السعوديه Vs توغو (مباراة وديه دوليه)

[..:: الاستديو التحليلي ::..]

بسم الله الرحمن الرحيم :)

اعداد وتقديم :
2t

المناسبه :
لـقـاء ضمن إسـتـعداد المنتخبان لكأس العالم

المنتـــ http://us.i1.yimg.com/us.yimg.com/i/fifa/06/flag/lg2/KSA.gif ـخب الـسـعودي VS المنتــــــ http://us.i1.yimg.com/us.yimg.com/i/fifa/06/flag/lg2/tog.gif ــــخب التوجــي


يوم وَ تـوقـيـت اللقاء :
الأحد 14\05\2006
الساعه الخامسه بتوقيت مكـه المكرمه
الثانيه بتوقيت غرينتش
" يبدأ التحليل قبل المباراة بـ ساعة "

مـكـان اللقاء :
المباراة تقام على ملعب مدينة سيترد في هولندا مقر معسكر المنتخب السعودي حاليا

القناة الناقله :mad: :
pb131
ART SPORT 1


نبذهـ سريعه عن الفريقين :
المنتخب السعودي
http://us.news1.yimg.com/us.yimg.com/i/fifa/gen/afp/20060512/i/1488526141.jpg

تأهل المنتخب السعودي للمرهـ الرابعه على التوالي لنهائيات كأس العالم
وكان أفضلها عام 1994 في مونديال امريكا
وأسوأها عام 2002 في مونديال كوريا واليابان :(

وضعت القرعه المنتخب السعودي في المجموعه (H)
مع كل من :
http://us.i1.yimg.com/us.yimg.com/i/fifa/06/flag/sm2/ESP.gif Spain (http://fifaworldcup.yahoo.com/06/en/w/team/overview.html?team=ESP)
http://us.i1.yimg.com/us.yimg.com/i/fifa/06/flag/sm2/UKR.gif Ukraine (http://fifaworldcup.yahoo.com/06/en/w/team/overview.html?team=UKR)
http://us.i1.yimg.com/us.yimg.com/i/fifa/06/flag/sm2/TUN.gif Tunisia (http://fifaworldcup.yahoo.com/06/en/w/team/overview.html?team=TUN)

يدرب المنتخب السعودي المدرب البرازيلي (باكيتا)
،،،،،،
المنتخب التوغي

http://us.news1.yimg.com/us.yimg.com/i/fifa/gen/fi/20060213/i/3189239096.jpg
تأهل المنتخب التوغي للمرهـ الاولى في تاريخه لكأس العالم
ويسعى ليكون الحصان الأسود للبطوله
كما فعل السنغاليون في المونديال السابق

وضعت القرعه المنتخب التوغي في المجموعه (G)
مع كل من :
http://us.i1.yimg.com/us.yimg.com/i/fifa/06/flag/sm2/FRA.gif France (http://fifaworldcup.yahoo.com/06/en/w/team/overview.html?team=FRA)
http://us.i1.yimg.com/us.yimg.com/i/fifa/06/flag/sm2/SUI.gif Switzerland (http://fifaworldcup.yahoo.com/06/en/w/team/overview.html?team=SUI)
http://us.i1.yimg.com/us.yimg.com/i/fifa/06/flag/sm2/KOR.gif Korea Republic (http://fifaworldcup.yahoo.com/06/en/w/team/overview.html?team=KOR)

يدرب المنتخب التوغي المدرب النيجيري (ستيفان كيتشي)
وفي روايه ثانيه يدربهم المدرب الألماني ( بفستر اوتو)

كل الدعوات للمنتخب السعودي بالتوفيق وان يستفيد من التجربه
،،،،،،،،،،،،،،
سوري على التأخير بالتقديمpb094

[جريح الرياض]

الله من الدجة ..!!

نبي نشوف وش بيسوون في هالمباراة ... اما لو يخسرون قضينا بس

[2t]

طططططططططططيط pb192
اول تعديل
القناة الناقله تراها
sport4 ماهي sport1
خبـركم فيه ناس الله يستر عليهم مضيعين
حتى لاصار المعلق انقليزي ماعرفوا يغيرونه ;) :D

[Dr.Nawwaf]

أديبايــور بيلعب ؟؟ ( صورة قلب كبير )

عشان نشوفها ..

[مطـر صيـف]

^
^
^

ما أتوقع .. لأن عنده مباراة نهائي دوري الأبطال ..

بكره بروفه لمباراة تـــونس .. مع أن منتخبنا فاشل ولا عندهم تكتيك معين

بس أوقع أنهم بيلعبون مباراة حلوه .. و أتمنى أن تعطى الفرصه لمالك معاذ .. لأنه الأنسب لكأس العالم .. :rolleyes:

[المستهام]

توتي الله يعافيك تأكد لي من توقيت المباراة كأني سمعت انها الساعه السابعه بتوقيتنا الرابعه بتوقيت غرينتش !!

[بدر]

كل التوفيق لـ الأخضر
وأن شاء الله نشوف مباراه مختلفه عن مباراتنا ضد بلجيكا ..





توتي bp039
ليه ماحطيت التشكيله المتوقعه ..؟







لاهنت عـ التقديم
والحمد لله عـ سلامتك وطالع من الشر أن شاء الله ..
قايلك خل التتن عنك ماتسمع الحتسيpb192

[جريح الرياض]

طططططططططططيط pb192
اول تعديل
القناة الناقله تراها
sport4 ماهي sport1
خبـركم فيه ناس الله يستر عليهم مضيعين
حتى لاصار المعلق انقليزي ماعرفوا يغيرونه ;) :D



خخخخخخخخخخخخخخخخخخخخخخخخخخخخ

الله يرجه امل زلابة <<< فضيحة :D

[2t]

^
^
^
خخخخخخخخخخخخخـ
انت قربه مشقوقه ماتقدر تمسك لسانك pb192
طيب علشان مايقولون ردي شات
التشكيله المتوقعه

الدعيع
الخثران المنتشري تكر الدوخي
عزيز كريري
التمياط نور
الحارثي القحطاني

المستهام
ياخالي يقولون انها اربع بتوقيتنا واول مرهـ اسمع انها سبع pb036

[فان باستن]

المشكلة ميلان و روما بنفس الموعد ..

للأسف ما تابعت مباريات المنتخب الودية .. ودي أضحك عليهم شوي : d

عوافي توتي عقبال ما نصككم بكرا pb067

[2t]

^
^
ايه هييين ;)
اشوى ان توتي يبي يعلق زلابتكم ديدا بالعارضه
ياناس التوقيت توني الاحظ انه بهالوقت
احد يلعب الساعه 4 العصر pb131
المهم اخر اضافه
المنتخبين ماعمرهم تقابلو ولامره بتاريخهم
وان فزنا عليهم بكره ان شاء الله
يبي يجي عام 2018
ونبي نقابلهم ويقولون سنسنعى لرد الثأر:cool:
زي ماقالوا البلجيكين

ياليت اللي عنده علم عن مدربهم يعلمنا :)

[snatch]

الله من الدجة ..!!

نبي نشوف وش بيسوون في هالمباراة ... اما لو يخسرون قضينا بس

يا إبن الحـلال معـليش يخـسرون بس على الأقـل يـقدمون مســتوى !! ,,

يحــسسونـا أنهــم يبــون يســوون شئ بـعد شــهر :) ,,

ـــــ

موقع كورة يـقول أن المباراة السـاعة 4 بـ توقـيت الســـعوديــة ,,

ــــ

ودي أن بـاكيــتا يــعطي " ســامي " فرصــة عشـان يـثبت لـه أنه جاهـز لياقيـا :) ,,

ــ

[هاوي..هوى]

المباراة الساعه خمس

المصدر : عاقل قاريها في القناة الرياضيه :d ,,

[بتي فور]

بالتوفيق لمنتخب توغو:d
باكيتا ورى ماتجرب 4/5/1
خلك رجال وماعليك من ابو مخطط مدروسه

[phénomène]

كل اللي ابيه من منتخبنا العزيز انه ينظم الوسط .. ويصير يعرف ينظم له هجمه زي العالم والنااااااس ..

ولا هجمه بتكتييييييييييك .. قسم بالله كلها اجتهادات فرديييييييه .. مثل انفرادات ياسر القحطاني ومحمد امين مع بلجيكا

لازم ثلاث لمسات ولا اربع من الوسط .. وانقلها للمهاجم .. ولا على الاطراف :(

وتكر ذا يشوتونه ولا يلعبونه .. نكبه من جدددددددددددددددددد

بالتوفيق لمنتخبنا pb189

[المــهــنــد]

لازم يــوواصــل علــى نفــس الخـــطة ولازم يطـبب ســاامي عشــاان نشــوف إمكــانيــاتـه

والخــطة رايــقة ... بــس لازم فـي الشـوط الثـاني يلـعب بمحـور واحــد ويطـلع المحـور الثـااني ويطـبب بـدالـه الشلهـوب

عشــاان لاصـار فـي الـوسط (( نـور و الشلهـوب والتميــااط) بيـصيـر الـوسـط حريــقة !! .. ويطـلع الحــارثي ويطبب

سـاامي .. لان ذي أقــوى خطــة راح يلــعب فيـها المنتـخب في الكــأس ....


بــس مهــوب يطببــلي الغـامدي ويطـلع التميـااط :( ولا يطـبب العنبـر وأميـن ويطـلع القحـطاني والحـارثـي !!!



بالتــوفيق للكـــل ... وعــووافي تــوتـي .. : ) ..

[أرقيلة]

http://alhilalclub.net/ngl10/tadeeen2.jpg

كلّـف الجهاز الإداري بالمنتخب السعودي اللاعب الكبير وصخرة مركز المحور واللاعب البثر خالد عزيز لمراقبة اللاعب الاوكراني شيفتشينكو في المباراة المرتقبة في كأس العالم ، وعلى ذلك تم تسليم اللاعب الفذ خالد عزيز العديد من الأشرطة لمشاهدة اللاعب شيفتشينكو ومعرفة طريقة لعبه حتى يتمكن منه نهائياً ويقوم بإنهاء خطورته كما فعل سابقاً بمحمد نور pb192

كني به في كاس العالم شيفا بيسحب في المنتخب كله من المهاجمين الين الحارس ويشبكها الهدف السادس لاوكرانيا وبعدين بيجيب المخرج الصورة على عزيز بحكم انه المكلّف بمراقبته وبنلاحظ انه جالس ينظف أسنانه الخضرا من الثيل :D

لاعاد الجد
مدري ليه أتوقع خالد عزيز بيكون أفضل لاعب في المنتخب خلال البطولة ولا يهون محمد نور (إذا كان بمستواه) والمنتشري طبعاً وياسر ( إذا لعب لمصلحة المنتخب مهوب لمصلحة نفسه :rolleyes: )
وعلى طاري المنتشري فتحت لي موقع قبل كم يوم يتكلم عن المنتخبات اللي بتشارك في كاس العالم وحاطين عن كل منتخب كل استعداداته واللاعبين اللي يستححقون المشاهدة فيه
لقيتهم حاطين المنتشري pb189 من منتخبنا هو اللي يستحق المتابعة pb189

[سيبونن]

توتي يعطيك العافيه

ودك باكيتا يلعب نور ونواف وشلهوب اول شي

وراهم على طول الحقنه ابوعزيز

والهجوم ياسر وسعد ولا مالك مع اني افضل معاذ اول من يلعب

نتمنى نشوف مستوى ولو ينهزمون بس اهم شي يقدمون مستوى

[2t]

ياشباب pb036
تعديل pb094
ترى المباراة تبدى الساعه 5 العصر
والاستديو التحليلي يبدا 4
يبي يعلق عليها عبدالله الحربي
ويبي يصير استديو تحليل
يعدهـ ويقدمه وليد الفراج
ويبي يكون معاه ماجد عبدالله و مدني رحيمي

برايفت المشرفين :
ليت واحد منكم يتبرع ويضيف قوس لنهاية عنوان الموضوع :D

بالتوفيق للأخضر

عبدالغفور نحتري تحليلك لحبابيك :D

[Dr.Nawwaf]

ما أتوقع .. لأن عنده مباراة نهائي دوري الأبطال ..

أي نهائي أبطال أصلا هو ما يشارك مع القنرز ..

لأنه سبق ولعب مع موناكو بنفس البطولة ..

[Dr.Nawwaf]

________togo________
____________________

معلومات عن منتخب توغو

http://www.goal.com/images/535_news.jpg

تأسس الإتحاد التوغولي سنة 1960 ..

وأنضم إلى الفيفــا سنة 1962 .. وهذي أول مرهـ يتأهل لكأس العالم

في تاريخــه الكروي .. مع العلم أن هذا هو إنجازهم الوحيد ولا يوجد

لهم أي لقب مسجل ..

________togo________
____________________

أهــم اللاعبين ( مفاتيح اللعب )

http://www.togocity.com/IMG/sheyi.jpg

إيمانويل أديبايور

سجل 12 هدف في التصفيات كانت من الأسباب في تأهل

توغو التاريخي لنهائيات كأس العالم .. أنتقل من نادي موناكو

الفرنسي إلى نادي الأرسنال الإنجليزي .. ويمتلك قامة طويلة

وتحركات خطيرة وهو هداف الفريق ..

,
,

http://www.ftf-enligne.tg/imarticle/agassa.jpg

كوسي أجاسا

حارس الفريق ويعتبر سبب كبير من أسباب

تأهل المنتخب التوغولي للنهائيات .. سلعب في نادي ميتز الفرنسي

ويلقب من قبل الجمهور ( الأيدي السحرية ) ..

,
,

http://www.d.lycos.de/startseite/sport/content/dpa_files/pic/jpeg-1wfp4553-20051207-img_10453702.onlineBild.jpg

جين باول أبالو

كابتن المنتخب ويبلغ من العمر 30 سنة

يعتبر مدافع ممتاز ويلعب في الدوري الفرنسي ..

وتعقد عليه الأمال في قيادة المنتخب لتحقيق نتائج

إيجابية في كأس العالم ..


________togo________
____________________

المدرب والتشكيلة المتوقعة

http://www3.estart.com/stores/media/zamalekmanager.jpg

الألماني أوتو فيستر

,
,

التشكيلة المتوقعة

كوسي أجاسا

ايريك اكوتو .. جين باول ابالو .. مهما أودي .. ايمانويل ماثياس

جونيور سينايا .. ياو ازياونو .. شريف توري .. اليكسيس رامو .. محمد قادر كوبادجا

ايمانويل اديبايور

[OMO]

الخوفة انهم يطقمون كلهم أخضر عاد يالله دور ربعنا خخخخخخخخخخ

[الافــــلاجــــي]

يازين الوقت اجل 4 العصر ما يبغوننا ننام :cool: ..

يالله الله يوفق الاخضر الموت ما ارقد وننهزم بنتيجه كبيره :) ..

[ريفالينهووو]

^
^
^
المشكله اغلبهم نفس اللونpb192

بالتوفيق للمنتخب :(

[مـشـكـلـجـي]

,,,


ما أتوقع .. لأن عنده مباراة نهائي دوري الأبطال ..


ما راح يلعب النهائي .. اديبايور ما يشارك الارسنال اوروبيا حسب نظام اليوفا ..
اللي يمنع ان لاعب سبق ولعب مع نادي في البطولة .. يلعب مع نادي ثاني في نفس البطولة نفس الموسم ..
: ) ..


,,


بـ التوفيق لـ الاخضر .. باكيتا اتوقع بـ يلعب هـ المباراة بـ مهاجمين ..
على اساس انها تحضير لـ مباراة تونس .. " المباراة الوحيده اللي اتمنى يلعبها بـ مهاجمين " ..
باقي المباريات امنيتي نشوف 4\5\1 .. اضمن .. واريح لـ البال .. حتى بتكتك متعود عليها اكثر .. " دلع باكيتا " .. : ) ..

تحيتي ..


,,,

[KANU]

ركـّزوا .. عـلى إلتحـاامااتهـم .. وبس ..!!؟

وقـسـم يا .. مونتشري .. إن يسطّحـونه .. خخخخخخخخخخـ ..

[ابو سميث]

اتمنى المنتخب يلبس طقم فسفوري عشان نميز :d

ودي مالك معاذ يخش اساسي..لاعب انظلم كثير

[شنطه]

ودي المدرب يجــرب يلعــب الحارثــي و اميــن نبــي نشــوف وش بيســوون مــع بعــض كان الوضــع نفــس ما هــو يســوي اللــي يبـي ..

انــا اهــم شــي عنــدي يأســر وسعــد لا يلعبــون مع بعــض .. مافــي توافــق ..

يعنــي يلعــب سعـد مع اميــن .. سعــد مع سامـي .. سعــد مع مالك .. سعــد مــع العنبــر .. افضــل بكثيـــر .. و العكــس مــع ياســر ..



الله يوفقهــم .. وعســى يقدمــون مستــوى حلــو << ما قلـت نتيجــه :(



يعطيــك العافيـــه توتي

[10 على 10]

الاهم ان المدرب يستبدل ( الدوخي ) في هذه المباراة ويضع بديل عنه ( البحري ) ,كما ان ( الخثران ) يجب ان يستعيد مستواه السابق هو و ( الدعيع ) .

في اعتقادي (محمد نور) في الاتحاد غير محمد نور في المنتخب هناك فرق شاسع هل يعتبر اللاعب لاعب نادي فقط .

من وجهه نظري :

عزيز مع الغامدي والتمياط والشلهوب في ( الوسط ) .
الخثران ومنتشري وتكر والبحري في ( الدفاع ).

ياسر والحارثي في ( الهجوم ) .

الدعيع او زايد ( في الحراسه ) .

وبالتوفيق ان شاء الله .

[بن خوري]

اعلن صاحب السمو الملكي الأمير سلطان بن فهد في اتصال هاتفي بقناة ART عن تغييرات في تشكيلة المنتخب ضد منتخب توجو اليوم .... والتشكيلة على النحو التالي ::

مبروك زايد

رضا تكر

حمد المنتشري

عبدالعزيز الخثران

محمد مسعد

عمر الغامدي

خالد عزيز

نواف التمياط

محمد نور

ياسر القحطاني

مالك معاذ


وصلت التشكيله :d

[شنطه]

مبروك زايد *

رضا تكر

حمد المنتشري

عبدالعزيز الخثران

محمد مسعد *

عمر الغامدي

خالد عزيز

نواف التمياط

محمد نور

ياسر القحطاني

مالك معاذ *

* اللــي مــا شاركــوا فــي المبــاراة السابقــه اساسيــن ..

بنسبــه للهجـــوم ياســر و مــالك .. حلــو فـي امــل نشــوف هــدف :D ..

[A Living Legend]

وفي روايه ثانيه يدربهم المدرب الألماني ( بفستر اوتو)


مهب هذا الي استلم منتخبنا بعد فينجادا في 96 مدري 97 ؟؟؟؟؟؟؟؟؟

[A Living Legend]

اعلن صاحب السمو الملكي الأمير سلطان بن فهد في اتصال هاتفي بقناة Art عن تغييرات في تشكيلة المنتخب ضد منتخب توجو اليوم .... والتشكيلة على النحو التالي ::

مبروك زايد

رضا تكر

حمد المنتشري

عبدالعزيز الخثران

محمد مسعد

عمر الغامدي

خالد عزيز

نواف التمياط

محمد نور

ياسر القحطاني

مالك معاذ


ألا ورا ما يطق ترنق أخضر ويدرب المنتخب احسن .. وشوله خساير مدربين ؟

[cavallo nero]

8
8
8
اية ....


اتمنى نشوف مباراة حلوة :)

الى شباب خابر المدرب الي يعلن التشكيلة ... بس ابو خطط مدروسة خربها ها المرة وهو الي اعلنها عيني عينك :(

اعلن صاحب السمو الملكي الأمير سلطان بن فهد في اتصال هاتفي بقناة ART عن تغييرات في تشكيلة المنتخب ضد منتخب توجو اليوم .... والتشكيلة على النحو التالي ::

مبروك زايد

رضا تكر

حمد المنتشري

عبدالعزيز الخثران

محمد مسعد

عمر الغامدي

خالد عزيز

نواف التمياط

محمد نور

ياسر القحطاني

مالك معاذ

[احم .. احم]

الغااامدي اساسي من البدايه اظن كريري احسن :(
بالتوفيق لتوغو :d

[صريع الرز]

دخل الفريقان أرض الملعب الآن يعزف السلام الوطني المباراة بتعليق عبدالله الحربي
منتخبنالابس اللون الأبيض
وتوجو لابس اللون الأصفر
<== يسمع بالتفصيل الممل

[2t]

غلط التشكيله pb095
الدوخي اساسي ;)
التمياط كابتن المنتخب :)

[صريع الرز]

نواف (كابتن)
مبروك ز ايد حارس
رضا تكر
المنتشري
عمر الغامدي
الخثران
ياسر
نور
الدوخي

ماامداني اشوف الباقي

وفيه واحد من الجمهور يشبه مشعل (يعني حلو)

[صريع الرز]

سنترت توجو

[صريع الرز]

مالك معاذيلعب
كورنر لمنتخبنا كالعاددةحوسة في التنفيذ
هجمة شبه مرتدة لتوجو جاء منها فاول لهم في نصف الملعب تحولت كورنر

[تـــالف]

اعلن صاحب السمو الملكي الأمير سلطان بن فهد في اتصال هاتفي بقناة Art عن تغييرات في تشكيلة المنتخب ضد منتخب توجو اليوم .... والتشكيلة على النحو التالي

خخخخخخخخخخخخخخخخخخ
بالله يا سمو الأمير ,, ناوي تلعب بخطة الضغط على الخصم ولا الأعتماد على الكرات المرتده


مهزلــــــه يا أبو خطط مدروسه

[صريع الرز]

خالد عزيز هي اللاعب الباقي صاروا 11 <== كملت التشكيلة

لاتشرهون ترى مااميز اللاعبين

كلهم شبة بعض الخبط بين ياسر القحطاني ومالك معاذ شبه بعض :d

[صريع الرز]

طبعا المباراة إلى هالحين حوسة بعد سبع دقايق من المباراة مابعد اتضحت لها ملامح معينة

[صريع الرز]

أكمل أو ماتبون اروح اشوف لي حل؟

[موووديل مغبر]

مساء الخير ياجمااااعه الخير...


هاااااه بشرو..جاء هدف..

<< < متفائل

[موووديل مغبر]

صريع ..كمل كمل كمل..

<< متحمس معك خخخخ

[جريح الرياض]

المباراة مملة الى الحين :(


الدقيقة 15

[برشلونه]

توقيت المباره فاشل اجل ملعبينهم العصر اصبرو شوي وبيطفون اللاعبين

[موووديل مغبر]

المشكله ان خسر المنتخب من توغو ..وش عذر ابو خطط مدروسه...!


هو بس لو يترك باكيتا ياخذ راحته كان تأهلنا الى الست طعش بالراحه...!

اجل الخطه اربعه اربعه اثنين...من متى باكيتا يلعب بهاطريقه

[صريع الرز]

انفراد لنواف حطها في رجل الحارس من زمان ترى هالانفراد بس اتصالي علق وش اسوي

ومباراة مملة مثل ماقال جريح الرياض

جريح وشلونك حبيبي

[صريع الرز]

الظاهر منتخبنا يدورون الظل يلعبون جهة الظل

وتوجو متراجعين دفاع ومنتخبنا مايهاجم يلعبون في نصف ملعبنا

يعني صايرين نتفرج على ماادري وشو

[صريع الرز]

هجمة لتوجو بغت تجي هدف فينا لو ماحاسها لاعب توجو
عليهم سرعة نوعا ما في الهجمة المرتدة

[صريع الرز]

25 دقيقة صفر صفر وشمس وحالة وزهق باقعد اتقهوى اصرف لي

[جريح الرياض]

جريح وشلونك حبيبي

تمااااااااام يابعدي

[صريع الرز]

تهديفة تجاه المرمى السعودي ضربة مرمى
ملاحظ أن لاعبي المنتخب السعودي مايخشون على الكرة اذا كانت مع لاعب توجو او انا غلطان؟

[احم .. احم]

ميلان وروما
للحين 1-1 مباراة حلوه << مضيع العالميه

اقول شباب خلوك مع روما وميلان اصرف لكم بالله هذا منتخب :(

[صريع الرز]

من جد ياشباب مافيه اي شيء يذكر حدث ممكن ينقل لكم هنا مباراة مافيها أي شيء

تو جات هجمة ضايعة لتوجو فوق العارضة <== حتى الان هذا الشيء اللي ممكن انه يذكر

[صريع الرز]

على الاقل لو كرت اصفر اي شيء بس يغير ملل هالمباراة

[صريع الرز]

36 دقيقة تهديفة على المرمى السعودي ضايعة

[Abu_Yagoub]

عك كروي وبكل بسااطة ..

صور من المباراة والفرصة السعودية الوحيدة !!

http://www.eqla3.com/vb/attachment.php?attachmentid=155321&d=1147616976

http://www.eqla3.com/vb/attachment.php?attachmentid=155322&d=1147616976

http://www.eqla3.com/vb/attachment.php?attachmentid=155323&d=1147616976

http://www.eqla3.com/vb/attachment.php?attachmentid=155324&d=1147616976

http://www.eqla3.com/vb/attachment.php?attachmentid=155325&d=1147616976

http://www.eqla3.com/vb/attachment.php?attachmentid=155326&d=1147617138

http://www.eqla3.com/vb/attachment.php?attachmentid=155327&d=1147617138

http://www.eqla3.com/vb/attachment.php?attachmentid=155328&d=1147617138

http://www.eqla3.com/vb/attachment.php?attachmentid=155329&d=1147617138

http://www.eqla3.com/vb/attachment.php?attachmentid=155330&d=1147617138

http://www.eqla3.com/vb/attachment.php?attachmentid=155331&d=1147617320

http://www.eqla3.com/vb/attachment.php?attachmentid=155332&d=1147617320

http://www.eqla3.com/vb/attachment.php?attachmentid=155333&d=1147617320

[موووديل مغبر]

يعطيك العافيه صررريع

وشكل الشباب مصممين على درزن اهداف مع اسبانيا..عااد الدرزن منهو له ..مدري ..بس الاكيد ان ابو تكر بيجلس يعد الاهداف..!

انا شكلي بروح اشوف المؤشر اصررررف من منتخب خطط مدروسه

[صريع الرز]

يعافيك حبيبي
بس من جد مباراة مملة قرب الشوط الاول ينتهي ولا فيه اي شيء ممكن انه يذكر او ينقال ابدا ابدا ابدا

[صريع الرز]

ترى انتهى الشوط الاول <== هذا اهم حدث صار الى هالحين

[صريع الرز]

دعاية عصير الربيع <== ياشين اللي يتميصل ولا يدري وشلون

[Louis]

8
8
8

هههههههههههههه

[مضيع بيتهم]

الحين مهب قالوا ان المباريات كلها منقوله على السعوديه الارضيه ؟؟

ولا بس المباريات الرسميه ؟

[صريع الرز]

دخل اللاعبون ارض الملعب في انتظار الشوط الثاني ياخوفي قضى بنزين ربعنا من الشوط الاول لان توجو ماسوت ولا شيء

[صريع الرز]

سنتروا ربعنا

[صريع الرز]

مضيع هذا بس لمبارايات كأس العالم

هجمة شبه حلوة لمالك معاذ <= وشلون شبه ماادري بس لان فيها دبل كيك :d

[صريع الرز]

فيه كم لاعب طايح محرولين يعالجونهم قاموا كلهم بخير

[مضيع بيتهم]

المباريات الوديه ماودي يفوزون السعوديه فيها ابد عشان مايحسون انهم احسن ناس في العالم هذا طبع لاعبينا اذا فازوا على منتخب مشارك في كاس العالم قالوا خلاص فزنا على ذا الفريق ماعندنا مشكله مع كل الفرق وبناخذ الكاس ..

[مضيع بيتهم]

في الدقيقه 25 بيجي هدف <------ شايف المباراة

[مضيع بيتهم]

هاه ماجا قول ؟ وكم الدقيقه الحين وماتغيرت التشكيله !!

[صريع الرز]

هجمة لتوجو كادت ان تخش هدفا <== يسمع بالتعليق
والان ضربة ركنية وبرضه ضاعت
وايضا هجمة للمنتخب كادت ان تخش هدفا
وتغيير لتوجو
8
8
8
كل هذه زحمة في دقيقة واحدة شكل ماصورة المباراة انفكت مرة واحدة

[مضيع بيتهم]

المتواجدون حالياً
‏مضيع بيتهم, ‏A Living Legend, ‏أبـوٍيـعـقـوٍب, ‏بسجل غصب, ‏شايف وساكت, ‏snatch, ‏عميد السيارات, ‏قلم زايد

راح معلقنا صريع الرز :(

[cavallo nero]

الدقيقة 59

بغى يجي قول لتوجو ...

وهجمة يقالها حماسية للسعودية ...



وتبديل لتوجو


مباراة مملة :( تفكك ولا في اي تكيتيك في المنتخب العزيز

[مضيع بيتهم]

اثرك مخفي يامعلقنا ...

[صريع الرز]

طلع الغامدي خش كريري من بداية الشوط الثاني بس مثلك خابر لاعبيتنا شبه بعض والمعلق ماتعتمد عليه

[مضيع بيتهم]

صريع عادي متى ماتورطت قل طلع اللاعب رقم 16 وطب رقم 4 وشكله يشبه لاعب من لاعبين المنتخب

[صريع الرز]

شوي تحركوا اللاعبين بس بدون مردود واضح
مجرد هجولة

[Flexible]

اخي احسب المباراه الساعه 9


يلعن ابو القهررر

راحت علي

[مضيع بيتهم]

كم الدقيقه الحين

[cavallo nero]

الشلهوب بدال التمياط

[لجنة التغطيات]

:)

[BIG MAC]

والله يا علينا منتخب يسد النفس

[صريع الرز]

تحركت المباراة شوي نوعا ما احسن من بدايتها

[صريع الرز]

سقها لاتحسف مافي المباراة شيء يستاهل

[Flexible]

منهو الكابتن الحين اذا طلع نوواف؟

[عاصفه]

..







كم الدقيقه الحين ؟؟





.

[صريع الرز]

سامي خش بدال ياسر

[قــــــرنـــاس]

الحمد لله إن بطاقة الآي آر تي اختربت pb192


وبالتوفيق للأخضــر :)

[مضيع بيتهم]

شكرا على حسن تعاونكم .. ياشباب بس ممكن تعلموني كم الدقيقه لاني ثالث مره اسال وانتم ساحبين علي :)

[صريع الرز]

الدقيقة 72

[Flexible]

سامي خش بدال ياسر

ليتك ماقلت هالجمله ودي اشوف سامي pb189


ان شاءالله بيصقعهم بقوول الحين:)

[صريع الرز]

هجمة حلوة بين سامي والشلهوب تطلع ضربة مرمى

[الوافي من اجلك]

فرحووووونا ولو بكلمة مدح

قولوا مرروا كورة حلوة

قولوا رموا الاوت صح

قولوا خلصوا الكورة صح

اهم شي عطونا مدح


عطونا امل اننا نتعادل في كاس العالم
مع اي منتخب ولو واحد بالمليووووووون

وعااااادي ننهزم مع البااااااقين




.

[صريع الرز]

هددددددددددددددددددددددددددددددددددددددددددددددددد دددددف سعووووووووووووووووووووووووووودي
تصليحة من سامي سجلها مالك معاذ

[cavallo nero]

قوووول

لمالك معاذ

تمريرة حلوة من سامي الدقيقة 86

[صريع الرز]

وافي مافيه شيء من اللي قلت للاسف

محمد نور يطلع يخش بداله محمد امين

[ابو سميث]

مادري ليش حاس ان التعادل جاي

[صريع الرز]

توجو معهم لاعب حمر عطر شكله طرش بحر :d

البحري دخل بدال الدوخي

[Flexible]

بالله قول جد والا تمزح!


وتمريره من سمسم؟؟


مبرووووووووووووووووووووووووووووووووووووووووووووووو وووووووووووووووووووووووووووووووووك <<لاتلومني ياخي نبي فوز واحد يخلي مجموعتنا يحسبون لنا حساب اقل شي

[phénomène]

الهدف تسلل .. عشان سامي هو اللي مصلحه :d

==============

قسم بالله منتخب داااااااااااااااااااااااااج

ياشيخ هذا وجهي اذا فلحو

[XمقتـamalـــولX]

هددددددددددددددددددددددددددددددددددددددددددددددددد دددددف سعووووووووووووووووووووووووووودي
تصليحة من سامي سجلها مالك معاذ


تمريرة حلوة من سامي الدقيقة 86

الحين بيقولون لك ماسوى شي :d

[الهجاج]

اقول .. ردد ياليل ما أطولك

[cavallo nero]

معلومة ذكرها المعلق قبل شوي ....

توجو مافازت ولا في اي مباراة من المباريات الودية الي لعبتها ... pb192

انا مادري على اي اساس مختارينها ... يستعرضون عليها يعني ... حتى على هاذولي مافلحنى :D

المعلق متحمس اكثر من اللازم ومن يمسكون كورة قلبها انجاز :(

[صريع الرز]

بصراحة ماتحسن منتخبنا الا مع دخول الشلهوب وسامي اما من اول قاعدين بصراحة يستهبلون مايلعبون

طبعا مو معنى هذا ان مستوى المنتخب زين

[صريع الرز]

انتهى الوقت ودقيقتين وقت ضايع

[صريع الرز]

سامي مطرس كورة من شوي المفروض يمررها لكنه استهبل فيها الا يجيب هدف

المباراة انتهت

واحد صفر

اول فوز لنا في مباراة تجريبية

حتى لبنان هزمتنا

تشاوووووووووووووووووووووووووووووو

[عاقل بقوه]

جايبين لنا منتخب سياحي اسمه توغو عشان تستقون عليه :d

[ابو سميث]

اقول ماودهم يحطون توجو في المجموعة بدال تونس

[!!..ANTRAX..!!]

انتهت المباراة
1\0 للسعودية
سجلة مالك معاذ

[بتي فور]

خخخخخخخخخخخخخخ

والله مافزنا لقوة المنتخب
توغو زلااااااااااايب

ياحبيلك يالشلهوب دخل وحرك الوسط

سامي ثقيييل بالحيل ولايقدر يتحرك بس ماقصر صلح الهدف

[ابو سميث]

الحين سلطان
بيدق عليهم ويقول..شفتو تشكيلتي احسن تشكيلة في العالم

[XمقتـamalـــولX]

8
8
هههههههههههههههههههه

اسير المخده وش عنده كرفته خضرا :d

بصراحة ماتحسن منتخبنا الا مع دخول الشلهوب وسامي

ومحمد امين بعد :)

[Flexible]

وجهه نظر لاحد ينشب لي


ياسر * وسعد

ماينفعون بالمقدمه فيه احسن منهم ماش احس انهم يملكون مهارات بس للاسف اللمسه الاخير من جنبهاا

[cavallo nero]

مقابلة مع اسير الشوق .... :rolleyes:


يقولكم ان منتخب بلادكم يحضى بكل الاهتمام من قيادتة .... pla pla pla



لابس كرفتة خضرا تحفة :D

يقولكم المباراة هاذي الغرض منها ان احنا نجرب قدر المستطاع ( مابقى الى 3 اسابيع وانتو تجبون )

ويقولكم انة مطمئن ...

وانة بيروح يجتمع مع اللعيبة الحين ( الله يستر لا يخلي المكافئة مضاعفة :( وياخذون مقلب اللعيبة بعدين )

ويقول اني مالنا دخل انا وعمي في اختيار اللعيبة وان احنا اجل ليش نجيب جهاز فني pb095


ويقول انة واثق بالله وطموحة كبير جدا ...

وبالتوفيق يا حلو :rolleyes:

[khalid alshoq]

من تشوف اسير المخـدة متشقق ومبسوط عشان فوز بمباراة ودية
وقدام فريق (( مغمـور كروياً )) وأنت تدري أن الطاسة ضايعة !!!

[اهلكني الشوق]

,,,


عزيزي .. حنا هنا نشجع المنتخب .. بدون الوااان الانديه ..
شجع منتخبك بـ يدينك و رجلينك .. لكن رجاء ابعد عن الانديه و هلالي و نصراوي و غيرها ..
الحين كلنا لابسين الاخضر .. انتقد .. بس انتقد الاخضر ..


,,,

[A T T ! LA]

توجو معهم لاعب حمر عطر شكله طرش بحر :d


يارجال شكله مهجّن ,, شف الخشم + البراطم !
شكل ابوه تكروني وطالعن على خواله :p

[رشاش]

مالت علي وانا قلت بدخل النت الين تخلص صلاه العشا وبروح اشوفها << كله منك يالدوري السعودي :(

واثر المباراه خلصت وراحت

مبروك ... واذا فيه اعاده علمونا

[سيبونن]

منتخب مرررررريض

والله يا توقو لو عندهم واحد مخ بس كان سجل هاترك

مافيه اي شي يخليك تقول منتخبنا يبي يسوي شي قدام المجموعه اللي معه

الا بالمستوى هذا انت متأكد ان اقل مباراه 4 او 5 مصكوكين

ولا لاعب اليوم تقدر تقول عنه انه لعب زين غير مبروك طبعا

الله يستر بس

من جد منتخبنا 4/5/1 هذي خطته غيرها ماتنفع معه

[cavallo nero]

ههههههههههه الامير سلطان مبسوووط على المستوى :rolleyes:


مكالمة مع سموة ...

قام يرسم الخطة واخر شي قال اعتقد باكيتا عارف ها الامور كويس :(






وكل الامور بتدرس بشكل علمي هههههههههههههه << من جدة الى اليوم يقول ها الكلمة :(

وعندة وجه نظر يقول الاتحاد السعودي الاتحاد الوحيد الي دايم يقدم لعيبة جدد .... :( قالها على طاري مالك معاذ انة لاعب جديد

<< اي ار ات مبسوطين من جدهم مشغلين لاجا وقت الجد :(

[A Living Legend]

محمد الفراج : سامي بلمستين فقط يثبت معدنه ومهارته

وماجد تقلب وجهه يقول اصلا الكثره العدديه هي السبب في القول :d ما كن سامي داخل بدال ياسر

[KANU]

قدّر الله عليّ وشفـت آخــر نص سـااعـة من الشـوط الثااني ..!!؟

تــوغـو .. منتخـب مــااله أي تـااريخ ريـااضي .. مـغـمـور جــداً أفـريقـيـاً .. !؟

سـرعـة + لـيـااقه عـااليه جـداً + المهـاارة في الأستلاام والتسلـيم + إنـضـبــااط .. !!؟

كـل هـالـعـواامـل .. تـفـوقوا فيها عــلى المنتخب السعـودي ..

اللـي يفـوقهـم من نــااحـية الخـبره .. (( المفـروض طـبعـاً )) .. !!؟


فـرحـااانين أوي بـالهـدف .. !!؟

لـو بأحلف إن تـوغـو (( المهـزومين )) أستفـاادوا أكـثر من المـبـاارااة .. !!؟


ياناااس .. ماأشـوف شيء .. وااضح .. كل لعـبهـم .. مـُبـهـم .. !!؟

ممـكن تـااكل أثنين .. ثـلاااثـه .. بس تـطـلع من المباارااة بنتيجـه ..

بشيء تحـس إن المنتخـب من إدارة فـنية .. ولااعـبين .. عـندهم شيء بيوصلونه .. !!؟

شـيء بيحـسونه الجـمـهـور .. أبد .. مـطـرسه .. شـديده جـداً .. !!؟

إسـتـفـهــااام كــــبير .. !!؟

[زعبية]

8
8
لاتحرق اعصــابك , فالنهــايه منتخب توغو اســتفاد ومنتخبنا استفاد وحســـمها ..

[بدر]

والله يـ علينا منتخب:mad:
مدري له أغلب العيال اليوم مايسلمون كوره صح وخشنين ..!


أجل أول مادخل سامي سوى شغل
كم أنت كبير يـ أبوعبداللهpb189 ..

مالك مهاجم واعد جداً وأتمنى لو باكيتا راح يلعب بـ مهاجم واحد يكون مالك احتياط لـ ياسر
لأنه صاحب قدم قويه ولاعب رائع ..



أن شاء الله يتحسن ادائنا قبل المنديال ..

[خالد سلطان]

يعطيهم العافيه ما قصروا
بعدين انتو وش تبون فاز ولا عجبكم وانهزم وازعجتنواااا
خلوا في بالكم ان المنتخب لان يتاهل للدور الثاني وتكفينا المشاركه لان هذا هو مستوانا فنحن المنتخب المتأهل الوحيد بدون لاعبين متحرفين خارج الدوري المحلي .

[T-S-T]

8
8

نبي مستوى .. نبي سرعه .. نبي لياقه..
يعني بالعربي نبي إحترافية..


الا متى تكفينا المشاركه.. هاااه <<< عصب ..خخخ


ياخي على حسب الخطط المدروسه اللي منتخبنا يمشي عليه
المفروض اننا نفوز بكاس العالم هالسنه.. ( وجه ماسك بطنه من الضحك) خخخخخخخخخ


اها حطيت يدك على المشكله.. ليش ما عندنا لاعبين يلعبون برا؟؟..


بعدين اللي انتقد باكيتا.. وش تبونه يسوي..
هذولا اللاعبين اللي عنده.. سواء غير نص الفريق والا كله..
نفس اللاعب السعودي به بلا..


يا شيخ دول ما عرفت الكوره الا امس وتلعب ازين منا..
ليييش ؟؟ :mad: .. والله شي يقهر..


ان طلعنا بأقل من اربعه قدام اسبانيا.. انا اعتبره انجاز..pb093


مير خلونا ننسحب من هالحين .. ويا دار ما دخلك شر.. خخخ :D

[ابوهلال]

مبروك للمنتخب ولكل الخطط المدروسة !!

الشوط الاول ياهو بايخ بشكل !!
التمياط ضيع كورة ماتضيع !!
ونور يكثر من الاحتفاظ بالكورة على غير سنع !!

الشوط الثاني اللعب افضل !!

بدخول pb189 ســــامي pb189 تغير اللعب !!

وشفنا ثلاث كور منه كلها حلوة !!

مالك معاذ bp039 بطل ومهاجم وااعد !!!
وانا قلتها قبل هو اللي بيفيدنا بالمونديال !!

بدخول الشلهوب pb189 شفنا اللعب صار افضل بكثير !!

محمد امين bp039 لاعب مظلوووم وصدقوني هالانسان يطلع منه بس مفروض يعطي فرصة اكبر !!

[موكا]

سامي بالله بياخذونه في كأس العالم !!!

سلم لي ع المنتخب اللي ياخذون لاعبين عشان يكرمونهم بكأس العالم !!!!!!

المنتخب اليوم مستواهم جيد .. محمد نور ومالك معاذ متفلتين .. الشلهوب دخوله غير شكل المباراة للأحسن
المدرب لسه مصر يلعب التمياط ونور سوا مع ان مركزهم واحد !!

القحطاني مفيش لياقة اليوم

الغريب في المباراة انهم في الشوط الأول طاحوا بعد 20 دقيقة مفيش لياقة وفي الشوط الثاني انقلبت الامور ما شاء الله وصاروا يركضون ..

عمر الغامدي اثبت انه احتياط واحتياط بس !!

رضا تكر مستواه اليوم حلو .. ياليت يستمر على هالمستوى على طول

[جريح الرياض]

سامي بالله بياخذونه في كأس العالم !!!

سلم لي ع المنتخب اللي ياخذون لاعبين عشان يكرمونهم بكأس العالم !!!!!!

تبيهم يكرمون سالم سرور ولا محمد الحمدان اجل ؟ :d

احلى تكريم من سامي تصليحه للهدف اليوم

[خبله بس ثقه]

مبروكـ الفوز لنا وأكوس استعداد لكاس العالم ان نفوز على توغو 1-0 :sm12:

اللي يقهر المذيع الحربي آخر المباراهـ مو كنها مباراه وديه وجبنا الهدف بآخرها :( بس ياللهـ فاتحة خير عسى ..!

الشلهوب يوم المدرب نزله بان تأثيره بالوسط bp039

[ابو سميث]

وعلى طاري التشكيلة

اتمنى زيد المولد يكون بدال الخثران...ويكون دور الخثران في المنتخب ديني و دعوي او شي زي كذا :d

وبعد رضا تكر لازم يشوفون له بديل ان شاءالله لو يجنسون تفاريس

[سوبر هلالـــــي]

احمد ربي اني ماشفت المباراة........... بصراحه لازم يشفون لهم حل

المنتخب والله مايطمن الاسف يعاني من ضعف في لياقه..

[snatch]

اللي يخــوف أن المنتخب مافيه ولا لاعب مســتواه ثــابــت .. ويمكن نستثني " عزيز " ,,

شــفنا يـاسر في المباراة السـابقة مبـدع .. وشـفناه اليوم " مخــتفـي " ..

كـريري .. في المباراة السـابقة كان كـلمة " سـئ " شـويه عليــه ..

لكـن في هالمـباراة .. كـان أكثر من مـمتاز ..

ــ

[موكا]

تبيهم يكرمون سالم سرور ولا محمد الحمدان اجل ؟

احلى تكريم من سامي تصليحه للهدف اليوم

ابو تركي بكيفهم لا ياخذون احد من الشباب .. بس على الاقل يضبطون وضع سامي معهم .. لياقته معدومة تماما .. 5 كور او ست استلمها ما قدر يسوي شئ كلها انقطعت منه .. تصليحته للقول هذي من خبرته بس لياقته صدق معدومة وبعذره حق الهلال راكنه بالاحتياط

[مطـر صيـف]

على ايش مستانسين مدري منتخب فاااااشل .. pb093

لا يوجد تكتيك معين .. إذا كان ماعندك لاعبين اطراف جيدين فما عليك إلا أن تشرك الشلهوب لانه يوصلك لمرمى الخصم

بأقصر الطرق .. و يكون قدامه مالك لأنه مخلص و تسديداته حلوووه .. pb189

و بصراحه سامي ما يستاهل المنتخـــب .. لانه لاعب احتياطي وفيه من هو افضل منه (( مالك و امين والحارثي والقحطاني )) :D

و يللي تقولي صنع .. شق كم كورة راحت منه وكم مره حاول يسحب وما قدر

وبعدين تراه منتخب توغو .. خلوكـــــم واقعييييييين .. bp039

[_JIN_]

أصلن الفريق سياحي

[عضو متلطم]

وعلى طاري التشكيلة

اتمنى زيد المولد يكون بدال الخثران...ويكون دور الخثران في المنتخب ديني و دعوي او شي زي كذا

خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ خخخخخخخخخخخخخخخخخ
خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ خخخخخخخخخخخخخخخخخ
خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ خخخخخخخخخخخخخخخخخ
قوية

[المستهام]

المنتخب اليوم لعب بـ 4 _5_1 مالك معاذ ماكان مهاجم صريح مع ياسر المدرب خلاه وسط ومع الهجمه المرتده يتحول الى مهاجم واعتقد هذي الطريقه افضل من ان نلعب بمهاجمين تقليديين لأنك اذا لعبت بهالشكل فهذا بمعنى انتحار خصوصاً مع منتخبات قويّه زي اسبانيا واوكرانيا وتونس

مبروك زايد اليوم اثبت انه افضل بمراحل من الدعيّع حارس بالفعل يطمنك مع انه ماتعرض لهجوم قوي من منتخب توغو لكن ابدع في بعض الكرات

في مساحة كبيرة بين المحاور والدفاع ما استغلوها التوغوليين اللي كل تسديداتهم كانت طائشه ,, عمر الغامدي ماسوى شي ووضح عليه الارهاق خصوصاً في لحظة استبداله ... سعود كريري قدم مستوى جيّد

الخثران كاد يتسبب في هدف في مرمانا لولا يقظه تكر لازم نركز كثير على التمريرات خصوصاً في الدفاع لأن الخطأ في هالمنطقه يعني هــدف !!

اكثر عيب تلاحظه في المنتخب السعودي البطء في تحضير الهجمه وارجاع الكرة الى الخلف دائماً للتحضير وهذا يقتل المتعه ويضيع الوقت ويترك الفرصه للفريق المقابل بتقفيل مراكزه وخطف الكرة بقدر الامكان وتكوين هجمه مرتده

ظهر بعض اللمسات الحلوه في نهاية الشوط الثاني مع دخول الشلهوب وسامي الجابر ... أعتقد تواجد محمد نور والتمياط ماراح يخلق انسجام لأن كليهما يلعب بنفس المركز وسط أيمن والتمياط شبه ضائع في الجهة اليسرى لأنه مهوب متعود يلعب في هالخانه .... المفروض من المدرب يلّعب التمياط مع الشلهوب او نور مع الشلهوب عشان الوسط يعطي أكثر

مالك معاذ لاعب ممتاز بتحركاته السريعه وتسجيله للهدف هو تتويج لمستواه الممتاز في هالمباراة ... ياسر الى الآن غائب عن مستواه مشكلته يكثر من المراوغات اللي مالها داعي !!!

اتوقع المنتخب الى الآن يبيله شغل فيه ملاحظات كثيره على خط الوسط والدفاع ... التمياط ونور مهوب منسجمين مع بعض لأنهم يحبون يلعبون بمركز واحد ... ليش مانلعب بمهاجم وحيد في المقدمه ويكون الوسط نواف على اليمين وعلى اليسار الشلهوب ويكون محمد نور في المنتصف كـ لاعب حر ؟؟

مبروك الفوز المعنوي لو ان المستوى الى الآن لك عليه ... قدامنا اختبار قوي امام منتخب التشيك واتمنى يصحح باكيتا من الاخطاء لأن مابقى معنا وقت

بالتــوفيق للأخــضـر bp039

[خلف خلاف]

مباراة اليوم فيها عك كروي اكيد , لكن ماني من ظمن قائمة المتشائمين ولله الحمد :)
صحيح بناء الهجمه يحتاج الى اكثر من تمريره ( وهذا اشين شي يكرهك بالكوره والمباراة عموماً )
لكن توقو كان راجع وراء كثيير , بالظبط مثل بلجيكا .. ( وهذا افضل لنا اكيد علشان المنتخبات الي بنواجهها اكيد ماراح تخليك تاكلها بسهوله ) ...



نور هو افضل المتواجدين ( الرئيسيين ) اليوم ..
.. يحسسك والكوره برجله انها مع لاعب " تكـانه " :)
هو اللاعب السعودي الوحيد الي يقدر ( يحضّن ) على الكوره بين اكثر من لاعب حتى لو كانو هـ اللاعبين افـاارقه !!
جسمه يسـااعده , وكلنا نذكر مبارة ميلان مع الاتحاد كـ اقرب مثـال .. :) ..

نواف ( صورة قلب كبييير ) .. ماينفع ابداً يسـاار , يابكيتا لاتحرقه يرحم والدينك تكفى :(
لاعب من اللاعبين الي يلعبون بثقه نجوم كبــااار بدون مبالغه بالظبط مثل حالة نور ( حتى وانا ما اواطنه ) .. وهذي الي يحتاجه المنتخب السعويد (( الثقه في استلام وتسليم الكوره )) .. لكن المشكله انهم كلهم يلعبون في نفس الخانه
ولك منهم له ميزاته الي متوفره فيه هو وبس .!!

ياسر ..
افتقد لـ امدادت , وشفناه في بعض الكرات يرجع للنص علشان يستلم ويتخلص من الرقابه
محاوله تحسب لـ ياسر اكيد

سامي + الشلهوب
اضافو قوة في الخط الاماامي .. الكوره استمرت فيها كذا هجمه بعد دخولهم مباشره
ولو ان سامي اضع كوره او اكثر , لكن صناعته للهدف هي الي كان يحتاج لمثلها المنتخب ( من لمسه وحده )


مالك معاذ
وجه رساله لـ باكيتا بـ ان لديه مايعطيه
مشاغب , و ( سبرنته ) حلو جداً .. يفك لك سبرنت اليم في بعض الاحيان يخلصك من كذا لاعب جنبه
اليوم شفناه ساند الوسط بكثره .. ( يمكن تعليمات باكيتا )


المنتشري + الدوخي
عجبوني اليوم , وخصوصا الدوخي ..
حنا محتاجين رجعة ابو دوخي بسرعه , لانه