عرض كامل الموضوع : سليمان يجيب على أسئلة منتدى الأسرة
روح الأسرة
18-06-2006, 17:54
يسعدلي مساكم جميعاً :)...
حيّاك ربي سليمان...وفي البداية نحب نتوجه لك بخالص الشكر على قبولك دعوتنا
يعطيك العافيه bp039
.
.
.
.
جاهز؟؟ نبدى؟ :D
لطفاً لا أمراً لحد ينزل أي رد إلا بعد انتهاء المقابلة
احم ..
بادئ ذي بدء الشكر موصول للأخت الشوق شوق على تشريفي بالمقابله هذي الله مير يخليها ويبقيها ..
ثاني ذي ثنئ الشكر والتقدير لكل المتواجدين والاعضاء على هذه اللفتة الطيبه والتفاعل اللي ماكنت اتوقعه :d ..وكل الكلمات تعجز عن التعبير عن مافي داخلي من شعاعير وحساحيس كلها مليئه بالفخر والاعتزاز بكم وبكلامكم اللطيف ياجعلي ماعدم زولكم
يالله يالله ارسلي ارسلي << يحسب المايك مفكوك :d
روح الأسرة
18-06-2006, 18:18
بوح القلوب
شخصية متفهمه ..
ردوده حكيمة جداً جداً ..
حروفه تجبر قارئها ، على قراءتها بتمعن ..
حياك أخي / سليمان ..
إختيار موفق جداً .. وممتع بإذن الله
السؤال الأول من الشوق شوق
يسعدلي صباحك سلوووم ..
أول سؤال البطاقة الشخصية لو سمحت
يافتاح ياعليم يارزائ ياكريم :D
الأخت العزيزيه بوح القلوب /
الله يحييك اخيتي ويجزاتس خير ..تشرفنا بتواجدك الله يرفع قدرك ويخليك
الأخت الغاليه الشوق شوق /
الله يسعدتس ويخليتس .. ياختي من قريت هالسؤال هناك نزلت تحت اشوف تكملته قلت اكيد كاتبه .. "يالله يالله الحقنا القسم :D"
الظاهر يا الشوق على هالسؤال قمة طموحك تصيرين جندي ماسك تفتيش بالدايري ..اشك ان اسمتس الشوق بن مناحي على هالسؤال العبقري << مايستحي على وجهه هالولد :D
اما عن بطاقتي الشخصيه فانا اسمي سليمان بن عبدالعزيز ويعيروني ولد نورة :D .. ابلغ من العمر بالتقويم الميلادي 24 سنة والأصح بتقويم امي ..يومها حاملتن فيني في السابع ولا ولد حماتها توه متوفي ..وهو صار له متوفي من 25 سنة ..يعني عمري يغدي 25 الا ثلاث تشهر ..
الشوق شكرن pb094
روح الأسرة
18-06-2006, 18:24
رنّو
من جد يابختنا
~~~~~~
مقلعه منذو مبطي
ياصباحكم وورد ..
في انتظارك سليمان وياليت ماتبطي علينا ..
ولا تكثر دعايات وفواصل كنك روتانا ...
لي بااك في اي لحظه << تكفين
~~~~~~~
لوحة فنية
وينك ياهوو
~~~~~~~
دجه هانم
صبحه بالخير الشيخ سليمان
ازييك ياقدع ؟
اسرد لنا كلش سليمان من الى لاتبقى ولاشي ,,
ترا عادي لو تسولف علينا من دون اسأله
<< رقدوهاا خخخخخ
رنو
pb094 الله يحييك اخيتي منورة .. وتو ما ابتسم لي الحظ وتشرفت بان اكون ضيف بينكم pb094
مقلعة منذ مبطي
:( هما يوم قلتي صباحكم وورد .. بغيت اقول مسائتس بوربوينت :( بس الحمدلله تعوذت من الشيطان وقلت خلك ثقل وبلا مصاله بس :D
الله يسعد مساتس وصباحتس ان شاء الله.. منورة واشكرك على كلامك اللتيف pb094
لوحة فنية
شكرن لتواجدك.
دجة هانم.
خخخخخخخخخخخخخخخخ صبحتس بالنور والسرور .. مهنا شي عشان ينسرد ياخيه ... شاب سعودي داج هاج ..يهيم على وجهه ويعيث في ارض المعمورة بثارة ومصالة وفراغ :D ..مافيه شي يستاهل عشان ينسرد :D
ووو.. وشكرا لكلامك السابق جعلتس تسلمين ..يالله حد آذانك وتفتح بيبانك ان تحشم جلال هالبنية وتوفقها وترزقها .. إليتسيpb161
روح الأسرة
18-06-2006, 18:28
صاحب الظل الطويـــــل
سلــّووووم
حيــــّاك
~~~~~~
جنون مهرة
ونِعـــم الإختيـــار والله
سليمـــان ردودة جـدا ً تعجبنـي وآراءه فيهـا وطريقتـه بالكتابة مميـزة ..
متابعــة بإذن الله من بعيـــد لـ بعيد ..
موفقيـــن ..
~~~~~~~
&&&مستر إكس &&&
مساء الخير ,,
مانقدر نقول شئ بعد الي قيل عنه ولايوفيه الي قالوا ولا الي كنت بقوله فيه ,,
ماأخطؤا الاختيار ,,
في أنتظار إشراقك يالغالي علينا ,,
تحياتي ,,
صاحب الظل الطويـــــل
الله يحييك ويبقيك pb189 منور المكان
جنون مهرة
كلي فخر وتقدير لهذا الإعجاب ..اسأل الله ان اكون عند حسن الظن وكفوا لما تفضلتي به لي ..
منورة المكان اخيتي جنون مهرة bp039
&&&مستر إكس &&&
مساء الورد ..الله يحييك اخيي اشكرك على تشريفي بهذه المجاملة pb094 ..ياجعلك تسلم ان شاء الله
روح الأسرة
18-06-2006, 18:32
ضامي الحب
مساكم الله بالخير جميعا
اشكر اخواتي مشرفات الاسرة ولايهون ابو ظل وارحب باخوي سليمان
وحياك الله في بيتك وبين اخوانك
وبما ان باب طرح الاسئلة مفتوح .. بطرح كم سؤال .. بس قبل تجاوب اكتب اسمك ورقم جلوسك
1- مافيه شك ان الخجل صفة انثوية .. لكن وش رايك في الشاب الخجول الى يستحي ؟
2- كل شخص له وجهه نظرة من ناحية النجاح والفشل الشي الى انا اشوفه نجاح غيري يشوفه فشل
انت وش تعريفك للنجاح وللفشل ؟
3- وش نوعيه الكتب الى تحب تقرااها .. وهل تحب تقراء عن الديانات الاخرى
عقائدهم , افكارهم , معتقداتهم ؟
4- النزعة الى الكمالية .. هل تعاني منها .. وهل تسعى لبلوغ القمة في كل شي .. عل سبيل المثال بما اننا
في المنتدى بعض الاعضاء يقول ياانزل موضوع قوي اقل شي يتثبت ولا ماانزل موضوع احسن ؟
5- سليمان متى يكون حنون وطيب ومتى يعصب ويزعل ؟
6- بكل تأكيد النت اخذ منك واعطالك اذا قارنت بينهم هل تجد فعلا ان النت مفيد لك ؟
7- اذا بدات تستعرض شريط حياتك هل تحس انك راضي عن نفسك ؟
8- وش اكبر مشكلة تواجه الفتاة , واكبر مشكلة تواجه الشاب في مجتمعنا السعودي ؟
9- حدثنا عن ايام طفولتك كيف كانت هل كنت هادي ولا طقاق مع خوانك وهل كنت طفل هادي ولا من النوع
الى يخوفونه اهله وتقوله امه .. الى يطلع في الشارع يجيه الحرامي ياخذه ؟
10 - بما انك عيار .. وش رايك في نظرة مجتمعنا للعيار تلاحظ انهم مايحترمونه كثر مايحترمون الشخص الغير عيار
واحيانا ينظرون للعيار بنظرة مهيب زينة يحسون انه انسان فارغ وماعنده هدف ..... ألخ
ليش البعض ينظر له بهالنظرة ؟
11- بماا اننا في اجواء المونديال الان هل انت رياضي ولك في الكورة ولا لا ؟
اكرر شكري للمشرفين ولك على هاللقاء الى اكيد بيكون ممتع
تمنياتي للجميع بالتوفيق
الأخ ضامي الحب
ياهلا والله بوخيي ضامي ومنور المكان وياعلّك تسلم
وبما ان باب طرح الاسئلة مفتوح .. بطرح كم سؤال .. بس قبل تجاوب اكتب اسمك ورقم جلوسك
<<بدا يطلع البراشيم :D
1- مافيه شك ان الخجل صفة انثوية .. لكن وش رايك في الشاب الخجول الى يستحي ؟
طاعون هالحريم كلشن بيستحلونه :D .. لا ياخيي الخجل موب صفة انثوية البته ..ممكن تكون غريزه عند المرأه بشكل اوضح منها عند الرجل ..لكنها فطرة ربانية فطر الله بها بني آدم ..موجوده في الرجل والأنثى على حد سواء ..انا معك انها تطغى عند الانثى في جوانب عديدة وتقل عند الرجل .. لكن هذا ماينفى وجودها عند الجنسين
ورايي في الشاب الخجول من راي بابا << ويصك على نفسه الغرفة وينسدح على السرير :D .. الصدز مافيها شي لاصار الواحد خجول بالعكس بعض الاحيان تصير من حسن اخلاق الشاب انه خجول..ولكن الخجل زيه زي غيره .. فإذا زاد عن حده انقلب ضده ..وكلن له شخصيته اللي تميزه عن غيره
2- كل شخص له وجهه نظرة من ناحية النجاح والفشل الشي الى انا اشوفه نجاح غيري يشوفه فشل انت وش تعريفك للنجاح وللفشل ؟
لاحققت هدفك تعتبر ناجح .. لا اخفقت في تحقيق هدفك تعتبر فاشل ..مهما كان هذا الهدف
3- وش نوعيه الكتب الى تحب تقرااها .. وهل تحب تقراء عن الديانات الاخرى عقائدهم , افكارهم , معتقداتهم ؟
والله الصراحه منوّووول كنت اقرا اما هالحين مبطييي مافتحت كتاب :D والله معد ألقى وقت للقراية ولا عد اهضم قراية الكتب زي منول .. الديانات الأخرى قليل قريت عنهم ولا تستهويني :D
4- النزعة الى الكمالية .. هل تعاني منها .. وهل تسعى لبلوغ القمة في كل شي .. عل سبيل المثال بما اننا في المنتدى بعض الاعضاء يقول ياانزل موضوع قوي اقل شي يتثبت ولا ماانزل موضوع احسن ؟
والله حلو الواحد يطمح للقمة ويعزز طموحه بسعي نحو بلوغها .. لكن لبلوغ القمه تحتاج إلى عمل وصبر وجهد .. وفي مثالك ..ما اعتقد انك إذا امتنعت عن إنزال موضوع راح تسعى لبلوغ قمتك اللي حاطها براسك
5- سليمان متى يكون حنون وطيب ومتى يعصب ويزعل ؟
والله مدري .. انا عند نفسي قبلي وش حليلي وودي احبني بس اخاف افشلني وتخيب مشاعري :D ..شي اكيد غيري ابخص مني في نظرته لهالأمور ..لكن اغلب شي اكون حنون وطيب مع البزران
اما التعصيب فانا ما اعصب الا خمات ..بس تعصيبة عن الف تعصيبة :D ..وما اعصب الا على اسباب تافهه :D .... يعني مرة راحوا اهلي لعمتي وانا بارجعهم ولاعلموني اني انا اللي بأجيبهم :D ..دقوا قالوا وينك..يالله تعال مرنا ..مع اني كنت في البيت ذاك اليوم وفاضي ..لكني عصبت عشانهم ماقالوا لي من اول:D ..صح اني من زود الحقد بغيت اوديهم للهيئة اقول شوفوا ذولي صديقاتي :D لكن يوم فكرت فيها بهدوء يعني مافيه اي داعي للتعصيب من الاساس :D ..
6- بكل تأكيد النت اخذ منك واعطالك اذا قارنت بينهم هل تجد فعلا ان النت مفيد لك ؟
بكل تأكيد مفيد لي ..عني انا شخصيا فادني النت ووسع مداركي وفتّح ذهني ..فاستفدت منه استفادة مايعلم بها إلا الله
7- اذا بدات تستعرض شريط حياتك هل تحس انك راضي عن نفسك ؟
إلى حد كبير الحمدلله راضي ..ولو هالشريط يحذف منه المقطع حق فترة المراهقة تسان ياسلااااااام :D
8- وش اكبر مشكلة تواجه الفتاة , واكبر مشكلة تواجه الشاب في مجتمعنا السعودي ؟
في مجتمعنا السعودي .. اكبر مشكله تواجه الفتاة اخوها :D .. واكبر مشكلة تواجه الشاب خويّته :D
9- حدثنا عن ايام طفولتك كيف كانت هل كنت هادي ولا طقاق مع خوانك وهل كنت طفل هادي ولا من النوع الى يخوفونه اهله وتقوله امه .. الى يطلع في الشارع يجيه الحرامي ياخذه ؟
خخخخخخخخخخخخخ الله يهديك بس .. امي ماتقول اللي يطلع في الشارع يجيه الحرامي ياخذه... لأ كانت تقول لنا ياحراميه انتبهوا تاخذون عيال احد :D
الصدز فترة طفولتي ماكنت لا هادي ولا بثر .. كنت مع الخيل ياشقرا :D ..لاصرت في المدرسة اصير وش حليلي وفي حالي اباري الساس ..وبرضه إن صرنا لحالنا انا واخواني مانتعدى البيت وملائكه سم الله علينا ..لكن لااجتمعنا مع بزران ثانين ..والا جانا يمرح عندنا ولد عمي والا رحنا نمرح عنده غدينا شياطين اعوذ بالله:D ..يعني اذكر موقف من بثارتنا مستحيل انساه :D .. من زمااااان مره مخيمين ..طاقين خيام .. خيمة للرجال وخيمة للحريم ..اذكر وحدة من بنات خالتي كانت موزيه الببسي همن طلعته وعطت البنات ولاعطتنا منه :( تقول بلاكم يالعيلان تطيّشونه منتب تشربونه :( ..قمنا حقدنا على الجنس الانثوي كله :D .. صرنا نجي باسرع ماعندنا ونرجف الحريم الكبار اللي يتسنّدن على طرف الخيمة من ورى :D ..همن رحنا وذبينا عباياتهم بالمجرى حق موية السقس اللي نغسل منه ..ومتشققييييييييين وناسه لأننا انتقمنا منهن خخخخخخخخخخخ ياشطننا وحنا بزران
10 - بما انك عيار .. وش رايك في نظرة مجتمعنا للعيار تلاحظ انهم مايحترمونه كثر مايحترمون الشخص الغير عيار
واحيانا ينظرون للعيار بنظرة مهيب زينة يحسون انه انسان فارغ وماعنده هدف ..... ألخ
ليش البعض ينظر له بهالنظرة ؟
والله لانيب عيار ولانيب راعي عيايير .. صح ان جانب الهزل يغلب عندي لكن لفظ عيار غير منطبق علي :D ..ويمكن الشي الوحيد اللي يعانيه العيار هو انه داااااايم يوخذ كلامه على انه استهبال :D حتى لو يحتسي جد ويصيح من الحماس .. مااش تحس كلن يقول ماااتخلي عيارتك يالعيار :D ..واللي الاحظ في نظرة مجتمعنا ان العيار مرغوب ومجالسته محد يمل منها وكلن يطلب وده
11- بماا اننا في اجواء المونديال الان هل انت رياضي ولك في الكورة ولا لا ؟
ايييييه بالحيل :D ..من زود حبي للمباريات والرياضه ..لادريت ان فيه مباراه ذاك اليوم معد رحت الاستراحه :D
ياخي مالله عطاني حب بهالكورة مدري ليه :D ..انا بس اخق مع رونالدينهو واتابع لقطاته بكل مكان .. اما غيره فمع احترامي لهم احس لو يقلبون بدال لعب كورة إلى لعب "عين سين صاد الدور على تهاني" انه ابرك لهم ولنا
اكرر شكري للمشرفين ولك على هاللقاء الى اكيد بيكون ممتع
تمنياتي للجميع بالتوفيق
الشكر لك حبيب قلبي على تواجدك واطلالتك الخفيفة ..ونتمنى لك التوفيق والسداد
روح الأسرة
18-06-2006, 18:42
EMILY
wej3 ....looo7t almfateee7 3a6laanh....refe'9t tektep 3araby
wa re7b be sulimaan ....ne3m alu'7teaar......
ley 3awda
~~~~~~~
SaDeEeM
ونعم الاختيار .. جدا موفقين فيه
ضيفنا متميز بغض النظر عن كونه عيار طراز أول .. الا انه متميز حتى بردوده الجادة ماشاء الله ..
مجرد ترحيب ولي عودة ان شاء الله
.. سديم ..
~~~~~~~
wind_rose
صباح الخير
سليمان من اليوزرات الي اثبتت وجودها في وقت قصير ..
كثير احترمه واتابع ردوده واحس انها تعطيني خلاصة الفكرة بطرح متزن .
سؤالي :
الي من البداية تابعك يحس انك متشرب بروح المنتدى مما يعطينا تصور انك تكون عضو قديم
او متابع من فترة طويلة يعني سنوات .. هل تصوري صحيح اذا لأ فكيف تفسر الموضوع ؟
وشكرا الأسرة
EMILY
Yes , I am fine Thank you :D
منورة اختي ايميلي والله يحييك ويبقيك ان شاء الله
SaDeEeM
الله يحييك من ذوقك يا اختي .. اشكرك على ترحيبك واشكرك على اطلالتك الرائعه ..منورة بس انه قضى اللقاء وانتي مابعد عدتي :D
wind_rose
صباح النور .. اشكرك وخيتي ويند على كلامك اللي اعتبره فخر لي ووسام اعلقه على صدري
بالنسبة لسؤالك : نعم تصورك صحيح وفي محله ماشاء الله عليتس .. انا فعلا كان لي يوزر سابق بالاقلاع :D ..بس من زود مصالتي وبثارتي فيه احس ودي افقد الذاكره عشان انسى انه لي :D ..وبالاساس ذيك الايام كانت نظرتي للمنتديات غير نظرتي هالحين ..فممكن هذا سر التغير الشاسع بين اليوزرين ..ماكنت اكتب فيه واجد بصراحه ولاكنت اتابع الاسره منوّل ..كنت في سعة الصدر والمنتدى العام والكمبيوتر اكثر شي . انقطعت عن الانترنت كله فتره طويلة همّن رجعت له ورجعت للاقلاع بس كمتابع لفترة لا بأس بها .. إلى ان سنحت الظروف وسجلت بيوزري ذا
الف شكر لك اختي ويند ومنورة المكان
روح الأسرة
18-06-2006, 18:47
لافندر
حياك ربي
ردودك تكشف عن انسان واعي
س / كيف بنيت قاعدة فكرك في ظل الشبهات و اللخبطة والحكي الي حاصل الان ؟!
س / من أكثر كاتب يجذبك ؟
شكراً يالأسرة
~~~~~~~
رمال
السلمي حته وحده : )
.. راح تكون مقابله مميزه .. اسئلتي باطلعها من اجاباتك << ابد ما نوت تستقعد لك خخخخخ
بالتوفيق خيو : )
لافندر
الله يحييك اختي وشكرن على لطفك
بالنسبه لبناء قاعدة فكري فانا الحمدلله ماتعبت فيها ولافكرت ابنيها :D ..هي بنت نفسها بنفسها وفقا للظروف والمؤثرات والبيئه اللي انا فيها .. وشي اكيد الاشخاص والمواقف اللي مريت فيها لها الأثر الكبير في بناء قاعدة افكاري
ودام فكرك واضح وشامل ..ولا يتقاطع مع اي مبادئ وثوابت ..ولا يخرج من تحت المظلة الشرعية ...ومع ثقة قليلة بالنفس ..صدقيني لا شبهات ولا حكي راح تزحزح منك او تحرك فيك شعرة
بالنسبة لسؤالك الثاني .. فماحددتي كاتب بالاقلاع والا من برا ؟ :D .بالاقلاع لو ارغمتيني على ذكر شخص واحد كان قلت مرثية فرح الله يحرسها باسمه
رمال
الله يحييتس ويبقيتس ياخيه .. المقابله متميزه بوجودك وبتواجد هالكوكبة الرائعه ماشاء الله .. وترى يان شفتس مستقعده بأعلم عليتس "لست بثره" خل تستقعد لتس بعد :D
والله يوفقك ان شاء الله دنيا وآخره ..
روح الأسرة
18-06-2006, 18:50
رجه ونص
مساء الخير
وها بس وليدي هنية هلا يمه شلونك بشرني عنك تو ما نور البيت
قصدي الاسرة
شف وانا امك انا شهادتي فيك مجروحة تخبر الام لازم تمدح وليدها بس صدقا
انت من الاقلاعيين الي اموت ضحك اذا قريت ردودهم وتعجبني عقلانيتهم ووسطيتهم
الي نحتاجها واهم شيء احس علاقتك بامك وخواتك ما شاء الله مرة حلوة فالله
يخليك لكل عين ترجيك
1- ليش تلزم علي اكتب بالعيارين يوم كنت مشرف ولا ترد على موضوعي هل السبب
انه موضوعي كان مالع وكنت مستحي تفشلني <<<<<<< حركات بزران
2- مين الاقلام الي تتابعها بالاقلاع وتشدك
3- مين هم الاعضاء الي تطورت علاقتك فيهم وصارت خارج حدود النت
واذا تذكرت شي بنكس
~~~~~~~~
قطر المطر
هلا والله بـ / سليمان
ارحب فيك
وسؤالي عن توقيعك
بس مهوب الحين اذا تفرغت سألتك
امي الغالية / رجة ونص
الله يحييك اميمتي رجة ويسلمتس ..استانست يوم شفت ردتس pb094 ..كلي فخر بهالاعجاب وبإذن الله اسعى إلى استمراريته ..
1- ليش تلزم علي اكتب بالعيارين يوم كنت مشرف ولا ترد على موضوعي هل السبب
انه موضوعي كان مالع وكنت مستحي تفشلني <<<<<<< حركات بزران
خخخخخخخخخخخخخخخخخخخخخخخخخ يا اميمتي اصبري خل اشرح لتس ..انتي تذكرين قصة علي بابا يوم دخل المغارة ولقى الكنز وضيّع "افتح ياسمسم" !! معد عرف الكلمة اللي تفتح الباب ثانيه؟ .. هه هذا كأنه انا يوم شفت رجة بكبرها كاتبه موضوع..لم استطع النطق بأي حرف .. وكأني بالحروف تحقر نفسها إذا ماكُتبت عن موضوع لك ..فلم يسعني إلا ان اسكت في حضور هذا الإبداع ..او كما قيل الصمت في حرم الجمال جمال << زينه التصريفه والا ازوّد شوي؟:D
الصراحه والله ياميمتي موضوعك فوق اني أقيّمه ..ماشاء الله عليتس مايحتاح تزكية .. لكن تراي آسف عزمتك ولا ضيّفتك pb094 .. ومارديت بسبب بعض الاعتبارات اللي احتفظ فيها لنفسي pb094
2- مين الاقلام الي تتابعها بالاقلاع وتشدك
والله واجد اللي يشدّوني بصراحه ماشاء الله عليهم كلهم مبدعين..ولو تسئلين نفسك هالسؤال صدقيني منتب قادرة تجاوبينه :D ..لأن في كل مجال فيه واحد يشدك وتتابعه وصعب استحضرهم في اجابه .. وانتي من احد الاقلام اللي تشدني دائما وافخر بشرف معرفتي بها والله ..
3- مين هم الاعضاء الي تطورت علاقتك فيهم وصارت خارج حدود النت
كثارين :D عندتس التفخ واضح وهايم وليتانا وبنز وحرباز وكودجي ..وفيه غيرهم اتمنى تتطور علاقتي معهم بس ماجت الظروف على كيفنا :D
منوره ماما رجة الله لايريك مكروه ان شاء الله
قطر المطر
الله يحييك ويسلمك .. بس تراه مابعد جا سؤال التوقيع :D ..انا موجعني بطني ودي اعرف يعني توقيعي مافيه الا ايقونه وش بتسئلين عنه بس !! :D
روح الأسرة
18-06-2006, 18:55
NawaL
حيا الله سليمان ، نورت الأسره بتشريفك ضيف في اللقاء ،
وانت احد ابنائها البرره ، بتواجدك الطيب ، ونقاشك المثمر ،
سليمان شخصيه تميزت بالوسطيه ، لا غلو في الإنغلاق ولا الإنفتاح ،
من ردودك اللي واجهتني لمست فيك صفه صعبه تتواجد بسهوله ،
وهي عدم الإنتقاد ، تاخذ الأمور من جانب منطقي بحت ،
من الكُتاب اللي إذا شفت ردهم آخر شي بالموضوع احرص على متابعته ،
لتيقني انه يحمل فائده ، ونقاش عقلاني ، بأسلوب خفيف ، وقريب من الآخرين ،
سعدنا بلقائك ، نتمنى تَسعد بصحبتنا في هذا اللقاء ،
- تفكيرك في الردود هل تطبق هالشي في حياتك ،
بمعنى سليمان داخل النت هو سليمان خارج النت ؟
او انت تشوف انه فيه افكار الواحد ممكن يؤمن فيها لكن مايقدر يطبقها
- إذا نطلب منك ترجع بشريط ذكرياتك ،
واحلى سنه بحياتك ، او مواقف جميله واجهتها ،
مواقف محرجه ، مواقف صعبه تغلبت عليها ،
قرار مصيري اخذته ، وبعدها ندمت عليه ،
- الإقلاع منتدى صعبه الإبتعاد عنه إلا في حال الإنشغال ،
نكتب مع الأعضاء ونكون معهم قلب واحد ،
سليمان اذا دخل الإقلاع اول منتدى يدخله ؟
ترتيب المنتديات بالنسبه لك من ناحية الأقرب لك ،
- بالنسبه لي قارنت بين كنت عضوه وبين مشرفه
فيه فروق عده ، بين اخذ وعطا ،
من خلال تجربتك الإشرافيه سليمان ، وش اخذ منك الإشراف وش اعطاك ،
اتمنى ما ثقلت عليك ، تمنياتي لك بالتوفيق ،
NawaL
الله مييير يحشم جلالتس ويرفع مقدارتس اختي نوال ..شرف كبير يقال لي هالكلام من شخص مثلك ..وان شاء الله احافظ على هالصورة الطيبة اللي مأخوذه عني ..
- تفكيرك في الردود هل تطبق هالشي في حياتك ،
بمعنى سليمان داخل النت هو سليمان خارج النت ؟
او انت تشوف انه فيه افكار الواحد ممكن يؤمن فيها لكن مايقدر يطبقها
نعم صادقه .. فيه افكار يقدر الواحد يطرحها هنا ويطبقها ..وفيه افكار لاتعدو كونها مسئله اعتقاد وإيمان .. قد يكون الواحد يحلم بتطبيقها واقعا ولكن صعب عليه ..أو قد يكون غير واقعي ويكتب عن افكار حتى هو لا يؤمن بها وقد لايطبقها حتى و ان شاءت له الظروف..
انا نفس سليمان اللي برا ..ونفس تفكير سليمان اللي برا ..لكن هنا اضع فكري كنقاط وآراء عن طريق رد او موضوع .. وبرى كردود افعال وقرارات .. ربما هنا اطرح مايجول بخاطري بدون اي اعتبارات أخرى ..بينما خارج النت لأ قد توقفني امور اخرى ..
- إذا نطلب منك ترجع بشريط ذكرياتك ،
واحلى سنه بحياتك ، او مواقف جميله واجهتها ،
مواقف محرجه ، مواقف صعبه تغلبت عليها ،
قرار مصيري اخذته ، وبعدها ندمت عليه ،
احلى سنة بحياتي مدري بصراحه ماحسيت فيه سنة مميزه عن اخرى :D ..يمكن سنوات الدراسه والكلية هي اميز شي بالعالم عندي ..والمواقف الجميلة سبحان الله تنّسي مادري ليه ..
من اصعب المواقف هو بكل تأكيد موت والدي الله يرحمه ويرحم اموات المسلمين :( .. مع ان عمري كان خمس سنين بس لازلت احتفظ بذكرى ذاك اليوم وبتعابير وجه امي وقتها .. واتذكر ذاك اليوم بتفاصيله كأنه حلم توني حالمه
اما قرار مصيري وندمت عليه ..فمدري يوم فكرت وفكرت حسيت اني من الاساس ماعمري اتخذت قرار مصيري عشان اندم عليه :D ..مااش قهر ماحضّرت عمري لهالاسئله :D
- الإقلاع منتدى صعبه الإبتعاد عنه إلا في حال الإنشغال ،
نكتب مع الأعضاء ونكون معهم قلب واحد ،
سليمان اذا دخل الإقلاع اول منتدى يدخله ؟
ترتيب المنتديات بالنسبه لك من ناحية الأقرب لك ،
صادزه والله هالاقلاع مهما كابرنا ومهما واجهنا فيه إلا انه صعب تركه ...تحس القلوب كلها على بعض والميانه طايحه من اولها وكأنك بين اهلك ..
ترتيب المنتديات بصراحه على حسب المزاج .. بس الاغلب دائما ادخل الاسره والجادة والقهوة وبرضه الصور والفن التشكيلي احب اطّلع عليه دايم
- بالنسبه لي قارنت بين كنت عضوه وبين مشرفه
فيه فروق عده ، بين اخذ وعطا ،
من خلال تجربتك الإشرافيه سليمان ، وش اخذ منك الإشراف وش اعطاك ،
من خلال تجربتي الاشرافية أنا اعترف انها كانت فاشله بكل المعايير:D .. الفشل كان مني انا شخصيا .. كنت مهمل وما احس اني قدمت شي ولا حسيت اني اعطيت المنتدى حقه من الاهتمام للأسف :( .. كنت دائما متواجد بالمنتدى لكن ما حاولت ازين شي مدري ليه :(
والحمدلله اعتبر الاشراف على المنتدى "حتى في فشلي" اعطاني اشياء كثير وتعلمت أمور احسها فادتني الحمدلله لكن الأخذ ما أخذ مني شي الا ان تسان فواتير ودراهم التلفون :D
اتمنى ما ثقلت عليك ، تمنياتي لك بالتوفيق ،
بالعكس والله لا ثقلتي ولاشي .. الا من زين اسئلتس ودي ارجع اجاوب ثانيه :D ..شرفتينا ونورتينا يا أبلا نوال :D
روح الأسرة
18-06-2006, 19:01
الشطورة
سليمــــــان
يالله انك تحيه..
سليمان انا الشيء الي فعلا أشوفه يميزك ماشاء الله ردودك غريبه عجيبه تعجز تعصب لاقريتها لازم تقول "الله ياسليمان" واقعي لأبعد حد من جد ماتزودها . الي بقلبك تقوله بس بدون ماتجرح أحد وتوصل المضمون بسلاسه.
مواضيعك أقل شيء يُقال عنها مجنونه فضيعه وتهبل استمتع بقراءتها لاخر حرف "الله لايضرك " واصل سلووووم <<<< قاطه الميانه
سؤالي الحبيب..
هالسؤال يهمني أحسه يجمع أكثر من نقطه بسؤال واحد دائما احب اسأل العالم هالسؤال <<< ماعندها غيره
لو قالو سليمان بنوديك في جزيره منعزله مافيها الا انت كائن حي بشري وسط البحر ولا احد بيعرف اصلا انك فيها تقضي فيها بقية عمرك بدون جوال ولا طياره ولا شيء <<< قلك اعقد الموضوع الحين بس
قبل ماتروح بتاخذ معك اشياء معينه بالعدد عشان مابنسمح لك تاخذ الي تبي وبنعطيك مدة شهر واحد تسوي فيه التالي.
1.تقول لكل شخص عزيز على قلبك كلمه اخيره .من هم؟؟ ووش بتقول؟؟
2.تختار معك كتابين فقط . وشهم؟
3. من تاخذ معاك ؟؟ (مع العلم انه ممكن يكون شخص قابلته معروف او شخص تسمع عنه اوالي تبي ) وليه تختاره بالذات؟؟
4.أسماء ل 3 أشياء تاخذها ووش الغرض منها؟؟ (لاتقولي موبايل ولابتوب مستحيل أنسى ) قلت اشياء مو وسائل اتصال.
5.وكلمه اخيره تقولها لأعضاء الاقلاع قبل ماتروح الجزيره <<< رحمتك والله:sm1:
6.آخر شيء بتسويه في العالم قبل ماتروح.؟؟
بس خلصنا آسفه ع الاطاله بس والله يهمني أعرف واذا ودك تضيف شيء المجال open لكـ وشـــــــــــ كرا
الشطورة
الله يسلمك ياوخيتي ويخليك ان شاء الله ..شكرن على ذوقك ولطفك ..ياجعلك تسملين ..
اما هالسؤال احس لو يجيني في اختبار تسان كتبت اسمي ونحشت والا قلت الحل فايل وفكيت عمري:D
خل باحاول اجاوب نقطه نقطه ..
1.تقول لكل شخص عزيز على قلبك كلمه اخيره .من هم؟؟ ووش بتقول؟؟
يبي لي اسبوع وعساي الحق اقول لكل العزيزين على قلبي :D .. وبأقول لهم حللوني وابيحوني
2.تختار معك كتابين فقط . وشهم؟
بآخذ معي القرآن وكتاب تعليمي "تعلم تحفر قبرك في ست ايام بدون معلم" :D
3. من تاخذ معاك ؟؟ (مع العلم انه ممكن يكون شخص قابلته معروف او شخص تسمع عنه اوالي تبي ) وليه تختاره بالذات؟؟
هماتس تو تقولين لحالك وجزيرة مافيها الا انت ؟ لا ماعلي يا خلوني لحالي ياجيبوا كل اللي ابي والا بطلت هه :D وان كان ولابد فلا بأس بنناسي معماري جيبوها بس باشوفها وهي تدق رقبه همّن باقبّصها لين تموت :D
4.أسماء ل 3 أشياء تاخذها ووش الغرض منها؟؟ (لاتقولي موبايل ولابتوب مستحيل أنسى ) قلت اشياء مو وسائل اتصال.
سكينة، مركى ، عدّة شاهي << يحتاج اقول وش الغرض منها؟:D
5.وكلمه اخيره تقولها لأعضاء الاقلاع قبل ماتروح الجزيره <<< رحمتك والله
ياجعل المنتدى يخرب عليكم :D
6. آخر شيء بتسويه في العالم قبل ماتروح.؟؟
بأروح اصطر مديري بالدوام :D ..بس هاااااه !! تراكم قايلين معد ترجع .. موب ان جا عقب ترجعوني وابلش معه !! :D
بس خلصنا آسفه ع الاطاله بس والله يهمني أعرف واذا ودك تضيف شيء المجال open لكـ وشـــــــــــ كرا
الله يحييك ويبقيك منورة ياخيتي
روح الأسرة
18-06-2006, 19:06
هنـادي
سليمان نورت الاسره
حاليا ماعندي اسئله بس الله يكون بعونك من اسئلتي
~~~~~~~
ابنة رشد
مرحباً ..
.
.
أستئذنكم في طرح أسئلتي مباشرة ، وربما لو أني متابعة بشكل مستمر لكتاباتكم أو لمنتدى العيارين لخرجت بغيرها لكن هذا ما لدي من خلال نظرة عامة :
نتلمس الذكاء والقدرة على صياغة الأفكار بطريقة مبتكرة مع روح السخرية والعيارة في بعض أعضاء منتدى العيارين خاصة المتميزين منهم ..
ـ هل تعتقد بما أني لاحظت في ردودك نوع من الفطنة والنباهة أنك استفدت من هذه الميزة وارتقيت بها ووجهتها التوجيه الصحيح الذي يشعرك بالرضى عن نفسك ؟!
ـ لماذا ـ حسب ما لاحظت (أحياناً)في ردودك ـ تُكثف استخدام هذه الميزتين في اتجاه واحد ! قد يكون إيجابي في نظرك لكنه سلبي في نتائجه ؟!>> لاحظ أنني قلت أحياناً حتى أكون منصفة لأن متابعتي محدودة
ـ من خلال إشرافك على منتدى العيارين سابقاً أليس للمنتدى نظرة مستقبلية تجديدية وتوسعية ؟
بمعنى أعضاء العيارين رغم ما يمتلكونه من ميزات ( النباهة أوالذكاء وحضور البديهة) إلا أن كتاباتهم قاصرة على موضوعات محددة مثل ( النساء ـ الترفيه ـ السفرات ـ الزواج ـ وقليل من القضايا الإجتماعية ) وبطرح يغلب عليه الإغراق في الجزئيات أكثر من إبراز الجانب النقدي أو الإرشادي .. وربما لو حدث وبرز هذا الجانب في الموضوع سرعان ما يتلاشى التركيز عليه في الردود ، فالردود تركز على الجوانب الهامشية المضحكة أكثر من الهدف الرئيس للموضوع ..
ـ ما المانع من طرق العيارين لموضوعات أخرى ( سياسية ـ اقتصادية ـ ..الخ ) بشكل أكثر دقة من التلميحات العابرة ؟!
ـ هل هناك توجه لجعل الكتابة في منتدى العيارين ـ سواءً بالتشجيع أو الإلزام ـ شمولية بطرق جميع النواحي بحيث يتجاوز الطرح لتناول القضايا الجادة ومن ثم تنسخ موضوعاتهم المميزة للجادة .. والموضوعات السياسية وتنسخ المميزة للسياسي .. والأسرة وهكذا .. حتى يحصل التنوع في الطرح والجذب ويستبعد التكرار وتشابه الأفكار أو المضامين ؟!
إن لم تكن هذا الفكرة مطروحة فما رأيكم بها ؟!
ـ لماذا لا نرى حضور قوي لأعضاء العيارين في الجادة والسياسي على الأقل مقارنة بحضورهم في منتديات أخرى .. رغم أن كثير منهم أجزم أنه لو دخل الجادة لأضاف لها الكثير لما ألحظه على كثير منهم من نباهه وذكاء وإنصاف وثقافة ؟!
ـ بصفة عامة وفي ظل تركيز بعض الأعضاء والردود على الجزئيات المبتذلة في الطرح العياري هل تتوقع أن يكون مستقبله أكثر رقياً وجذباً لكافة الأطياف من القراء ؟!
.
عفواً هذا ما لدي على عجالة .. أرجو أن تكون أسئلتي واضحة وخفيفة !
وشكراً
.
هنـادي
حياتس وسعيد جدا بتواجدتس ..
ابنة رشد
حياك الله وبياك ..اشكر لك تشريفي في هذا اللقاء المتواضع ..
سأجيب على ماتفضلتي به نقطه نقطه ..
.
مرحباً ..
أستئذنكم في طرح أسئلتي مباشرة ، وربما لو أني متابعة بشكل مستمر لكتاباتكم أو لمنتدى العيارين لخرجت بغيرها لكن هذا ما لدي من خلال نظرة عامة :
نتلمس الذكاء والقدرة على صياغة الأفكار بطريقة مبتكرة مع روح السخرية والعيارة في بعض أعضاء منتدى العيارين خاصة المتميزين منهم ..
ـ هل تعتقد بما أني لاحظت في ردودك نوع من الفطنة والنباهة أنك استفدت من هذه الميزة وارتقيت بها ووجهتها التوجيه الصحيح الذي يشعرك بالرضى عن نفسك ؟!.
اشكرك على الإطراء واتمنى ان يكون فيني ماقلتي .. حلو الواحد لما يكون فطن ونبيه .. والأحلى انه يبرز من خلالها إذا كانت موجوده فيه ..
ما اعتقد اني استفدت منها وارتقيت بها او قصدت ذلك..لأن هذا اسلوبي في الحوار وهذا طبعي ولا أحس انها موجودة فيني اساسا .. لكن على كل حال غيري يراني افضل مني.. فاتمنى اني وجهتها التوجيه الصحيح وبالتالي إلى الشعور بالرضى عن نفسي
ـ لماذا ـ حسب ما لاحظت (أحياناً)في ردودك ـ تُكثف استخدام هذه الميزتين في اتجاه واحد ! قد يكون إيجابي في نظرك لكنه سلبي في نتائجه ؟!>> لاحظ أنني قلت أحياناً حتى أكون منصفة لأن متابعتي محدودة
ما لاحظت على نفسي اني اكثف من استخدام هالميزتين في اتجاه واحد .. هي ليست ميزه افكر بوضعها في كل رد ..بقدر ماهي طبع أو اسلوب اعمل بها في جميع الاتجاهات دون ان احس..
ولو كنت اعلم ان نتائج ما أقوم به سلبية لما كتبت شي خير شر ..إبن آدم تفكيره محدود يقف عند حد معيّن لا يتعداه وبالتأكيد فوق كل ذي علم عليم .. هنالك من هو اوسع مني علما واشمل نظرة .. فإذا كان يرى بأن نتائج ما اقوم به سلبيه .. كلي رجاء وامتنان بأن لا يأخذني كعدو بل كإبن أو كأخ له ..واتمنى منه ان يقومّني إلى الطريق الصحيح ويناصحني ويبيّن لي أوجه السلبية في نتائج ما أقوم به .. وله مني كل حب وتقدير وأعده بدعوات بظهر الغيب إن شاء الله
من خلال إشرافك على منتدى العيارين سابقاً أليس للمنتدى نظرة مستقبلية تجديدية وتوسعية ؟
بمعنى أعضاء العيارين رغم ما يمتلكونه من ميزات ( النباهة أوالذكاء وحضور البديهة) إلا أن كتاباتهم قاصرة على موضوعات محددة مثل ( النساء ـ الترفيه ـ السفرات ـ الزواج ـ وقليل من القضايا الإجتماعية ) وبطرح يغلب عليه الإغراق في الجزئيات أكثر من إبراز الجانب النقدي أو الإرشادي .. وربما لو حدث وبرز هذا الجانب في الموضوع سرعان ما يتلاشى التركيز عليه في الردود ، فالردود تركز على الجوانب الهامشية المضحكة أكثر من الهدف الرئيس للموضوع ..
ـ ما المانع من طرق العيارين لموضوعات أخرى ( سياسية ـ اقتصادية ـ ..الخ ) بشكل أكثر دقة من التلميحات العابرة ؟!
في فترة إشرافي لأ لم يكن له نظرة مستقبليه تجديديه وتوسعية ..قد يكون جذب الاعضاء هو ماكنا نصبو إليه سابقا إبان توليي الإشراف .. أما الآن فأهل مكة أدرى بشعابها
وبالنسبة لاعضاء العيارين ..فالنفس وماتهوى..ليس كل الناس باهتمامات واحدة ..ولا بأهداف متماثلة لعل اغلب اهتمامهم قد يكون منصب على الكتابات الساخره والضحك وسعة الصدر ..وإخراج الكبت الداخلي الموجود فيهم من خلال مواضيع جريئه تنفس عن مافي مكنونهم.. فهم يتركون الدنيا وراءهم بهمومها ونكدها ومشاكلها ويمنحون انفسهم مجالا للضحك والسخرية بعيدا عن كل مايكدر صفوهم من موضوعات سياسية أو اقتصادية او...او..
وليس هنالك اي مانع بل بالعكس رأينا بعض الكتّاب في العيارين يتطرقون لبعض الموضوعات السياسية والاجتماعية بشكل عياري سلس ...لكن الاغلبيه ليست كذلك
ـ هل هناك توجه لجعل الكتابة في منتدى العيارين ـ سواءً بالتشجيع أو الإلزام ـ شمولية بطرق جميع النواحي بحيث يتجاوز الطرح لتناول القضايا الجادة ومن ثم تنسخ موضوعاتهم المميزة للجادة .. والموضوعات السياسية وتنسخ المميزة للسياسي .. والأسرة وهكذا .. حتى يحصل التنوع في الطرح والجذب ويستبعد التكرار وتشابه الأفكار أو المضامين ؟!
إن لم تكن هذا الفكرة مطروحة فما رأيكم بها ؟!
لا لا اتوقع ان هناك هذا التوجه ..والفكره معمول بها حاليا بدون تشجيع أو إلزام ..تقدرين تشوفينها بشكل اوضح في منتدى قهوة الاقلاع ..اغلب اعضاء العيارين لما يكتب عن قصة أو سالفة ساخره يكتبها في منتدى العيارين أما النواحي الأخرى سياسية كانت أو اجتماعية فيغلب طرحها في قهوة الاقلاع ..وللمعلومية هنالك اعضاء ماشاء الله عليهم يملكون من حس العيارة الشيء الكثير لكن ما يكتبون في منتدى العيارين ولا يقربونه .
ومنتدى العيارين انا احس ان هذا هو توجهه ..وهذي طبيعة المواضيع فيه .. ولو طبقت فكرتك المطروحه فيه ..لكان دمجه مع منتدى قهوة الاقلاع أو الجادة افضل
ـ لماذا لا نرى حضور قوي لأعضاء العيارين في الجادة والسياسي على الأقل مقارنة بحضورهم في منتديات أخرى .. رغم أن كثير منهم أجزم أنه لو دخل الجادة لأضاف لها الكثير لما ألحظه على كثير منهم من نباهه وذكاء وإنصاف وثقافة ؟!
اولا ليس كل من تابع وكتب في منتدى العيارين عيارا كما انه ليس كل من كتب في الجادة جادا .. هنالك اعضاء موجودين في الجادة والاسرة .ماعمرهم طبوا العيارين لكن حس العيارة لديهم يفوق مالدى اعضاء العيارين بكثير ..واسلوبهم من نفس الاسلوب اللي ذكرتيه .. واولهم كبيرهم الذي علمهم السحر "المنفهق":D ..
وتساؤلك ياعزيزتي اجابته بسيطه .. لأن هدفهم من دخول الانترنت والكتابة غير هدفك انتي..وتفكيرهم غير تفكيرك .. والكل يكتب لإشباع رغبته وتحقيق هدفه ..وللناس فيما يعشقون مذاهب .. يرون انهم بهذه السخرية وسعة الصدر وصلوا هدفهم ورغبتهم المنشودة ..وكأني بلسان حالهم يقول : وش لنا ووش للغثا ذا كله خل نوسع صدورنا بلا جاده بلا قلق ! ..
ـ بصفة عامة وفي ظل تركيز بعض الأعضاء والردود على الجزئيات المبتذلة في الطرح العياري هل تتوقع أن يكون مستقبله أكثر رقياً وجذباً لكافة الأطياف من القراء ؟!
لا لا اتوقع :D
عفواً هذا ما لدي على عجالة .. أرجو أن تكون أسئلتي واضحة وخفيفة !
وشكراً
اسئلتك كالعسل على قلبي.. والشكر اولا وأخيرا لك لتشريفنا بتواجدك
روح الأسرة
18-06-2006, 19:13
EMILY
هلا سليمان
فرحت كثييير يوم دريت انك الضيف....
كأنهم دارين ان توني مادحتك في موضوع مكحوله...
شخصية سليمان ابهرتني...ماكنت متصوره ان فيه سعودي يفكر هالتفكير...
طيب.......جداااااااا متفهم
ردوده دائما غييير .ومقنعه.....وبحكمه...
من أشوف اسمه راد على موضوع على طول أدخل الموضوع ..علشان اقرأ رده......>>>>لايكبر راسك..
سؤالي بيكون شوي جرئ....وياليت تجاوب عليه
1-هل سبق وجرّبت الحب وخاصه عن طريق النت؟
لأني الاحظ بردودك...شخص مرّ بقصة حب مااكتملت...دائما ينصح ان الواحد ينهي حبه بالزواج اذا الاثنين مقتنعين,,
2-وش موقفك لو قالت لك اختك انها تحب واحد وبتتزوجه...
.مو شرط عن طريق تلفون ..يمكن بس علاقة منتدى او ماسنجر..؟
3-الكل يلاحظ تغيّر بشخصيته عن قبل...
ياليت تذكر لي الجوانب الايجابيه الللي اكتسبتها
وبنفس الوقت الجوانب السلبيه اللي طرأت على شخصيتك.. ؟
4-عيّار وطيّب..
كيف نظرة الناس لك؟.( اللي اقصده...يطيحون الميانه معك..ويقولون ايه طيب..وحليل..او كيف؟)
هذا اللي في بالي....واذا استجد شئ ..ماراح يردني شئ..راجعين راجعين بحول الله
تحياتي لك ونوّرت هالمساحه...
~~~~~~~~~~~
زهرة الأقحوان
واااااااو سليمان..
مفاجأة حلوة كثير!
انا جاية من سفر والأصوات تعلو بالخارج: يالله تعالي
نفسي أقرأ اش مكتوب فوق؛وما عندي وقت ؛ولوما قرأت في العنوان اسم سليمان