جسمك لا يكذب !! [الارشيف] - منتديات شبكة الاقلاع ®

ميادة

22-06-2006, 13:38

جسمك لايكذب

انه يترجم كل ما يأتيه من غذاء اما الى صحة او مرض
الغذاء الصحي والحفاظ عليه صار صعبا في وسط الحياة الحديثة
كل شيء تغير ..
ماعاد سهلا ان تكتفي بغذاء سليم خال من الالوان \ السكر \ النكهات الصناعية
اذا حاول الشخص ان يحافظ على غذائه صحيا سيجد نفسه
معزولا عن من حوله في حالات كثيرة ابسطها شرب الشاي ..
الوعي بالامراض التي يسببها الغذاء غير الصحي منتشر
لكن للأسف اصبح الكثيرون يتعاملون مع الاغذية الضارة
وكأنها خيار وحيد وقدر محتوم لا يستطيعون الفكاك منه
ولا النجاة بصحتهم \ انفسهم بعيدا عنه ..
جسمك لن يكذب ..
سيحكي غذائك
إما صحة وإما مرض .

جسمك لا يكذب

جسمك لا يكذب , انه يترجم كل ما في داخلك ..
لذلك تظهر السعادة جلية على جسم السعيد والمتفائل
و لا يخفى حزن الشخص مهما اجتهد في إخفائه ..
السعادة تنعكس بنضارة الوجه , و صفاء العينين والابتسامة
التي تحملها كل الملامح بصدق بدءً بالعينين و انتهاءً بالشعر !!
الصحة الجسدية مرادف للسلامة و الراحة النفسية ..
الحزن والقلق ينعكس بوضوح على جسم الإنسان
بشرة باهتة , نظرات أشبه بنظرات المحتضر ,
مشية متثاقلة , شعر ضعيف متهالك , وقد يتضاعف الأمر
أكثر من ذلك و يصيبنا الحزن والقلق بأمراض عضوية متعبة
مشاكل في الجهاز الهضمي \قولون \قرحة \بواسير\فقدان الشهية \ أو إفراط فيها
صداع
الآم المفاصل والعظام

كل شيء في جسمك سيتحدث نيابة عنك و يفضح كل ما تجتهد في إخفائه
تخلص من قيودك \ حزنك \ قلقك
اعمل باجتهاد \ توكل على من خلقك \ تفائل \ عش حياتك برضا
وسيتحدث عنك جسمك حينها بما يسعدك .

جسمك لا يكذب

حين تبدي المودة و تجاهد في اصطناع البهجة
واللهفة بمقدم احد ما بينما العكس هو الصحيح ..
مهما تظاهرت جسمك لن يكذب ..
عيناك ستقولان الصدق
ستقولان انك تبدلت !!
وأن الودَ ما عاد ودًا !
وأنتَ ما عدت أنتَ !

جسمك لايكذب

حين تخفي ودك ..
عيناك \ يداك \ كل مافيك سيفضح الود ..
لا تثق كثيرا بقدرتك على إخفاء
مافي نفسك ..

تحياتي للجميع .

:)

الكاسر888

22-06-2006, 13:45

هلا ميادة..

كثير اوقات كثير يضحكون بوجهك لكن ماترتاح لهم!

أعتقد نظرة العين تكشف كل شيء..عند غالبية الناس

يعطيك العافيه

الهلي

22-06-2006, 14:04

جسمك لا يكذب !!

صدقتِ..

موضوع جميل..
بارك الله فيك...

عزة ## المرتزة

22-06-2006, 14:10

موضوع رائع جداً
بالنسبة لي أحاول جاهدة يكون غذائي صحي لكن للأسف صعب
يكون صحي 100% ..يكفي يكون لو 50%
يعطيك العافية على الموضوع

صوت الصمت

22-06-2006, 14:17

ميادة

موضووووع خطير وهالايام احاول ابتعد عن ((البيبسي))

بس عجزت الحقير

حلو ان يكون اكلك صحي ودايما تشرب مويه

bp039

بوهه طايره

22-06-2006, 14:20

رائعه مياده

..

مهما تظاهرت جسمك لن يكذب ..
عيناك ستقولان الصدق
ستقولان انك تبدلت !!
وأن الودَ ما عاد ودًا !
وأنتَ ما عدت أنتَ !

Najed

22-06-2006, 14:23

:
هلا مياده ..
موضوع حلوو ..
بس يااختي وش تسوين بالي مايشتهون ياكلون اي شيء لازم يشمون ريحته قبل << الحمد لله والشكر :D
بس غصب على الواحد يعني لاحظت انه موب بس انا حتى بعض اهلي طبع شين :(
على قولة امي " نفسن شينه وجلدن مروح :D "
:
بس فيني ميزه اني مانيب احب الدهن يشحط حلقي pb036 .. واشبع بسرعه pb036
:
تسلمين مياده ( ورده )
:

cavallo nero

22-06-2006, 15:05

جـنــون مهـــرة

22-06-2006, 15:09

أبدعتــي ميــادة :)

مشكلتـي إنه كل شي خاص فيني

على حسب مزاجيتــي !!

حتى لو إني أدري بأنه خطأ اللي أسويه ويضرنـي

ماأسمع ولا أرضي إلا مزاجي ..

وكل شي بيكـون فوق راسي ، بس راضيـة :D

لا تثق كثيرا بقدرتك على إخفاء
مافي نفسك ..

فعلا ً ، معـــك حق ميــادة

مو كل مرة ينفع التمثيــل !!

Forgotten

22-06-2006, 15:16

موضوع رائع مياده
والحقيقه احنا نظلم اجسامنا كثير
يكفي الوجبات السريعه / الببسي
انا لو استغني عنهم كان صار اكلي صحي 100%
فيه محاولات خجوله للاستغناء عنهم
لكن مايمديني اتركهم الا وارجعلهم وبشوووق
اتمنى لكم اجسام صحيحه

شكرا مياده
bp039

علمتني الأيام

22-06-2006, 15:18

فعلا الجسم لا يكذب..

شخصيـا غصب عني أكل الأكل صحي واكل معه فيتامينات مكمله

لأن فيه بعض الفواكه ما أحبها..

مياده شكراً لك..

دارما

22-06-2006, 15:31

ابدعتي كلام سليم

بس من يسمع :(

يجيني فتره بسوي نفسي صحيه وحركات بس ماش ماحب

يعني انا ماحب الزيوت الكثيره وهذي نعمه بس ولو اكل مقالي :D

يعني انا فيني قولون ولا يهنى لي الا الاكل الحار اعرف اني بتعب بس اشتهيه :( وارحم نفسي اذا ماكلته :D

الله يعين بس عجزنا نصير صحين :D

مهما تظاهرت جسمك لن يكذب ..
عيناك ستقولان الصدق
ستقولان انك تبدلت !!
وأن الودَ ما عاد ودًا !
وأنتَ ما عدت أنتَ !

والله صادقه مافينى الا الهزل والكسل والخمول ونفس خايسه :D

يعطيك الف عافيه bp039 pb189

سيـدو

22-06-2006, 15:33

مش بطال

بس من يسمع

ياشينكمـ

22-06-2006, 15:35

صدقتي الجسم ما يكذب
دايما نحرص على الاكل الصحي بس وشلون نقدر وأكلنا كله
صار كيماويات وبلاوي بس قد ما نقدر نحاول نحافظ
عن نفسي البيبسي لي سنين ما اعرفه والمقليات ما
أحب اكثر منها.
مياده bp039

بيبسي يغلي

22-06-2006, 15:44

احاول واحاول
يعني البيبسي تركته سنتين ورجعت له اردى من اول
برضو الفاست فود لازم كل يومين اكل
هاليومين صايره بطله واكل فواكه
الشاي الاخضر صديقي (قلب ينبض)
يعطيك العافيه

NawaL

22-06-2006, 16:25

مثبت وبـ عنف

لي عوده لرد متواضع عله يدرك الأبعاد الجميله لروعة طرحك مياده !

يوسف

22-06-2006, 16:41

هل تحرص على أن يكون غذاؤك صحياً ؟

الاكل الصحي اسمع فية كثير وماأعرفة .. pb093
انا اذا اكلت فاكهة مرة وحدة في السنة اعتبر نفسي اكلت اكل صحي :D
مب هذا بس .. اذا اكلت اي شي من بيتنا مرة وحدة في الشهر راح اعتبر اني حققت شي صحي
غير طبيعي وان جسمي صحته زينة

اذا ماشربت بيبسي مرتين في اليوم وماأكلت وجبة من الوجبات السريعة راح اعتبر نظامي الغذائي
منقلب فوق تحت يحتاج للتعديل :D
الي مساعد صحتي هو شي واحد هو اني امارس الرياضة بعنف فقط

البحه

22-06-2006, 17:15

نحاول ونحاول ونشوف اخرتها وتخربها الاجازه ..
وليا جاء عرس ورطنا بهالجسم :D

يعطيتس العافيه ياقمر bp039

EMILY

22-06-2006, 17:21

^ ^ ^
ابوعبدالله....اووف وش هالاكل:eek: ..
على الاقل اترك الببسي ماجاب للشباب هشاشة العظام الا هوpb093
مره يقول اخوي ان معاهم واحد زلق
المهم جاه شلل
وقال لهم الدكتور ان السبب الببسي لانه يسبب حاجه زي تكلس العظام
فيمنع العظام من امتصاص الغذا فتكون هشه

هلا ميادهpb189

انا معاك بان المظهر الخارجي يكشف مابالداخل....

من زمان توفت ام وحده من البنات....بعد الوفاة بشهووور...
كانت بجلسة بنات ويسولفون ويضحكون وهي عادي تضحك
تصدقين وحده من البنات ماتعرفها تقول هالبنت تضحك ونظراتها مليانه حزن..!!:rolleyes:

وتصير لنا انا نكون متضايقين حدنا ونضحك ونبتسم ...مرات يكشفونا ومرات يمر الوضع ايزي:)

اما الاكل الصحي احاول ان اعدل اكلي ...للاسف اطفر شهر وارجع للشوكلت ولشرب ابريق شاي يوميا ولاتهون القهوه
الحسنه الوحيده اني مااكل الرز كثير...يعني 20 مره بالسنه

موضوع حلو سلمتي ومبرووك التثبيتbp039

قراءة

22-06-2006, 19:25

مـــيادة bp039

هل تحرص على أن يكون غذاؤك صحياً ؟

أحــاول أحـــاول أحـــاول

لي فترة نظام الغذائي تغير بقوة وللأسف صار للأسوء

>>> السن له دور :sm18:

جسمك لا يكذب!!

وانتي صادقة..

أحس انه يكسر خاطري لأني أجرم فية كثـــير

بس أهم شي اني أتلاحق علية :D

cavallo nero
واذا كان ولا بد دايت بيبسي

أخطر شي الدايــت, حاول قد ماتقدر انك ماتشربة مادامك لقيت العوض بالعصيرات

انا مدمنة دايت سفن ماقدرت اوقف منة :(

ان شا الله يتمتع الجميع بصحة ممتازة bp039

قشامه محترقه

22-06-2006, 21:07

موضوع راائع

يختي احاول اني اكل اكل صحي

الحين البيبسي والكولا وهالخرابيط الحمد لله مبتعده عنها لي 6 شهور وانشاء الله اقدر اصبر

المقلي ماعاد اكله ومبدلته بمشوي ...

الخبز صايره اكل خبز نخاله ( مشرع عجوز انا :D )

بس والله انذبحنا من اكل المقالي والحلويات وهالخرابيط

واكيد الاكل ونوعيته تنعكي على الجسم وبالذات الوجه

والله يديم الصحه علينا وعليكِ وكل موسلم

تحياتي ...

:)

عععععععععع

22-06-2006, 21:17

تخيلي شكلي وأنا آكل أكل صحّي !!!!

مايصلح ..

وتخيلي شكلي مبطل ببسي هههههههههههههه

حاليا ماأقدر آكل أكل صحّي إطلاقا .. لأن الغدا لازم يصير برا البيت .. والعشا مافيه عشا عليه العلم في البيت .. متعودين إن الوجبه الرئيسيه تكون الغدا ..

مستعد أسوي أي شي .. بس الببسي يخاويني فيه ..

t00fee

22-06-2006, 21:18

ياعمري ياجسمي
رحمته ماقد فكرت اكل اشيا صحيه
:(
من جد ضاق صدري

ميادة

22-06-2006, 21:56

الكاسر bp039
الهلي bp039
عزة المرتزة bp039
صوت الصمت bp039
بوهة طايرة bp039
Najedbp039
cavallo nerobp039
جنون مهرةbp039
forgottenbp039
علمتني الايام bp039
دارما bp039
سيدوbp039
خصام الوقت bp039
بيبسي يغليbp039
Nawal bp039
ابو عبدالله bp039
البحةbp039
Emilybp039
قراءة bp039
قشامة محترقة bp039
عععععععععع:D عادي تخيلت طلع مقاسك بالتمام
توفي bp039

الغذاء الصحي بنظري هو الغذاء المتوازن الشامل لكل الاصناف
و الخالي من الالوان والنكهات الصناعية
الاكل المقلي , السكر الكثير , الملح الكثير , الاكثار من اي صنف كان
وطبعا اللحوم الحمراء كثرتها مضرة ..
القهوة والشاي ياكافالو وايملي ماهي ضارة .. لها فوائد كثير لكن لما نشربها بشكل معقول
حتى الشوكولاته يايملي مفيدة لكن لما تكون جودتها عالية ماهي الشكولاتات المصنعه بشكل اي كلام
او يكون عليها الوان ..
المشروبات الغازية الحمد لله من زمان اتخذت قرار ماعاد اشربها من اكثر من ست سنوات
قلنا لك ياواحد من الناس اكبر منك ..... الخ pb095

مشروبات غازية ×
الوجبات السريعة ×
سكر زايد ×
ملح زايد ×
مقليات ×

عسل
تمر
حليب بمشتقاته
فواكه
خضار
سمك
زيت زيتون
خبز البُر
عصيرات طبيعية
شاي اخضر
pb189

لو نشوف الي حولنا الكبار و نقارن بين صحة الاشخاص المهتمين بغذائهم مع الغير مهتمين
بنتأكد بأنفسنا أن أجسامنا ماتكذب أبدا ..

مااحد اعطى الصحة النفسية اهتمام !!

الله يديم الصحة والعافية عليكم جميعا .
اشكرك نوال pb189 على لطفك .

orangah

22-06-2006, 22:37

والله انك صادقه !!

تدرين ساعات اعاهد نفسي اني بمشي على نظام غذائي صحي بس ماش ما أصمل !!

بس الحمدلله لي كم شهر مبطله المشروبات الغازيه نهائيا وحتى لو صارت قدامي ما أتلهف عليها زي اول يعني في البدايه الشي يصير صعب بعدين تتعودين ;)

احنا لو ربي يتوب علينا من اكل المطاعم بشكل مستمر كان احنا بخير !!pb093

والمشكلة ساعات الفواكه والخضار يجون يسيرون علينا بالثلاجه ويخلصون وانا ما سلمت عليهم خخخخخخخخخخخ

موضوع رائع ميمي bp039

اورنجه.....

:: قلم كحل ::

22-06-2006, 23:46

مرحبا
:)

الأكل الصحي مهم جداً ، ومعروف انو العقل السليم في الجسم السليم
يعني تأثير الجسم يتعدى النفسية والمظهر إلى العقل برضو

أسوأ شي فيني اني مااكل خضار وفواكه كثير خصوصا
الفاكهة اسمع فيها بسpb093

صادقة في جملتك كثيـــــــــــــر
اجسامنا لاتكذب ابد :)

ميادة pb189
موضوع جميل
مشكورة bp039

عتريــــــس

23-06-2006, 13:10

أهليين ميادة ..,‘

اه انا مايذبحني إلا عجايز هالاجانب ..
والله عجوز وجها طايح بالارض من كثر ماظهرها منحني .,
ومع كذا ترقا للجبل .. وماخذه راحتها عالاخر ..ماشالله صحة ونشاط وقوتها فيها ..
وانا اللي عمري ماتعدا الــ 20 خطر لا يغمى علي من التعب : \

والله ودي أصير صحية بأكلي لكن ماقدرت..
اذا خذيت لي نظام صحي معين .. اتبع شي واترك شي ثاني .!
الحليب ., ما أشربه
اللحم .. الدجاج مغضوب عليهم : \
التمر .. يسبب لي حساسية .. والقائمة تطول .!

وتبين الصدق باين علي بآلام العظام .. ظهري داايم يعورني
هذا غير الركبة عندي تفر :D
ما يمدي امشي خطوتين عالسـلم إلا وانا طايحة

.,‘

في دراسة تقول انه الامهات اللي ياكلون من صغرهم أكل صحي
وبالاخص معتمدين على السمك .. فايدة هالاكل تطلع على اولادها

لولا الوالدة يطولي بعمرها كان علووم ..
هي اللي حببتني بالخضـار pb189 .. وتحن علي بأكل الفاكهة .. ولاتهون فيفا حبوب الحديد .,‘

(( مااحد اعطى الصحة النفسية اهتمام !! ))

روح الانسان ونفسيته هي اللي تبين للناس ., وظاهرة ..
اذا كان الواحد صحته توب ونفسيته دمار راح تكون العلاقة طردية بينهم < تحليل مبادئ

تحياتي لك مياادة ..,‘

أروقة الصمت

23-06-2006, 17:55

.
.
عزيزتي " ميادة "

يسلموووووووووو على هالموضوع المهم ..

بالفعل حالة الجسم مرآة لما يدخل له ..

وأعتقد إن أجسامنا تستحق النظر لكل ما ندخله إليها ..

وإحنا المستفيد الأول والأخير ..

أنا شخصياً أحاول قدر الإمكان أقلل من fast food والمشروبات الغازية ..

تقريباً ما آكلها إلا مرة أو ثنتين بالشهر .. والبيبسي تعودنا ما ندخله بيتنا .. لكن إاذ رحنا مطعم نخربها ..

مشكوورة على الموضوع الروعة ..

يا روعة انتي :)

أعذب التحايا ..
.
.
أروِقـــــــــة

NnAaDdAa

23-06-2006, 22:57

هلا مياده المشكله ان الفاست فود مايجي معه الا بيبسي وش تسوين طيب لازم شي يبلع لاتقولين ماي لان المايه استغفر الله مع الاكل مايمشي
انا الحمدالله يعني اشوف نفسي بالنسبه للي حولي يعني اكل سلطه >>>> ترى ذا انجاز
نقلل مقلي ورزوز بس لازم شيبسات وشكولاتات خصوصا هالعطله مافي شي تتسلين فيه الا الوجبات الخفيفه يصير اليوم كله بس شيبس وببسي والوجبات الرئيسيه تسحبين عليها ومع ذلك يزيد وزنك قسم بالله قهر
مشكوره مياده على الموضوع

hilali_cool

24-06-2006, 00:27

والله اني ظالم نفسي بقــــــوه :(

الفاست فود شبه يومي اكله :(

وانا مدمن بيبسي وشاهي :(

والفواكه يمكن اكل مره بالشهر

الشئ الوحيد اللي زين فيني اني اتغدا مع أهلي غدا صحي :)

يعني خضار ودجاج ( أولحم ) مع كأس لبن هذه الوجبه اللي مخلية جسمي يصبر علي :(

بس بالاجـــازة الوضع دمـــــار :( :(

رمش الغلا

24-06-2006, 02:23

هلا وغلا مياده وتشكرات على هالموضوع

أما عن النظام الغذائي فأناعايشه على البركه
ولا أحب الوسوسه هذا يجيب المرض وهذا فيه كذاوهذاك فيه كذاك
أكل اللي يعجبني وأستلذ له وأترك عني الشيء اللي تعافه نفسي
وبالنسبه أن المظهر الخارجي يكشف ما بداخل النفس فمهو دايم
هناك من يتصنع ويجيد التمثيل ويخدعنا منظره
لكن أحساس القلب هو الرادار فالقلوب شواهد

رجة ونص

24-06-2006, 06:52

مساء الخير

ميادة pb189 موضوع جميل جدا

بالنسبة لي فالحمدلله انا صحية جداااااااااااااااااا العيب الوحيد الي اعاني منه هو

البيبسي والحمدلله بادية ابطله غير كذا اكلي الحمدلله صحي :sm4: ما اشرب

الا عصيرات طازجة اكل خضار وفاكهة كثير ما اكل تشاكلت واجد ما احب الحلويات

قبل فترة رحت اتبرع بالدم سالوني وش تاكلين الهيموجلبين عندي الحمدلله مرة عالي

وبنفس الوقت احب الرياضة اهم شيء المشي والسباحة :D

هنديه حليوه

25-06-2006, 03:05

السلاام عليكم

اسفه على التأخيرpb094

عن نفسي احرص ونص

منها أحافظ على رشاقتي
وامنع بقدر الامكان الأمراض من نفسي
وقبل فتره سويت حميه غذائيه وتعودت عليها

يعني بس اكل شوويه مايونيز مثلا على طوول pb093 pb093 ارجعه

موضووع خرافي

:)

خوداافس

shgrawy111

25-06-2006, 03:19

مشكورة اختي ميادة على الموضوع الرائع والمتميز:epda0:

ميادة

25-06-2006, 20:10

orangahbp039
قلم كحل bp039
عتريس bp039
أروقة الصمت bp039
NnAaDdAabp039
hilali-coolbp039
رمش الغلاbp039
رجة ونص bp039 - ماشاء الله -;)
هندية حليوة bp039
shagrawy111bp039

انا فعلا شاكرة للجميع على مشاركتهم في التصويت ..
يارب الجميع يتمتعون بالصحة والعافية طول العمر .

:)

صاحب الظل الطويـــــل

25-06-2006, 23:31

أستاذة ميـّادة موضوع جميل ومـفيد.
من منتدى الأسرة إلى المميزة
الرّابط
http://www.eqla3.com/vb/showthread.php?t=220230

خزامى سدير

25-06-2006, 23:45

نعم ولكن ليس دائما :)

نعم بديت من تقريبا شهرين اتبع نظام غذائي صحي .. بعيد عن الوجبات السريعه والبيبسي ..
نعم قدرت خلال هالشهرين اني آكل ثلاث وجبات يوميا يفصل بينها سناك ويكون عباره عن فاكهة أو قطعة حلا صغيره لان أجسامنا تحتاج لنسبة من السكريات ..
نعم تغلبت على كل الصعوبات اللي تواجهني في المناسبات بحيث اكتفي بالشوربه وطبق السلطه مع قطعه صغيره من اللحمة
نعم أدعّـم نظامي الغذائي بنظام رياضي منتظم مناسب لجسمي ووزني وصحتي ..
نعم أحس براحه نفسيه كبيييييييره وبسعادة جواتي ما تتخيلونها والسبب بدت النتائج الإيجابيه تبان في صحتي وجسمي ونفسيتي وتفكيري ..

بس ليش ليس دائما؟!!
لأني ممكن في يوم من الأيام أني أضعف وأكل وجبه سريعه .. بس ما حصلت الا 3 مرات خلال هالشهرين :)

ميادة ..
شكراً لك على هذه الكلمات :)

مهما تظاهرت جسمك لن يكذب ..
عيناك ستقولان الصدق
ستقولان انك تبدلت !!
وأن الودَ ما عاد ودًا !
وأنتَ ما عدت أنتَ !

جسمك لايكذب

حين تخفي ودك ..
عيناك \ يداك \ كل مافيك سيفضح الود ..
لا تثق كثيرا بقدرتك على إخفاء
مافي نفسك ..

مي

26-06-2006, 14:56

الموضوع يامياده مره مفيد ورايق

ومحدثتك اكثر وحده خوافه وتهتم بالصحه

بس المشكله بهالبيبسي >>>>>مشكله كل الشعب

حين تبدي المودة و تجاهد في اصطناع البهجة
واللهفة بمقدم احد ما بينما العكس هو الصحيح ..
مهما تظاهرت جسمك لن يكذب ..
عيناك ستقولان الصدق
ستقولان انك تبدلت !!
وأن الودَ ما عاد ودًا !
وأنتَ ما عدت أنتَ !

عباره اعجبتني

شكرا حبيبتي تسلمين

شاربه بيره

26-06-2006, 15:04

اهلين اختي مياده

بالنسبه للاكل الصحي احيانا اكل واحيانا اخبص

بس اكثر الوقت اخبص

انا من النوع اللي احب التشوكلت والحلويات ........اموت فيهم

البيبسي احبه مع الفاست فود اللي بعد احبه ......بشكل عام احب الاكل واستلذ فيه

يعني ماالتزم بالوجبات بس اذا اشتهيت الاكل حتى لو نص الليل اقوم اكل ماعندي مشكله

بس طبعا اكل فواكه واشرب عصيرات طازجه

كل اللي حولي يقولون انتي لو على اكلك كان صرتي كبر الفيل ........لان وزني حلو

بس اعتقد سبب انو وزني مايعبر عن كميه الاكل اللي اكلها بسبب المشي والحركه انا احب الشغل والحركه

ومااحب اجلس في مكان واحد لفتره طويله

بس تدرين انا اعرف بنات بشراتهم تهبل وشعورهم حلوه واكلهم كله فاست فود وبيبسي ولا يعرفون الاكل الصحي

مَـدْمِـي

26-06-2006, 19:20

بخصوص الجسـم

فيه اشياء لايستطيع احد ان يشكك فيهــا

وهي مجموعه من الأكلات الصحيـّـه والمفيده

الـفـواكـه والحليـب لو يداوم عليها الشخص فـ بيبني جسم جبـّـار

المشروبات الغازيـه هي الدمــار بـ عينه وعلمــه

لكن عـن جد البيبسـي مافي مثل طعمــه أبــد

لعل وعسى يأتونــا بـ عصير يقارب طعـم البيبسي الفـتـّـاك

....

أرجـع وأقول ان بنيـة الشخـص تختلف من شخص لآخـر

فيه نـاس تـآكل اكل مجنون ولكن استجابـة جسمهم لـه ضعيفـه

وفيـه نــاس يآكلون على خفيـف ولكن يبيـّـن فيهم بشكل كبير

أولا ً وآخـرا ً هذا حظ ونصيب :)

الريـاضه الريـاضه الريـاضـه :)

تحياتي

مروة

26-06-2006, 23:18

عزيزتي ميادة
لو قرأت موضوعك قبل أسبوع من الآن فقط .. كان قلت : قلبتي علي المواجع ياميادة
أحياناً تطرأ علينا التغيرات الجيدة بشكل مفاجىء جداً
وهذه إحدى النعم والحمدلله

الأكل غير الصحي محط إعجاب الجميع يعني .. كبقية الأشياء الممنوعة والمقننة..قرأت قبل فترة قصيرة
أن نصف مبيعات أي سوبر ماركت تعتمد إعتماد كلي على التشبس والببسي فقط :(

الجيل هذا يطلق عليه: (الجيل الهش) أمراض الكساح للأطفال وهشاشة العظام بالنسبة للمراهقين
وكثرة أمراض الجلدية المتعلقة بطبيعة الأكل
وأمراض الجهاز الهضمي.. والقائمة طويلة عريضة !

على فكرة ..
بالنسبة للببسي فيه طريقة مفيدة جداً تخليك تترك الببسي بدون أي عبء وبسهولة
طبعاً قبل أي شيء لازم تقتنع أن هالمشروب مضر.. وأنك مصمم فعلاً بتركه
وبعدها .. كل ماتشتاق له أشرب كأس ماء راح تشعر بالإمتلاء وتأجل الببسي لمرة ثانية
وهكذا

نسيت شيء؟
أيه .. التصويت :(

ميادة، جزاك الله ألف خير ..
موضوع مهم بالفعل

bp039

ميادة

27-06-2006, 20:55

صاحب الظل الطويل bp039
شاكرة جدا لك لطفك وتشجيعك .
خزامى سدير bp039
فنيلة علاق bp039
شاربة بيرة bp039
روح مجروح bp039
مروة bp039

شاربة بيرة .. الاشخاص الي اشكالهم حلوة واكلهم غير صحي طبعا ماله علاقة
هم بالاساس خلقتهم جميلة .. لكن الاكل الغير صحي يبان على المدى الطويل في الصحة
الداخلية للجسم .. بعكس الصحة النفسية هذي اثارها تكون عاجلة وتبان بسرعة على شكل الشخص
وملامحه ..!!

مروة ..
احس اني غريبة جدا .. لأني مااستطعم البيبسي ولا استسيغه .. دايم لما احاول اشرب اي شيء
غازي او اكل شيء ضار احس اني ضميري يأنبني و مااستطعمه ابدا .. !!

شاكرة للجميع المرور والتصويت والتعليق ايضا .
:)

عالم آخر

28-06-2006, 01:56

عندي اكلات واشياء محظورة لايمكن اقربها ،،،

البيبسي صارلي حول السنتين ماشربتة ،، ومدهر انواع العصيرات :)

واذا كان ولا بد دايت بيبسي ،،

junk food بكل انواعة مااقربة الا نادرا ،،،

وعندي عادة اني يوميا اكل تفاحة :) bp039

من سنين وانا مستمر عليها ،،، قريت مرة عنها ان لها فوائد لاتعد ولاتحصى :)

وابشرك لا الشاي ولا القهوة اقرب لهم ،، مادري لية بس ماعمري قربت لهم :)

ولا الحليب ولا اي شئ من مشتقاتة الا الروب ،، واللبن ،،، ادري انها دمار بس مادري لية ماحب الحليب وعائلتة الكريمة ،،

موضوع جميل جدا ،، والاحظ هذا الشئ على نفسي لو انقطعت عن الرياضة او الاكل الصحي ،، تقفل الاخلاق ، :)

تحياتي

ماشاء الله لاإله الاالله..

متاكد انك سعوديpb036

انا من كثر ماعقدتني ماما بسبة هالموضوع قسم بالله انه اي شي فيه فايده ماأقدر آكله:mad:

حتى المويه اللي كل الناس تشربها ماأستسيغها ابد وأضغط على نفسي عشان أقدر عليهاpb093

ومستحيل آكل اي شي من منتجات الألبان ولااطيق الفواكه بأنواعها ماعدا المانجو..pb189

والصحه لك عليها مايمدي اي شي يلمسني الا أي و أوه كأني بزر..:sm1:

موضوعك حلو يامياده ويستاهل التثبيت ياعسل..bp039

MelOdy

29-06-2006, 09:15

.. ..

حسيت أني مجرمة لأني مضيعة حق بدني pb093

تعرفي مشكلتي ايش ؟؟

مافتقد الأكل وتمر 16 ساعه 20 ساعة ماأكل شي لاصحي ولا غير صحي .. ووجبة الفطور محذوفة عندي وخاصة أيام الجامعة لأني ماكون مرتاحة اذا اكلت شي :rolleyes:

وعشان أكل لازم اجلس قدام نت / تي في ولو برى البيت أخذ الأكل تيك اوي وأكل وأنا اتمشى بالسيارة pb036

لكن من فترة صايره كل صباح بعد صلاة الفجر اخذ سبع تمرات وعلبة مويه وبعدها بربع ساعة ملعقة عسل وسبع حبات من الحبة السودا :)

ميودة ئلبتي المواقع pb189

.. ..

ورديـه

29-06-2006, 17:45

ماحرص ابدا على كميات السعرات الحراريه او الاكل الصحي
الأكل اللي احبه pb189 مامنع نفسي عنه
وهذا الطبيعي
اهم حاجه ماتمنعين نفسك عن شئ تحبينه وكولي باعتدال تااام pb189

سبب السمنه عندنا الاكل العاطفي :D
وهو نتيجه الحاله النفسيه :sm5: مافي ضبط

ميادة

29-06-2006, 19:07

عالم آخرbp039
متاكد انك سعودي
:D

ميلودي bp039
كنت متوقعة انك كذا من يوم ردك في موضوع الطبخ !!
اجل ماتبغين تحطين في بيتك مطبخ بالمرة ؟!! هذي النقطة السعودي بيتفاهم معك فيها pb192
خليني في ردك هنا ..
ليه ياميلودي ماتهتمين في الأكل ؟!!
تتوقعين طريقتك و اهتمامك بصحتك مابتأثر على قدرتك في انك تكونين أم مستقبلا
اشياء كثير اتوقع ممكن مانهتم فيها لكن هذي النقطة مااظن ماتهمك
جسمك يستحق اكثر يادلوعتي pb189
والبداية الي بدأتيها حلوة ومفيدة استمري ووسعي نظامك اكثر ,,

وردية bp039
المسألة ماتخص كمية السعرات الحرارية فقط ..
انا اقصد الأكل النافع و الأكل الضار بشكل عام !
يعني اشمل من مجرد مأكولات سعراتها الحرارية عالية ..
الأكل الضار يشمل أشياء كثير ممكن سعراتها الحرارية ماتذكر .

:)

**خربز**

29-06-2006, 20:25

السلام عليــكم ورحمة الله..

مســـائك ورد .. bp039

بفترة جلست في البيت .. كنت كثيرة وقتها متمسكة ومسيطرة على
نفسي من ناحية الأكل وصيحته ,,

بس بعد ما اشتغلت .. بعد فترة لقيت نفسي فقدت السيطرة
بشكـل كبير .. :(
وما انتبهت إلا لما لاحظت إنها أثرت على بشرتي ..
بديت أرجع أحاول أسيطر من جديد :D ..

::

من ناحيـة المشاعر ..
كثير قريت إن الجسم وحركاته تؤثر على الطرف الآخر
بنســبه كبيرهـ .. :)

بس أعتقد فيه ناس تحتاجين مهارة عشان تعرفين
هل هالمشاعر صادقة ولا .... ;)

..

استمتعتـ بقرائتكـ حبوبـهـ :)