لماذا فشل المنتخب السعودي؟؟؟ اجيبوني !! [الارشيف]

عرض كامل الموضوع : لماذا فشل المنتخب السعودي؟؟؟ اجيبوني !!

ziz00o00

23-06-2006, 22:59

السلام عليكم ورحمة الله وبركاته

رغم كل الدعم من الدوله ومن الشعب وغير ذالك لم يقنع المنتخب السعودي جماهيره pb093

يعد المنتخب من اكثر المنتخبات استعداد للمنديال واكثر المنتخبات خوضا للمباريات الوديه

فهل السب المدرب ؟؟؟

ام الاعبين؟؟؟

ام الاداره والواسطات لبعض الاعبين؟؟؟

ام كثرة الاعلانات وان المنتخب مستعد لطمس الصوره السيئه في 2004 ؟؟

لا اعلم بالضبط ما السبب!!!

اريد التعليقات الاقلاعيه:D وبدون تعصب:mad: وانتم فاهمين قصدي

Madridi

23-06-2006, 23:12

الجهاز الفني والاداري بشكل عاااااامـ

والاعبين ممتازين بس يبيلهم من يظبطهم

لي بااااااكـ مع تفاعل الموضوع

خـذنـي مـعـك

23-06-2006, 23:16

.

لا اعلم بالضبط ما السبب!!!

ما يبــلهاا ياخوي ,,
المشكله أمكانيــات فقطـ لا غيـر ,,

مدرب متوفر ,, فلووس متوفره ,, دعم جماهيري متوفر ,,
دعــم أعلامــي متوفر ,, كــل شي متوفر ,,

لاعب ما يعرف يثبت ما يعرف يتمركز ما يعرف يتحرك ,,
من جدك هذا يستاهل كاس العالم ,,

لا عيبتناا يبيلهمـ فرمتــه من الــى ,,
مــع أحترامي للجميــع ,,
المفرووض ننسى كااس العالمـ وحتى القادمه واللي بعدهاا ,,

ونبداء بـ الفطافيطـ بزرايناا ,,
علموهـم أساسيات الكورهـ ,,
أمــا المهــارات أن شاء الله انها موجودهـ بـ الفطرهـ ,,
هــاذيـ هي المشــكله برأيي اللي مال أمــه داعــي في الحيــاة ,,

وعوافي
ومشكوور
والى الملتــقاء

.
.
.

go6e_ma3foo6

23-06-2006, 23:20

هذولا أحسن ناس يلعبون كوره بالسعوديه ..

وركز على السعوديه ..

بس اذا طلعوا برى .. وخصوصاً بكأس العالم ..

يتغير كل شي ..

يقابلون ناس متعدينهم بمراحل .. وماخذين الدعوه مهنه حقيقيه ..

موب مجرد تطبيق كلمه احتراف .. لأ

يطبقون الاحتراف صح ..

وهم أصلا متعودين على هالأجواء والضغوطات ..

كل واحد يلعب بنادي ودوري قوي .. كل اسبوع يلعب مباراه قويه وبرى ارضه ..

ويواجه مواقف بالملعب كثيره مره ..

يجي يلعب كأس العالم وهو شي عادي عنده ..

ومعه ناس بالفريق من الدوري الايطالي والاسباني وغيره ..

كذا الفريق يكون متكامل ومتماسك ..

كل الـ 11 لاعب يساعدون بعض ..

موب يجيك واحد زلابه و واحد عصل و واحد يكره الثاني و واحد سلطان بن فهد ملعبه ..

بإختصار .. منتخبك مكانه كأس الخليج وبس ..

اما انك تسوي منتخب مكون من لاعبيين لهم 4 سنوات يلعبون بديرتهم ومعزولين عن العالم ..

وتجي قبل كأس العالم تلعب كم مباراه وديه وتبي تفوز .. هبااااال هو ..

والله راحمنا يوم يحطنا بالمجموعه ذي ولا كان علوووم ..

اذا تبي تنافس المنتخبات الي بكأس العالم يبيلك 20 سنه تشتغل ..

يعني تمسك ناس صغار أعمارهم 6 و 7 سنوات من الحين ..

وتوديهم برى ولا يرجعون هنا أبد .. الين يصير عمره 24 او 25 ..

يعني تكر والمنتشري ومبروك زايد وعزيز والغامدي وكريري و نواف و و و و ..

لهم 4 سنين يبارون مين ؟

يبارون بعض .. المنافسه كلها بينهم .. الهلال والاتحاد ..

سويت منتخب منهم .. وتبي تفوز على اوكرانيا ولا اسبانيا ولا تتأهل ..

خخخخخخخخخـ

الكلام كثير مره ..

94 مشت بالحظ .. فؤاد صلخ لك هدف .. وسعيد مدري كيف مشت معه .. وبلنتي ..

يعني لنا 12 سنه ما تطورنا .. ب نروح نشارك ونرجع ..

اذا تبي تحل ذي المشاكل .. لازم تجيب جيل جديد ..

لازم تجيب واحد مخه جديد ونظيف .. تبرمجه من يومه صغير ..

أجل قبل كم يوم اشوف بمنتدى ايطالي واحد يقول هذا اللاعب ما بدى يلعب كوره الا متأخر ..

بدى يلعب وعمره 11 سنه بنادي ..

خخخخخخخخخخخـ عندنا متى يدخل نادي ؟

20 ولا 18 ..

صعب صعب تحسن مستواك الحين ..

متأخرين مره ..

رايحه جايه

23-06-2006, 23:32

مااهنا إحتراف دولي :(

وما هقيت المدرب هو السبب ، لأني سمعت إنه مدرب البرازيل يوم ياخذون كأس العالم :(

التشكليه ، الإعلانات ، الثقه الزايده :d

حتى الرياضه ما فلحنا فيها :(

طريح الفراش

23-06-2006, 23:39

انا اقولك ليش ..

لانه منتخب مهب مهم فيه ادائك المهم فيه الواسطة ... ولانه منتخب شيبان من طقة سامي وعبدالغني ..

ولانه مهب راضين يقتنعون انه منتخب 94 كان طفرة جينية وانهم اذا بغوا يحققون شيء لازم يهتمون بالشباب اللي يقدرون يعطون بشكل كبير في كل وقت اول المباراة والا اخرها مهب لاجا منتصف الشوط الثاني طفوا ..

واكبر دليل على كلامي منتخب ايطاليا والارجنتين وان كنتم تبون من الدوري المحلي عندكم الشباب مثال على صبر السنيين والاهتمام بالقاعدة الى مااستطاعوا انهم يوصلون للنهائي العام الماضي ويأخذون الكاس هالسنه ..

ولانه مهب مقتنعين ان ياسر +سامي+نواف التمياط+ رضا تكر +الغامدي كلهم مستواهم متواضع ومنهم ماهو صنيعة
اعلامية ومضاربات اندية ..

ولان سامي الجابر الى هالحين يتعلم من المونديلات دروس مستفادة ومسجات .. مع انه اعتزل اليوم واتمنى انه مايتراجع كالعادة ..

ولان المنتخب قابل لاعبين كبار مثل شف شنكو << مايعرفون لاعبين المنتخب اسم لاعب غيره وحاطينه شماعة لهم

ولان المنتخب لعب (كاس عالم) قبل كاس العالم اجل وش نسمي 14مباراة تحضيرية ولالقى التكتيك اللي يصلح له ..ولا قدم شيء

ولان اللاعبين اليوم بعد مباراة اسبانيا يتبجحون ويقولون قدمنا مستوى واللي يسمع كلامهم يحسب انهم لعبوا على النهائي وانهزموا ... هم ودفاعهم الشوارع ..

ولان المنتخب مازال يسير وفق خطط علمية مدروسة ...

ولان ولان ولان وش اقول بس وش اخلي الله يخلف على الدراهم اللي صرفت على كومة هالفاشلين ....

VIP

23-06-2006, 23:41

اممممممممممم نقدر نقول غرورهم بتعادلهم مع تونس وعدم الإستعداد الجيد مع اوكرانيا
اضف الى ذلك المطر
اضف الى ذلك مبروك زايد والعيد (( في مبارات اوكرانيا فقط لاحد يجي ويطقني pb192 ))

مع اسبانيا مستوى جيد نوعا ما

ولكن الحارثي الي ابلشونا فيه جاب العيد

(( وهذا رد للي ابلشونا وقالو سامي سامي وياسر وياسر ))
شوفوا وش سوا سامي وياسر بالمونديال وشوفو الحارثي

صح ان سامي كان منفرد بس لو تدققون جابها بزاوية حلوه
وياسر نفس الشي جابها بزاوية ضيقة جدا

اما الأستاذ سعد الحارثي والعيد pb093 يعني الباب فاضي قدامه وافضل وضعيه للتسديد كانت متوفره
ابفهم وش ناقص
(( انتظر جواااااااااااااااااااااااب ))

وهذا الحارثي الي ابلشونا فيه وخاصة سحيم :mad:

وبعدين يافيصل الله يهديك ويفتح على قلبك
وش الأخطاء الإملائيه (( هذا من ضحكك على علي عسيري :D ))

وشو بلنتيه

23-06-2006, 23:43

والله يبي لنا احترافن صح داخلي وخارجي ولهوب على اللاعبين وبس لا
لازم لاعبين ومسئولين وانديه وبعدين عقب 12 سنه من الان يعني بعد 3 كيسان عالم جايه يصير مستوانا مثل كوريا واليابان حاليا
يعني نلعب زين ونقدم مستوى يشرف ومايخالف لو ننصقع بس اهم شي انه اساسيات وابجديات الكوره تكون موجوده عندنا
والمنافسه لادوار متقدمه عاد هذي صعبه علينا الا كان طحنا مثلا في مجموعه سهله ومن هالحركات

ام كثرة الاعلانات وان المنتخب مستعد لطمس الصوره السيئه في 2004

مدري وش هالبطوله اللي في 2004 بس مايخالف يمكن خطا مطبعي
<<<<<<<<< بثر ويحب يدقق في كل شي

خـلـيـجـي

23-06-2006, 23:47

مشكور اخوي على طرحك لـ الموضوع ..

بس صدقني .. بـ يقلب هلال و نصر و اهلي و اتحاد ..

و لـ الاسف.. هذا اللي مضيعنا ..

تحياتي لك ..

طريح الفراش

23-06-2006, 23:53

^
^
اللي مضيعنا وانا اخوك واقعنا المرير... لاننا نعتبر وجهات النظر اللي ماتوافق هوانا ثرثرة وكلام فاضي

ziz00o00

23-06-2006, 23:55

مدري وش هالبطوله اللي في 2004 بس مايخالف يمكن خطا مطبعي
<<<<<<<<< بثر ويحب يدقق في كل شي[/quote]

يعطيك العافيه قصدي 2002 لكن الاربعه حقت اوكرانيا انت عارف ما اقدر انساها:d

جــبّــار

23-06-2006, 23:56

محتاجين لـ خطط علمية مدروسة :)

محتاجين اولا وعي الشعب لأهمية " الرياضة "
ضروري جداً ، تتغير نظرة الشارع السعودي للرياضة والرياضين ... ضروري جدا تكون نظرتنا لهم ونظرتهم لأنفسهم أنهم أشخاص لهم تأثير ووزن في المجتمع .. وضروري يدرك الرياضي أو اللاعب بالتحديد أنه ممكن يكون صاحب رسالة " فعلاً "

ولو اتكلم عن الكورة بالتحديد ... اقولك اننا محتاجين اكاديميات كرة قدم " تدرس " اللعبة تدريس
وتعد اللاعب لـ"مهنته" .... وركزلي على " مهنته " تكفى :)

اللاعب في أوروبا وهو رايح للنادي يتمرن ... يقول انا رايح للشغل
أما اللاعب عندنا بيستخدم أي لفظ ماعدا " الشغل "

ثقافة اللاعب أولاً ... وبعدها " من الطبيعي " أن تأتي وبشكل تلقائي الأساسيات اللي محتاجينها لبناء فريق ينافس على كأس العالم pb192

ولو ناخذها ببساطة ... أعتقد أن عندنا كل شي لازم " لإعداد " منتخب يفوز بكأس العالم : 1-مواهب 2-فلوس

انا غلطان ؟؟

توزيعة طيبة

24-06-2006, 00:06

باختصار شديد

الرياضة بشكل عام ماراح تترتقي للعالمية الا اذا طلعوا منها الأمراء ولنا في اتحاد اليد عبرة

كوامر

24-06-2006, 00:07

التشكليه غلط

ziz00o00

24-06-2006, 00:10

VIP لادقق على الاخطاء الاملائه pb094 وانا اخوك وخلنا في صلب الموضوع ok

Hollywoody

24-06-2006, 00:17

اول شيء هو الاتحاد السعودي لكرة القدم

والاعبين

والتشكيلة

:)

خـلـيـجـي

24-06-2006, 00:19

^
^
اللي مضيعنا وانا اخوك واقعنا المرير... لاننا نعتبر وجهات النظر اللي ماتوافق هوانا ثرثرة وكلام فاضي

حبيبي .. و من قال كذا .. كلنا نتقبل وجهات النظر ..

بس بعض الاخوان ( و يا كثرهم ) .. لـ الاسف .. ياخذون منطق وجهات النظر لكل شي ..

يسبون و يجرحون و يلعنون ابو اللي جاب اللعيبة .. و يقولون وجهة نظر ..

تحياتي لك ..

ziz00o00

24-06-2006, 00:27

كردب

الامكانيات موجوده لكن لا يحسنوا التصرف بها ومن ناحية تثبيت الكوره او غيره من المهارات لا تعليق من جنبها بقوه

go6e_ma3foo6

إذا هذولا احسن ناس عز الله رحنا فيها pb093 ممكن يكون الحل الصغار وتدريبهم على العموم يعطيك العافيه

جبار

كلامك سليم نحتاج الى اكادميه تكون بمستوى اكادمية ( اسباير ) في قطر تدريب عالمي وتعليم إحترافي

توزيعة طيبة

الامرآء هو الحل؟؟؟ مستحيل يطلعون منها

طريح الفراش

الواسطه لابد منها في اي مجال ولوتركوها اكيد راح يكون في إنصاف لبعض الاعبين الي ما عندهم واسطه أمثال........ ولا اقولك لا ماني قايل اسماء عشان ما احد يزعل

orangah

24-06-2006, 00:28

شوف اخوي باللاعبين الموجوديين حاليا السعوديه حدها تنافس العرب وآسيا !!

أشياء كثيره تنقص اللاعب السعودي !

لازم المسؤؤلين يحاولون يهتمون باللاعب من يوم هو صغير يدربونه ويهتمون فيه مو لاعب عمره 18 والا عشرين توه يبتدي !

تسهيل احتراف اللاعبين خارجيا ومحاولة تسويقهم يا شيخ لو يروحون يلعبون بدرجه ثانيه في احد اندية اوربا اهم شي يحتكون فيهم ! ويزيل الرهبه عنهم هذا غير ان مستواهم ممكن يتطور !!

الاعلام لازم يكون على مستوى أرفع من الواقعيه موب اذا فاز المنتخب طبلوا له وخلوه المنتخب الذي لا يهزم !! لازم يناقشون الااخطاء ويبعدون عن التعصب !!

الجماهير لازم يشيلون من بالهم حركات التعصب والتحزبات لأنه يأثر على اللاعبين !

وبعدين الاحتر اف المطبق في الانديه زي وجيههم لازم يسوون تدريبات صباحيه ومسائيه هذا غير انهم لازم يسوون كورسات للاعبين لبناء اجسامهم شوي صايرين عصاقيل خخخخ !!

الاهتمام بالجانب النفسي للاعب السعودي ..وصراحه لازم يعينون دكتور نفسي لأن لاعبينا عاطفيين وأي شي يأثر عليهم !!!

الاستقرار التدريبي .... وهذا أهم عامل ...لازم نصمل على مدرب كم سنه .... موب اذا قعد سنه مسكناه الباب وكان جميع أخطاءنا فقط محصوره بالمدرب !!

هذا اللي عندي الحين !!

مشكور ..

اورنجه...

ziz00o00

24-06-2006, 01:19

كلامك سليم وواقعي orangah يعطيكِ العافيه

ريفالينهووو

24-06-2006, 09:59

ولانه مهب مقتنعين ان ياسر +سامي+نواف التمياط+ رضا تكر +الغامدي كلهم مستواهم متواضع ومنهم ماهو صنيعة
اعلامية ومضاربات اندية ..

ولان سامي الجابر الى هالحين يتعلم من المونديلات دروس مستفادة ومسجات .. مع انه اعتزل اليوم واتمنى انه مايتراجع كالعادة ..
pb192 pb192
اظرف رد الى الحين : (
اجل سامي وياسر والتمياط ما يستاهلون المنتخب:(
اجل من تبي تلعب بدالهم تكفى الحارثي واحمد الخير والعلياني:D

طريح الفراش

24-06-2006, 12:32

^
^
شف وانا اخوك مهب اي واحد يطبل له الاعلام لازم يلعب ...

يناس لو حنا مثل اوربا ان كان ولا واحد من اللي ذكرت اسمائهم لعب اساسي .. شف راؤل مثال على تراجع الاداء والمدرب حقهم ماعنده لعب تشتغل صح تلعب اساسي وغير هالكلام مافيه.. مهب يسمع كلام خوان كارلوس :)

وانا اعتراضي على شيئين مانبي شيبان ولا لاعبين واسطة ..

ياقلبيـ

24-06-2006, 14:39

اسلمو ..!

SapNa

24-06-2006, 19:18

تعددت الأسباب والموت واحد

× باكيتا (( اهم الاسباب)) مدرب قاعد يجرب
×الجهاز الفني والأداري كله
× ومعهم ابو خطط مدروسه

انا اطالب بعودة كالديرون
<<<<<<<<<<< برى

سام006

25-06-2006, 00:05

والله انكم متفائلين واجد

صدقوني ما كذب المثل اللي يقول

لا بغيت تكنس الدرج فأبدا به من فوق

(( وافهم يا فهيم))

لأنك لو بديت من النص راح يتوصخ اللي تحت ويبقى الفوقي ما جاه شي

ف ابدا به من فوق ينظف كلللللللللللللللللللللللللللللللللللل اللي تحت

(( يلعن ام الشرح))

مهمد كان

25-06-2006, 09:50

بكل اختصار المحسوبيه

الاداريين عيونهم زرقاء

تسحيبات الثنيان

26-06-2006, 02:53

/
/
/

محتاجين لـ خطط علمية مدروسة

لا .. لا .. تكــفى :( عنــدنا اللي مكفيــنا :d

بكـل بســاطـه .. الاتحـاد السـعودي لـكرة القـدم يتحمل 75 بالميـه من الاخفـاق في 2002 و2006 :cool:

ziz00o00

bp039

/
/
/

سويهر بن طحنون

26-06-2006, 10:37

كل شي

حط الف خط تحت كلمة كل شي

اذا تغير كل شي اللي حطينا تحتها الف خط

صدقوني بيتغير وضعنا وحالنا

تحياتي

الأزرق الهلالي

26-06-2006, 16:54

بكل اختصار المحسوبيه
الاداريين عيونهم زرقاء

هههههههههههههههههههههههههههه
يا حليلك بـس ..

سام006

26-06-2006, 16:59

بكل اختصار المحسوبيه

الاداريين عيونهم زرقاء

وييييين؟

وقفت الحين على الإداريين

وين راح الإحتراف وتطبيقه

وين راح فكر الاعب السعودي اللي يكون تفكير لاعب محترف؟

مشكله اللي معمي عيونهم التعصب

ziz00o00

26-06-2006, 22:13

تسحيبات الثنيان bp039
يعطيك العافيه ابوي إنشا الله يقل الاخفاق مع قليل من الواقعيه
سويهر بن طحنون
ما اتوقع إن كل شيء غلط ولازم يتغير.... المشكله في نظري حتى الان وزي ما قالو الاخوان الاعبين
يحتاجون لإعادة تنظيم وتطبيق معنى الاحتراف ....... مو السهر حتى الفجر في المقاهي ومعسلات وشيشه
واجحد التمارين ....... الصباحيه وحتى التمارين المسائيه وعدم جاهزيه وإهتمام .......
طريح الفراش كلام سلييييم يعطيك العافيهbp039

المــهــنــد

28-06-2006, 09:34

اللــه يهديك يـازيزو خخخخخخخ

لايكــون كنـت تطــمح اننـا نفـوز بالــكــأس ... أنا أتـوقع أن الاغلبيــة كــان شعـارهم الخــروج بـ أقـل الخسـاائر

<< تــذكر هجمـة سعـد الي عنـد البـااب وضـااق صـدره:(

ziz00o00

28-06-2006, 20:10

اخوي المــهــنــد ........... انا ما اطمح في كأس العالم الحين .......

كل ما اريده المستوى الجيد والاداء والروح ..... ومفهوم الاحتراف

وانا متأكد إن كأس العالم .... يجي مع الاجتهاد .... ونقول إنشاء الله نجيب كأس العالم لو بعد 20 سنه...:d

mr.gaz

28-06-2006, 22:25

ياجماعة والله ناقصنا احتراف بس ولو يطبقونة من الحين يكون افضل وباندية صغيرة عشان يلعب كثير ولو طبقوا الاحتراف صدقوني راح نقدم شي بكاس العالم

نواف

29-06-2006, 02:34

من كاس العالم المشئوم الفائت في كوريا واليابان
لم يحدث اي تغيير جذري وفعال للمنتخب
يعني لمدة اربع سنوات لم يحدث الا سوى القليل جدا
والذي لايتناسب مع الامكانيات المميزه المتوفره للمنتخب

ومع كامل احترامي لشخوص الاميران سلطان ونواف
فنحن نعتقد بانهم فشلو في مهتهم سابقا ولاحقا
ونذكر عندما ظهر الامير نواف بعد نكسة المانيا
وهو يصرح بانه مسؤول كامل المسؤوليه عن النتيجه
وهل الامير نواف يعي معنى جملة اتحمل المسؤوليه؟
مانعرفه ان الامير نواف ومن معه في الرئاسه العامه
يحقق معهم تحقيق رسمي واقل نتائجه اقالتهم من مناصبهم
ولان ذلك لم يحدث وجملة اتحمل المسؤوليه فقط كلام في كلام
تكرر نفس السيناريو في هذه البطوله ايضا

تغيير الهرم من الاعلى هو المطلوب
وليس مثل كل مره يكون المدرب كبش الفداء
والجمله المشهوره اتحمل كامل المسؤوليه بدون افعال وتحقيق رسمي 00

mska

29-06-2006, 17:08

مــــــــــــــــــــــــــــــــــــــــــا

عنــــــــــــــــــــــــــــــــــــــــــــــــ دنا

امكانيــــــــــــــــــــــــــــــــــــــــــــ ـــــــــــــــــــات

(بس)

ziz00o00

07-07-2006, 18:59

mr.gaz كلامك سليم اخوي ويعطيك العافيه...
نواف يعطيك العافيه ..من ناحية تغير الهرم فهذا ما كنت اقصده من البدايه.... تغير الكل .... كلام سليم
وبعد ذالك نبدأفي الاحتراف بصراحه اهم شيء الاحتراف وتعليم الناشئين ولوا كان فيه إمكانيه<<< اكيد فيه:D
إرسالهم لوروبا
لمعاهد واكادميات تعليم كوره حديثه ...
mska اما المكانيات فنحن من اغنى الدول إمكانيه إن كان قصدك إمكانيات كرويه وإداريه ..انا معاك ...
بس يبيلنا تغيرات جذريه ورسم خطه لتحقيق هدف معين وحده وحده..... ونصير نصارع على كأس العالم ليه لأ...
ومشكور اخواني bp039

سعد2

07-07-2006, 19:34

تبون الحل

عدم ضم أي لاعب من أندية الهلال و الإتحاد و الأهلي و النصر للمنتخب لمدة 16 سنة

عشان يطلع جيل ما يعرف التعصب و يشجع المنتخب لانه المنتخب و بس

هلالي صميم

07-07-2006, 20:36

الاحتراف الى متى نقول الاحترااااااااااااااااااف

وبنتظار نكسة 2010 بوجود سلطان ولا يهون نواف

هلالي موت

07-07-2006, 20:45

بيني وبينكم المنتخب مهب متأهل او بيروح للربع النهائي في كاس العالم الا بعد ثلاثين سنه !!

على العموم باكيتا وما ادراك ما باكيتا

تحياتي هلالي موت

المشاكسة

07-07-2006, 21:48

طبيعي فشل بسبب الخطط العلميه المحيوسه !!
قال ايش قال بنصحح الاخطاء عيت تخلص ذا الاخطاء !!!
من 98 وهم بيصححونها هههههههه
يقالهم بيكتشفونها الحين !!!

مبااري السااس

10-07-2006, 11:15

السؤال : هل انت متوقع نجاحهم ؟
لهذا تبحث عن اسباب للإخفاق ؟

هذا مستواك وسيظل هذا مستواك وترتيبك بالعالم
مثل ما نتقدم
ايضا الدول الثانية تتقدم واحيانا توسع الفارق عن مستوى منتخبنا.

ما حوّم كبدي لاعب مثل ( توكر ) يقول نعوض بمباراة اسبانيا <<<< تكفى يا عبدالرحمن الداخل.
الله مير يصلحك انت وهالرجلين اللي كنها مراوح هليوكبتر.:d

نواف

20-07-2006, 08:02

بدخول استراليا في تصفيات اسيا اعتقد مهمة التسالي اصبحت اصعب
واقصد في السابق في تاهلنا لكاس العالم بسبب عدم وجود منافسه قويه من الاخرين
اعتقد بوجود استراليا وعدم تنازل كوريا او اليابان او ايران عن التاهل لكاس العالم
ان المهمه سوف تكون اصعب من السابق كثير :)