كل شئ تبعثر :: قصه قصيره ::

[قنوعة]

http://www.awaael.net/forum/images/bsm.gif
http://awaael.net/forum/uploaded/131_1162943864.gif

:::::::::::::::::::::::

خلاص مليت معدنيب مقومته مره ثانيه مهيب الشرهه عليه على اللي يقومه اصلا
اذا قومتك تسفهني واذا نادتك هند تقوم بسرعهhttp://www.awaael.net/forum/images/smilies/ranting_w.gif
طراااااخ << صوت صكه الباب

:::::::::::::

هذا ديدنها كل يوم
ادري انها تنقهر مني بس شسوي احب ارفع ضغطها شويhttp://www.awaael.net/forum/images/smilies/1aa.gif
نوف اختي الصغيره مهوب صغيره صغيره بس هي اصغر البنات ولا انا اصغر منها بسنه ونص
مايحلى اليوم الا اذا حارشتها فيه خاصه انها ثالث ثانوي هالسنه وعلى بالها تتدلع
على ايش ياحبيبتي http://www.awaael.net/forum/images/smilies/ANSmile29.gif اذا دلعوك امك وابوك بكيفهم اما انا فمعصيhttp://www.awaael.net/forum/images/smilies/1.gif
انا سعود والاجر على الله http://www.awaael.net/forum/images/smilies/1aa.gif


:::::::::::::::

هند شوفي هالعلّه سعود ماقام قوميه الله ياخذهhttp://www.awaael.net/forum/images/smilies/mad.gif
................ يوووووووووووووووه للجنه خلاص فكينا

ماسمعت شئ بس متأكده انه كالعاده كل مادعيت علي هالولد هاوشتني هند ابفهم بس واذا صار اخر العنقود
وش يبوني اسوي له !

انا نوف اصغر البنات لو الله فاكني من هالسعود كان صرت اخر العنقود http://www.awaael.net/forum/images/smilies/ANSmile29.gif
ثالث ثلاثه يعني هند ثم انا ثم هو كذا ترتيبنا في العائله ..
صديقاتي كلهم عندهم اخوان كبار يطلعونهم ويمشونهم ويلبون طلباتهم الا انا http://www.awaael.net/forum/images/smilies/frown.gif ابوي مهوب فاضي لي دايم
بعدين شغله كثير ارحمه من كثر طلباتنا .. على الله يتعلم سعود السواقه عشان يريح ابوي شوي
مع ان امي معارضه هالشئ تقول لين يدخل الجامعه على الاقل ..
::::::::::::::::::::

نوف افطري عشان بيجي خالي محمد بعد شوي لاتأخرينه كل صبح
وانا هذي شغلتي في البيت اقوم هالاثنين كل صبح ويعلوني
استاهل . . لو شديت حيلي كان جبت نسبه زي الناس ودخلت الجامعه مهوب اقعد في البيت كذا http://www.awaael.net/forum/images/smilies/frown.gif
مع اني مستانسه على هالوضع http://www.awaael.net/forum/images/smilies/smokie.gif

نوف يالشينه هذا هو يدق الجرس اطلعي بسرعه

احب الاعمال اليدويه ابوي دايم يقول يبي يفتح لي محل ابيع فيه منتجاتي بس انا اعارض خوف مبهم بالفشل رغم ان الكل مشجعني ..
حتى نوف على انها تعارض كل شئ الا انها تلح عليّ في هالمشروع
:::::::::::::::::::

.... للحديث بقيه http://www.awaael.net/forum/images/smilies/flower.gif

[قنوعة]

القصه بمجملها تحكيها هند .. تتذكر مواقفها السابقه
تسردها بالكيفيه اللي تمر فيها
هند .. وهند فقط هي بطله القصه ..
:
:
كل شخصيه لها لون ثابت
لاتنسون http://www.awaael.net/forum/images/smilies/smile.gif
:
:

[كورديليا]

:


يُنقـل لـ منتدى الأسـرة ..


.. ....


||||| .. .. |||||



.. ....

[قنوعة]

هذي كل ذكرياتي عن اهلي
مدري ليه مرّ عليّ هالشريط اليوم .. يمكن عشان القصه اللي قالها خالد عن صديقه
حادث شنيع راح فيه ثنين من عيال اخوه .. الله يرحمهم بس اكيد مهوب مثل ذاك الحادث http://www.awaael.net/forum/images/smilies/frown.gif

كان يوم خميس ونوف فرحانه باليوم هو الافراج بوقتها .. سبحان الله لو كنت ادري ان اللي بيصير لهم كان رحت معهم
وش الدنيا بلياهم http://www.awaael.net/forum/images/smilies/frown.gif استغفر الله بس وش هالافكار
كل شئ صار بسرعه طلعوا من البيت على اساس ابوي يعلم سعود السواقه
ونوف لقتها فرصه تطلع شوي من جو المذاكره
ليتها ماراحت .. الا ليتني مازنيت على هالسياره ..اعوذ بالله من الشيطان وش له داعي هالكلام


ترن ترن
نعم ..
..........
وعليكم السلام ورحمه الله
.........
زين ان شاء الله صدقت واجب طيب كم يبي لك !
..........
ان شاء الله بجهز واحتريك

ياعمري ياخالد عليته معي .. يحاول بكل طريقه ينسيني اللي صار
احيان اكره وجودي معه .. احس بحزني يحزن معي .. الله يعين
خل اقوم اجهز قبل يجي .. والله اني شايله هم وشلون بعزيهم .. اذكر يوم عزاء اهلي الكل حضر
بس ما انسى ام ناصر جزاها االله خير .. فعلا محتاجه لكلماتها الطيبه في ذاك الوقت
ان شاء الله بسوي زيها اليوم:::::::::::::::::



هند متى بيزين العشاء !


::::::::::

سعود مايبي عشاء
يقول متعشي خلاص يالله جيبي العشاء والله جوعانه

وش مايبي قبل شوي يسألني يقول متى بيزين !

والله متعشي ( بصوت واطي تقول " امس " )

بسأله واشوف كوده ياكل لو شوي



ياااااااااااااااااه يانوف كل شئ حولي يذكرني فيك .. هند اللي كنتي تقولين عنها قويه وصابره
ليتك تشوفينها من بعدكم http://www.awaael.net/forum/images/smilies/frown.gif كل شئ فيها تبعثر
حتى نظراتي يقول خالد ليه احس الحزن بعيونك
مع اني احاول قد ما اقدر ما ابين له شئ
الله يغفر لك يأمي كلامك اشوفه قدامي الحين
هذا خالد اللي اخترتوه لي الحمد لله كان نعم الاختيار
زوج ورجل يعتمد عليه .. جزاه الله خير
:::::::::::::::


هلا خالد وينك يارجال معد تنشاف !!
........
نشوفك اليوم في الاستراحه ..
.........
زين اجل ترى ببلغ الشباب .. لا تتأخر
..........


من زمان عن الشباب والله جلستهم ما تنمل صدق ان الشغل ياخذ من وقت الواحد تالشئ الكثير
اليوم من طلعت من الدوام وانا مبسوط .. الحمد لله هند اليوم ازين من الايام اللي راحت بواجد
الله يعينها من جد صدمه .. ابوها وامها واخوها واختها كلهم في يوم واحد .. الحمد لله على كل حال
الشئ اللي ضايقني من الشباب اليوم اصرارهم على سيره العيال
الله وا اكبر واذا سنه مرت من الزواج ومابعد حملت هند وش المشكله
ما دمت مرتاح وهي بعد وش على الناس مننا !
الايام جايه واللي كاتبه ربي بيصير

:
:

ماقد احترت مثل حيرتي اليوم .. هديه نوف ماعرفت اختارها
مدري من استشير ! سعود مع انه راعي استهبال الا ان هداياه كلها زي وجهه !
اجل شاري هديه نوف ميداليه صرصور محنط !! ادري مهيب ساكته له بتردها منه واكثر بعد

اليوم خالد قالي انه النتائج حقت ثالث ثانوي بتطلع بعد اسبوع .. وبيبشرني بنوف قبل هالوقت
خالد ... سبحان الله الواحد مايدري وين نصيبه فيه .. كثر ماعارضت عليه ورفضته كثر اصراره واهله عليّ
خذتها عناد .. مدري ليه ! بس امي ياحبنيلها تبيني اوافق لانه رجل بحق وحقيق زي ماتقول
ووافقت .. ما انسى وجه نوف يوم علمتها امي http://www.awaael.net/forum/images/smilies/smile.gif بغت تصيح
جتني تركض تقول ليه !! ليه بتروحين وتخليني ليه توافقين وانتي واعدتني انك ماتتركيني ابد http://www.awaael.net/forum/images/smilies/frown.gif
نوف انتي اللي تركتيني الحين http://www.awaael.net/forum/images/smilies/frown.gif


هند
....
هند
...
هند اكلمك وين سرحتي http://www.awaael.net/forum/images/smilies/smile.gif

هاه .. سم حبيبي وش كنت تقول

حبيبي ! حبيبي راح وخلاني .. بباه اشتقت لك
والله اشتقت لك ولنصائحك لي .. لولا الله ثم انت كان مافتحت المحل وابدعت فيه
الفرح الحقيقي حسيته مرتين .. مره يوم قلتا لي انك استأجرتا المحل والثانيه يوم نجاح نوف
كلنا تحمسنا ونشتغل ليل ونهار لين فتح المحل فعليا .. رهبه اول زبونه تدخله وتشتري عجيبه
ههه اذكر نوف عطتها سعر وانا سعر اقل .. ( فكري بطريقه التجار الربح اولا ) ياحليلك يانوف انتي ونصايحك اللي مدري وش تبي ..



هند الله يعافيك زيني البحث حقي نوفوه عيّت هي ووجها عاد من زين ابحاثها بس

صلحه انت طيب وبساعدك فيه

عندي واجبات كثيره بعدين صعبه مشاويري للمكتبه ومالي داعي اطلب من ابوي كل شوي يودين
انتي تقدرين مهوب لازم يكون ممتاز جدا من النت يكفي .. الله يخليييك

هههههههه تعرف نقطه ضعفي يالدب خلاص بس متى تبيه ؟

بكره الصبح

نعم !! وانتم دايم كذا ماتجون الا في الوقت بدل الضائع
وين تعال اكلمك ( يمشي وهو يسرع ويضحك بعد ..)

آه ياسعود لو تبي عمري اهديك اياه .. ليه تتركني http://www.awaael.net/forum/images/smilies/frown.gif
:::::::::::::::::::::::::::::::::::
::::::::::::::::::::::::


دادا دادا نوني
يادلبو ياناس تعالي سلمي .. شسمك ياحلوه ؟
نوني واوا
نوني اممم انتي نوره
بابا لاح نوني بابا
بس بس لاتصيحين روحي لبابا
( تمسك ثوبه وتسحبه معها ) بابا لاح نوني
ههههههههه طيب وين بتوديني


لو سمحت

نعم اختي

هذي بنتي .. تعالي نوف
( تمسكها بيدها وتسحبها وراها وهي تصيح )

بغيت الحقها واقول طيب امسكيها زين حرام عليك تراها صغيره
الله يهديك بس .. نظراتها تنرحم شوي شوي عليها

خالد
....
خالد
...
( تدفه بشويش ) هيه خالد وش تناظر !

شفتي ذيك البنيه

وين ؟

ذيك اللي ماسكتها امها اللي لابسه فستان وردي

ايه وش فيها

مدري بس حبيتها

نعم !!

البنت هههههههه وش جاك .. اسولف معها تو وجت امها وخذتها بالقوة مني الله وا اكبر وش بسوي فيها يعني اقول هند اطلب منك طلب

( والله انك فاضي ياخالد خل اخلص مقاضيي الحين ) سمّ وش بغيت !

روحي لامها قولي لها تعاملها زين

زين زين طيب

هند اتكلم من جد بسرعه قبل تطلع

خالد اعقل بس وش عليّ منها هي امها وادرى فيها





اقول هند اذا جبتي بنت بنسميها نوف
لا
الا
لا
منيب
موب بكيفك
معصي
نعم ! اقول مهوب بكيفك نوف يعني نوف
اقول خلها تجي اول بعدين سمها زي ماتبي . بصوت واطي ( الا نوف http://www.awaael.net/forum/images/smilies/frown.gif )


:::::::::::::::


هذا الركن ودي اغير في ديكوره بس مدري وش يناسبه
خالد وش رايك !

بكيفك سوي اللي تبين

ودي اغير لونه مثل اللي سوته بس منيب ضابطته زيها
منهي ؟

نوف http://www.awaael.net/forum/images/smilies/frown.gif


::::::::::::::

يالله يارب ياكريم يامن بيدك كل شئ
يامن اذا ااردت شئ قلت له كن فيكون
يارب لاتذرني فردا وانت ارحم الارحمين

لو توافق هند نسوي هالتحليل مدري ليه تعارض
مافيها شئ نتأكد بس بدل ماننتظر وماندري وش النهايه




اليوم خالد غريب شوقه للاطفال اليوم زايد
انا مثله طيب بس .. لا مابي احمل ..

:::::::::::


يمه من تحبين اكثر
كلكم عيالي واحبكم كلكم
لايمه تكفين اكيد تحبينا بس من اكثر
نوف لاتكثرين كلام كلكم عيالي قومي عني بس
ههههههههههههه حبيبتي اكيد امي تحبني انا بس ماتبي تجرح مشاعركم

شوفوا بس من اللي يتكلم .. الله لو انك هند الحين

هند انتي ووجهك على ايش شايفه عمرك .. مغروره !

الله يصلحكم ياعيالي .. وربي يشهد كلكم في قلبي سوا http://www.awaael.net/forum/images/smilies/smile.gif

:::::::::::::::::

يابن الحلال فكني من هالسيره بكيفي راضي عن حالي وش عليك انت بس ! شف شغلك الله يصلحك
.........
عبدالعزيز ترى هالكلام يضايقني .. انتهينا .مع السلامه

من فتره وكل كلام الشباب عن العيال وليه مابعد حملت حرمتي ! من جد ناس مدري وش تبي
هند بنت طيبه وتعجبني في كل شئ .. الله يرحمك ياخال هذي تربيتك ، ومابي اضغط عليها خاصه انه مابعد تمت سنه من فقدت اهلها .. الله يعوضها الجنه ويعيني على تعويضها اللي ققدته عقبهم ..

:::::::::::::::::::::


هند وانا امك ما اوصيك زوجك هو جنتك ونارك
ان شاء الله يمه
مالك بعد الله الا هو .. اهلك خلاص انفصلتي عنهم حافظي على زوجك وبيتك
بعيد الشر يمه انتم اهلي لو وش ماصار
مهوب شر يابنيتي بس كذا الدنيا .. بتكونين بيت جديد واسره جديده اعطيها كل اهتمامك والله الله بهالرجال الطيب
ان شاء الله يمه .. لاتخافين عليّ .. انا بنتك يمه لاتنسين http://www.awaael.net/forum/images/smilies/smile.gif

::::::::::::

سعود الله يخليك تعال شل هالكرتون عني ثقيل وده المطبخ
هههاي وراه ماتشيلينه انتي .. تستغلين منصبك يعني !
وش منصبه انت ووجهك هذا وانا متواضعه معك الحين واشاورك تعال شله وانت ساكت
دقيقه بعلم امي
نعم !
يمااااااااااااااه وش ابشرك هند حامل
اص وجع يمااااااااااه يكذب والله يكذب
اشيل الكرتون اصرف لي مامنك فايده يامال اللي منيب قايله بس

:::::::::::::::::::::


ابوي اليوم مهوب على عادته .. من جت هند اليوم وهو متغير ... خير اللهم اجعله خير
سألت امي وسعود قالوا مافيه شئ بس متأكده ان فيه شئ بسأل هند واحاصرها بالاسئله وهي طيبه ياعمري بتعلمني على طول ..ماتقاوم اصراري .. هههههههه مثل خالي نشبت فيه لين علمني اسم خطيبته بعد بعد يخطب ولايبي يعلمنا من هي ! والله


بحاول اخفف من مزحي مع هالنوف مع انها ماتستاهل بس تنرحم وهي تذاكر
بفهم الحين اذا كلت بيضيع عليها الوقت !!
وبذاكر مثلها عشان ابوي يشتري لي السياره اللي ابي .. ياحبني لك ياهند آزرتيني واقنعتيهم اني صرت رجال وقد المسئوليه http://www.awaael.net/forum/images/smilies/smile.gif

::::::::::::::::::


خالد لو سمحت مابي تفتح هالموضوع مره ثانيه معي .. اللي ربي كاتبه بيصير
سواء سويت هالتحليل ولا ماسويته



اتمنى اسعدك ياخالد بس مو بيدي http://www.awaael.net/forum/images/smilies/frown.gif اشوف شوقك للاطفال بعيونك اقراه بنظراتك لما تشوف طفل قدامك
انا مثلك والله اتمنى اجيب طفل يناديني .. ماما
اشيله اضمه اعطيه حنان الدنيا كله ..
انا مثلك لما تدخل البيت اتمنى اسمع صوته يركض وهو يضحك وتشيله وتضمه قلبك كبير ياخالد وبيوسعنا كلنا
اشوفك وانت تقلب ملابس الصغار في السوق
تجمع حلويات الصغار في السوبر ماركت بس ماتحاسب عليها .. تطلع وتتركها
تحسبني ما اشوف اللي تسويه !
آآآه ياخالد لاتجبرني على اللي ما ابيه .. سامحني http://www.awaael.net/forum/images/smilies/frown.gif
::::::::::::::::::::


خالد يالله قم الساعه 6:30 الحين تأخرتا على دوامك
....................




سعود حبيبي يالله قم الساعه 6 الحين لاتتأخر على الامتحان
........
سعود قم
........
سعود تحرك ياخي حس فيني وجع غيبوبه ذي مهوب نوم
.........
يوووووووووووووووووه ( تسحب البطانيه ) قم لاتاخرني منيب فاضيه لك
..........

هــــــــــند تراه ماقام قوميه بروح البس لا اتأخر بعد انا

:::::::::::::::::::


خالد قم ( سحبت البطانيه منه بالقوة ) احركه بقوه قم يعني قم
خالد لازم تقوم
خالد قم الله يخليك قم
خالد لا الله يخليك قم لاتخليني

هند طيب مهوب لازم تصارخين ( وهو معطيها ظهره )

اقولك قم خااااااااالد الحين قم قم وhttp://www.awaael.net/forum/images/smilies/crying.gif


( قمت مفزوع ) هند وش جاك فيك شئ ليه تصيحين !!
.................


:::::::::::::::::::


صباح الخير استاذ خالد
..............
خالد نحن هنا http://www.awaael.net/forum/images/smilies/smile.gif
...........
اللي ماخذ عقلك يتهنى فيه http://www.awaael.net/forum/images/smilies/smile.gif
............


ليه هند خايفه اليوم !
ماحسيت فيها وهي تقومني اول مره توني غافي بعد مارجعت من الصلاه الفجر وهي كانت طبيعيه صلت عادي وقعدت تقرا قران زي كل يوم .. لحظه اتذكر .. عاديه جدا حتى كانت تبتسم لي .. الله يسامحك ياهند تعبتيني معك .. لو تفتحين قلبك لي مثل اول كان انحلت كل مشاكلنا ..
هند طبيعيه جدا وصريحه معي .. بس من صار هالحادث وهي متغيره تكتم احزانها ادري والله ان اللي جاها مهوب بسيط بس تسمح لي اخفف عنها مهوب تصدني كل مره بدموعها وصمتها
:::::::::::::::::::::



هند تعرفيني ؟
هيه نوف وش فيك مصخنه !
لا جد هند تعرفيني ؟
ايه انتي نوف اختي اللي تغثني بمناقرها مع سعود دايم
لا والله اتكلم جد تعرفيني ؟
اممم لحظه اتذكرك هالوجه مهوب غريب علي قد شفتك مره العيد !
يعني ماتعرفيني http://www.awaael.net/forum/images/smilies/frown.gif
افكر http://www.awaael.net/forum/images/smilies/lac.gif
طيب خلاص http://www.awaael.net/forum/images/smilies/frown.gif

هيه نوف وش فيك اليوم انتي وهالاسئله ماخليتي احد ماسألتيه هالسؤال
http://www.awaael.net/forum/images/smilies/frown.gif
ايه يابنت الحلال اعرفك انتي نوف اختي الغاليه اللي ساكنه معي في نفس الغرفه و...خلاص يكفي http://www.awaael.net/forum/images/smilies/frown.gif
نوف ( لفيت بوجهها تجاهي وخليت عينها بعيني ) وش فيك !
......... - تنزل عيونها -
نوف ارفعي عينك وناظريني .. وش فيك اليوم ؟
هند .. ( ضمتني وبكت )

!!هند ليه ماعلمتيني

:::::::::::::::::


بباه تعبت خلاص خل نرجع البيت ونكمل بعدين

باقي هالمحلين خل ندخلهم وخلاص .. يابنتي لازم نتحرصين على حلالك وتجديد بضاعتك لو بتطاوعين عمرك ماتحركتي خطوه قدام


هذا اخر شئ اتذكره .. ماقمت من هالاغماءه الا وانا في المستشفى على السرير وبيدي مغذي وجنبي نوف حاطه يدها على السرير ونايمه .. حاولت اتذكر وش صار ماقدرت .. الا ان نوف يوم حست بحركتي طلعت وهي ساكته ونادت ابوي .. ورجعنا للبيت ..



منظر الدم اليوم افزعني .. بس اتصبر قدام خالد واحتسب الاجر .. بنت اخته بتسوي عمليه جراحيه ومحتاجه متبرعين بالدم
وفصيلتنا مناسبه لها .. نظره خالد للصغيره قطع قلبي .. لا انا اللي جبت له الطفل اللي يبيه و ريحته ولا .. مدري الله ييسر بس
::::::::::::::::::


سعود ركز معي مهوب معقوله كذا هذا كبرك وماتفرق بين المفعول به والمفعول لاجله
طيب قصري صوتك فهمت فهمت .. بس لاتسمعك امي
لي ساعه اشرح لك وانت ولا هنا .. هذي اخر مره اشرح لك ولا والله لاعلم ابوي عليكhttp://www.awaael.net/forum/images/smilies/h035.gif
طيب زين زين عيدي بركز معك
ياسعود ياخوي الامتحانات قربت خلاص كم يوم وتبدأ ولازم تركز .. ترى منيب جايتكم كل يوم اذاكر لك خالد عنده دوام وصعبه يجيبني كل يوم

انا اجيبك اصبري بس لين انجح ويشتري لي ابوي سياره http://www.awaael.net/forum/images/smilies/smile.gif

زين بس انتبه معي الحين http://www.awaael.net/forum/images/smilies/smile.gif



:::::::::::::::::::

اقول خالد .. انت رجال والله تنشرى
واذا تبي زوجتك اختي


هالكلمه عجزت انساها .. يعني مشكله هالعيال صاروا ! هند لو تطاوعني ونكشف واذا محتاجه علاج اعالجها بكل ما املك مدري ليه خايفه ! كل مافتحت هالموضوع معها تصرف وتغير الكلام .. اليوم بكلمها من جديد واحاول اصرّ شوي .. ياهند لاتجبريني اضايقك http://www.awaael.net/forum/images/smilies/frown.gif


:::::::::::::::::::::::::


اقول هند
نعم يانوف
وراك تكلميني كذا طيب !
نوف الله يخليك منيب رايقه لك راسي مصدّع
سلامتك من الشر .. تبين بندول !
لا شكرا ابيك تطلعين الحين من الغرفه
واذا قلت منيب
نوف اطلعي وخليني الحين
نو نو نو
بتطلعين ولا وشلون !
..........
صبر جميل والله المستعان وش تبين الحين !
ابي اكلمك في موضوع
اسمعك
لا ماينفع تسميعني وانتي لهالحاله تعالي تحت نتقهوى وتصحصحين شوي
طيب جهزي القهوة وبنزل وراك
شكرا يا احلى اخت بهالدنيا

::::::::::::::


السلام عليكم ورحمه الله
وعليكم السلام ورحمه الله وبركاته .. حيا الله الغالي

هند البسي عباتك وخل نتمشى بالسياره شوي http://www.awaael.net/forum/images/smilies/smile.gif

بس ! تأمر امر انت من لي غيرك

اييييييييه هذا وانا ماقلت بنتعشى برا بعدhttp://www.awaael.net/forum/images/smilies/cool2.gif

هههههههههههههههههه لاتخاف انت غالي ولو ماتعشينا برا http://www.awaael.net/forum/images/smilies/flower.gif

يعني اهوّن !

لا يارجال امزح خلاص انا جاهزة الحين



طول الطريق وانا احاول افتح الموضوع معها بس ماقدرت
ضحكاتها وسواليفها حسستني بالعجز .. ما ابي اخرب وناستها بموضوع تافهه مثل ذا
ياااااااااااه ياهند من متى ماسمعت مثل هالضحكه .. الله لايحرمني منك


:::::::::::::::


خالد .. وربي حاسه فيك بس ما اقدر .. ما اقدر
الكل تخلى عني وراح .. حتى انت http://www.awaael.net/forum/images/smilies/frown.gif

::::::::::::::::


هند انتي صاحيه !
لا بالله مجنونه !! يابنت الناس قصرت معك في شئ ! ضايقتك في شئ !
اسمعي مني الحين .. بسافر اسبوع وبرجع وفكري زين في كلامك .. هند ما ابي افرط فيك سامعتني !



:::::::::::::

اقول وش هالقهوة اللي شمينا ريحتها ولا ذقناها

http://www.awaael.net/forum/images/smilies/smile.gif القهوة وصلت ياجدعااااااااااااان

وين امي وابوي وسعود ؟

ماناديتهم .. هالقهوة خصيصا لي انا واياك http://www.awaael.net/forum/images/smilies/smile.gif


مدري وش تاليه هالتدليل .. صبي فنجال وغردي بما عندك ياعزيزتي

هنيدووووه لاتتريقين عليّ ترى بهوّن

توبه خلاص .. معك شئ غالي ، معك القهوةhttp://www.awaael.net/forum/images/smilies/ANSmile29.gif

:::::::::::::


سعود .. اذا رجعتوا جيبوا لي عشاء معكم http://www.awaael.net/forum/images/smilies/smile.gif

طيب تعالي معنا .. ماودك تشوفيني وانا اسوق لاول مره احم احم

ودي بس عندي هالعمل ودي اخلصه لان راعيته تبيه بكره الصبح

متى بترجعون !

ماراح نرجع الا الصبح http://www.awaael.net/forum/images/smilies/099.gif

لايكثر وانا اختك .. ابوي بيرجعكم مبكرين http://www.awaael.net/forum/images/smilies/drunk.gif




آآآآه ياسعود .. لا انتم اللي رجعتوا مبكرين ولا متأخرين http://www.awaael.net/forum/images/smilies/frown.gif

:::::::::::::::::


هند اختي .. مادام لقيت فيني هالشجاعه اتكلم معك اسمعيني للاخير

طيب اسمعك
هند .. ليه تخافين من الموت لهدرجه ...

نوف لو سمحتي لا تكملين اذا هذا موضوعك خلي القهوة لك وانا بروح غرفتي

هند اسمعيني للاخير اتفقنا على كذا


طيب http://www.awaael.net/forum/images/smilies/002.gif


من جد خوفك مهوب طبيعي .. ماتوقعت ان سبب اغمائك ذاك اليوم انك عرفتي ان احد عماله المحل صار له حادث ومات ! الله يرحمه والموت حق وكلنا نفس المصير .. ياهند خلي ايمانك بالله قوي واستعدي للموت بالعمل الصالح وصدقيني الموت بحد ذاتيه مهوب سئ مثل ماتظنين بالعكس الموت وسيله انتقال ووصول لرب العالمين وهو ارحم الراحمين بالله ياهند ماودك تروحين بجوار ربك ! والله اتمنى ..الانسان في هالدنيا سبحان الله خلق في كبد وماراح يرتاح الا اذا لقي ربه بعمل صالح يرضاه .. ادري ياهند انك تعرفين هذا كله وانتي اللي معلمتني اياه ... معك حق تخافين من موت قريبك او امك وابوك او حتى انا وسعود بس هالخوف لايعيقك عن الحياه لان كل شئ يقع بقضاء وقدر .. ياهند ماتمنيت اشوفك في هالموقف وهالعجز انتي هند الصابره القدوة .. طيب فكري بالعقل وش ذنب خالد معك ! انتي وافقتي عليه برضاك ( هند هدي اعصابك لاتتوترين هدي الموضوع ابسط مما تتصورين )


نوف يكفي

لا مايكفي .. مايكفي ياهند انتي خلاص ارتبطتي برجل ائتمنك على حياته واختارك انت بالذات عشان تكونين ام لعياله .. ليه تحرمينه هالشئ بخوف لامبرر له ! تخافين يموت البيبي !! ياهند هذا بيد الله سبحانه مهوب بيدك انتي افعلي الاسباب واتكلي على الله .. والله ياهند مهوب عذر ولو يدري خالد ماراح يسامحك ..
قولي له عن خوفك ممكن يساعدك في تخطي هالخوف .. اذا كان يحبك بيساعدك ياهند .. صدقيني


نوف خلصتي !

هند .. ليه نظره الخوف بعيونك !

خلصتي ! http://www.awaael.net/forum/images/smilies/crying.gif

ايه

شكرا

:::::::::::::::::::::::


لديك 1 رساله جديده
ادري اكيد انها منك ياخالد ( هند .. قرار الانفصال مو بيدك لحالك .. اذا انتي قدرتي تفرطين فيني لو بفكرك .. انا ماراح افرط فيك عمري كله .. والعيال ! عمرهم ماجوا )


مسكت الجوال .. وبتردد دقيت على خالد

http://www.awaael.net/forum/images/smilies/frown.gif يكفي .. يكفي .. انا مجنونه انا ما استاهلك ياخالد
عجزت اتخلص من هالخوف .. ليتك معي الحين .. ياخالد انا مافرطت فيك وتدري شكثر احيك واغليك
خالد انت الباقي لي بعد الله .. لا ام ولا اب ولا اخت او اخ . . كلهم خطفهم الموت من عندي http://www.awaael.net/forum/images/smilies/crying.gif

هند .. هدئ اعصابك .. ربع ساعه واكون عندك .. هند انا هنا بالرياض ماسافرت لكن قلت ببعد عنك تفكرين بدون تأثير وجودي .. هند تسمعيني !

خالد خلني اكمل كلامي لو سمحت .. نظره الشوق بعيونك للصغار اشوفها بكل وقت .. حرمتك من الشئ اللي تتمناه .. اعطيتني كل شئ .. وماقدمت لك اي شئ .. انانيه انا صح ! خوفي ضيعني .. نوف حذرتني من هالشئ .. بس ماسمعت كلامها .. ابوي نصحني واكثر من نصحي .. ياخالد خوفي هالسخيف كان سبب ان ابوي يبكي عشاني http://www.awaael.net/forum/images/smilies/frown.gif يكامني وهو يبكي يتمنى يشوفني طبيعيه بس انا السخيفه اللي كابرت واعطيت الموضوع اكبر من حجمه .. مات وهو زعلان مني http://www.awaael.net/forum/images/smilies/bawling.gif

هند .. انا في الطريق مع السلامه


:::::::::::::::::::::::


يمه كملي

وبس ياسعود .. كان هذا اخر مره اسمع صوت ابوك فيها .. كنت متوتره وخايفه وقتها .. مدري كيف اقول له اني حامل فيك خوفي ذاك منعني من شوفه نظره الفرح بعيونه ..اجتمع علي خوفين .. خوف موته وخوف موتك
وهو جاي في الطريق حصل له حادث .. اظنك تذكر الصور اللي وريتك اياها !

اذكرها .. كان حادث شنيع

الموت حق وانا امك .. والحمدلله على كل حال .. خوفي السابق من الموت حرمني من الاستمتاع بوجود اهلي وزوجي حولي .. ايييييييييه راحت ذيك الايام .. بس علمتني درس كبير .. اتمنى تفهمه ياسعود .. والحمد لله انت اشجع مني واثبت .. الموت مايخوفك صح ياسعود !

صح يمه .. بس وشو الدرس !

ان الخوف الحقيقي مهوب من الموت نفسه .. الخوف ان تلاقي ربك وانت ماقدمت شئ يشفع لك عنده ..
:::::::::::::

يمه كلميني اكثر عن خالي سعود .. ودي اعرف اكثر عن سمييّ http://www.awaael.net/forum/images/smilies/smile.gif

::::::::::::::

الموت مايخوف
الموت مايخوف
الموت مايخوف
الموت مايخوف
الموت مايخوف


( سعود الصغير وهو متلملم في فراشه ويرتجف http://www.awaael.net/forum/images/smilies/shudder.gif) الموت مايخوف http://www.awaael.net/forum/images/smilies/frown.gif

:
:
:
:
:


انتهى

[انوار الرياض]

يااااااااااااااربيه انا عانيت مثلك ياهند وربي حقيقه

والحمدلله على كل حال

وربي قصة مؤثره

الله يرحمك ياخالد بس ليش ماطعتي تروحين تحللين اااااااااه يازمن

وربي احيانا اقول ظالم ولا انا ظالمه نفسي

والحمدلله مؤمنين بقضاء الله وقدره يعني خالد لحق اهله

الله يرحمهم برحمته وجميع اموات المسلمين اجمعين

[عبيد المصرقع]

ما شاء الله قصه جميله
لكن نرجع ونقول ان الموت ليس شبحا مخيفا بل هو شئ لابد منه وان طال الزمان
فالامر يجب ان يكون على اين سيكون مصيرنا بعد الموت

شكرا يا قنوعة على القصه الجميله

[ابو دلامه]

قنوعة

كيف حالك \ اخبار المنتدى وناسه والله زمن عنكم

حبيت اعلق على كلمة قصه قصيره <--- ما كأنها اقصر من القصيره ههههههه :D

بالصراحه قرأت البدايه بس..
ويوم طمرت لتكمله لقيتها قصه قصيره جداً :D <--- وبما ان هاليومين برد وبيات شتوي فأنا قررت اقراها بعدين :D

البدايه توحي بقصه جميله .. كعادتك "قلم جميل"

ان شاء الله ارجع لها


تحياتي

[Ladies Killer]

قنوعه .. حاس بشعورك .. حبيت بس اشجعك واقولك متابع

ومثلك عارفه بحكم شعبيتي .. بعد ما ارد عليك بتشوفين كللللل الاعضاء بيردون عليك

ولا تقولين ذباح ماقالي

<< خيييييييير ذباح ديكابريو؟؟؟؟:D

bp039 :) bp039

[ί c o n]

قصة رائعة و أسلوب سرد و لا أروع ..


سجليني متابعة ( غير ) قنوعــــة :)