استفسار عن حالة التأهب

[شعبان]

مساكم الله بالخير :)



اذا كان فيه احد رافع حالة التأهب القصوى .. وانتهت حالة الطواري بعد ثلاث ايام

السؤال / هل تتضاعف قواتي العسكريه .. يعني قوتي العسكريه مليار وبعد التاهب هل تصير مليارين ؟

والسؤال الثاني / وانا في حالة التأهب هل مسموح لي ارسال مساعدات ؟



الله يعطيكم العافيه

[يـزغت]

هلا شعبان باشا


سؤالك الاول اذا رفعت حالة التأهب راح يكون جيشك مثل ماهو بس تتضاعف القوه

يعني اذا عندك 100 الف دبابه

الي يغى يحاربك يحتاج 200 الف دبابه عشان يساويك بالقوه بس بالدبابات

واذا انتهت حالة التأهب ترجع قوتك زي ما كانت يعني ما تتضاعف

السؤال الثاني انا ماجربتها بس اعتقد مسموح ترسل وتستقبل

[modamer010]

أول مشاااركة ... <-- الخبل كان يراكض شهرين يبي يفعل يوزره واليوم اكتشف ان عنده يوزر قديم مفعّل pb192


السؤال / هل تتضاعف قواتي العسكريه .. يعني قوتي العسكريه مليار وبعد التاهب هل تصير مليارين ؟
ج / لاء يخوي قوتك مثل ماهي لكن تتتضاعف اعداد جيشك في حالة الدفاع من الهجمات اما اذا جيت تهاجم فجيشك هو هو ما تغير
وفوق تسذاا مصانعك ما تنتج شي ... يعني مستحيل ترقى


والسؤال الثاني / وانا في حالة التأهب هل مسموح لي ارسال مساعدات ؟
ج/ الله العالم انك تقدر

[شعبان]

الله يعطيكم العافيه

مشكور اخوي يزغت ولا يهون مدمر

واحد الله يهديه معطيني معلومه غلط عن حالة التأهب وقالي بعد ما تنتهي تدبل قواتك وشوي ويحلف
وعلى هالمعلومه نصحت واحد فوق الترليون يسويها ..

واشوى انه ما طار في العجه وقلنا خلنا نتأكد وننزل موضوع ناخذ العلم الاكيد :)


والاكيد صار ان القوات ما تدبل ولا هم يحزنون :)

[RSMi]

حاله التاهب القصوى مفيده فقط في حاله الدفاع فقط
تتطلب لوضع حاله التاهب 15% من قدرتك الكليه لو قدرتك مليار يبغالك 150 مليون كاش عشان تسويها ولا تستهلك ادوار
جميع القوات لديك تزيد لضعف في حاله الدفاع فقط بينما في الهجوم لا تتغير طبعا التكنلوجيا داخله بالموضوع مع التكنلوجيا راح تتضاعف اكثر لو عندك 1 مليون دبابه تكنك10 معنتها لديك 2 مليون دبابه بالتاهب تطلع 4 مليون
عيوب التاهب القصوى 72 ساعه اي ثلاثه ايام قواتك تتضاعف بينما نزع اسلحتك 96 اربع ايام لا ينتج بلدك
سوى صوت او ما صوت بالامم المتحده على نزع الاسلحه ما راح يفيد لان التصويت يكون لمده اربعه ايام الي هي المده الي راح يوقف انتاجك فيها
فيه ثغرات بنظام اللعبه اكتشف يؤدي افضل من دور التاهب القصوى ومنتشر بالمنتديات العربيه لو تطبقه افضل من التاهب
وجه نظري ان التاهب الان بعد ما تتحارب تضعه او ان لديك مثلا انتاج كبير من الاقمار وتبي تصفي الاقمار عندك ل0 تسوي حاله التاهب

اتمنى اكون افدتك باستفسارك تحياتي لك

[ابوعيون جريئه]

انا ما ادري وشلون الواحد قديم في اللعبه ولا يعرف ابسط ابجدياتها...!!
اللهم لك الحمد بس :)

[شعبان]

استغرابك يبو عيون في محله :)

المشكله ان اللي عطاني المعلومه اقدم مني في اللعبه واحد ابرز المقاتلين في الاقلاع !!!! تعجب كبر جبهتك :)

ومن زين الطبايع يقولي انا مجربها ... قسم بالله كنت ناوي استخدمها بعد ما ارقى وبغينا نوهق ابو ترليون
والسبه هالاحمق .. :)

[ابوعيون جريئه]

وانت الله يهديك تطير في العجه بسرعه ؟؟!!
وبعدين انت مشخص بصداقتك لابو ترليون؟ :)
الله يالدنيا

تذكر يوم أبلشتني اول ما طحت في اللعبه كل ماهجمت كوماندوز على احد ونجحت العمليه تتصل على جوالي تعلمني؟ :)
وتذكر يوم قلت لك لاعاد تكلمني الا عند الضروره الله يرحم والديك...اتصلت علي الفجر ليلة دوامات تقول لقيت لك صيده واحد معه سيوله ستين مليون وتبيني اهجم معك :)

[ابوعيون جريئه]

الا تذكر الدباب يوم عنده 700 دبابه وحاط موضوع يقول تبون فزعه ياشباب؟هههههههههههههههه

[شعبان]

لا ما انكر :)

وهذا كله بسبب اساسي كان ضعيف .. انت اللي معلمني هالحركات واول درس تعلمته منك

القدره العسكريه + القدره الصناعيه = القدره الكليه

[ابوعيون جريئه]

ههههههههههه قصدك:
(القدرة الصناعيه+العسكريه) - القدرة الكليه= الفلوس
هذا انتم ياخريجين الأدبي وش يعرفكم في الرياضيات...:)

[شعبان]

الا تذكر الدباب يوم عنده 700 دبابه وحاط موضوع يقول تبون فزعه ياشباب؟هههههههههههههههه

هههههههههههههههههههههه الله يذكره بالخير والله ياهو تفقع وجهه في بداية مشواره


ههههههههههه قصدك:
(القدرة الصناعيه+العسكريه) - القدرة الكليه= الفلوس
هذا انتم ياخريجين الأدبي وش يعرفكم في الرياضيات...

انت ابخص يا انشتاين ... ما اشبهك الى بالمدرسين المصاريه في المدارس الاهليه
اللي يخرجون طلابنا وما يدرون كوعهم من بوعهم :)

[ابوعيون جريئه]

ههههههههههههههههههههه
اضحك الله سنك احمد ربك بس انك ماصرت تلميذ لحلاو صعو كان انت الى هالحين تكنلوجيتك في الجنود 30%

[RSMi]

الحين انت يا شعبان مدري اي شهر من السنه قالب الموضوع شات
معطيك معلومات مفصله ودقيقه حتى كلمه شكرا ما فيه ؟؟؟؟
قالبها لي شات وذكريات عام الف وخشبه !!!
يا اخي مدري وش تحسونبه يا منتدى اقلاع مهوب مشكله اي احد يبي معلومه احسن شي تتلايط لانه والله محد يستاهل اكتبله الي عندي حتى كلمه شكرا يستخسرها المشكله انك تستفسر ونجاوبك والي معطيك على قفاك ترد عليه ترا اسهل شي على الواحد الشبه لو تبي اشب فيك طلعت مثل العشب ليابس الي ولع فيه نار
بمشي بدون تحيات واي موضوع لك استفسار فيه يا شهور السنه ما راح اجاوب عليه
<<< زعلان عليك

[RSMi]

ولو ابي احرجك قلتلك عطني رقم هويه خويك ابي اشيك عليه؟؟

هذا شلون وصل تريليون وهو ما يعرف نظام التاهب القصوى تحسها ما تنبلع يبغالها وايت مويه ويالله ما نشرق

[توزيعة طيبة]

الحين انت يا شعبان مدري اي شهر من السنه قالب الموضوع شات
معطيك معلومات مفصله ودقيقه حتى كلمه شكرا ما فيه ؟؟؟؟
قالبها لي شات وذكريات عام الف وخشبه !!!
يا اخي مدري وش تحسونبه يا منتدى اقلاع مهوب مشكله اي احد يبي معلومه احسن شي تتلايط لانه والله محد يستاهل اكتبله الي عندي حتى كلمه شكرا يستخسرها المشكله انك تستفسر ونجاوبك والي معطيك على قفاك ترد عليه ترا اسهل شي على الواحد الشبه لو تبي اشب فيك طلعت مثل العشب ليابس الي ولع فيه نار
بمشي بدون تحيات واي موضوع لك استفسار فيه يا شهور السنه ما راح اجاوب عليه
<<< زعلان عليك

انت ليش دايم معصب

[ابوعيون جريئه]

انت ليش دايم معصب
شفت وشلون...وسع صدرك يالماهر