اعاني من ( الثعلبه ) ممكن فزعة

[صــادق الــود]

السلام عليكم جميعاً

الحقيقه انا اعاني من مشكلة بسيطة

وقلت مهب فازع لي بعد الله إلا اخواني في منتدى الاقلاع

المشكله الي عندي اني اعاني من ( ثعلبه ) والثعلبه هي وجود منطقه في اماكن نمو الشعر لا ينمو فيها الشعر .

الثعلبه هذي عندي بالوجه وحاولت علاجها بجميع الطرق الحمد لله تحسنت بس ما راحت مره

وذكرلي واحد من الربع ان فيه واحد يكتب عليها وبإذن الله تروح

والي قالي يقول ان الي يكتب بالقصيم وتحديداً في عنيزه

ولكن انا رجال منب من القصيم ولا فيه احد من الي اعرفهم قدر يفيدني

فياليت من عنده علم يدلني على الشخص الي يكتب على الثلبه يمكن الله يكتبلي فيها شفاء

والف شكر لكم يا احلا ناس

[ذيبة]

هلا اخوي
انا بالنسبه للشخص الي تقول عنه ماعرفه

بس الثعلبه علاجها هين

ولد اختي كان يعاني منها والحمد لله تعالج بالمستشى وراحت منه


وفي كريم ينباع لاخصائي اعشاب الكل مدحه من الي جربه


اذا تبي رقمه انا حاضره لك..


ولا تحاتي علاجه سهل بس يبي له وقت

وخفف العصبيه والسترس


هي السبب الرئيسي وراء ظهور الثعلبه..


وماتشوف شر والله يعافيك

[سحر المعاني]

الله يوفقكـ إن شاء اللهـ

[بنت اخت القمر]

صادق الود... ماتشوف شر يارب
اذا كنت من سكان الرياض فيه الدكتور ابو بكر يوسف دكتور من 35 سنه على طريق التحليه ..
ممتاز وعنده صيدليه تبيع علاجات هو مركبها وخاصه فيه هو بس
والثعلبه مرض جلدي بسبب القلق والتفكير الكثير وفي اي صيدليه موجود محلول مائي او لوشن خفيف تحطه على نفس المنطقه المصابه بالثعلبه وبعد ثلاث ايام يطلع شعر باذن لله (في اي صيدليه قول محلول لثعلبه وشكله مثل النقاااط )
والله يشفيك وكل مسلم

[يـااويـليـهـ]

..+ \ تدري اخوي فيه ثعلبه في راسه
كبيره كبر قريح..ومابقى دكتور ماراح له..
في الاخير سواقنا وداه لحلاق يعالج الثعلبه
بـ 100 حط عليه زي العجينه لمده يومين
همن تحط علاج يعيطك اياه..
قسم بالله شي مايتصدق طلعت والشعر كثر وطال
في اسبوع يمكن..

[دنيا العجايب]

استخدام الثوم حيث تؤخذ افصاص الثوم وتقطع إلى جزأين ثم تدهن الثعلبة بالماء الذي يخرج من افصاص الثوم وذلك مرتين في اليوم مع ملاحظة عدم ترك أي شيء من أنسجة الثوم على الثعلبة فقط ماء الثوم وبإذن الله يشفى المريض


هذه طريقه للعلاج بثوم
الله يشفيك :)

[فـوق الحـــلا شامه]

اخــــــوي با الثــــــوم اقطهـاا نصين وافركه في نفس المنطقه اللي فيهـاا ثعلبه لين تحس انهــاا حمــــرت

واكثر من مرتين يوميــــاَ

واحد من اخــــــواني جــااته في راســــه لا راح مستشفــى ولآآ شي علجنهــــاا بثوم


ولآتشيل هم فتره ويطلــــع الشعــــــر الله يشفيـــــــك bp039

[صــادق الــود]

والله اني مثل ما توقعت

اعضاء يفتحون النفس
الف شكر لكم جميعاً على تفاعلكم

كل ما ذكرتو هو الي صارلي بالضبط

اسبابها فعلان من العصبيه الزايده والا كثرت التفكير بمواضيع معينه

الفتره الي بدت معي كانت فعلا في وقت عصيب كنت امر فيه

الحمد لله الحين الامور تمام ونحلت المشاكل الي كانت تسببلي التوتر والتفكير الزايد

بالنسبه للعلاج انا عندي خمس بقع ثعلابات

اربع في الوجه ووحده في الراس

رحت لمستشفى متخصص وعطاني علاج وحقن موضعي لمده شهرين الحمد لله راحت الي في الراس بسرعه بفض الله

لكن الي بالوجه ما راحت

كانت تتحسن مع انها في بدايتها كنت اشوفها تكبر لدرجه تخوف

انا جربت الثوم كاول علاج استخدمته

ما نفع

وجربت المستشفيات برضو ما نفع بالشكل المطلوب بس الحمد لله في تحسن مع العلم اني خسرت عليها كثير ولا فيه فايده

اخر شي قررت اخليها الين تروح من حالها

بالصدفه دخلت بقاله اول مره ادخلها بحياتي وكان فيها باكستاني

اول ما شافني طلع من مكان الكاشيير وجا لمي وقالي وش هذا ويشر على الثعلبه

قلتله ثعلبه وانا مستغرب

قالي عالجتها كثير ولا طابت صح

قلت اكيد

قالي انا كنت عندي زيها مغطيه نصف وجهي وخسرت كثير مافيه علاج

لكني اكتشفت العلاج

قلتله الحقني فيه بالله

قالي تعال ووداني لواحد من الرفوف وعطاني خل اسود وقالي تحط مرتين في اليوم ولما تقوم من النوم تخذ شوي من ريقك وتحط عليها بعد

انا استغربت وقلت وش ورانا نجرب

بس قلت بجرب على بقعه وحده بس عشان لو كان فيه ضرر ما يعم

المهم اني بديت في اكبر بقعه منهم وحطيت عليها مثل ما قال

بجد كان يحرق وكان كني كاويه بالنار

لكن يومين ووقفته

بعد يمكن اسبوع بدا يطلع الشعر فيها

على طول بديت في الثانيات لكن سبحان الله معد نفع معهم مع اني اسوي نفس الطريقه

عشان كذا قلت امري لله وبصبر يمكن الله يكتبلي فرج

اخيراً قالي الرجال الي شفته ان فيه رجال يكتب فقلت بجرب يمكن تكون فيها نفع وهي ما تضر والقرآن كله بركة .

ادري طولت عليكم بس اعتقد سالفتي هذي فيها رد لجميع الردود الي قلتوها مشكورين

عساني ما اعدمكم ولا اعدم دعاكم ولا فزعتكم

[كنترول]

حتى أنا طلعت لي وحدة من أكثر من شهر تقريبا :( ..
حطيت لها خلّ التفاح .. يحرق حررق .. وشكله بس يوقّف اتساعهاا ..
فلبيني عندنا بالدوام جاب لي نبته خضراااء يقول بتفيدك .. وناوي أجربهاا ان شاءالله ..

//

متاابع للموضوع .. ولأي إضافة جديدة .،!!

//

إلا على الطاري .. ليش سمّوها ثعلبة ..؟!!

[LA..TRO7]

زي ماذكرو لك الاعضاء ....

الثوم مجرب ... بس لازم تتداوم عليه.....

ماتري باس ....

[جوهره الرياض]

صادق الود

ياهلا ومرحبا :)


والله خالتي جتها الثعلبه في راسها كان عندها مشكله وتفكر كثيرررر pb093

وجتها الثعلبه

بس راحت الدكتور وقال لها

خذي فص ثوم واقطعيه نصين وافركي بها على نفس المنطقه اللي ما فيها شعر

والله ما شاء الله صارت تفرك به كل يوم

الين يحرق كل المنطقه

وما كملت اسبوعين الا ويبدأ يطلع الشعر

يبي له وقت

بس علاج مضمون

والله يشفيك من هالثعلبه يارب ويوفقــــــــــــك :)

تستاهل كل خيرbp039

[هناء]

الله يشفيك يارب

وعليك بالثوم

[صــادق الــود]

كنترول - لا تروح - جوهرة الرياض -هناء

الف شكر على ردودكم وحرصكم
بس انا ما نفع معي الثوم

وبجرب الخلطه الي قالت عنها الذيبه

الله ينفع بها

ولا زلت ابي رقم الي في القصيم الي يقدر يجيبه لي

[رعشة دفا]

أمي تقو
مالها إلا الثوم :d
والله يشفيك

[Weekend]

الله يشفيك يارب

[!..E S H A..!]

الله يشفيك :(


طيب ممكن انك تزرعهــا ؟!!

[مَـاءْ]

اقترح انك تراجع الدكتور ابو بكر يوسف خبرة واسعة في الجلدية

وقدامك العافية انشاء الله

[مصقوعه بقدر]

اناسمعت ان ناس عالجوها بالفحم !!
بس والله معرف كيف الطريقه بسئلك واشوف
ومثل ماقالو الثووم وحده بوحده وان شالله الله تطيب
وان بدا يطلع فيك الشعر الطخه بالحشيش الاصلي
عاد ذا مو صاحي بشهر تحصل شعرك واصل لركبك:d

[كوكب زحل]

سمعت ناس استخدموا الثوم وجاب نتيجه طيبه معهم ...
الله يشفيك اخوي ,,,

[Dwerah]

وخفف العصبيه والسترس


هي السبب الرئيسي وراء ظهور الثعلبه..

وذكر في علاجها الثوم ايضا .. مفيد جدا والله اعلم

طالما انها مستحضرات طبيعيه ان شاء الله ما منها خوف المصيبه بالكيماويات والصناعيات

[الليدي لجينا]

يمكن الثوم مانفع معاك لانك ماستخدمته باستمرار .. جرب استخدمه كعلاج .. بشكل يومي :)

bp039

[صــادق الــود]

بجد حسيت بالامل بس من حرصكم وردودكم الدائمه

انا ببدا من جديد مع الثوم من اليوم

وعسى الله يكتب الي فيه خير

[مش ولا بد]

سلام عليكم :|

الله يشفيك يارب

انا اعرف ناس كثير فيهم الثعلبه هي تجي من فوطه حقة اخوك مشط كاب طاقيه الخ الخ

فانت حاول انك تبعدها عن اخوانك عشان ماتعيدهم وترجع لك من جديد !!

الحجامه كثير يسونها ويشطبون مكان الثعلبه بس ماشوفها راحة :| في مستوصفات تعالجها والله اشوف ولد اختي بعد كم سنه خفة :|


الله يعينك ... : )

[na3ooma]

الله يشفيك يا اخوي
ليتني اقدر اساعدك
والبركة بباقي الاعضاء ان شاء الله يفيدونك

[صــادق الــود]

مش ولا بد

اولاً حسب ما قالي اكثر من طبيب ان الثعلبه غير معديه

والامر الثاني اي ثعلبه تجي في الراس بإذن الله سهل علاجها

اما قضية استخدام اغراض الغير من فوط وكابات وامشاط فانا من الناس الي ما استخدم اي شي لاحد غيري

لدرجة اني شاري عدة حلاقه خاصة من مكاين وامواس ومقصات وفوط كلها حتى ما استخدم شي يستخدمه غيري <<< موسوس من هالناحيه

اما الحجامين فنا اكتشفت حاجه << بيصير دكتور ثعلبه يوم من الايام

انه لما احلق مكان الثعلبه بالموس واحط عليها الخل حق الباكستاني علىطول تستجيب والله اعلم

بس من يتحمل الحراره الي تجي منها والحرق الي يبقى بعدها

الله يدلنا على الي فيه خير والله يجزاكم خير جميعا على تفاعلكم الدائم

[дLβťόǿŁ]

*

:

ماتشوف شر
شف أبو بكر السوداني
بالتحليه عيادته
يعالج عن الثعلبة
\

وشيخ القصيم
يكوي كاني عرفته
راح اسالك اهلي
واجيب لك الرقم

/

وماتشوف شر
:

*

[إحساس أنثى]

.
.

الله يشفيك منها

بس اللي أعرفهم عالجوا عند أخصائي جلدية والحمد لله راحت وطلع الشعر ياربي لك الحمد

والثوم برضو يقولون كويس للثعلبة

ما تشوف شر

.
.

[فـش فـش]

ماتشووف شر ياارب
/

[حلـم بنـت]

يارب يشفيك :(

[صــادق الــود]

البتول ممكن رقم الدكتور السوداني وياليت تجيبين لي بعد رقم الي يكوي في القصيم يمكن يكون هو الي يقولون عنه

والف شكر لجميع الي ردو

["كرتونة غلا"]

.

.

أجـر وعـافيـه يـارب bp039

يمكنـك للحيـن متـوتـر ولا فيـك عصبيـه عشـان كـذا ماتفيـد معـك بعـض الاشيـاءpb036 ؟؟

أنـا سمعـت عـن الثـوم بعـد .. وكثيـر بنـات يمـدحـونه ..جـربـه منـت خسـران واذا على ريحتـه حـدد لك وقـت تكـون مـنت بطـالع فيـه واشتغـل عليهـا ..مثـلاً قبـل النـوم ..العصـر لاجيـت من الـدوام ولا الجامعـه كانك تدرس

ولا جيـت تطلـع تطّيـب بعـود ;)


حـل ثـانـي ..



· اكليل الجبل : تضاف ملعقة صغيرة من النبتة إلى فنجان ماء مغلي ، ويترك مغطى مدة 6 دقائق ثم يصفى بعدها ويشرب فاترآ على جرعات متعددة خلال المساء ، ويواضب على هذ العلاج 10 ايام متتالية .

عـلى فكـره لاتتعـب نفسـك مـع المستشفيـات لان الكيمـاويـات ما تفيـد مـع الثعلبـه كثيـر..

وغيـر كـذا ممكـن تكـون لهـا اضـرار pb093

والعـلاجـات الطبيعيـه سـواءً بالنبـاتات او الأعشـااب كثيييـره ..وبحسـب السـبب اللـي جـتـك فيـه ..

عشـان كـذا ممكـن تشـوف عـلاج فـاد مـع غيـرك ومـافـاد معـك :)



معـافى يـآآاربbp039

[املـح خ ـشه :$]

اخــــــوي با الثــــــوم اقطهـاا نصين وافركه في نفس المنطقه اللي فيهـاا ثعلبه لين تحس انهــاا حمــــرت

واكثر من مرتين يوميــــاَ

واحد من اخــــــواني جــااته في راســــه لا راح مستشفــى ولآآ شي علجنهــــاا بثوم


ولآتشيل هم فتره ويطلــــع الشعــــــر الله يشفيـــــــك bp039


^
^

صادقه :)

نفس الشي حصل مع امي
داخت سبع دوخات بالمستشفيات والمواعيد
وآخرتها وصفوا لها الثوم
ويالله لك الحمد تشافت

موفق :)

[اوووب صااااحي]

وعليكم السلام ورحمه الله ..

الله يشفيك اخوي , من المؤكد انك لازم تعالج الثعلبه بوقت ابكر مما تتصور لانها تزحف لاماكن منتشره في الوجه وهذا هو المهم وتصعب علاجها .

1- الطرق الشعبيه : تقطع الثوم الطبيعي الى نصين وتاخذ المويه الموجوده فيه بواسطه الاصبع ثم يدهن مكان الثعلبه مرتين في اليوم او مره كحد اقصى في الليل , وعدم فرك الثوم كامله في الفروه لانها حارقه , او زيت الخروع اذا كان تساقط الشعر بسيط .. وعليك بالاستمرار قد تصل فوق الشهر وثلاث شهور .

2- بالطرق الطبيه : 1- العيادات الطبيه راح تسويلك كورسات مكثفه كل تقريبا عشر ايام تاخذ حقنه في مكان الثعلبه ( بدون الم ) وتاخذ معها بخاخات استعمالها يومياً مع قطرات او كريمات - بعض الاحيان يصرفون حبوب لثبات بصيلات الشعر الباقيه " بدون ذكر اسامي الادويه لان كل مرض له دواء خاص " والنتائج تظهر بعد ست شهور بشكل مرضي وتوقف الثعلبه من الانتشار .

- مستشفى الشميسي من افضل المعالجين بس المشكله الانتظار , وجميع الحالات تبي عزيمه وصبر وعدم ترك العلاج بعد استعماله ..

- الحاله النفسيه لها دور عيش حياتك وطنش على الاقل لين تشفى :/

تمنياتي لك بالشفاء العاجل وجميع المسلمين ..

[فرحتي]

ثوم ثوم ثوم
وما تشوف شر ان شاء الله

[لمى الليــــل]

الله يشافيك ويبعد عنك الامراض
مثل ماذكرو الاعضاء الثوم
بيت جيراننا صابتها الثعلبه واستخدمت الثوم
فص ثوم اخذته وصارت تفرك فروت راسها بمكان الاصابه بالثعلبه
طول فترت الشتاء وماخلص الشتاء الا والثعلبه رايحه والحمدلله

انت ارجع استخدم الثوم لكن لازم تفرك فروت الراس فيه قوه (المنطقة المصابه )
وأن شاءالله يجعل الله فيه الشفاء

..
.

[صــادق الــود]

وربي اني كل ما ادخل هالصفحة واشوف ردودكم اني انبسط

يكفي حرصكم وبحثكم معي عن العلاج

عسى الله يخليكم جميعاً

[قرم]

ما تشوف شر ان شاء الله

[Mr.DoOOoDY]

إلا على الطاري .. ليش سمّوها ثعلبة ..؟!!

بلاها ما تاكل الا الدجاج خخخخخخخ

[انا وانتي وبس]

ما تشوف شر ان شاء الله

[أبو عزة]

فيه لوشن لونه شفاف يوصفونه لعلاج الثعلبة ،،
وياخذ وقت ممكن اسبوعين وممكن أقل :) ،،

الله يشفيك ان شاء الله ..

[End Love]

هلا حبيبي .. الله يشفيك
بخصوص موضوعك إذا تبي نصيحتي أستخدم علاج ( بخاخ )
( Regain solution 5% ) هذا خويي كان يعاني من الثعلبه
في منطقة اللحيه والشنب والرأس وأستخدم هالعلاج والحمدلله الحين طلع له شعر
وكنت معه يوم كان يشتريه قيمته 100 ريال وقاله الصيدلي يستخدمه لمدة
6 شهور وهذا الكلام يمكن في شهر 5 من هالسنه والحين مشاء الله طلع له شعر
وراح ينفعك بإذان الله .. وأتمنى لك الشفاء العاجل pb189

[حنيني@بالكشنه]

يلامتك و ماتشوف الا العافيه ان شااءلله
انا جتني ثعلبه من حوالي 8 سنوات وراجعت لدكتوره مهيب بطاله بس صراحه استفدت من الثوم وهو اللي بدأ يعبي الفراغات تاخذ فص ثوم تقشره وتقطعه بالنص عرضيا مو بالطول بعدين تفركه على المنطه بس لازم يكون الشعر نظيف اعمل كذا يوميا لمدة اسبوع بعدين يوم ورا يوم وبعدها 3 مرات بالاسبوع وان شاءالله بتحصل فرق

[صــادق الــود]

ابشركم راحت الثعلبه

والعلاج بعد شفاء رب العالمين هو

خل اسود ( رنا)

سبحان الله وحده بوحده

بس له طريقه للاستخدام

الي يشكي منها يقولي وانا اشرحها بالتفصيل

والف شكر لكل من تفاعل مع موظوعي هذا

تحياتي لكم جميعاً

[عرفجه]

bp039 الحمد لله على شفائك

[! حمد !]

الأخوان .. ولله الحمد ما قصروا معاك ..
الله يشافيك يارب

\\

[عسل*عسل]

الحمدلله عالسلامة والله يبشرك بالخيررررررر

[في صمتي جروح]

الحمدلله على السلامه ومـا ترى بأس وانا اخوك

[احلى مملوحة]

الله يشفيك ويرفع عنك

وشكرا للاعضاء على تفاعلهم