السيارات على ebay أرخص من ماتتوقعون بكثير فرصة لاتفوتكم

[عاشق الأمل]

قبل شهر و بينام كنت أتفرج على السيارات في موقع ebay طحت لي على مرسيدس S550 AMGموديل 2007 ماشي 112 كيلومتر:eek:

أية بس 112 كيلومتر يعني يادوب من النسيم لحريملا ورجع << والله التشبية

المهم قلت خلني أشوف كم هالكمخة بيبي فيها ((طبعا توقعت أنة حاط نفس السع اللي شراها بة على بالة ذكي)) بس والله طلع سعرها 300,000 ريال و هو بيبيع على السوم خلال أسبوعين.

أنا و بحكم اللقافة قلت خل أجرب نصيبي و أزاود عليها يمكن ربي يكسر خاطرة و يحس إني ميت عليها و يعطينياها بخصم جيد.

المهم جمعت كل مابقي حولي من قريشات عقب طيحت الأسهم << حسبي الله على اللي كان السبب

و زاودت الين وصلتها 198,000 ريال قبل لايخلص المزاد بثلاث أيام

المهم يوم خلص المزاد إكتشفت إني أنا أعلى سعر << والله النشبة أحسبهم ينصبون ولا بيقولون هونا مثل عندنا

و أرسلو لي كامل المعلومات عن صاحب السيارة طلع شريطي بأمريكا << أية شريطي من اللي ياقفون بالعاير يقشمون فصفص و يشرون لأي سيارة مارة ماعندهم مانع يشرون أي شي أسمه سيارة

المهم كلمته و رتبت معة إن واحد من الشباب اللي يدرسون هناك يمرة و يشوف السيارة و طلع رجال ونعم ما عندة أي مانع و مستعد يوديها يفحصها بأي ورشة أي

((طبعا ورش صح مو زي عندنا ضحك على الدقون))

راح خويي و شاف السيارة و لقى فيها سمكرة بالرفرف خفيييييييفة و مافية أي شي ثاني غيرها ، قلت له توكل على الله و رتب لي الدفع و الشحن و اللازمنة بحكم غشامتي بهالأمور

راح خويي و دفع للرجال و شحن لي السيارة بكونتينر و أمن عليها و أرسل لي أوراقها

يوم و صلت السيارة الجمارك دفعوني جمارك بقيمة السيارة زي ما الجفالي يدخلها 400,000 ريال النصاب

المهم الجمارك 20,000 و الشحن 7,500 المهم طلعت السيارة واصلة عندي 225,500 ريال

المشكلة الوحيدة هي أني الحين مطفففففففففر جداجداجداجداجدا و أشخص بهالموتر و اللي يشوفني يظن هالملايين بحسابي ;)

بس والله كانت تجربة رائعة و مربحة ((أزين من الأسهم اللي لاخذنا خيرها و لا كفاية شرها))

[المايستـرو]

طيب بعها ... راح تربح فيها

[القرايــن]

ماشاء الله.. الله يطعمك من خيرها ويكفيك شرها.. فعلاً أنا الظاهر اني شفتها.. كاني مانيب واهم كانت سوداء..

لكن شفت السعر قلت شكلها تسحيب بخلق الله <== متعود على النصب بالمنتديات العربية :d ..

يعطيك العافية أخوي.. واذا على التطفيرة.. بعها الحين واللي رزقك بهذي يرزقك بأحسن منها ;)

وكانك تبي تبيع بمكسب 30 الف تراي شراي ;) ..

[::White Soul::]

مـاشاء اللـه , تـوفـقـت فيـهاا

واللـه رأيي مثـل ما قـالوا لـك الشـباب , بعـها , لإنـك راح تـكسب فيـها سعـر بإذن اللـه

[Abo-Jariah]

بس انا سمعت ان سيارات موديل السنة

ما عليها جمارك ؟؟

[عماره منسدحه]

ما شاء الله يعطيك خيرها ويكفيك شرها

اذا كنت ناوي تبيع ف انت ربحان
واذا منت بايع اكيد ربحان خصوصا انها 500 وتقريبا نص السعر



.............

[Muna Ro7ha]

مبروكـ ما شااء الله الله يعطيكـ من خيرها ويكفيك شرررها
أية بس 112 كيلومتر يعني يادوب من النسيم لحريملا ورجع << والله التشبية
وش فيها حريملاء pb131

[mr.kosah]

الله يعطيك خيرها و يكفيك شرها

[وش ملحـــــــه]

;)

على العموم يعطيك خيرها ويكفيك شرها

[رعبوب]

والله هالحركة تنفع لمشروع تجاري ;)

تنصح بها يالغالي ؟ خلينا نجرب ، وش ورانا

يعطيك العافية ابوي

[Silver Shadow]

الله يطعمك من خيرها ويكفيك من شرها

[عاشق الأمل]

فعلاً أنا الظاهر اني شفتها.. كاني مانيب واهم كانت سوداء

لاوالله بيظاء ناصعة :)

والله إني أفكر أبيعها :sm4: بس موجعني قلبي لأنها و الله لئطةpb094 وبنفس الوقت التشخيص فيها شي ثاااااااااااااااااااااااااانيpb192

[rs4ever]

الله يعطيك خيرها و يكفيك شرها

عندي سؤال الله يحييك
في رجال عندي يبي يشتغل في السيارات الامريكيه يعني يشتري من eBay و يبيع هنا. وش نصيحتك له؟

:)

[عاشق الأمل]

والله ترى الموضوع صعب حبتين لأنه محتاج أحد فاهم في السيارات يكون في أمريكا عشان يشيك على السيارة و يشحنها بكونتينر مأمن علية و مختوم بالشمع الأحمر << حسيت إني بمسلسل بوليسي

ولا لو تأمن لهم و تتوقع أنهم مضبوطين بتاصلك السيارة مشلحة و ماتسوى تعبها.:sm1:

بعدين عندك الجمارك هنا وصخين إذا تعرف أحد يدخل لك السيارة على إنها أقل سعر ممكن لفئتها (يعني لو جايب S550 AMG يدخلها على إنها S500 ستاندرد)

[وش ملحـــــــه]

السياره مكينتها A M G

[حفيد طرفه]

ربي وفقك فيهاا ..!
يعطيك خيرها ويكفيك شرها !

[غريب الدار]

مبرووووك الله يعطيك من يخرها ويكفيك شرها ,,
الا ورا ماتمرني نطلع نتمشى واعبي لك بنزين على حسابي pb192

[desprado]

مني مصقد من جدك

[عاشق الأمل]

مني مصقد من جدك

وش دعوى من متى المعرفة عشان أنكت معك pb166


السياره مكينتها A M G


أعتقد أنها AMG بصراحة مالي علم ولا قد فتحت الكبوت من يوم جت لأني أهتم بالشكل و مواصفات الرفاهية و مايهمني كثير المحك لأني بالعربي ما أحب التدعيس بهالسيارات الزينة ((والله حرام و تعور القلب))

[عاشق ربع]

ياخي ماش انت متأكـد .. ؟؟
طيب أبسألـك انت ماخفـت مثـلا على فلوسـك قلت لو أعطيـهن هالشخـص مايروح ويخلين .. ؟ --> معليش بس عانيـت مثل هالموقف .. :d

لأني فعـلا شفـت الموقـع وفيه سيارات رخييييصة جدا .. ’.,
طيب أبسألك .. لو كـنت ماعنـدي أحد من معارف في أمريكـا ماتطلب منهـم يعلمـونك وش فيها ومافيهـا .. ؟
يعني هل فيه مصداقية بهالمسألـة هـذي .. ؟


والله يوفقك بموتـرك .. ,.,

[غريب الدار]

اقول الصبح انا فاضي قعدت احوس بالموقع ولقيت سيارتك هههههههههههههههههههه
http://cgi.ebay.com/ebaymotors/Substantial-Savings-Opportunity-Purchase-or-Lease_W0QQitemZ140014906366QQihZ004QQcategoryZ6336 QQrdZ1QQcmdZViewItem

[وش ملحـــــــه]

أسمع ياأبو الشباب تأكد من المكينه لأنها إذا A M G ماراح يوكون سعرها أقل من 500 ألف

فبعها

[اسير الحزن]

فية شي يمكن انتوا ماتدرون عنة

اغلب السيارات اللي تجي من برا

ويكون سعرها طايح

تعرفون ليش يكون سعرها طايح

اغلبها مسرقة من عصابة المافيا

لاني اعرف واحد شرا فياقرا 2002

وكان معة مفتاح واحد ويوم رح للجفالي يطلب مفتاح ثاني

قال السيارة بلاك لست يعني الموتر مطلوب من الانتر بول :eek:

ولا تقدر تطلب لة اي قطعة :sm4:

يعني اذا خرب اي شي فية صور جنبة :sm1:

والحركة هذي بالسيارات الالمانية

[القرايــن]

^
^
هذا متعارف عليه من السوق الحرة اللي بالأردن.. تصير مسروقه من التشيك أغلبهن..

والجمارك يصادرون السيارة على طوووول..

[Criminal Mind]

بس ترا فيه إختراع إنك تاخذ رقم الهيكل قبل ما تشتري الموتر .. وتشيك عليه بالوكالة ..

وبكذا تتأكد وما تحط نفسك بمشاكل إنت في غنى عنها .. :)

[ابو سميث]

ماشاءالله تبارك الله

لو تبيعها تجيب لك 300 بالراحة

وتراها s 500 لكن كيت amg (جنوط و شكمانات كبيرة) والا المكينة نفس قوة ال500

بس تصدق حمستني..نشتري كم حبة ونبيع على المخفات اللي هنا :D

بس ما قلت لنا عن الحرارة..تسخن والا كيف؟؟؟

[عاشق الأمل]

"

[عاشق الأمل]

طيب أبسألـك انت ماخفـت مثـلا على فلوسـك

الا والله خفت :sm17: و ما نمت لي كم يوم الين خويي كلمني وقال لي إنه إستلم السيارة و بيشحنها << شخصياً لايمكن كنت أسويها إلا يوم خويي قال لي قدام و أنا أخلص لك الموضوع في أمريكا ((أعتقد إنه قد سواها كم مرة قبل لأثنين من أخوانه واحد إشترى مورانو و الثاني فياقرا))

طيب أبسألك .. لو كـنت ماعنـدي أحد من معارف في أمريكـا ماتطلب منهـم يعلمـونك وش فيها ومافيهـا .. ؟
يعني هل فيه مصداقية بهالمسألـة هـذي .. ؟


أنا ما جازفت والله إلا يوم خويي قال أنا بأفحصها لك عند محل محترم << صراحة نسيت أسمة بس هو سي معروف عندهم و موثوق

اغلبها مسرقة من عصابة المافيا

وخلها من المافيا وش علي دامها بتاصلني هنا، أعرف واحد شاري أودي A8 في سوريا لما خربت وراح للوكالة طلعت سيارة لولد صدام حسين و مسروقة

عموما كلام الأخ اعتـــــرفلك صحيح ممكن نأخذ رقم الهيكل و نتأكد << أعتقد إن خويي شيك عليها جعله يسلم:sm20:

بس ما قلت لنا عن الحرارة..تسخن والا كيف؟؟؟

الحرارة عادية وسألت المالكي للسيارات عن الحرارة و هل فية ضرورة أغير شي و قال لي أبدا ولا تلمس فيها شي:sm4:

[رعبوب]

^
^
^
في الموقع مكتوب رقم الهيكل عشان تتأكد من السيارة :)

[star top]

الله يطعمك خيرها ويكفيك شرها

بس الجفالي غير تكون مواصفات غير اللي معاك

والمستورده يقل سعرها ومافيها ضمان

[عاشق الأمل]

في الموقع مكتوب رقم الهيكل عشان تتأكد من السيارة

لا مو مكتوب بس لما يرسي المزاد عليك لك الحرية في إنك تفكر تكلم صاحب السيارة و تآخذ رقم الهيكل و تشيكه في الجفالي

بس الجفالي غير تكون مواصفات غير اللي معاك

مواصفات الجفالي حسب الطلب و هذي مافيها شي ناقص أبد أبد حتى الحزام موجود :)

الفرق الوحيد هو وجود أسطب جانبي على الصدام الأمامي شكلها من المقاييس الأمريكية

والمستورده يقل سعرها ومافيها ضمان

سعر الضمان 4,000 ريال للسنة الإضافية بعد السنة الأولى الملزمة من المصنع، طبعن الجفالي محترم و بنفس الوقت مستفيد و ملزم بأنة يصون أي سيارة مرسيدس خلال السنة الأولى و أكيد هو يحاسب المصنع على التكاليف ((يعني ما يخسر أبد))

الوكالات اللي ما تسوي صيانة للسيارات المشتراة من الخارج هي الوكالات الحقيرة:sm10: اللي داقمين أم المصانع و يبون يحرقون الناس حتى لو إنهم خسر شوي في إن السيارات ما تسوي الصيانة عندهم

[القرايــن]

^
^
الضمان الدولي عليه سنتين.. تغير مع المودييل الجديد !!!

[Glorious]

الحين 250 ألف ريال كاااااااااااااااش !!!........... وش قلت ؟؟؟

[عاشق الأمل]

الحين 250 ألف ريال كاااااااااااااااش !!!........... وش قلت ؟؟؟

ين بغيت أبيع بتكون أول واحد إقول له إن شاء الله;)

[وش ملحـــــــه]

8
8
حرام 250 ألف هذي ماتنباع بأقل من 400 ألف

[القناص]

الله يعطيك خيرها ويكفيك شرها

ما شاء الله

[ْالـoJg]

عالبركه الموتر
بس انا ما فهمت وش سالفه الموقع ، كنت اخشه زمان وفي موقع ثاني عربي يقولك اختر السياره من اي موقع حراج امريكي ونخلصلك امورها بامريكا ونفحصلك اياها عند الورشه الي تبي بامريكا ونشحنها لجده وتجي جده وتدفع هنا بعد ما يجيك الموتر والشحن والتامين والجمارك كلها رخيصه اذكر كانت بتطلع على بحدود 5000 ريال
ولهم مكاتب بالدمام والرياض بس ناسي اسمه ادوره واجيبه لكم
بس بغيت اسال الحين الدلوخ الي يحطونلك سيارات باقل من قيمتها ما يبونها يعني ؟؟ في لكزس es350 الجديد شفته قيمته بتطلع 45 الف ريال وباقي 7 ايام عالمزاد نقول بتطلعلي بحدود70 الف بالكثير ومع الشحن والجمارك 90 كم ببيعها هنا والموتر جديد وسقف بانوراما وسعره هنا 149 الف؟وفي ناس يزيدون على سيارات اغلى من قيمتها مثلا في افالون مستعمل 2005 وصل 150 الف والمواصفات مثل هنا مافي زود الا ملاحه بس ؟؟ هذولا دلوخ بعد ؟؟
وغير كذا اسعار السيارات الثمانيه سلندر المستعمله رخيصه مررره البنزين عندهم غالي وما يبونها
انا بغيت استثمر شوي فقلت للشايب نبي نشتري فوردات كراون فكتوريا اسعارهن بلاش موديل 2000 ، 2001 بحدود 7 الاف والله لو تجيب كميه وتبيعها على 25 ولا 30 تربح بالراحه
بس جحدني وانا مطفر ما عندي فلوس قاعد احاول بعمي وبواحد ثاني اعرفه بس مو معطيني فرصه اطلعلهم مواهبي

[عاشق الأمل]

بس بغيت اسال الحين الدلوخ الي يحطونلك سيارات باقل من قيمتها ما يبونها يعني ؟؟ في لكزس es350 الجديد شفته قيمته بتطلع 45 الف ريال وباقي 7 ايام عالمزاد نقول بتطلعلي بحدود70 الف بالكثير ومع الشحن والجمارك 90 كم ببيعها هنا والموتر جديد وسقف بانوراما وسعره هنا 149 الف؟

عزيزي ْالـoJg طبعاً لسا باقي كثير لأنة في آخر دقائق تلقى الأسعار تتغير بسرعة لأن فية ناس يكونون حاطين عينهم و ما يدخلون سعرهم الا في آخر الوقت

انا بغيت استثمر شوي فقلت للشايب نبي نشتري فوردات كراون فكتوريا اسعارهن بلاش موديل 2000 ، 2001 بحدود 7 الاف والله لو تجيب كميه وتبيعها على 25 ولا 30 تربح بالراحه

إنتبة من إن هالسيارات تكون مستعملة للإيجار أو تكاسي و أحيانا تكون مصدمة الين طلعت روحها ، بعدين تراهم نصاااااااااااااااابين جدا من ناحية الفحص خصوصا إذا عرفوا إن السيارة تصدير ((يعني ماحد بيرفع عليهم قضية)) :sm1:

فية سيارات لقطه و فية ناس تتحايل عشان تزيد قيمة سياراتهم عشان كذا لازم الواحد يحسبها صح أول و ما يجازف بفلوسة

[&&&مستر إكس &&&]

^
^
إقتباس »
الرسالة الأصلية كتبت بواسطة Glorious »
الحين 250 ألف ريال كاااااااااااااااش !!!........... وش قلت ؟؟؟

ين بغيت أبيع بتكون أول واحد إقول له إن شاء الله


طيب ماقلت لنا عن المواصفات ؟؟؟




لك 270 ألف بعد فحصها على حسابي في الجفالي اذا كانت فوق نص فل على الاقل ,,


اذا لك رغبة ياليت ترسل رقم جوالك على الخاص ,,


تحياتي

[&&&مستر إكس &&&]

إقتباس »
بس الجفالي غير تكون مواصفات غير اللي معاك

مواصفات الجفالي حسب الطلب و هذي مافيها شي ناقص أبد أبد حتى الحزام موجود

الفرق الوحيد هو وجود أسطب جانبي على الصدام الأمامي شكلها من المقاييس الأمريكية


ياليت تقولها بالتفصيل ,


الجلد وش نوعه فيها كاميرا خلفية ؟

الدركسون مخشب ؟ شاشات ؟ زينون او لا ؟


الالماني فيه شئ للموزينات ستاندر مررره فياليت توضح ,,,

[معلم سلندر]

عندي استفسار بسيط الحين اذا بغيت ازاود على سيارة لازم اسجل عضوية

طيب اذا كان الجواب بنعم كيف اسجل

[دبه ودها تلبس s]

اكيد لازم تسجل .. التسجيل عادي بس مدرى عن البطاقات اللى يقبلونها

[ْالـoJg]

لقيتلكم الموقع
هذا هو

http://www.exporterz.com/investor.htm

هذا فيه 3 مواقع غير موقع ebay ويقولك انت اخترر الموتر ونفحصها عند ورشه يفحصونلك 150 نقطه بالسياره ويرسلونلك التقرير ونشوفه وتشوف عيوب السياره بالتفصيل
سالت كم واحد بامريكا يقولون ما يعرفون شئ عن هالحراج بس والله لو تسالهم عن البارات ليوصفونها لك من باب بيتكم :sm5:
وتروح لمكتبهم بجده ونختار السياره والباقي عليهم واسعار الشحن حلوه 950 للسيدان ، 1400 للجيوب و100 لتخليص الاوراق طبعا الاسعار دولار
وبخصوص العضويه بموقع ebay داخل هالموقع بتلاقي موقع اسمه مزادي اذا سجلت فيه يعطونك عشويه بموقع eday لاني حاولت اسجل بـ eday ورفض لازم تكون بامريكا او كندا وكم دوله ثانيه pb131
بس لاحد يصدقهم اذا في حد من جده يروح لمكتبهم ويشوف هل صحيح كلامهم ولا يتصل تلفون ونستفسر منهم

[بدون تعليق!]

مرحبا ..

مبروك اخوي على السياره ..

متى تاخذني بجوله .. ؟؟

الا اقولك ..
انا ادور بي ام 745 اي ال ..

موديل 95 الى 2001
بس يالغالي اسعارهم خبال بكل ما تعنيه الكلمه ..

بالرياض تنقي ب 55 الف ؟؟الى 60 ..

عندهم بالاي باي .. ما تحلم بها دون 80 الف ؟؟

اذا تخبر شئ رخيص .. هلم الي به ؟؟

[عاشق الأمل]

موديل 95 الى 2001
بس يالغالي اسعارهم خبال بكل ما تعنيه الكلمه ..

بالرياض تنقي ب 55 الف ؟؟الى 60 ..

عندهم بالاي باي .. ما تحلم بها دون 80 الف ؟؟

اذا تخبر شئ رخيص .. هلم الي به ؟؟

السيارات اللي أسعارها رخيصة تكون لقطه يعني تدور فترة الين تلقى و حدة ما إنتبة لها أحد يزاود عليها;)

[بدون تعليق!]

مرحبا اخوي ..

انا خذيت لفه على السيارات ..

فبعضها تحصله عليه سعر .. تمام

لكن راعيه حاده بسعر معين ..

اذا مثلا انتهى المزاد .. ولا وصل السعر اللي يبيه .. يعني يبيع لاخر واحد ؟؟

بعض المواتر تحصل السوم حقها 0 او 500 يعني مبالغ ضغيفه جدا جدا ..

لو ازود عليها ويقفل المزاد .. بيبيعني راعيها .. بعدين هل الموقع له عموله ؟

ياريت تشرح لنا طريقه تسجيل العضويه ..

شكرا

[عاشق الأمل]

مرحبا اخوي ..

انا خذيت لفه على السيارات ..

فبعضها تحصله عليه سعر .. تمام

لكن راعيه حاده بسعر معين ..

اذا مثلا انتهى المزاد .. ولا وصل السعر اللي يبيه .. يعني يبيع لاخر واحد ؟؟

بعض المواتر تحصل السوم حقها 0 او 500 يعني مبالغ ضغيفه جدا جدا ..

لو ازود عليها ويقفل المزاد .. بيبيعني راعيها .. بعدين هل الموقع له عموله ؟

ياريت تشرح لنا طريقه تسجيل العضويه ..

شكرا

للشخص اللي يعرض سلعة الخيار إنة يبيعها أو يرفض العرض طبعاً إذا رفض يظطر إنة يدفع نسبة معينة للموقع كغرامة إنسحاب

أما بالنسبة للأسعار اللي موجودة قبل ينتهي المزاد بفترة طويلة فغالبا تكون قليلة لأن الناس مايحاولون يقدمون عروضهم الا في آخر وقت عشان مايعطون وقت للمنافسة و يرتفع السعر.

بالنسبة للعضوية ما عندي خبر لأنني أستخدم عضوية واحد واحد من الشباب

[بدون تعليق!]

مرحبا اخوي عاشق امل .. ثقلنا عليك بالاستفسارات ..

بس محد قدك ..؟؟

المهم اخوي ..

هل اسعار السيارات بالمواقع تعتبر ارخص من السوق في امريكا ؟؟

او العكس ؟؟

توقعاتك يعني ؟

[عاشق الأمل]

هل اسعار السيارات بالمواقع تعتبر ارخص من السوق في امريكا ؟؟

او العكس ؟؟

توقعاتك يعني ؟


الأسعار أحيانا تكون أرخص خصوصا لما يكون صاحب السيارة يبغى يبيعها بسرعة فتلقى أحيانا معارض سيارات عارضين سياراتهم على الموقع عشان تمشي بسرعة.

يعني الموضوع توفيق من الله ثم متابعة لمايطرح في المزاد المزايدة في الوقت المناسب:rolleyes:

[وحدانـــي]

الله يطعمك خيرها ويكفيك شرهاا ..
بصراحة ما توقعت إنك تشتريها أبد وانا اقرا الموضوع .. ؟!
لكن الحمد لله إنك توفقت فيها ، وما أنصحك تبيعها علشان ما تتحسف على الأقل في الوقت الحاالي .. :d

---------------------

والله لو نااس تفكر ممكن تسوي مشروع حلو عن طريق الموقع ..
2 في امريكا و2 هنا بالسعودية ..
والله يربحون ..

[engima]

وبخصوص العضويه بموقع ebay داخل هالموقع بتلاقي موقع اسمه مزادي اذا سجلت فيه يعطونك عشويه بموقع eday لاني حاولت اسجل بـ eday ورفض لازم تكون بامريكا او كندا وكم دوله ثانيه pb131
بس لاحد يصدقهم اذا في حد من جده يروح لمكتبهم ويشوف هل صحيح كلامهم ولا يتصل تلفون ونستفسر منهم

أنا دخلت موقعهم و لا لقيت عنوانهم في جده :(
و لا لهم رقم في المملكه بعد :(

تكفون اللي يعرف مكانهم يقول لي .... أنا لقيت سياره و ودي أشتريها بس ما لقيت العنوان :(
---------------------------------
إستفسار ثاني
أنا ودي أشيك على السياره و هي في فلوريدا .... شلون أفحصها ؟؟

[وش ملحـــــــه]

8
8

خذ هذا الموقع السعودي يتعامل مع أكثر من موقع ومن ظمنهم ebay

موفق

http://www.exporterz.com/investor.htm

[Da7oOoMe]

الف الف الف مببرررروك

ماشاللله توفقت فيها

لكن تراها ماهي Amg

اذا تبي تعرف كيف

شوف الهوب (داخل الجنط) اذا كان كبير ويلمع اعرف ان الموتر 600 او Amg

اما سيارتك اتوقعها 350

واذا كانت 500 وبالسعر هذا ماشالللللللللللله عليك


يعطيك خيرها ويكفيك شرها

[مدربيها]

ما قلت لنا يا بعدي كم كلفك التامين

بالنسبة لموضوع البلاك لست الي يقولوا عنه الشباب

شيكت على الموضوع ولا لا

[DAG]

تراني متابـع وش صار لك

! !

[عاشق الأمل]

يعطيكم العافية و الله الشباب مهتمين بالموضوع كثير

المعذرة بس كنت في رحلة عمل للهند و الصين و إنتداب للدوادمي (القاهرة) :)

عموما بالنسبة للشحن و التأمين كلها كلفت 7500 ريال.

بالصراحة بخصوص البلاك لست خويي تكفل بالموضوع و تأكد أن السيارة ماعليها مشاكل و تأكد من المواصفات اللي طلعت فيها من المصنع (كل المواصفات اللي فيها أصلية و مو مركبة).