كم سؤال عن بريطانيا لدراسة اللغه

[بتي فور]

اولا مبروك افتتاح القسم وشفته بالصدفه :confused:

قررت اسافر بريطانيا ورحت لمكاتب كثيره اسألهم واخذت فكره عامه

واخوي رجع قبل كم شهر ودرس الماستر بادنبره ،، واخذت معلومات عن هالمدينه

لكن انا ابي ادرس انجليزي بداية السنه القادمه يعني مابي اروح الصيف لكثرة العرب

ومن الكلام والسؤال مبدئيا اعجبتني برايتون لكن ماقررت للآن

اسألتي

1- كيف العرب بـ برايتون ايام السنه ( غير الصيف )
2- المدينه نفسها ممتازه مثل مانسمع ونشوف بالصور ولا ماحولك احد؟ يعني اللي راح برايتون ينصح بها؟
3- وش افضل معهد من حيث اللغه؟

طيب اللي ماينصح ببرايتون ليت يعطيني رأيه بالمدن الثانيه

اللي يهمني بأي مدينه اروح لها

1- سياحيه ،، يعني مهب 5 المغرب كل شي مقفل مثل ادنبره على كلام اخوي
2- معهد ممتاز ومجرب لاني ابي ادرس 9 اشهر
3- مدينه يقل فيها العرب والسعوديين خصوصا >>>>>>>>>>> زهقنا منهم pb192

اي معلومات ثانيه ممكن تفيدني ،، بإنتظاركم

[عبدالملك]

اخوي

بالنسبه لاختيارك الوقت فا انت مشالله ماشي صح وكويس انك مافكرت تجي الحين

بدايه السنه اشوفه انسب وقت ,, برافو عليك

بالنسبه لبرايتن

الديره رايقه وحلوة ووسيعه صدر نوعا ما

لكن تسال عن سعوديين فهم والله كثير

وذا تبي الجد انجلترا مليانه حيل سعوديين

تقول وين اروح

شف اخوك مشالله تبارك الرحمن لو هو ماخذ شهادته من ادنبره فهو انسانpb189

ادنبره تعتبر 3 او 4 اقوى جامعه في ببريطانيا

المهم

خذ نصيحه من واحد له باع في بريطانيا وقرفها

تبي لغه

اذا تبيها بانجلترا

خلك جنوبها يعني بالزون اللي حواليين لندن

ارجح بالمرتبه الاولى اكسفورد
كيمبريدج
برايتن جيده

كلهم واجد السعوديين

بس تجي شطارتك

انا اذكر كنت ادرس بجامعه ماكان فيها ولا سعودي وكنت مرتاح اخر راحه

الحين ولد خالتي فيها ويقولي بدوا يجون

على العموم هذا مجرد لفت نظر لك بكثر ابو سعود

ميزه اكسفورد قربها من لندن- ساعه بالباص ونت في سنتر لندن

نجي الحين لو مماتفرق معك وين ببريطانيا

مايمنع تطمر سكوتلند

الديره حلوة وادنبره مره مره حلوة واخوك بيفيدك اكثر مني

وذا من جد رايح تبي تدرس وتبي تتعلم صح لغه

مايمنع تاخذ ال سكوتش اكسسنت وتروح شمال سكوتلند نادر حيل السعوديين هناك

ويلز حلوة يعيبها شوي طفش ككل ويلز

===

من ناحيه سياحه اسمع

اذا انت راعي شرب وراعي كلبز فابريطانيا كلها بتكون لك فله

اذا لا والله راعي فله عاديه

فابريطانيا كل نظامهم بالشتا حوالي 7 مقفلين

هذا نظامهم

يبقى اماكن الدشره حقتهم

عطيتها لك على بلاطه

دامها 9 شهور اقضب باب غرفتك وقعد ذاكر وبالويكند ممكن تفلها لو تحب تطلع تتمشى

بالنسبه للمعاهد

شوف

بتلقى معهد اسمه EF هذا منتشر وبكل جهه ونا شخصيا مانصح فيه

انصحك تروح لمعهد يتبع الى جامعه معينه بالديره اللي بتروح لها

ولاتروح معهد خاص

الجامعه معاهدهم شديده

وبتستفيد هنا من شي ثاني لو تبي تعيش الجو الدراسي

انك تسكن في الاكومديشن حق الجامعه نفسها هنا نص الفايده بتلاقيها مع الفلات ميتس تبعونك

خذ نصيحه اخوك بادنبره والمناطق اللي بسكوتلند

وبانجلترا زي ماقلت لك ابعد عن شمالها او اليورك شاير وخلك جنوووب لانه بتشوف البريطانيين الاصل

فوق شوي بتلاقي تشكيله والفايده اقل

بالاخير يعتمد كله على مدى رغبتك بالدراسه

بالتوفيقbp039


عبدالملك

[بتي فور]

تعجبني فيك صراحتك:d
يعطيك الف عافيه

الديره رايقه وحلوة ووسيعه صدر نوعا ما

لكن تسال عن سعوديين فهم والله كثير

وذا تبي الجد انجلترا مليانه حيل سعوديين

انجلترا بشكل عام فيها سعوديين واجد؟؟
لندن معروفه مايحتاج
بس حتى اكسفورد وكمبريدج ومانشستر ...الخ
انا مايهمني كثرتهم بالمدينه نفسها
انا اللي اسأل عنه بالجامعات
يعني اعرف واحد راح الصيف برايتون يقول بالكلاس فيه 10 طلاب 7 منهم سعوديين:d
كون فيه سعوديين بالديره نفسها مايهمني كثير هذا شي يرجع لي اختلط معهم ولا لا
لكن بالكلاس غصب اختلط معهم

واخوي اخذ الماستر بادنبره وبرجع مره ثانيه عشان الدكتوراه



ارجح بالمرتبه الاولى اكسفورد
كيمبريدج
برايتن جيده

طيب اكسفورد وكيمبريدج كيف السعوديين؟
تراني فكرت اروح نيوزلندا عشان انحاش منهم بس:d

ميزه اكسفورد قربها من لندن- ساعه بالباص ونت في سنتر لندن

شف اللي اسمعه ان كل ماقربت المدينه من لندن كثروا العرب
اخوي الثاني مسافر بعد اقل من شهر لـ كول شستر وهي من ضواحي لندن بينهم 80 كيلو طبعا للماستر بالاقتصاد

لو راح كان سألته كيف وضعها لكنه للآن ماسافر ،،

نجي الحين لو مماتفرق معك وين ببريطانيا

مايمنع تطمر سكوتلند

الديره حلوة وادنبره مره مره حلوة واخوك بيفيدك اكثر مني

وذا من جد رايح تبي تدرس وتبي تتعلم صح لغه

مايمنع تاخذ ال سكوتش اكسسنت وتروح شمال سكوتلند نادر حيل السعوديين هناك

انا ماتفرق معي المدينه او الدوله كثير ،، اللي يهمني آخذ لغه ومثل ماقلت لك فكرت اصلا بنيوزلندا ،،

بس ماقلت لي وشو سكوتش اكسسنت ترى محاكيك دبشه شوي:d
عرفنا الاكسنت بس وشو السكوتش:d

من ناحيه سياحه اسمع

اذا انت راعي شرب وراعي كلبز فابريطانيا كلها بتكون لك فله

اذا لا والله راعي فله عاديه

فابريطانيا كل نظامهم بالشتا حوالي 7 مقفلين

هذا نظامهم

خخخخخخ

الله يرحم لي والديك وشو شراب
الشراب تحصله بكل مكان يعني منب رايح لبرايتون عشان شراب ،،

الفله اللي ابيها انا ( شاطئ ،، اماكن اتمشى فيها ،، )

يعني انا اللي افكر به ولا ادري تفكيري صحيح ولا لا ،، اني بروح ادرس لغه وابي اشوف هالناس بالاماكن السياحيه عشان اقدر اخذ واعطي ،،

لو ادرس بكالريوس او ماستر كان جلست بالبيت احفظ واراجع لكن هي لغه يعني الازين لي اقابل الناس

مابي مدينه ميته ماحصل فيها احد ،، مابي مدينه نظامها من البيت للدوام ومن الدوام للبيت

بالنسبه للمعاهد

شوف

بتلقى معهد اسمه EF هذا منتشر وبكل جهه ونا شخصيا مانصح فيه

انصحك تروح لمعهد يتبع الى جامعه معينه بالديره اللي بتروح لها

ولاتروح معهد خاص

الجامعه معاهدهم شديده

حلو حلو
برايك معاهد الجامعات اقوى
طيب وش الجامعات اللي تشوفها مناسبه وتعرف احد درس فيها ؟

وبتستفيد هنا من شي ثاني لو تبي تعيش الجو الدراسي

انك تسكن في الاكومديشن حق الجامعه نفسها هنا نص الفايده بتلاقيها مع الفلات ميتس تبعونك

انا ابي اسكن مع عائله ع الاقل اول ثلاث اشهر عقبها ما ادري ،، يمكن اطلع ويمكن اكمل

لكن الافضل بالنسبه لي اسكن مع عائله بالبدايه لين اعرف الديره واقدر احكي كلمتين


خذ نصيحه اخوك بادنبره والمناطق اللي بسكوتلند

وبانجلترا زي ماقلت لك ابعد عن شمالها او اليورك شاير وخلك جنوووب لانه بتشوف البريطانيين الاصل

فوق شوي بتلاقي تشكيله والفايده اقل

بالاخير يعتمد كله على مدى رغبتك بالدراسه

بالتوفيق

والله المشكله اخوي مطوع:d
بس مطوع زقرت شوي ،، يعني فيه اشياء كثيره مادرى عنها ولاشافها اكثر وقته بالبيت مع حرمته وبنته ،،
وانا وضعي غير وضعه عزابي وابي اشوف الناس وابي اماكن سياحيه واللي اكرره اني ادرس انجليزي والافضل لي اشوف الناس واهذر عليهم
واشوفك كل شوي تكرر جنوب انجلترا
طيب هماك تقول ياكثر السعوديين فيها؟؟

الجنوب معروف افضل لـ قربه من لندن ،، عشان كذا اخترت برايتون مبدئيا وماعندي مشكله اكنسلها واروح اي مدينه ثانيه اذا توفرت فيها ( قلة العرب ،، سياحيه نوعا ما ،، معهد ممتاز )

طبعا الاساس هو المعهد ثم قلة العرب ثم السياحه ،،

والله يوفقك الجميع وشاكر لك على اهتمامك

[أشعار]

..
حلوة برايتون , حلوة جداً و قريبة من لندن و ما فيها أي مشاكل تؤرق المبتعث بالعكس .. كل شيء فيها مريح و حيوي و ممتع . الدراسة فيها ما في أحد درس هناك إلا و مدحها . أنا ما درست هناك لكن منتدى المبتعثين و زميلات من منتديات عادية سافروا كورسات لغة و رجعوا للسعودية و كانت مذكراتهم عن فترة الكورس فبرايتون جداً مغرية و حلوة .

هذا معهد لغات فبرايتون (http://www.cydamos.i12.com/English.htm)

و هذا ثاني باللغة العربية عن معهد إيزيس (http://www.majedsy.com/ISIS%20LC.htm) للغات في برايتون و له فروع فعدة مدن ببريطانيا.

أنا ما عندي صور خاصة فيني لبرايتون بس شوف في القوقل صور لها عشان تاخذ فكرة أكبر عنها كملامح و تضاريس . و متأكدة إنها بتعجبك .

ـ

بالتوفيق bp039

[عبدالملك]

هههههه

لاتلومني على المصارحه ,, لان من جد في ناس هذا تفكيرهم .. واعذريني على الكلامbp039

ع العموم نرجع حق موضوعنا

بالنسبه للي تبيه صعب تلاقيه بغير انجلترا اذا تبي وناسه .. لانه بيني وبينك وقت الوناسه هو وقت اللغه عندك وقت كبير فاضي وعشان كذا للامانه خلك بانجلترا وحول لندن ترا تشوفني اقول لندن واجد لاني من عشاقها وقد عشت فيها

شف انجلترا كلها سعوديين- خصوصا مع طلباتك

اقولك خلك حواليين لندن او جنوب انجلترا احسن من شمالها للاسباب اللي ذكرتها لك

شمالها في دبل السعوديين اللي جنوبها (من اللي اشوفها ونا جربت الحياه هنا وهنا)

شمالها في خلطه عجيبه من الجنسيات خصوصا الاسيويه (باكستانين ونت رايح) يعني تحس انك بالسعوديه مع شويه تغييرات

وهنا انا ابعدك عنها لانك بفتره اللغه وبهذي الفتره تحتاج اكسنت مضبوط .. وتحتاج تخالط طلاب اجانب وناس شوي ارقى والاهم انك تشوف حياه الانجليز وعيشتهم بالشكل الصحيح (وهذي نصيحه اعتبرها من اخوك الكبير)

هذا كله لو قلنا بتقعد بانجلترا .. فخلك تحت حول لندن .. صحيح انها اغلى .. بس افيد لك كطالب لغه..بعد ماتخلص اللغه وتبي ترتاح اطلع الشمال .. فيه راحه نفسيه بالنسبه لي اكثر

السياحه كلها تحت حول لندن والبحر والفله اذا تبي تشوف اشيا تفتح نفسك pb030

تبي تطلع وتتمشى صدقني بريطانيا مافيها الا الدجه والقرف:confused: لكن خلك جمب لندن عشان كل ماطفشت تطمر لها يصير كنك ضارب مشوار من شمال الا جنوب الرياض مع احتساب الزحمه ض:D


سالتني هل الجامعات مليانه سعوديين-هنا مقدر اجاوبك لازم تحدد اول مدينتك بعدين تبدى تسال

على العموم وقت جيتك بيكون بدايه البرد وبيستمر البرد يعني لاتفكر بالبحر وقتها الا اذا جا الصيف وذا جا الصيف بتلهيك شغلات ثانيه

اكسفورد pb189 مدينه رائعه (مافيها بحر) بس فيها تشوف جنسيات كلها واخص الاوربيه ويميزها اغلبها طلااب جايين يدرسون يعني حالك من حالهم واهلها حبيبين (عاد لاتنسى انفس البريطانيين الشينه) لكنها عموما مدينه حلوة وتعيش فيها جو دراسي حلو-وتقدر تهذري بما انك تحب تتكلم هو انسب مكان انك تروح مدن صغيره وتتكلم مع الناس وتشوفهم وتطلع تسولف مع الاجانب (عشان كذا نصحتك بسكن الجامعه-نفس فايده العائله واكثر)

انت لما تعيش مع طلاب لك غرفتك ولك حمامك اكرمك الله - وحوالينك 6 بالدور حقك تاكلون سوا تطلعون سوا تتمشون سوا تسهرون سوا تهاوشون بعض -افضل من عائله ماتدري وش قلعتهم ويمكن نفسيا ماترتاح او يكفيك شروطهم عليك - تقول ابي عائله اسولف-اقولك اخوياك اللي بالسكن بتسولف معهم اكثر وكلهم زيك ناس شباب مو تسولف مع عجوز-تقول هم داجيين لغه زيي-اقولك مو شرط ممكن يكونوا اللي معك يدرسون ماستر او خلصوا مرحله اللغه - عموما بما انهم جنسيه مختلفه عن جنسيتك او لغتك فاهي من صالحك- طبعا اقصد السكن الجامعي - مو تروح سكن جماعي وتحصل جارك هوم لس او شي-والله عيشه حلوة صدقني لو هذا جوك والناس يختلفون - انا اعطيك وجهه نظري الشخصيه

لكن تقولي بروح اليوم مول ولا هالخربطه مافي الا السنتر حقهم ... طبعا شل كلمه مول من بالك ببريطانيا نادر وجوده بالشكل اللي في مخيلتك زي الفيصليه وكذا .. يعني في بمانشستر واحد واااو من جد وفي بشيفلد واحد جيد و اتكلم كمساحه حجم ومتعه تسوق ..اما البقيه تكون صغار وحلوات نوعا ما

كيمبريدج .. ديره مثل اكسفورد ومدينه رائعه ونفس جو اكسفورد الموست
برايتن مدينه برضه حلوة .. ووسيعه صدر
بورمث..حلو وفله وحقت شباب وبالصيف خرش وواجد سعوديين والبيتش حقهاpb189
نوتنقهام ديره بعيده شوي عن لندن بس فعلا رايقه-الاعلام هنا يقول تكثر الجرايم فيها لكن انا اشوف انه الوضع طبيعي لاني جربتها..وجوها حلو واوربيين واجد << ذولا اللي تدورهم ;)
برمنقهام ديره كبيره تحسها مدينه زي لندن وفيها مولات ووساعه صدر .. انا شخصيا مارتحت لها بسبب كثر الجنسيات الاجنبيه فيها وتحس زحمه ناس مارتحت لها
مانشستر مدينه كبيره زي برمنقهام والسنتر حقها جيد اذا لقيت معهد بطل يمكن تنفع لك - انا شخصيا مارتحت فيها
لو بتطلع فوق شوي وتروح لليورك شاير..
عندك ليدز ديره حلوه بنظري بمعنى الكلمه ورايقه بس لاتقولي تدرس لغه فيها (قرار فاشل) اذا تبي فله حلوة وسنتر رائع
كارديف - مدينه جمييييييله ورائعه جدا فيها سعوديين كميه لابئس بها وهي تحت

انا شخصيا احب المدن الصغيره اللي اقدر امشيها برجلي وتحس فيها جو رائع للدراسه والهدوء
ابعد عن اللي يقولك شيفلد

عندك جمب لندن مدن حيل كثيره بس دور وين اللغه الصح من وين تاخذها


مابي اطول

لكن انصحك- السؤال بيحيرك انت اقرا وشف وش يصير معك ووش تحسه اقرب لك ..

تبي صمله دراسه اطلع سكوتلند شمالها باحد هالقرى والله اللي بتاخذه ب9 شهور تحت بتاخذه فيها ب 6
السكوتش اكسنت هو الاكسنت حقت السكوتلندين يختلف كثير عن الانجليز اللي هم اصلن تلاحظ الفرق مابين جنوبها وشمالها


عموما تشوفني ابعد عن الديار الكبيره ولا انصحك فيها لاني رجال احب المخمخه والهدوء واتعايش مع الشعب واندمج معهم يعني يصير كل اللي حولك عارفينك طبعا بالسمعه الطيبه والاخلاق الحوة وان شاء الله ان اهل لها

ع العموم بريطانيا كلها كبر يدي والتنقل فيها سهل القطارات متوفره دايم ومواعيدها قريبه من بعض والامور سهالاتbp039

[deoood]

يالله حي عبدالملك ...

اسمح لي بقط واسئلك :d

وش فيها شيفيلد لاني الصراحه ناوي انا بعد اروح الصيف ذا لها ..؟

[بتي فور]

اشعار

أنا ما عندي صور خاصة فيني لبرايتون بس شوف في القوقل صور لها عشان تاخذ فكرة أكبر عنها كملامح و تضاريس . و متأكدة إنها بتعجبك

انا اصلا ماتحمست لها الا عقب ماشفت صور لها وقريت عنها وسالت كذا شخص عن طبيعة المدينه ،، لكن يبقى لي المعهد اللي اسجل فيه ،، متعقد من كثر السعوديين كلن يقول الكلاس تحصل فيه 7 سعوديين من اصل 10 :(
انا لاشفت واحد يمكن انتحر شلون 7 :d

وانا بشيك على المعاهد اللي نصحتي فيها واتأكد

ماقصرتي ويعطيكِ العافيه

---

هههههه

لاتلومني على المصارحه ,, لان من جد في ناس هذا تفكيرهم .. واعذريني على الكلام


هذي اخرتها اعذريني:d
طيب مو مشكله،، والله الوناسه بالنسبه لي طلعات وروحات منب راعي لابنات ولاشراب ،، لاشميت ريحة الدخان انحشت من المكان شلون اشرب :d

بالنسبه للي تبيه صعب تلاقيه بغير انجلترا اذا تبي وناسه .. لانه بيني وبينك وقت الوناسه هو وقت اللغه عندك وقت كبير فاضي وعشان كذا للامانه خلك بانجلترا وحول لندن ترا تشوفني اقول لندن واجد لاني من عشاقها وقد عشت فيها

شف انجلترا كلها سعوديين- خصوصا مع طلباتك

اقولك خلك حواليين لندن او جنوب انجلترا احسن من شمالها للاسباب اللي ذكرتها لك

شمالها في دبل السعوديين اللي جنوبها (من اللي اشوفها ونا جربت الحياه هنا وهنا)

شمالها في خلطه عجيبه من الجنسيات خصوصا الاسيويه (باكستانين ونت رايح) يعني تحس انك بالسعوديه مع شويه تغييرات

وهنا انا ابعدك عنها لانك بفتره اللغه وبهذي الفتره تحتاج اكسنت مضبوط .. وتحتاج تخالط طلاب اجانب وناس شوي ارقى والاهم انك تشوف حياه الانجليز وعيشتهم بالشكل الصحيح (وهذي نصيحه اعتبرها من اخوك الكبير)

حلو

طيب يعني انت تقريبا تأيدني باختيار الجنوب ،، سواء برايتون او غيرها المهم تكون بالجنوب

سالتني هل الجامعات مليانه سعوديين-هنا مقدر اجاوبك لازم تحدد اول مدينتك بعدين تبدى تسال

يالغالي شف انا اللي يهمني بالدرجه الاولى هو المعهد ،، يعني مهب مشكلة اسحب ع الوناسه وتصير بالويك اند وانزل لندن
المهم والاساس هو المعهد
طبعا يهمني قوته وجديته وقلة السعوديين
انت تقول اختر المدينه اولا ،، طيب لو قلنا برايتون

وفيه سؤال الحين دايم اسمع افضل شي تختار معهد تابع للجامعه افضل من معهد متخصص باللغه انت وش رايك؟ طبعا بـ برايتون وخلنا ننسى اي مدينه حاليا ونشوف برايتون

انا ماعلقت على باقي ردك يوم تقترح بقية المدن ،، ابي رأيك ببرايتون من ناحية المعاهد اللي فيها وهل الدراسه بمعهد تابع للجامعه افضل او معهد متخصص ،،
ياليت احصل معلومات منك عشان احجر لـ راعين المكاتب:d ،، او ابحث بالنت عن الحجز باحد المعاهد اللي ممكن تنصحني فيها

بإنتظارك ومعليش كلفنا عليك

[The Twinkle]

بتي فور
يمدحون نيوزلندا وأنا أخوك , أو تبي قريب لملعب الإمارات وغيره :d

وإلا فيه مميزات لبرايتون [ طبعًا واحد من الشباب مبتعث ويمدح ذا الديرة ]

[::Zizou::]

بيتي فور بيجينا

يالله حيه<<واقف عند هيثرو بلوحه خخخ


شف يا بعدهم

مثل ما قالك راعي وناسه

السعوديين في كل مكان
واللي ما يبيهم يسحب ولا كأنه سعودي


انا مثلا اذا سلم علي سعودي اقوله (كوموستاس)
<<عايش جوه اسباني خخخ

اهم شي ابعد عن الـef
هو صح كله مزز وذا بس ما حولك دراسه

رح لأي معهد خاص بجامعه
مثلا عندنا في مانشستر فيه معهد تبع جامعة Mmu
هذا بطل والسعوديين اقل فيه من حق جامعة مانشستر الاساسيه

على العموم اذا بغيت اي شي زياده مساعده في الابلكيشنز ولا تقديم الخاص عندك

ترى تحتي بار ينقل الليغاpb189:D

=====

deoood

والله من شين الذوق اجل شيفيلد خخ
كلها زيود والله، تصدق فيها مطاعم مندي
والله حتى نسيم حميد هناك

الوالد درس فيها الماجستير قبل 5 سنوات وقعدت عنده شهرين
نسيم حميد يصلي معنا الجمعه :D


خلك على ( مانشستر ، ليدز ، برايتون ، بورتسموث )

شيفيلد ديرة الزيود
وبرادفورد ديرة البكس :D

[خانه زمانه]

انصحك باكسفورد...صغيره وحلوه ومن اقدم المدن تاريخيا

يعني يا مالك من حدايق متاحف اماكن سياحيه

وزي ما قال لك الطيب ساعه وانت بمواقف الهايد بارك:d

[عبدالملك]

هلا والله ديود

شخبارك يعلم الله مشتاق لك ولذيك الايام الحلوة بالمنتدى..

ع العموم ان تحفظي على شيفلد هو كثره السعوديين

ثاني شي الديره بنظري بايخه جدا

يكثر فيها اليمنيين والصوماليين بشده

طبيعي جدا تدخل بقاله وتقولهم عطني قات ويعطيك خخخخ ترا صدق في كذا ببعض الاماكن

ثاني شي انت بتروح فتره الصيف كورس انجليزي .. وش يوديك لها!!

ثالث شي .. الديره رخيصه وهذا يميزها

رابع شي نصيحتي انت رايح كورس صيفي يعني تبي تنبسط وتدرس
رح جنوب بريطانيا ..عشان بالصيف تمتلي اوربيين يجون يدرسون وتصير تطلع وتجي معهم

وحاول تختار ديره فيها بحر ..عشان تستمع بالصيف

واخيرا عشان تكون حول لندن .. زي منت عارف لندن بالصيف وش تصير

هذي نصيحتي لك

وخل عنك كلام المكاتب

رح اكسفورد برايتن كيمبريدج بورمث كارديف يعني شي يفتح النفس

مو شيفلد (وع)

وبالتوفيق

[FX 35]

معلومة يمكن تهمك ..

برايتون عاصمة الـ Gays في بريطانيا :D

[بتي فور]

بتي فور
يمدحون نيوزلندا وأنا أخوك , أو تبي قريب لملعب الإمارات وغيره

وإلا فيه مميزات لبرايتون [ طبعًا واحد من الشباب مبتعث ويمدح ذا الديرة ]

والله مهب شينه نيوزلندا
بس الوالد يقول خلك قريب عشان لابغيت ترجع بالويك اند يمديك مهب نيوزلندا 22 ساعه

وكأني برجع لـ ذي الديره لارحت بريطانيا >>>>> جحدهم قبل يسافر

هلا هلا زيزو
اثره انت اللي رافع يده ويأشر بالمطار:d

شف انا مثل ماقلت مايهمني السعوديين وكثرتهم بالمدينه نفسها ،، اللي يهمني المعهد
طيب الحين على كلامكم اكنسل EF
طيب لاشفت معهد خاص تعرف شي معين ولا بشكل عام ابحث عن معهد خاص بجامعه واكيد يطلع شي كويس

ترى تحتي بار ينقل الليغا

تصدق رااااااح عن بالي مره
زين نبهتني:D

انصحك باكسفورد...صغيره وحلوه ومن اقدم المدن تاريخيا

يعني يا مالك من حدايق متاحف اماكن سياحيه

وزي ما قال لك الطيب ساعه وانت بمواقف الهايد بارك

اسمع انها مدينه صغيره
وانا مشكلتي احب المدن الكبيره اكثر او تكون صغيره وكل شي متوفر فيها ،، يعني ماحب الهدوء ابد

[بتي فور]

معلومة يمكن تهمك ..

برايتون عاصمة الـ Gays في بريطانيا

هلا والله:D


زيزو ياليت تحذف بعض رسايلك ملياااااان الخاص pb192

[deoood]

راعي وناسه pb189

ايه والله زمان عنك pb189
الله يذكر ذيك الايام بالخير pb189

بسئلك يا خالي :D
الحين بقولك اياها على بلاطه :D , انا ناوي اروح شيفيلد صح انه عشان ازين اللغه شوي :D
لكن بعد عشان العيال كلهم هناك :D , وودي اقعد معهم عرفت وشلون !
يعين جنوب بريطانيا كم يبعد عن شيفيلد يعني يمدي ازرق لهم متى ما بغيت :D

زيزو pb189

يا حبيبي فيه مندي تقول pb189
عز الله اللي ما حسينا بالغربه هههههههههههههههه
لا الصدز يعني انا ناوي اروح افلها وان شاء الله يعني كل ويك اند منيب قاعدن فيها عرفت
ناوي اسعسع :D

[Mr.Champion]

انصحك في ( كانتربري) وهي في الجنوب وقريبة من لندن ,, مدينة حلوة ورايقة وفيها معهدين على مستوى قوي جداً ,, الأول (بلقرم) ولاراح تلقى فيه سعودي واحد ,, والثاني معهد جامعة (كرايس شيرش) لكن مشكلته كثرة السعوديين

عموما لو ميزانيتك قوية انصحك في بيل (http://www.bell-centres.com/locals/sa/adults/bedgebury.asp)

[بتي فور]

انصحك في ( كانتربري) وهي في الجنوب وقريبة من لندن ,, مدينة حلوة ورايقة وفيها معهدين على مستوى قوي جداً ,, الأول (بلقرم) ولاراح تلقى فيه سعودي واحد ,, والثاني معهد جامعة (كرايس شيرش) لكن مشكلته كثرة السعوديين

عموما لو ميزانيتك قوية انصحك في بيل

تنصح بـ بلقرم إذا الميزانيه قويه؟؟
طيب على اساس يعني المعهد قوي فقط ولا فيه عوامل ثانيه؟؟


ديود اشوفك قالط معي:d

[deoood]

8
8
بتي فور وخر شوي كلنا اصدقاء :d

ما رديتو علي تقولون برايتون حلوه ؟ :d

لان شيفيلد فيها اخوياي وناوي اروح لها فكم تبعد عن لندن وكذالك برايتون :d

[Mr.Champion]

1- سياحيه ،، يعني مهب 5 المغرب كل شي مقفل مثل ادنبره على كلام اخوي
2- معهد ممتاز ومجرب لاني ابي ادرس 9 اشهر
3- مدينه يقل فيها العرب والسعوديين خصوصا >>>>>>>>>>> زهقنا منهم

توني انتبه انك بتاخذها 9 شهور على كذا بتمل من كانتربري :D لانها صغيره ،،
ميزة كانتربري انها تبعد عن لندن ساعة ،، وعن باريس ساعتين ،،
عموماً شوف وانا اخوك منتب لاقي مدينة سياحية الا والسعوديين فيها واجد واجد ,,
سواء لندن والا كامبريدج والا غيرها ,,
لكن اذا تبي مدينة سياحية فعلا ابعد عن اكسفورد لأني اعرف واجد راحوا لها ويقولون انها مملة جداً
انا مثل ما قلت لك انصحك في كانتربري وكامبريدج وفيه خيار ثالث وهو هاروغيت حول مانشستر

تنصح بـ بلقرم إذا الميزانيه قويه؟؟
طيب على اساس يعني المعهد قوي فقط ولا فيه عوامل ثانيه؟؟
بيل يختلف عن بيلقرم ,, بيل في بيدجبيري وهي حول كانتربري ,,
المعهد فلة ووناسة ,, لكن مشكلته غالي غالي غالي وفي قرية تقريباً,, ولازم مستواك في اللغة ثالث او مافوق ,, اضغط هنا (http://www.bell-centres.com/locals/sa/adults/bedgebury.asp)

كرايس شيرش برضو قوي وميزته سعره معقول جداً لكن بتلقى سعوديين :D ،،
بيلقرم غالي لكن مستواه تعليمياً قوي و بتدخله وانت ضامن مافيه ولا سعودي في الكلاس ,,
وعندك معاهد غيرها لو تبي ,, بس انت اصمل على مدينة :D

لان شيفيلد فيها اخوياي وناوي اروح لها فكم تبعد عن لندن وكذالك برايتون
شيفليد الى لندن ساعتين ونص بالقطار ،، برايتون الى لندن ساعة او تقريباً 50 دقيقة ,,

[عبدالملك]

اخوي ترى نيوزلندا فيها سعوديين بالهبل يعني شلها من راسك ويكفي بعدها

برايتن فيها سعوديين

كل بريطانيا سعوديين- انت اختر ديره حلوة ترتاح لها وهذا الاهم وعلمتك من البدايه لو ماتبي سعوديين اطلع شمال سكوتلند

الاخ اللي قال هراوغيت - صراحه الديره من اجمل المدن اللي رحت لها كـ راحه نفسيه

الديره سكانها (كاشات) يعني اذكر مره ببرنامج توب قير والشايب وهو يتكلم وين ممكن تحصل افضل سيارات بالعالم بمدينه قال نيويوؤك وممدري وشو وحط هاروقيت

بس ابد ابد ماراح تنفع لك

ديره شياب

الللي يتقاعد يروح يكمل اخر عمره فيها

ديره حقت قهاوي

ديره فيها حمام مغرربي خخخخ

بس صراحه جميله وجوها هاااادي ونادر تلقى سعوديين يدرسون

اذا رحت لها سير على قهوه باريز (قلوب)

والديره صغيره

===

ديود انت تعال بريطانيا عند اخوياك دامك حاب الفكره وفكره التنقل لاتشيل همها سهالات الصبح تركب وتروح لندن وتالي الليل لو فيك حيل ترجع

[أبو خيال]

بتي فور شوووف مسالة انك تبي الهجه عن العرب فهذا مساله شلها عن بالك....

بكل مكان وبكل زمان وبكل حته لازم تلقى ابو عريب..وفيه مدن مثل مافيها عرب واجد تلقى اجانب واجد من اوربيين ولاتينيين وبوكيمونات(اسيويين)

........................
مساله المدن مثل ماقالولك الشباب الله الله بالجنوب تراى مره وناسه وفيه مدن مررره روعه وقريبه لم لندن وكل شيء..

شف ياطويل العمر انا باقولك الي جربته .. جلستلك فتره مهيب قصيره بساوث هامتون..مدينه حلوه ورايقه وهاديه مرره يعني حقت درااسه مره ..بس مشكلتها مافيها اجانب واجد وفيها كميه لاباس بها من العرب ..
ومشكلتها مافيها الا معهد لغه واحد فقط وهذا الي خليها مافيها اجانب واجد..درست فيها تقريبا 4 شهور في المعهد حقها بالنسبه للعرب تقريبا الكلاس الاول الي كنت فيه كنا حوالي عشره طلاب تسعه كلنا سعوديين وواحد امراتي يعني ماتحس انك الا بنيوهرايزن ولا حدى معاهد الرياض..والكلاس الثاني يعني اهون شوي كنا تسعه خمسه عرب والباقيين اجانب..مع كذا المعهد حلو والمدرسين الي فيه على كيف كييفك بس انه صغير مره..هذا بالنسبه لساوث هامتون..

بعد كذا من الله علي وغيرت الديره طلعت بورمثpb189
الصراحه الديره مايعلا عليها السنتر حقها حلو وفيه شاطيء من احسن الشواطيء باوربا يمكن.. يعني بالصيف انواع الدعثهpb034 ...ومدينه تخترش مو زي ساوث هامتون يعني مدينه فيها حركه مرره وخرشه وناس رايحه جايه واجانب مليااان ...هذا وانا ماكملت شهر الى الحين فيها..
بالنسبه للعرب مليانه اكثر من الي قبلها بس زينتها ان فيها تقريبا اربعين معهد لغه يعني شف الفرق بينها وبين ساوث هامتون وهي من اكثر المدن الي مليانه معااهد ومليانه طلاب بالنسبه للمعهد الي انا فيه فرق جدا كبير بينه وبين المعهد الي كنت ادرس فيه بساوث هامتون كبير مره وحلو وتدريسهم جدا جيد ...

طبعا يوم طلعت بورمث حسيت صدق اني ادرس بمعهد مو معهد ساوث هامتون الصغير مره والي مافيه الا هو..
وبعطيك صور الحين لبورمث وانت شف ..

http://www.world-guides.com/images/bournemouth/bournemouth_map.jpg

http://www.world-guides.com/images/bournemouth/bournemouth_view3.jpg
http://www.bic.co.uk/Library/images/Global/Bournemouth/bournemouthbeach395.jpg
هذا بحرناpb030 شيء موطبيعي
http://www.bournemouthballoon.com/Balloon%202a.JPG
http://www.selfcateringbournemouth.co.uk/graphics/tourist8.jpg
هذا bournemouth eye

http://www.woodlodgehotel.co.uk/images/bmth.jpg
http://www.hotelmayfield.co.uk/graphics/balloon.jpg
هذا السنتر

http://www.bournemouth.gov.uk/Library/Pictures/News/yellow-bus.jpg
وهذا الباص حقي:D
واي شيء عن بورمث تبيه ولا عن ساوث هامتون انا حاضر وموجود..:)

[أبو خيال]

مكركرbp039

[deoood]

ما ننحرمشي يا عيال ( قلب )

بس سؤال ..؟

الفيزا الحين حقت الدراسه تدخلك اوروبا والا لازم الشنقن ..!

[خانه زمانه]

الي اعرفه لازم الفيزا الاوربيه عشان تدخل فرنسا وباقي اوربا

[أبو خيال]

فيزا بريطانيا تقدر تطلع سويسرا واسكتلندا بس اما باقي اوربا لازم شنقن فيز

ونصيحه مني للي يبي يجي..يفيز الشنقن قبل فيزت بريطانيا:):)

[::Zizou::]

ديود

شنقن من بدري ترى يبي لها 3 اسابيع عشان تطلع

مهب زي البريطانيه في يوم واحد تطلع فيزتك


لو تطلع الفيزا من السفاره الايطاليه اصرف من غيرها

[deoood]

ديود

شنقن من بدري ترى يبي لها 3 اسابيع عشان تطلع

مهب زي البريطانيه في يوم واحد تطلع فيزتك


لو تطلع الفيزا من السفاره الايطاليه اصرف من غيرها

ايه ان شاء الله اني ناوي اسبق لها بشهر :D

وزي ما قلت قالو كثير طلعها من الايطاليه والا الفرنسيه اسرع وازين

ما قصرتو pb189

[whitshadow]

محد جاب طاري نيوكاسل ..:D

واحد مدح لي اياها ...يعني هي في الشمال .... وساحليه ..على ما ظن ...pb192

[::Zizou::]

^
^
نيوكاسل اعرف واخد هناك
يقول شعبها عنصري مره

بس مدري عاد اذا صاير له موقف ولا صادق

[ALJoKR]

انا رحت لـ كامبريدج بصراحه كـ تعليم رايقه جداً فيها معاهد كثيره واهلها حلوين والطلاب الاوربيين كثااار
بالتحديد رحت لـ معهد اسمه يورو سنتر المعهد بطل من ناحية التعليم كان فيه على مااظن 10 عرب بس على مستوى المعهد كامل .. حتى هالمعهد نفسه له فرع ببرايتون ..

بالنسبه للعرب مالك مفر واحد من العيال الحين هناك يقول بكل مكان بس انت بنفسك تحاول تبتعد عنهم ..

كامبريدج صغيره ومافيها زود من ناحية السياحه لكن كمدينه تعليميه قويه جداً وقريبه من لندن ..

جا دوري اقط معكم :d .. ناوي اروح هالصيف بس ابي غير كيمبردج ؟ وش رايكم وين اروح وش اجرب ابي معهد عليه الكلام لانه فيه ناس راحوا لمعاهد كل اللي فيها كلاسين .. ابغا اجرب مدينه جديده ..

[مئه مئه]

اخوي

بالنسبه للمعاهد

شوف

بتلقى معهد اسمه EF هذا منتشر وبكل جهه ونا شخصيا مانصح فيه

انصحك تروح لمعهد يتبع الى جامعه معينه بالديره اللي بتروح لها

ولاتروح معهد خاص

الجامعه معاهدهم شديده

وبتستفيد هنا من شي ثاني لو تبي تعيش الجو الدراسي


عبدالملك



عزيزي الله يعطيك العافييه
بس حبيت اسال انا بروح اكسفورت
وكنت حاط في بالي هذا المعهد
EF
بس انت اشوفك ليش ماتنصح فيييه ؟

وهل في معاهد تابعه للجامعه في اكسفورت تنصحني فيها ؟

[Pampered]

طيب مدينة شيفلد كدراسة ماستر وش رايكم فيها ؟
بغض النظر عن العرب اللي فيها