مابعد الاختبارات واجازة الصيف اقتراحاتكم وتجاربكم [الارشيف]

ماجد ناصر

13-06-2006, 01:30

السلام عليكم

الاختبارات انتهت وارتاحوا العالم من همها

النتايج اغلبها طلعت على مااضن والله يوفق الجميع

المهم بعد الاختبارات راح يكون عند اغلب الطلاب اوقات فراغ كبيره تقريبا الصيف كله

سوق الاسهم جايب العيد اتوقع كثير عوائل راح يتمتعون بصيف الرياض وماجاورها

اقتراحاتكم لهالصيف

اذا اقترحت سفر الله لايهينك الديره وكم المصرف

وان اقترحت نشاط ياليت تعطينا اياه بالتفصيل

بالنسبة لي صيفي ان شاء الله بالرياض اغلبه

واتوقع يتقسم وقتي زيارات للاهل والاصحاب

اقترح على الشباب يستفيدون من وقتهم في دورات لغة انجليزيه او دورات علميه

تخصيص وقت لقراءة القران خاصة ان اليوم جدا طويل بالصيف

ممارسة الرياضة فعلياً مهب تلعب كورة على الكمبيوتر وتبي تنحف

بالنسبة للسفر مافيه احلى من عمره وزياره للمدينه

وخارج المملكه اتوقع اوروبا بداية الصيف زحمه وغاليه عشان كاس العالم

ومصر ولبنان ودبي زحمة عشان العالم مايبون يروحون اوروبا عشانها زحمه :)

وامريكا على ماتطلع الفيزا قد قضت الاجازة

يعني امسك ارضك وحط فلوسك بسهم من اسهم السوق كوده يدبل وتصيف السنه الجايه باحلى مكان

Hattori Hanzo

13-06-2006, 07:30

انا والله عن نفسي.. pb071
راح اخذ ترم صيفي 9 ساعات ابي اتخرج وافتك
والاهل راح يسافرون وعادي اظل لحالي بالبيت خاصة ان اكثر زملاي راح ياخذون ترم صيفي معاي
والنهار راح اقضيه كله في النوم pb071 وماصحى الا الليل واواصل واحضر محاضراتي وارجع وانام
عشان يومي يخلص بسرعه pb131

ومصر ولبنان ودبي زحمة عشان العالم مايبون يروحون اوروبا عشانها زحمه

لبنان ودبي اوكيه بس مصر اكثر العالم راح يمشون لها مو عشان خايفين من زحمة اوروبا بالعكس مصر راح تكون أأأزحم لانها رخيصه وانت عارف الاسهم خسف بالعالم خسف يعني مالهم الا هالبلد :D

ماجد ناصر bp039
تسلم على طرحك هالنقاش

NawaL

13-06-2006, 08:56

حياك الله ماجد ،

صيف سعيد ، وعطله مليئه بالفائده إن شاء الله ،

موضوع يفيدك ،

الصيف واللسته (click) (http://www.eqla3.com/vb/showthread.php?t=216021)

Fiorella

13-06-2006, 10:33

عن نفسي هالايام قلت اخليها راحه بعدين ابدا بمشروعاتي << امحق مشروعات :D
ياناس ابسئلكم انا عندي التخطيط ماهنا اسهللللل منوه ولو يسون اختبار في احسن واحد يسوي تخطيط بفوز الاولى على العالم :D << مبالغه ترا
بس في التنفييييذ تعالوا دوروني
زي السنه الي راحت ححطيتلي لستةة اشياء ابس اسويها وسويت ربع الربع بس:D

بس يله تعالوا بقولكم وش لستتي كود احد ينتفع ويسوي زيي
طبعا دوراااات شايلتها تمامن من بالي ماصدقت افتك من غثا الدراسه والتزامها بعد ادخل اليف دوره ووووع:sm3:

فإليكم لستة مخططاتي << اخللصي << طيب خلا بقول والله اخر مره ( وجه يتنافض)

1- أعمــــــال يدويه ( عن نفسي تستهويني الجداريه عاد كل واحد والي يميل له )

الحلو فيها تقدر تسويها وانت عند اهلك وتسولف يطلع مره وناسه وفله ,, وبرضو لو ارت جمعه وجلستوا تسونها يطلع افل وافل ضحك واستهبال وكذا يعني

نتائج هالشي :: روحو بيعوها تكسبكم ذهب << حضرمية:D

2- اقرا الكتب الي في المواضيع الي تشدكم منها تزيد ثقافتكم في شي تحبونه ويفيد كثير ,, مثلا االـ LNP مره رائع انكم تقرون فيه بدال هالدورات الي تاخذونها بمدري كم وحتى فيه كتب كثيره حلوه فيها اذكر منها :

آفاق بلا حدود لـ د / محمد التكريتي
و كتاب .... أعرف ماتفكر فيه لــ د / ليليان جلاس
وكتاب..... البرمجة اللغوية العصبيه في 21 يوم لـ هاري ألدر وبيريل هيذر
وبرضو .... أيقظ قواك الخفية لـ أنتوني روبنز

3- اتعلم حاجه تفيدني عن طريق شي احبه .. مثلا .
. انا اموت على النت
وابغا اتعلم فوتشوب او الورد والاكسل والاكسس وهالطقه
ولا ابي التزم بدورات لازم اقوم صباح ولا عصر اروحلها
وش أسووووووي
اروح ادورلي من هالمواقع الي فيها تعليم هالاشياء واتعلمها بنفسي عن طريق النت واروح اي معهد اختبر وبكذا اصير حلت على شهادة دور وش احلى من كذا

4- ماننســـــــــــى أهم شي اخصص وقت احفظ فيه قران ,, كل يوم مثلا نص وجه ,, وافضل انه يكون مع جماعه عشان التزم مثلا صديقاتي في النت اتفق انا وياهم ونبدا نحفظ كل يوم على الاقل نص وجه ونخلي الجمعه بريك عشان نقرا فيها سورة الكهف ونراجع الي حفظناه ;)

ووطبعا زيارات اهل واقارب وهالحركات ذي:D
.................
وصايا بقولها لكم عشان ماتفشلون زيي ولا تنجزون شي من لستتكم ..

سو اشيائك انت وناس تحبهم وتنبسط معاهم ( يعني مجموعة) عشان تستمر وتحقق ولاّ بتكسّل ولا راح تسوي شي
خطط وقتك وامشي على تخطيطك صح
خل في بالك ان شيئان يغبط عليهم الفرد الصحه والفراغ .. عشان نحس بقيمتهم ولا نضيع لحظه من وقتنا
خلك متفائل وتذكر انك فرد من هالمجتمع لازم تطور نفسك وتكون احد اسباب تطور مجتمعك ورقيه ورقي فكره ,, لان لو كل واحد منا استغل وقته بشي يفيده والله صرنا زي اليابانيين نخترع لين قبل
يارب انجزز مخططاتي هالسنه وياااااكم يارب:(

ماجد ناصر

16-06-2006, 01:02

طربولا حياك الله
والله يوفقك ويعينك على الصيفي وصيف الديره حررررررررر

:) موفق ان شاء الله

ماجد ناصر

16-06-2006, 01:02

نوال الله يحييك ومشكورة على الموضوع :)

ماجد ناصر

16-06-2006, 01:10

ام الغوايش
1- أعمــــــال يدويه ( عن نفسي تستهويني الجداريه عاد كل واحد والي يميل له ) ( انا مااخبر اعمال جدارية غير تلييص او ضرب بوية )

:)

4- ماننســـــــــــى أهم شي اخصص وقت احفظ فيه قران ,, كل يوم مثلا نص وجه ,, وافضل انه يكون مع جماعه عشان التزم مثلا صديقاتي في النت اتفق انا وياهم ونبدا نحفظ كل يوم على الاقل نص وجه ونخلي الجمعه بريك عشان نقرا فيها سورة الكهف ونراجع الي حفظناه

ممتاااااااااااااااز الله يعينك ويوفقك

والقراءة جدا مهمه :) ماشاء الله عليك مخصصة اشياء مفثيده تملين فيها وقت فراغك بالتوفيق

وشكرا للجميع على مشاركتهم

الافــــلاجــــي

16-06-2006, 12:44

انا ما عندي إجازة بأخذ ترم صيفي خلني اتخرج السنه الجايه بس الله يوفقني ونهايه العطلة لازم ارفه على نفسي بسافر لي اسبوعين بس لحد الان ما حددت مكان اروح له ومن هنا لشهرين افكر وين بروح له ,,

ميته من الحر

16-06-2006, 16:14

عن نفسي دبرت وظيفة لمدة شهر والباقي يفتح الله

ماجد ناصر

19-06-2006, 01:23

فتى الظهران بالتوفيق ان شاء الله :)

ميته حر شهر احسن من ولا شي:) وكود يعجبك الوضع بالشغل وتكملين الصيف كله

دارما

19-06-2006, 11:16

جدولي لصيف هذا العام زي اي صيف :D

نوم+ اكل+ طلعات + نت

بس فيه اشياء اضافيه جدت علي بالصيف هذا والي فات الي هو رياضه :D < يقالك تطورت منفوحه

يعني جابين مدربه بالبيت الصباح من 10 الى 11 واكيد اذا طلعت بنروح نكمل وناستنا بما انا قمنا

< والا موب عشان شي

وكمان مقدمه على وظيفه بالصيف في بنك طبعا فتره ثانيه يقالك لما ازهق من الاجازه :D

يعني للحين هذا الي اكيد بسويه عاد مدري يجد شي جديد والله اعلم

يازين الاجازه وبس لو ماسفر الواحد :D

ماجد ناصر

24-06-2006, 04:50

دارما :) الرياضة ممتاز جدا

وملاحظ ان البنات مركزين على الرياضه بقوة :)

الظاهر برامج ام بي سي 2 اثرت فيهم:)

بالذات اكستريم ميك اوفر

MiSs._.Dj

24-06-2006, 05:32

صيفي حافل:sm5:

بدايته يعني الحين رحت سجلت بمعهد بدال قعدتي فاضيه وماقبل النت طول يومي قلت افك النت مني شوي:D

وانشا وسط شهر سبعه بطيير على لبنان :sm3: والله يعيني على الزهق اذا رجعت

وووبس:)

ماجد ناصر

26-06-2006, 22:08

موفقه ان شاء الله يامس

واذا رحتي لبنان سلميلي على مريام فارس:(

حــلــى

10-06-2007, 21:22

أهلييين bp039
سجلت ترم صيفي 9 ساعات و ما رح يمديني أسوي فيه شي لأن مليان لابات و دوام طويل :sm1:
و لسة باقي على الصيفي فترة بس لسة الوضع متوتر عشان اختبارات المدارس فممكن مرات أشارك بأني أدرّس أو أسمّعpb131
و ناوية أقضّي ملابس للصيف عشان وسط الدوام ما فيييه وقت بالمررررة :sm1: مثل هالمواضيع يبغالها روقان :rolleyes:
و بسسس :rolleyes:

top secret

10-06-2007, 21:45

هالصيف بالرياض مصلحة العمل فوق أي اعتبار آخر pb024

برايفت لأهلي : تكفون لا تسافرون وأجلس لحالي مثل عيد الأضحى :(

العصلا المصلا

10-06-2007, 21:47

2006 !! :sm18:

Mr.DoOOoDY

10-06-2007, 22:34

حلى :( !
رفعتي الموضوع وراح يتقفل !

Mr.DoOOoDY

10-06-2007, 22:35

[] مـاجد مساء الخير bp039 []
[] مساء الخير لكل الموجودين خصوصاً المعطّلين pb189 []

/
/

الصيـف عسى الله يلحقنا من خيره ، طويل على البعض وبعض لا !
وانا من حبي للنوم يمكن اشوف الصيف قصير :D !

عموماً بما انك قاعد في الرياض لازم يتوفر لك الآتي :-

# سيارة مظللة جيّداً تمنع الأشعه من دخول السيارة ( من ضمن هذه الاشعه البلوتوث ) .
# مُلحق مُكيّف بدرجة عالية ( ويحتوي على رسيفر وبلي ستيشن وستريو وقارئ DVD وانترنت ) .
# إشتراك في شبكة الشوتايم .
# استراحة يجتمع فيها الأصدقاء الذين لامانع لديهم من الدشرة .
# جوال دون حدّ إئتماني ( ورقم سوا إحتياط ) .
# كل شهر رصيدك على الآقل 3500 كحد أدنى للرفاهية .
# معرفتك وعلاقتك بأشخاص لديهم النفوذ في السوق السوداء ( ولازم تعرف ضابط في المرور ) .
# طلعتك للشرقيـة برفقة شخصين ، كنك واصل مشوار في جنوب الرياض ( الريوس مفصول ) .
# اذا تحب تدرس ، ادرس بس بعقل ( يعني الصيف مهوب وقت معاهد ) :D .

# تطول القائمة ولكن هذه بعد ذكر الله من طاردات الزهق ،
بل تجعلك من مُلبي السياحة الداخلية pb027 pb034 !

تحيتي لكم
pb189

>< ساره ><

10-06-2007, 23:07

والله 22 سنــه مافي عطلـه طلعت منهاا بنتييجه مفييده pb093 pb093

ياأماا نســـافر (( وهذي ترفيه وفاايده بس بسييطه )) ولاسهــــر باللييل ونووم واكـل وتلفزيون ونــت :sm12:

جزاهم الله خيـــر الــ LBC صاروا يونسونا بالصيف بالواادي وقسمه ونصيب :D ولاالوقـــت اووف ماايمــر بسررعه :( pb071

هالصيـــف نااويه انشاالله أغيـــرر نظاامــي واستفييد ولو شي بسييط سجلت بناادي ريااضه و الشهــر اليااي لو ماسافرناا سجلت دورة لغه انقلش + فرفره بالمولات لزوم الوظيفة اليدييده pb192

وكـــل عاام وانتــوا بخيـــر pb189 pb189

حــلــى

10-06-2007, 23:27

والله بالغلط http://vb.eqla3.com/images/icons/icon4.gif
ضغطت على صفحة قديمة و نسييييت أحسب المواضيع اللي فاتحتها جديدة :(:(
و الله سوووري :(

مجروحهه

11-06-2007, 00:48

يالله الصيف جاي
وحياتنا هي هي
تحية للعاطلين والعاطلات امثالي
ومازال البحث جاري عن وظيفة

من جد طفش الناس تفرح بالاجازة والعاطلين والعاطلات ايامهم سواء
مافي فرق بين عطلة ولا غيره

الله يلطف بنا ويرحمنا برحمته

قدر ضغط

11-06-2007, 14:40

انا ياكرهي للاجازه والله ما ادانيها الله يعديها على خير وما فيه احسن من الرياض

الموت اهون

11-06-2007, 21:33

^^^^^^^^
من جد
انا اكره الاجااازه لانها تفرق ماتجمع الكل بيروح ديره
ومافيها نظام الايام متلخبطه والاوقات بعد..

A j w a d

11-06-2007, 21:54

هالصيف طبعا بيصير غير مثل الصيف اللي راح واللي قبله < خرفت pb036
* مايبقى منتزه في الثمامه مانسير عليه مره او يمكن اكثر :D
* نفرفر جميع الاسواق مرتين او اكثر :D
* عزايم عاديه تدعو الى الملل والهواش اكثر مافيها من صلة رحم pb131 < تكارنه :D
* سفره بسيطه "على حسب مزاج الوالد" اذا كان راضي علينا هاك السنه ودانا الجنوب : ابها ، الباحه .. الخ
واذا كان راضي قليلا ودانا مكه ولف بنا شوي على جده ، واذا مارضى مايحتاج اقول لكم وش يسوي :D

وه بس متى تجي الدراسه < بتتصفق :D

. rOro .

12-06-2007, 03:35

موضوع شيق

:

السفر ممكن يكون داخلي مدة اسبوع او اثنين .. خارجي بااح هالسنه.. الجنوب يستاهل الزياره فترة اخر شهر 7 الى اول شهر 8 لان الاجواء تكون فضيعه ..ضباب وبرد ومطر....والمتعه تكون في منتجعات "سياحيه" الموجوده هناك...لانها حركه ومرتبه نوعا ما .. لكن اي شقه مفروشه في وسط البلد مافيها اي متعه
مكه..والشاليهات في جده يمكن لها زياره..كم يوم ...
ناويه اهتم ببعض الرياضات اليوميه مثل السباحه والمشي بحكم الفضاوه والسنتره بالاستراحه ..
بس

الباقي سهر ونت وطلعات

مافيه اي مشاريع :(

شكرا لك

je t'aime

12-06-2007, 18:09

الا على فكرة
شكل صاحبنا تخرج هههه
وبعدين هالموضوع لو بينرفع كل سنة مايهم المهم الفكرة لكن يبي له رواق
حاليا مابعد خططت .. مبسوط على الرياض وحرها والدوامات هادية والطلاب عطلوا مايشغلون الواحد الصبح بزحمتهم .. والطلعات تحلو والسهرات والجمعات ،،

حتى الخنفس يرفس

13-06-2007, 07:40

انا عن نفسي مغتربة (يا كبدي علي)...يعني مصيفة برا من سنتين ...و بستنالي شهر و ببدا اظفظف غريضاتي و اكرتن مواعيني و اسكر شناطي عشاني راجعة ديرتي بعد الصيف باذن الله ...
وحشتوني والله وحشتووووووووووووووووووووونييييييييييييييييييي يييي ...وه متى ارجع للحر <<< ادري بتحسف على هالحكي اذا صكني الغبار و الشمس اللي تميل الخشة بس الشكوى لله احب ديرتي ....
هاه توصون شي ؟؟؟ اجيب شوية براد معي ؟؟؟<<< تسأل !!!!

العصلا المصلا

15-06-2007, 15:59

الصيف قرب والسفر حان طاريه

انا هالسنه صيفي ما اظنه حلو pb093

وشايله همه من قبل ما يبدا !

حتى السفر شكلي بحرم اهلي منه لان عندي شغيلات بالصيف :(

بس ما يمنع ان الواحد يستانس بين الفينه والأخرى بجمعات بنات وطلعات وكذا :D pb189

الغزال الشااارد

15-06-2007, 19:04

ياليت اللي يعرف اسماء نوادي رياضيه في الرياض يقولنا

ابي ادخل نادي بس مو عارفه نوادي بس عندنا مركز الامير سلمان والمناهل (هذي المعروفه)ابي غيرها

تعبت أشتاق

15-06-2007, 19:47

الله ياخذ الهوامير

هبلوا بالعالم

كلن هالسنه قاضبن ارضه بدون ماتقول

ماجد ناصر

15-06-2007, 23:34

ياليت اللي يعرف اسماء نوادي رياضيه في الرياض يقولنا

ابي ادخل نادي بس مو عارفه نوادي بس عندنا مركز الامير سلمان والمناهل (هذي المعروفه)ابي غيرها

فيه الشباب والرياض والهلال والنصر

ماجد ناصر

15-06-2007, 23:38

والله الصيف حر بكل مكان واحسن مكان الواحد يقضي فيه صيفه قدام المكيف

مشكورة ياحلى على رفع الموضوع :)

موضوع مدنبشه نيجيري كل شوي يطلع الصفحه الاولى من سنه على هالحال:)

ماجد ناصر

15-06-2007, 23:43

مستر دووودي مساء النور والسياحه الداخليه صارت اغلى من الخارجيه وفوق كذا تلقى شوفة نفس :)

ماجد ناصر

15-06-2007, 23:46

والله 22 سنــه مافي عطلـه طلعت منهاا بنتييجه مفييده pb093 pb093

ياأماا نســـافر (( وهذي ترفيه وفاايده بس بسييطه )) ولاسهــــر باللييل ونووم واكـل وتلفزيون ونــت :sm12:

جزاهم الله خيـــر الــ LBC صاروا يونسونا بالصيف بالواادي وقسمه ونصيب :D ولاالوقـــت اووف ماايمــر بسررعه :( pb071

هالصيـــف نااويه انشاالله أغيـــرر نظاامــي واستفييد ولو شي بسييط سجلت بناادي ريااضه و الشهــر اليااي لو ماسافرناا سجلت دورة لغه انقلش + فرفره بالمولات لزوم الوظيفة اليدييده pb192

وكـــل عاام وانتــوا بخيـــر pb189 pb189

وش بتتوظفين سيكيورتي ؟؟؟ تعليقا على ان الوظيفه يبغاله لفلفه بالاسواق

ادرسي عنقلينزي لانه مفيد وصحي
وك عام وانت بخير

>< ساره ><

16-06-2007, 00:11

وش بتتوظفين سيكيورتي ؟؟؟ تعليقا على ان الوظيفه يبغاله لفلفه بالاسواق

ادرسي عنقلينزي لانه مفيد وصحي
وك عام وانت بخير

هههههههههههههههههههههههههههههههههههه pb027 pb027

فرفره لزوم هدوووم يديييده اتسمم البسهــم فهمـــت pb094

وسوري عالــرد مره ثاانيه :D pb189

العصلا المصلا

16-06-2007, 02:26

ياليت اللي يعرف اسماء نوادي رياضيه في الرياض يقولنا

ابي ادخل نادي بس مو عارفه نوادي بس عندنا مركز الامير سلمان والمناهل (هذي المعروفه)ابي غيرها

عندك التخصصي الطبي فيه جيم الدور التاسع اكثر جم ارتحت له بالرياض
اشتراك شهري 900 يتضمن ايروبكس اجهزه كلاسات ولايفوتك كلاس سوسو يخليك ترجعين والناس تسألك ليه خدودك حمر خخخخخخخخخخخ:D

ماجد ناصر

18-06-2007, 16:37

هههههههههههههههههههههههههههههههههههه pb027 pb027

فرفره لزوم هدوووم يديييده اتسمم البسهــم فهمـــت pb094

وسوري عالــرد مره ثاانيه :D pb189

لاطبعا مافهمت ( وجه فاهي )

ماجد ناصر

18-06-2007, 16:40

انا عن نفسي مغتربة (يا كبدي علي)...يعني مصيفة برا من سنتين ...و بستنالي شهر و ببدا اظفظف غريضاتي و اكرتن مواعيني و اسكر شناطي عشاني راجعة ديرتي بعد الصيف باذن الله ...
وحشتوني والله وحشتووووووووووووووووووووونييييييييييييييييييييييي ...وه متى ارجع للحر <<< ادري بتحسف على هالحكي اذا صكني الغبار و الشمس اللي تميل الخشة بس الشكوى لله احب ديرتي ....
هاه توصون شي ؟؟؟ اجيب شوية براد معي ؟؟؟<<< تسأل !!!!

ويلكم تو زا كيلوب سانديويتش
حنا عكس العالم العالم تصيف وتروح تسافر برا حنا العكس نروح نسافر جوا اقصد كلن يرجع لديرته بس برضو احسن عشان ماتصير الديره فاضيه عشان التوازن الاقتصادي

ماجد ناصر

18-06-2007, 16:41

الله ياخذ الهوامير

هبلوا بالعالم

كلن هالسنه قاضبن ارضه بدون ماتقول

احسن عشان الفلوس تنصرف بالبلد بدال ماتطلع برا اووووووووووه نسيت مابقولنا فلوس :( هالهوامير

ماجد ناصر

18-06-2007, 16:44

انا مستغرب من اللي يكرهون الصيف والاجازة :( انا اكره الصيف عشانه حر بس اقدر الاجازة لانها برد ( جالس تحت المكيف )

ماجد ناصر

18-06-2007, 16:45

والله بالغلط http://vb.eqla3.com/images/icons/icon4.gif
ضغطت على صفحة قديمة و نسييييت أحسب المواضيع اللي فاتحتها جديدة :(:(
و الله سوووري :(

الله لايهينك السنه الجايه زي ذا الوقت كرري الغلطه :) عشان اجيكم مره ثانيهpb131
شكلهم يحذفون الموضوع عشان مااجي :sm12:

كوكب زحل

18-06-2007, 16:51

قديمك نديمك ..!!!!!

مـطـر الـوسـم

19-06-2007, 06:44

موضوع خمس نجوم

انا صراحتن ماعندس سفرة بس موصي اخواتي ياخذون تخفيض المدرسة(احتياط)
التخفيض هذا يخفض خمسين بالمية من قيمة التذكرة(للطلاب والطالبات ماتحت الثانوي فقط) وبشترك في منتديات جديدة ..اللي يبي يلتحق في دورة لاحد المنتديات للشيخ ابن جبرين يعطي دروس ومحاضرات هذا الرابط http://dorat-7.ibn-jebreen.com/
..ترى المنتديات الاسلامية ماشاء الله نشيطين مره الحين مشاريع ومراكز وبرامج لرمضان .. ومراكز البنات الصيفية اشتغلت وبندخل اخواتي فيها (فيه مراكز حكومية بعد)..

حــــــتى الان هـــــــذي مشــــــاريعي عالعموم دايما كل عطلة اطلع مية مشروع ومااشترك الا في ربعها (اهم شي اشتركت)>بعد ماقريت الموضوع حسيت اني اهون من غيري..شكرا

ايزي بدي

19-06-2007, 07:19

بعد اذنك ماجد
ولكمووووووووو حلى

باك
بالنسبة لي عندي جدول جديد ابجربه اول مره وهي اني ان شالله ابدخل عش الزوجية او مدري وش يسمونه الصيف هذا ادعوا لي بالتوفيق

ثــــــلــ مشوي ـــــــج

19-06-2007, 14:32

ابي اكمل دورة الكمبيوتر اللي عندي 6 اشهر ,,انشالله اخذ دبلووووم

بس مالي الا نيوهورايزن مع اني مااااحبببه ابد<<اكرههم

ووووووووووو بروووح عروووس العالم اللي عازميننا ,,

وووووووبصمم لي ملابس سبووور للجامعه <<لاتقولون بدررري !!

وووبشووووف افلااااااام 2007,,,

و بأعرس << خـخخ اما هذي مافية امـــل هههه

ماجد ناصر

20-06-2007, 23:36

موضوع خمس نجوم

انا صراحتن ماعندس سفرة بس موصي اخواتي ياخذون تخفيض المدرسة(احتياط)
التخفيض هذا يخفض خمسين بالمية من قيمة التذكرة(للطلاب والطالبات ماتحت الثانوي فقط) وبشترك في منتديات جديدة ..اللي يبي يلتحق في دورة لاحد المنتديات للشيخ ابن جبرين يعطي دروس ومحاضرات هذا الرابط http://dorat-7.ibn-jebreen.com/
..ترى المنتديات الاسلامية ماشاء الله نشيطين مره الحين مشاريع ومراكز وبرامج لرمضان .. ومراكز البنات الصيفية اشتغلت وبندخل اخواتي فيها (فيه مراكز حكومية بعد)..

حــــــتى الان هـــــــذي مشــــــاريعي عالعموم دايما كل عطلة اطلع مية مشروع ومااشترك الا في ربعها (اهم شي اشتركت)>بعد ماقريت الموضوع حسيت اني اهون من غيري..شكرا

الله يجزاك خير موقع مفيد واتمنى كلنا نستفيد منه

ماجد ناصر

20-06-2007, 23:40

بعد اذنك ماجد
ولكمووووووووو حلى

باك
بالنسبة لي عندي جدول جديد ابجربه اول مره وهي اني ان شالله ابدخل عش الزوجية او مدري وش يسمونه الصيف هذا ادعوا لي بالتوفيق

خذ راحتك اخوي

اما من ناحية عش الزوجية نقول الف مبروك والله يجيب العواقب سليمه يارب:)
الله يوفق ويوفقها ويجمع بينكم بالمعروف
منك المال ومنها العيال
الاوين الزواج فيه مبطي ماتعشيتpb192

ماجد ناصر

20-06-2007, 23:44

ابي اكمل دورة الكمبيوتر اللي عندي 6 اشهر ,,انشالله اخذ دبلووووم

بس مالي الا نيوهورايزن مع اني مااااحبببه ابد<<اكرههم

ووووووووووو بروووح عروووس العالم اللي عازميننا ,,

وووووووبصمم لي ملابس سبووور للجامعه <<لاتقولون بدررري !!

وووبشووووف افلااااااام 2007,,,

و بأعرس << خـخخ اما هذي مافية امـــل هههه

صيف حافل بالنسبه لك :)
بس تصممين ملابس سبووور ؟ بتروحين الجامعه ولا بتروح استاد الملك فهد

الله يوفقك ويرزقك ببن الحلال واحسن شي انك تاخذين دورة تفيدك مستقبلا

حتى الخنفس يرفس

21-06-2007, 01:01

ويلكم تو زا كيلوب سانديويتش
حنا عكس العالم العالم تصيف وتروح تسافر برا حنا العكس نروح نسافر جوا اقصد كلن يرجع لديرته بس برضو احسن عشان ماتصير الديره فاضيه عشان التوازن الاقتصادي

يا حبيلك يا ماجد ...لا انا برجع مع الناس << ذهينة
برجع باول اسبوع من رمضان ...يمكن قبل بشوي كمان ...
وع عاد ياشين الديرة و هي فاضية ... اشوى برجع وقت الزحمة وللا بكتأب !!!!
عموما شكلي تحمست و بديت اظف اغراضي من الحين !!!!<<< طقني الحماس ...

K.B.A

21-06-2007, 09:23

أنا والله بأخذ ترم صيفي عشين أرفع المعدل و أحدد المسار <<<< معدلي 4.06 pb034
بتبدأ الدراسة يوم 15/6 وما أدي متى تنتهي بس أعتقد كلها 7 أسابيع
وخلالها أكيد نادي ودورة في الإنجلش ..... وبعد الترم الصيفي يبقالي 3 أسبيع قبل الدراسة
شكلي بأطلع لأخوي الشرقية و أنواع الدجة في البحرين و دبي pb024 .
وطبعا في جدة الخرجات على التحلية والكباين والبحر والحمرا عشين العشا والعودة في نفس الإتجاه .

ارق الليل

21-06-2007, 13:08

احيانا السفر وتغيير الجو
من اكبر الفوائد للجسم والروح والنفس

حياك الله

ماجد ناصر

23-06-2007, 17:32

يا حبيلك يا ماجد ...لا انا برجع مع الناس << ذهينة
برجع باول اسبوع من رمضان ...يمكن قبل بشوي كمان ...
وع عاد ياشين الديرة و هي فاضية ... اشوى برجع وقت الزحمة وللا بكتأب !!!!
عموما شكلي تحمست و بديت اظف اغراضي من الحين !!!!<<< طقني الحماس ...

ماشاء الله موفقه وترجعين بالسلامه :)

الا ماانتم بايعين اثاثكم قبل تسافرون ( حاط عينه على البلازما )

مااقول الا الله يبلغنا ويعينا على رمضان بيكون دوامي جداً سيء للاسف

ماجد ناصر

23-06-2007, 17:51

أنا والله بأخذ ترم صيفي عشين أرفع المعدل و أحدد المسار <<<< معدلي 4.06 pb034
بتبدأ الدراسة يوم 15/6 وما أدي متى تنتهي بس أعتقد كلها 7 أسابيع
وخلالها أكيد نادي ودورة في الإنجلش ..... وبعد الترم الصيفي يبقالي 3 أسبيع قبل الدراسة
شكلي بأطلع لأخوي الشرقية و أنواع الدجة في البحرين و دبي pb024 .
وطبعا في جدة الخرجات على التحلية والكباين والبحر والحمرا عشين العشا والعودة في نفس الإتجاه .

صيف حافل بمفاجات الصيف جده غير:)
الله يوفقك واحسن شي الصيفي واللغه

ماجد ناصر

23-06-2007, 17:55

احيانا السفر وتغيير الجو
من اكبر الفوائد للجسم والروح والنفس

حياك الله

السفر وتغير الجو يعطي الشخص دافع قوي للسنه الجديده