عرض كامل الموضوع : المدارس الداخليه
السلام عليكم ورحمة الله وبركاته
مساكم الله بلللللخييررر جميعا
عندي مشكله pb131
وابى الحل:confused:
اخوي عمره 17 سنه وساقط باول ثانوي ثلاث سنوات و جو البيت والشارع وحياته بشكل عام غير مريح واحس انه لازم يغير البيئه اللي هو فيها وفكرت بحل لمشكلته ومالقيت الا اني اطلعه برى السعوديه يدرس في مدارس داخليه .
بحيث يهتمون في سكنه وملابسه واكله ومعيشته وحمايته وتعليمه يعني يكون كانه في بيت اهله
لكن ما حصلت مواقع بالنت تدلني على المدارس الداخليه والملحقيات السعوديه اتصلت عليهم يا ارقامهم مفصوله او محد يرد او ياخذها من قاصرها ويقولون ما فيه ويريحيون انفسهم وكنت ابحث عن مدرسه داخليه في الخليج او لبنان بحيث تكون قريبه وامنه ويتكلمون عربي حتى لا ينصدم ويكون الجو متغير عليه كثير ويكون قريب من امه وابوه وبصراحه الولد نفسيته تعبانه كثييييييير ويمكن يضيع مستقبله واخاف عليه من الانحراف .
وش تنصحون ووش الحل في مثل هذي المشكله واللي يقدر يفيدنا بمعلومات عن المدارس الداخليه وعناوينها يتفضل مشكور وله الاجر والدعاء .
بيني و بينك أحس لو تودونه مدرسة داخلية حيفلت أكثر و يخرب...
الله يهديه بس...
الاخت جهينه المشكله اصدقاء السؤ لازم يبعد عنهم وفي نظري لو جلس بالرياض مع اصحابه راح يضيع اكثر
مشكووره على المشاركه :)
.. ..
يسعد يومك تهقا bp039
الله يصلحه ويهديه ويبعد عنه رفاق السوءbp039
قبل كم شهر كنت ادور ع مدارس داخليه بس بالسعوديه من جد نحتاج لوجودها لأن جيلنا واللي بعدنا صعب جداً مراقبتهم ولا فرض نظام عليهم بالبيت
كنت اعرف قبل 20 سنه تقريبا كان فيه مثل هالمدارس بالمناطق العسكريه مدري ليه سكروها ؟؟
ان شاءالله راح ابحث لك بالأمارات وأرد لك خبر ان لقيت
.. ..
وعليكم السلام ورحمة الله وبركاته
أهلييين خيو تهقا
بغض النظر عن كون مؤهلك كان تعليم عالي ولا لا !
معقولة أخوك اللي أصغر منك في السن ما أنت قادر تتحكم فيه؟
ولا حتى قادر على توجيهه التوجية الصحيح !
معليش أخوي ، بس وين دورك في تربيته وتنشأته التنشأة المطلوبة ؟
جلست وسولفت معاه ؟
ولا بكرا تبوننا نطالب بعيال يجوننا شنبات مغلفين ومعلبين ونفتح شريط العلبة بيدينا ؟ بحيث يكونون متربين أحسن تربية !
لا بد للواحد يتعب عشان يربي نفسه ويثقفها على التربية الصحيحة والنشأة السوية
فما بالك وهذا أخوك المحتاج لرعايتك وتربيتك له ؟
شوف وأنا أخوك ، مراهقين الوقت هذا يا يجيك ماشي جنب الحيط بس يوم تناقشه ولا تبيه يدير أمور حياته ومعيشته ما يقدر لأنه ما أختلط بالناس والمجتمع ، ولا يجيك شارب الدشارة وبالعها بس مشاكله توجع الرأس;)
لا ترخي ولا تشد..: )
يعني بعض الهياتة ترى تنفع بس بحدود وبمراقبةpb027
قريت مدري سمعت واحد يقول وأعجبني كلامه
راقب ابنك ( أخاك ) بحيث لا يدري أنك تراقبه
ليش ؟
لأنه لو اكتشف أنك تراقبه بتجيه عقدة منكpb027
تبي الحل بنظري ولو أني مكانك وش بسوي؟
من جد بمسكه لحاله أنا وياه وبقوله هذا أنا عندك ومستعد للي تبيه
بس فضفض لي وقل اللي يدور في بالك
وش مضايقك؟ وش اللي مخليك ما تنجح في دراستك وأمور حياتك
حتى في البيت أحس أنك ما أنت مرتاح
وخله يتكلم ويقول كل اللي في باله ولا تقاطعه
إذا عرفت مشكلته صدقني بتلقى حل لها
وحاول أنك تعرف من يجالس ومنهم خوياه بس مو سؤال مباشر
بطريقتك وبالمراوغة تقدر تخليه يعترف لك من يماشي ومنهو اللي مأثر عليه يومك قلت [ اصدقاء السوء ] !
وحاول قبل تجلس معاه تكون متأكد أنك راح تتفهم وضعه وتحتويه وحاول أنك تكسر حاجز الرعب والخوف من بينك وبينه
ترى بعض الناس وده يفضفض ويتكلم عن اللي بصدره بس ما يلقى أحد يبوح له
أنت أفتح له المجال وخله يمسك الدرب
وأضرب لك مثال من هالناحية
مرة أخوي وأبوي مسكوني على جنب وكلموني في موضوع يحسونه مضايقني
ومن جد كنت متضايق منه وقد تلكموا معاي فيه بس ما توصلنا لنتيجة
وبعد فترة حسوا فيني وبضيقة الصدر داخلي
ومسكوني على جنب وخلوني اتكلم لهم حتى ما خليت شيء ما قلته
صحيح أني ما لقيت حل لمشكلتي
بس على الأقل هاللي بصدري طلع ولا كتمته
وأبوي وأخوي عرفوا وشهي مشكلتي ، بس ماهم عارفين كيف يحلونها
بس شيء حلو أنك تفضفض للي حولك وأقرب الناس لك
ويكون أفضل لو كان واحد فاهم بالأمور والمشاكل العائلية !
وصدقني فكرة أخذه برحلة أو سفرة مثل ما ذكرت
فكرة حلوة
بس بالأمانة ، منهو فيكم اللي أختار المكان اللي تسافرون له؟
أشك أنك خميته معاك وقلت أمش وحتى ما حسسته بأن هالسفرة له كامل الحرية باختيار وقتها ومكانها وفترتها !
حاول تشاركه الرأي في كل شيء
شف وأنا أخوك يمكن تتصاعب حتى فكرة الحديث معاه وبمعنى آخر [ البوح ] من قبل أخوك
بس أنت حاول تفتح المجال له وشوف وشهي النتيجة !
لاحظت شيء في كلامك واللي هو :
بحيث يهتمون في سكنه وملابسه واكله ومعيشته وحمايته وتعليمه يعني يكون كانه في بيت اهله
تعتقد أنك أضفت حل للمشكلة ؟
يكفيك الغربة أنه بيتغرب عن أهله وبتزيد مشاكله ويمكن يضيع أكثر ومثل ما فيه أصدقاء سوء في الرياض
بيلقى في المكان اللي يروح له ، بس الفرق والمصيبة أنه وهو متغرب ما بيلقى أحد يوجهه ولا يرشده مثل ما هو عندكم إلا أصدقاء السوء اللي ذكرتهم أنت في كلامك !
خلنا نمسك كلامك حبة حبة
الحين أنت تقول أنه لما يتغرب ويروح يدرس في مكان ثاني بيلقى أكله ومعيشته ومسكنه وحمايته كلها مثل ما هي كانت عندكم في بيتكم !
طيب وش اللي تغير بنظرك ؟
أنا عرفت من كلامك هذا أنه فيه مشكلة بينه وبين أحد من أفراد العائلة ( لا قدّر الله ) ولا وش اللي تغير بين المكانين سوى أنه بيواجه ناس غير الناس اللي كان يواجههم ؟
مع كامل أمنياتي لك ولأخيك بالتوفيق في الدارين
يسلموو اخوي ميلودي وانا اوافقك الراي ويدي بيدك لانها مشكله كبيره نعاني منها وفي انتظارك ولك مني خالص الدعاء .
اخوي الكريم غبن اشكرك بصراحه من كل قلبي لتفاعلك ورغبة في حل المشكله وتوضيح بعض الاشكاليات لكن ودي اقولك شي ان كل الكلام اللي قلته صار وسويته وانا ما اتخذت هذا القرار الا بعد ما نفذت مني كل الحيل والطرق وعلى موضوع اني اهتم فيه بقولك شي حنا ثلاث اخوان اولاد و انا اعمل خارج المملكه وعلشان كذا ما اقدر اتابعه او اراقبه واخوي الثاني يدرس في امريكا يعني ما فيه الا هو بالبيت مع ابويه وانت تعرف فارق السن بينهم وصعوبة التفاهم ولذلك في تصوري هذا هو الحل الامثل اكرر شكري لك :)
fahdaero
28-01-2006, 15:32
ترى المدارس الداخليه ما تنفع مع كل الطلبة........
بالتوفيق......
طيب أخوي تهقا انا عندي اقتراح أهون...
ليه ما يروح يدرس عندك أو عند أخوه بأمريكا بس بشرط يكون ساكن مع واحد فيكم...
إنه صدقني غربة مع مدرسة داخلية بحالته ما تنفع...
لأنه تخيل كم ولد نفس حالة اخوك و ألعن كمان أرسلوهم أهاليهم هناك و عاد تخيل كيف هالشباب يجتمعوا سوا؟
وش حيسووا بس؟؟؟
و بعدين اخوك حيحس بعقدة إنه أهلي ما يبوني خير شر و يبوا يتخلصوا مني و ما أعرف إيش...
ترا احياناً هالمشاكل و القصص اللي يسويها عبارة عن طلب للمساعدة أو وسيلة إنه يلفت نظر اهله له...
برأيي كذه يوم يشوف كيف إخوانه عايشين بالغربة مرة حيتأثر و حيهجد و يتغير للأحسن إن شا الله...
تحياتي...
السلام عليكم ورحمة الله وبركاته
أخ تهقا ؟
الله يعينكم عليه ويعينه على نفسه
كلام الأخ غبن رائع وأسلوب حضاري
لكن مايمنع من خروج الولد من الجو اللي كان فيه الى جو آخر يمكن تتحسن أوضاعه .
انا أعرف ناس ولدهم مدخلينه مدرسه داخليه في الأردن ممتازه والأردن قريبه مهيب بعيده .
وكل شيء يهون في مصلحة شبابنا .
وبسألك عن المدرسه وشو اسمها وعنوانها وارسله لك على الخاص إذا تحب .
السلام عليكم ورحمة الله
الاخت Juhaina
ا
شكرك ولكن انا موجود بدوله جدا خطيره ومتخلفه ما تصلح يجي عندي لدراسه ولا يوجد اصلا بها مدارس داخليه اما بالنسبه لاخوي الثاني بامريكا انتي تعرفين وش المشاكل اللي يعانون منها السعوديين بامريكا وممكن في اي لحظه يسجن او تصير له مشكله راح نتعب فيها كثير بما انه صغير ولا يقدر حجم المسؤليه فممكن يترتب عليها مشاكل اكبر وفي نفس الوقت ما عنده احد يهتم فيه اذا جلس بالرياض فذهابه لمدارس داخليه خارج السعوديه بالخليج او احدى الدول العربيه بنظري افضل حل لمشكلته وبشرط تكون المدرسه كويسه .
الاخ كولونيا
اشكرك وانا معك في ان كلام الاخ غبن جدا رائع وكلامك برضوه رائع وانا في انتظار عناوين وارقام هواتف المدارس الداخليه منكم لا عدمتكم .
االاخ fahdaero
شاكر لك مشاركتك وصدقت ما كل الطلبه تنفع لهم المدارس الداخليه ولكن المحاوله افضل من الجلوس بدون تصرف او وضع اليد على الخد والتوفيق بيد الله عز وجل.
أتعبني غروري
28-01-2006, 19:21
ياخوي أكبر غلط أنك تداوي غلط بغلط!
المدارس الداخلية مو كلها مضمونة .. موكلها تستند على دراسة الدين الأسلامي
أخوك ناقصة شوية تفهم .. لاتعالجون القضية بالتهرب منها .. أكبر هروب كان قدامكم من التخلص
من مشكلته أنكم ترسلونه يدرس برا!!
عمر الأمور ما أتخذت بهذا المنطق.. اذا على قولتك ماتبي ربعه يحتك معخم مره ثانية
ومجتمعه مو كويس .. ووضعه مو عاجبك تعاله بالرفق وبأحساس التقرب والصداقة فهمه الغلط
مره ومرتين وثلاث لاتيسأس أبداً .. اذا مافاد معه هذاك الوقت لاترسلونه برا
أنقلوه لأحد قريب لك بأحد مناطق السعودية .. جدة \الدمام\المدينة ...الخ
ترا ياخوي وحدة من صديقاتي للحين تعاني من تأثير سلبي لمدرسة داخليه دخلوها اهلها فيها
بلندن!!
تدري أنها لولا الله ورحمته كان الحين البنت مدمنة!!!:(
هذي وهي بنت حط في بالك .. أجل العيال وش بيكون مصيرهمpb071
ريح بالك .. وفكر بعقلانية أكثر .. وربي بيهدديكم للطريق الصواب
أحتراميbp039
الاخت اتعبني غروري
اشكرك على النصيحه وجزاك الله خير لكن فيه ناس كثير ودوا اولادهم لمدارس داخليه واستفادوا كثير وتعدل وضع ابنائهم ومتابعت الولد بالنسبه لنا صعبه جدا وفي الحقيقه ما عنده احد يعتني فيه او يوجهه فذهابه لمدرسه داخليه يعتبر شي احسن من لاشي اشكرك
خيط الحرير
28-01-2006, 20:16
مرحبا
في مدرسة دولية اخوي اسمها الشويفات في الشارقة ولبنان وسوريا
وتايع لها مدراس صيفية يمكن يكون عندهم قسم داخلي انت ابحث تحت مسمى مدراس الشويفات ويمكن تلاقي
او اتصل عليهم في لبنان وهم يدلونك والله يوفقكم وانا شخصيا مع هالفكرة وماني ضدها مادام فيه متابعه واختيار مستوى عالي من المدارس
يسلمووووو خيط الحرير
اشكرك على المعلومه وفعلا راسلت المدرسه وانشالله خير ولكني اطمع بالمزيد منكم
أبودحيم؟
28-01-2006, 22:05
مهوب شرط مدرسه داخليه والله في مدراس داخليه كل الي فيها دشييييييييير بمعنى الكلمه والله المدرسين بعضهم يقولون لنا من زمان انتم ليش كذا اغبياء احد يجلس في ذي المدرسه والله حرام الفلوس الي تدفعونها
اخوي ابو دحيم لك الشكر
ممكن اعرف اسم المدرسه اللي كنت فيها علشان انتبه لها ؟
ومشكور على المشاركه
Montreux
28-01-2006, 22:45
انا دارس في مدرسة داخلية والحمدالله ماضرني
ولا ضر ديني ولاشي
تبي نصيحتي ارسله سويسرا في مدارس داخلية هناك راح تطوره وتفيده من ناحية عملية ومهنية وارسل له عاد كتب دين يتثقف :d
والعب عليك لو اقول لك مافيها صياعة بس الصياعة موجودة بكل مكان سواء هنا ولا هناك اللي براسه حب طاحنه طاحنه
يسلموووووو اخوي Montreux
مشكوووور على النصيحه
طرف زوليه
29-01-2006, 02:25
الله يصلح حال اخوك....وشباب وصبايا المسلمين....
unpredictable
29-01-2006, 14:46
ما أنصحك تدخله مدرسة داخلية في دولة عربية.. لأن صدقني بيخرب أكثر
أقدر أنصحك بكثير مدارس في أمريكا .. ما أقولك هناك أخلاقهم أحسن.. بس على الأقل أضمن لك مستواه الدراسي
و في حل .. جربه لو ما جربته .. إلي هو فاميلي ثيرابي .. يعني تروحون عند أخصائي اجتماعي كويس
صدقني راح تثمر التجربة
الاخت unpredictable
اقدم لك شكري واوضحت وجهى نظري بموضوع ارساله لامريكا وكذلك سبق وعرضته على اخصائي نفسي واجتماعي ولكن ما فيه فايده والان انا محتاج عناوين مدارس خاصه داخليه عربيه لاني ما حصلت الى الان الا مدرسه وحده بس فارجوا من الاخوان مساعدتي من هذي الناحيه ولهم مني خالص الدعاء.
ضحية صمت
30-01-2006, 01:15
فيه مدارس في الباكستان تطلع رجال
وفيه بالسودان بعد
شد حيلك
vBulletin v3.7.1, Copyright ©2000-2009, Jelsoft Enterprises Ltd.