اسئلتي واااااااااااجد ؟؟؟

[أحلام بلا حدود]

مرحبا

عاد اسئلتي كثيرة الي بيتحمل يتحمل واذا منت متحمل بكيفك بس لازم تتحمل:sm12:


حابة اسأل عن التقديم ع الابتعاث للماستر عارفة بدري بس بسأل من اللحين حتى يطمئن قلبي pb095

اللحين انا عبالي تقديم الماستر عن طريق وزارة التعليم العالي وانه مالي خص بالجامعات الخارجية عاد انا قرأت لابد بحضور موافقه من الجامعة المراد دراستها
كلامي السابق صح ولا في تخصيص ؟؟؟ :eek:

الشي 2
لازم يكون مكمل لدراستي في البكالوريس انا تخصصي عربي يصير اكمل قانون او ادارة اعمال ؟؟؟؟

الشي3
انا صفر في الانجلش ينفع ابتعث ولا راح انكرش ؟؟؟

الشي 4
لازم يكون معي محرم ؟ ؟؟
وكيف حيكون السكن ؟؟

الشي 5

جاوبوني بسرعة لان العيار وصل10000 عندي وابغى اطلع من القصيم

[Guess who]

اهلين ياقلبوووpb189
.
.
اول شيء:D
تقديم الماستر عن طريق الوزاره بشهر رجب ان شاءالله
بيكون اون لاين فورم تعبينه وبعدها اللجنه ترشح مين ينقبل ومين لا
بالنسبه للجامعات
الوزاره تجيب لك قبول بالجامعه اللي فيها التخصص الاكاديمي الافضل لـ طلبك
انتي ماعليك الا تختارين الدوله اللي حابتها
هذا الكلام العام
فيه ناس يجيبون قبول بس مو كل من جاب قبول تقبل طلبه الوزاره:D
لانو الوزاره تدفع فلوس لـ مؤسسات تعليميه شغلها انو تجيب للطلاب قبول بمعهد لغه وجامعه
وبكذا لو جبتي انتي قبول جامعه
تخسرين الحكومه:D
اللي يجيبون قبول جامعه
ذولي يا طلاب طالبين تغيير جامعه ورفعو خطاب بـ اسبابهم وانقبل طلبهم وبكذا هم يختارون الجامعه
او انو ذولي من الشواذ
.
.
ثاني شيء:D
تخصصات الدراسه محدوده
مو اي تخصص ينقبل بـ برنامج خادم الحرمين
فيه كم تخصص بس
ومنه انتي تختارين اي تخصص تبينه
بس ماله علاقه بـ دراستك البكالريوس
بس له علاقه بـ نسبة ترشيحك
يعني فيه ناس ما انقبلو على انو معدلاتهم اعلى من زملائهم
ذولي لانو مختارين تخصصات للماستر تتطلب معدلات اعلى
من التخصصات اللي كانو طالبينها زملائهم
.
.
ثالث شيء:D
الا ينفع له لا
اجل ليه اجباري تدرسين سنه بمعهد لغه
عشان يأسسونك قبل ماتبدين دراستك الماستر بالجامعه
.
.
رابع شيء:D
ايوا لازم محرم للطالبات شرط اساسي والا ماراح يبتعثونك براpb034
بالنسبه للسكن
الحكومه مسؤوله انو تعطيك راتب شهري
فيه تقدرين تغطين تكاليف سكنك ومعيشتك هناك
بس هي مو مسؤوله انو تسكنك ببلاش:sm12:
.
.
خامس شيء:D
ياربي كذا افدتكpb189
جاوبتك بكل اللي اعرفه
.
.
موفقه قلبوو
bp039

[المرعب]

[B][CENTER]
ثاني شيء:D
تخصصات الدراسه محدوده
مو اي تخصص ينقبل بـ برنامج خادم الحرمين
فيه كم تخصص بس
ومنه انتي تختارين اي تخصص تبينه
بس ماله علاقه بـ دراستك البكالريوس
بس له علاقه بـ نسبة ترشيحك
يعني فيه ناس ما انقبلو على انو معدلاتهم اعلى من زملائهم
ذولي لانو مختارين تخصصات للماستر تتطلب معدلات اعلى
من التخصصات اللي كانو طالبينها زملائهم


ردك كله سليم إلا في النقطة ذي - طبعا لو طلعنا الواسطة برااااااا :D -
فالأساس ان تخصص الماستر لازم يكون امتداد لتخصص البكالوريوس او احد فروعه
مثلا .. تخصصي محاسبة اقدر ادرس ادارة مالية
تخصصي علم نفس .. اقدر ادرس قانون جنائي
بالشكل هذا
يكون فيه رابط
طبعا هذا في الموافقة المبدئية
اما سالفة الترشيح اللي انتي قلتي عليها ذي تعتبر المرحلة الثانية ..
اللي هي يسمونها على قولة الموظف ::: التحميص :D والتدقيق :::

انتي شوفي التخصصات واقرب شيء يتوافق مع تخصصك واختاريه على طول
ولو لاسمح الله رفضوا بتلاقين اعتراض قولي لهم هذا التخصص امتداد لتخصصي لأنه كذا وكذا
راح يعدلونه ويوافقون

بس صعب يكون لغة عربية وتختارين قانون مثلا .. مافي اي رابط ولا واحد بالمية :mad:
عموما التقديم مثل ماقالت Guess who
في شهر رجب ..

والله يوفقكم يارب
وان شاء الله تلاقين اللي تبينه وتطلعين من القصيم :D <<< والله مع اني احب القصيم خالتي هناك :D

[ضامي الحب]

مساء الخير احلام بلا حدود :)

لازم يكون مكمل لدراستي في البكالوريس انا تخصصي عربي يصير اكمل قانون او ادارة اعمال ؟؟؟؟
مو لازم يكون مكمل لتخصصك في البكالوريس لكن لازم يكون التخصص الى انتي تبغين تدرسينه في الماستر
تنطبقك عليك شروط القبول فيه .. على سبيل المثال فقط لو شخص معاه بكالوريس كيمياء ويبغى يكمل ماستر رياضيات ودرجاحته في الرياضيات ما هي كويسة لا يقبل.. اذا كان درجاته في الرياضات كويسة يقبل
وعلى كذا يتم القياس
وقوة الجامعه لها ور ايضا فيه جامعات تعطي قبول بسهولة وفيه جامعات لا

:)

انا صفر في الانجلش ينفع ابتعث ولا راح انكرش ؟؟؟

عادي انتي في البداية راح تدرسين لغة ومتى ما تحسنت لغتك تبدين في الدراسة الجامعية
ودراسة اللغة ماهي اجبارية الى يجي من السعودية ولغته ممتاز يبداء في الدراسة الاكاديمية على طول
واذا بتدرسين لغة الدراسة ما هي محددة بسنة اجباري لا انتي لك سنة ونص وتمتد الى سنتين اذا شافوا انك جادة ولكن لسى ما وصلتي للمستوى المطلوب .. فيه ناس تعدي جميع المستويات في اقل من سنة اما انه يكون عنده خلفية سابقة او يكون انسان سريع في تعلم اللغة ويتقبل بسرعة :)

لازم يكون معي محرم ؟ ؟؟
وكيف حيكون السكن ؟؟

البنات من شروط قبولهم وجود محرم ... والسكن انتي المسؤولة عنه هم مجرد يعطونك راتب شهري وانتي
الى تسكنين في المكان الى تبغين وتصرفين على نفسك :)

بعد اذنك عندي سؤال لـــ Guess who

فيه ناس يجيبون قبول بس مو كل من جاب قبول تقبل طلبه الوزاره
لانو الوزاره تدفع فلوس لـ مؤسسات تعليميه شغلها انو تجيب للطلاب قبول بمعهد لغه وجامعه
وبكذا لو جبتي انتي قبول جامعه
تخسرين الحكومه


الى فهمته من كلامك ان الحكومة تدفع فلوس لبعض الجهات عشان تجيب قبول
طيب اذا انا جبت قبول لي معناته اني وفرت عليهم وبكذا هم كسبانين ماهم خسرانين
الى اعرفه ان الى يجيب قبول وترفضه الوزارة اما انه جايب قبول من جامعه ماهي معتمدة او جايب قبول من جامعه
فيها عدد كبير من المبتعثين والوزارة ما تبغى المبتعثين يجتمعون في جامعات محددة تبغاهم يتوزعون :)


يعطيك العافيه
:)

[Guess who]

المرعب

صح كلامك انو افضل
انو يكون التخصص السابق امتداد للتخصص المطلوب
كذا يعطي فرصه اكبر بالقبول بالبرنامج
.
.
حتى افضل للطالب
انو يدرس شيء هو عنده خلفيه عامه عنه
مو يدرس شيء جديد
لا ويكون دراسات علياpb036
.
.




بعد اذنك عندي سؤال لـــ Guess who

الى فهمته من كلامك ان الحكومة تدفع فلوس لبعض الجهات عشان تجيب قبول
طيب اذا انا جبت قبول لي معناته اني وفرت عليهم وبكذا هم كسبانين ماهم خسرانين
الى اعرفه ان الى يجيب قبول وترفضه الوزارة اما انه جايب قبول من جامعه ماهي معتمدة او جايب قبول من جامعه
فيها عدد كبير من المبتعثين والوزارة ما تبغى المبتعثين يجتمعون في جامعات محددة تبغاهم يتوزعون :)


يعطيك العافيه
:)


8
8
اهلين اخوي
.
.
الحين بالابلكيشن حق التقديم للبرنامج
الطلاب يختارون الجامعات والدول اللي يبونها
طبعا الجامعات اساسا بموقع الوزاره فيه الجامعات الموصى بها ومعترف فيها
.
.
هنا يجي دور اللجنه
تشوف المعدل والتخصص السابق والتخصص المطلوب والدوله والجامعه
تحاول تخلي الافضليه بالدوله اللي الطالب مختارها
والجامعه تجيب له الجامعه اللي فيها التخصص الاكاديمي الافضل له
.
.
فرضا لو طالب كتب بخيارات الدول امريكا اول خيار
تقوم الوزاره تاخذ طلبه بعين الاعتبار
وتشوف الجامعه اللي هو حاطه برغبته
ان كانت الجامعه كـ دراسه اكاديميه مو هي الافضل لتخصصه
تغير جامعته بس بنفس الدوله
.
.
يعني تحاول توازن بين رغبات الطلاب وبين الافضل لهم كدراسه
هذا شيء
.
.
الشيء الثاني زي ماتفضلت
انو لو الطالب يجيب من نفسه القبول
كذا يوفر على الحكومه !!
صح كلامك وعين العقل
بس الحكومه تعطي هذولي المؤسسات
خبر انو ترا قبلنا فرضا 3000 الاف طالب
للابتعاث بالبرنامج
ونبي لهم قبول
تقوم المؤسسات تتراسل مع الجامعات بدول الابتعاث
عشان تجيب لهم قبول
.
.
يصير فيه طلاب يجيبون قبول
بس ذولي مثلا يكون قبول الوزاره لهم بجامعه
هم ما يقدرون يدرسون فيها
مثل لو كان السبب حقهم
انو المرافق او ااحد من اهلهم يدرس بجامعه معينه
وبكذا الطالب بيبي يدرس بمكان فيه اهله
هنا لما يرفع خطاب انو شكرا يالبرنامج جبتو لي قبول
بس انا ما ابيه:D
لانو اسبابي كيت وكيت وكيت
برضو تقام لجنه
وبعدها تطلع اسماء المقبولين والمفروضين اسبابهم
عاد يا يقولون للطالب
جيب قبولك حق الجامعه اللي انت جبته
واحنا نعتمده من عندنا وخلاص روح كمل اوراقك وسافر
او انو تقوله الوزاره
لك خيار من اثنين
يا ترضى باللي احنا جبناه لك:D
لانو انت بنفسك اخترت الدوله والجامعه هذي افضل لتخصصك
او انو تبغى تلغيها عشان يحق لك تقدم بالمرحله الجايه كيفك :D
.
.
او انو يكون الطالب
دارس على حسابه الخاص
والجامعه اللي درس فيها مو جامعه معترف فيها
او التخصص حقه مو من التخصصات اللي ببرنامج الابتعاث
وحب يلحق بالبرنامج حق الابتعاث
وهو يدرس برا
كذا برضوو راح ينرفض طلبه:confused:
.
.
هذا اللي انا شخصيا اعرفه عن الابتعاث
وما ادري عن كل شيء:sm5:

[المرعب]

طيب انا راح اقولكم وش اللي صار ويانا هالسنة عشان الكل يستفيد من سالفة قبول الجامعات او غيره
او طريقة التعليم العالي هالسنة عشان في التقديم الجاي محد يتورط :D
وراح اعطيكم إياها من بدأ التسجيل بالموقع إلى ان اخذت قرار الابتعاث خطوة بخطوة وعلبة موية بعلبة موية :D <<< لأنهم يرفعون الضغط هناك :D


اول شيء : فتح التسجيل بالموقع لطلاب الدراسات العليا اولا ولفترة محدودة جدا .. يقدمون وكان ضمن الشروط ان تخصص الماستر يكون تابع لتخصص البكالوريوس وماكان فيه اي افضلية بتاتا لأنه ماكانت معهم اي شهادات او ورق قدامهم .. بس ياخذونها كبيانات وإن شافوا ان تخصص الماستر يختلف عن البكالوريوس يتم رفض الطلب بشكل مباشر .. وللطالب الحق الاعتراض على الرفض هذا مع الربط بين البكالوريوس والماستر ووقتها بيردون عليه ان وقت ::: التحميص :D ::: راح يغيرون رأيهم لو طلع كلامك صح :D
وطبعا موظفين الحكومة راح يتم إلغاء طلبهم بشكل مباشر

ثاني شيء : يحددون لك موقع لتدقيق الأوراق : شهادة التخرج وكشف الدرجات - بالعنقليزي لازم :D - مع الاصول بالعربي ويكون وياهم التوصيات إن وجد ... ووقت التدقيق بتروح تختار التخصص والدولة فقط واي شيء ثاني مالهم دخل فيك

ثالث شيء : تجي سالفة الترشيح الاخيرة والواسطات :D وسيتم الترشيح على حسب المعدل والتوافق الاكبر بين تخصص البكالوريوس والماستر .. وطبعا الافضلية في الترشيح لطلاب الدراسات العليا عن البكالوريوس .. طبعا إلا طلاب الطب والهندسة

رابع شيء : بعد الترشيح وصدور الاسماء .. في هالوقت راح تاخذ الدولة والمتمثلة في وزارة التعليم العالي ( والله من زمان نفسي اقول كلمة المتمثلة في :D ) يراسلون المكاتب اللي قالت عليهم Guess who وهي ثلاث مكاتب وللأسف ما اعرف اي واحد لأني ما تعاملت وياهم .. بس واحد منهم مسئول عنه الدكتور تركي المنصوري طبعا هالمكاتب تبدأ تجيب لكم قبول معاهد كأساس ،، وجامعة كهدف ثاني
لأن الدولة من هالبعثات الاخيرة بدأت ترسل على قبول المعاهد فقط .. يعني اللي عنده قبول معهد ياخذ قرار الابتعاث ويروح الله يسلمه وخلال هالفترة هو يدبر قبول جامعة
اما البعثتين اللي قبل لازم يكون عندك قبول جامعة ..
التعليم العالي يبون يفكون نفسهم .. فالمعاهد سهل امرها .. انت جيب قبول المعهد وخلال ..
طبعا بمجرد ان يصدر اسمك ... حاول انك تاخذ قبول معهد لكن مايبدأ هالمعهد إلا في شهر 3 ميلادي .. قبل كذا راح تورط نفسك .. لأن التعليم العالي دائما كل معاهدهم راح تبدأ في شهر ثلاثة .. وذي اتفاقياتهم مع المكاتب اللي تجيب لهم القبول ..
طبعا لا تحاول تجيب قبول لين يطلع اسمك ويتم تحديد الدولة ...
لو حددوا لك بريطانيا مثلا .. ادخل موقع التعليم العالي وسوي بحث حسب التخصص ولازم حسب التخصص لأن كل دول العالم تعترف بالتخصص ماهوب بالجامعة
يعني مثلا .. جامعة ليفربول قوية جدا في التسويق .. لكنها زبالة في المالية ..
فالدولة اي خريج من ليفربول بالتسويق تعترف بشهادته لكن خريج المالية ماتطالع فيه..
فسوي بحث حسب التخصص .. وشوف الجامعات المعترف فيها حسب التخصص وراسلهم ..
وقبلها راسل المعهد اللي انت تبيه ..

طبعا مع نهاية كل سنة هجرية او بدايتها يعني نهاية هالسنة او بداية السنة الجاية(وهو الغالب ) ان التعليم العالي يبدأ يراسل الطلاب ان فيه عندنا اجتماعات لمدة يومين ( وحضورها إلزامي ) وماراح يقبلون اي عذر بتاتا - طبعا إلا الاعذار القوية - واللي مايحضر يتم إلغاء اسمه من البعثة مباشرة وهي مدتها يومين تبدأ من 2 إلى 8 الليل ... وارجع اقول حضورها إلزامي ... واعرف كثير ألغوا بعثاتهم لأنهم ماحضروا ..
وطبعا هالاجتماعات تصير في المدن الرئيسية الثلاثة ( الدمام - الرياض - جدة )
في هالاجتماع راح يوزعون بعض القبولات للطلاب سؤاء كان للمعهد او الجامعة ..
انت وقتها لا تنقز لهم وتقول جبت قبول :D
رح لمبنى التعليم العالي ثاني يوم ومعاك قبول المعهد حقك او الجامعة محد بيقولك لا .. ولاراح يلزمونك بقبولهم إلا في حالة ان معهدك او جامعتك غير معترف فيها ..


نجي للمرحلة الاخيرة في القبول :
بعد ماتجيب قبول المعهد او الجامعة وقالوا لكم خلاص ابدأوا كملوا اجراءاتكم .. كل واحد يطب للسفارة الخاصة بالدولة اللي بيسافر لها .. وتاخذ فيزا ..
بعد ماتاخذ الفيزا تروح للتعليم العالي تعطيهم صورة من الجواز والفيزا وبطاقة الاحوال او كرت العائلة مع صور الشهادات وموافقة المعهد او الجامعة ..
راح يطلعون لك قرار الابتعاث .. ومن نفس المكتب تطلع امر الاركاب .. ومن داخل المكتب تسافر :D



يبقى اقولكم اللي صار معي في قبول الجامعة والمعهد
انا التعليم العالي جابلي قبول في إيرلندا - وانا مقدم في بريطانيا - طبعا التعليم العالي حاط ايرلندا وبريطانيا واحد مع ان ايرلندا مالها دخل في بريطانيا مستقلة
المهم قلت لهم مابيه انا قلت بريطانيا .. قالوا لي ضف وجهك :D ، قلت هين يا الزلايب اوريكم
ورحت على طول لمكتب a2z وما انصح بالتعامل وياه :D
وقدمت عن طريقهم قبول في معهد CESC وخلال ثلاثة ايام جاني القبول :D
اخذت القبول وراحت للسفارة وطلعت الفيزا وخلال يومين اخذتها لأن يومها كان النظام معطل ..
وبعدها رحت للتعليم العالي وعطيتهم الورق مع الفيزا والقبول ..
ولا احد سألني عن قبول ايرلندا او معهد ايرلندا ..
خلال اسبوع اعطوني قرار الابتعاث وقالوا لي يله بالسلامة :D

طبعا انا جبت قبول المعهد على تاريخ 19/05 ميلادي .. وتضارب معي المسئول وقالي كل الطلاب لازم يسافرون قبل وفي شهر ثلاثة تبدأ الدراسة قلت له : ماجاني قبول في بريطانيا وانا قدمت ورقي وذي الفيزا حقتي وخلاص ..
قالي طيب :D
والحمدلله الحين جاني قبول من الجامعة بعد ...

طبعا ذا اللي انا كتبته لكم هو كل اللي صار ويانا ..



ارجع اركز على كم نقطة :
1- امتداد التخصص لازمي وممكن الواحد يناقشهم فيه مجال
2- موعد تدقيق الاوراق محدد ولازم تلتزم بالموعد اللي يعطونك اياه
3- الاجتماع راح يكون بعد الترشيح وحضوره إلزامي
4- ممكن انت تدبر قبول معهد او جامعة قبل لا يجيبون لك وراح ياخذونه منك ويقبوله لو كان في جامعة معترف فيها من الدولة
5- قبول المعهد كااااافي لأخذ قرار الابتعاث - إلا إذا غير التعليم العالي رأيه السنة الجاية - ..


ذا اللي عندي من واقع تجربة <<<< امحق تجربة :D
وهذرتي زيادة وسلامتكم وسفرة دايمة :D

[dbdooob]

ارجع اركز على كم نقطة :
1- امتداد التخصص لازمي وممكن الواحد يناقشهم فيه مجال

حبيت اوضح نقطهbp039
عزيزي امتداد التخصص غير الزامي بس الالزامي انو اذا كان تخصصك ادبي تدرس تخصص ادبي ما تقدر تدرس تخصص علمي

يعني لنفرض عندك القانون + التجارة الالكترونية+ التسويق
تخصصات تعتبرها الوزارة تخصصات ادبية فلذلك خريجين اللغه العربية او اي تخصص يقدرون يقدموا عليها

بس لنفرض انك قدمت على تمويل او حاسب آلي علطول ترفض الوزارة وتطلب منك تعدل التخصص وهذا اللي حصل معاي

الوزارة هالسنه سوت شئ جديد انها تقبل انك تطلع قرار ابتعاث بقبول اللغة فقط في حالة انك دراسات عليا وهذا سهل اشياء كثير على الطلاب

ومن ناحية سالفة ايرلندا ترا الوزارة من جنبها انت مش امورك ولا تخرب على نفسك هم همهم الاول والاخير انهم يتخلصون منك وتسافر وتصير تحت مسؤولية الملحقية

*******
على فكره ترا شئ طبيعي ان الواحد يدرس تخصص مختلف بمرحلة الدراسات العليا لان البكالوريس مجرد مقدمة في الدراسة الاكاديمية والماجستير ما يحتاجون فيه الا اساسات اكاديمية وسن معين لان دراسة ابو 18 و 19 سنة تختلف عن دراسة وتفكير ابو 24 و 25

نستثني من هذي التخصصات العلمية البحتة والطب لانهم يشترطون خلفية اكاديمية في مجال التخصص
فيه جامعات كثير خصوصاً في امريكا وكندا مريحة راسها
تشترط لقبول الماجستير درجة معينه في اختبار الـ GMAT وهو اختبار يقيس قدراتك الاكاديميه بالنسبة للتخصصات الادبيه والادارية

بينما تشترط اختبار الـ GRE للتخصصات الهندسية والعلمية والحاسب الآلي

تحياتي

[المرعب]

Guess who
Leap of Faith

يبدولي ان كلامكم اقرب للواقع لأن واحد من اخوياي خريج اعلام وطالع تسويق :D

وزيادة على كذا ان موظفين التعليم العالي مساطيل .. كل يوم تسمع كلام جديد منهم ماتدري مين الصح ومين الغلط فيهم ..
يقولون التجربة خير برهان :D

[أحلام بلا حدود]

يعطيكم العافية كل ابوكم

لكن تراكم دوختم راسي
واحد الزامي واحد لا

طيب نفرض انا قدمت قانون او ادارة اعمال اوكي وقالوا لي بررررره كيف اقنعهم ؟؟

مايصير اقنع انا بره يعني بره ؟

مع ذلك كلامكم كلكم افادني يعطيكم العافية يارب

[المرعب]

يعطيكم العافية كل ابوكم

لكن تراكم دوختم راسي
واحد الزامي واحد لا

طيب نفرض انا قدمت قانون او ادارة اعمال اوكي وقالوا لي بررررره كيف اقنعهم ؟؟

مايصير اقنع انا بره يعني بره ؟

مع ذلك كلامكم كلكم افادني يعطيكم العافية يارب


بالاعتراض بالموقع
بس اعتقد التجارة الالكترونية هي الانسب
كل الشعب اللي اعرفهم في البداية قدموا عليها ومشت امورهم

[أشعار]

..

مرحباً عزيزتي أحلام بلا حدود bp039

في البداية عليكِ بالاستفادة من رد الأخ المرعب لأنه وافي و صحيح بحذافيره bp039 . و عشان لا يتشوش تفكيرك بكثر الكلام راح أرتب لك باختصار الأجوبة على استفساراتك .


اللحين انا عبالي تقديم الماستر عن طريق وزارة التعليم العالي وانه مالي خص بالجامعات الخارجية عاد انا قرأت لابد بحضور موافقه من الجامعة المراد دراستها كلامي السابق صح ولا في تخصيص ؟؟؟

صح الكلام . مو لا بد يعني هم ما حيجيبولك قبول . بس الأفضل إنك إنتي تجيبيه . تشوفي قائمة الجامعات المعترف فيها من السعودية حول العالم و تختاري التخصص المرغوب .. لو كان مو موجود ضمن التخصصات اللي فقائمة الوزارة راح تعرفي طبعاً مِن خلال إعلان الابتعاث . بيكونوا موضحين فيه كل شي . و انتي على أساس التخصصات المتاحة البعثات لها و الدول المتاح الابتعاث لها و اللي حينزلوها في الاعلان تبحثي عن التخصص اللي تبغي تدرسيه من بينهم و تبحثي عن قبول فجامعة معترف فيها .


الشي 2
لازم يكون مكمل لدراستي في البكالوريس انا تخصصي عربي يصير اكمل قانون او ادارة اعمال ؟؟؟؟

لا طبعاً ما يصير . لو انتي خريجة ثانوية ممكن تدرسي أي تخصص حابته . بس بكالوريوس لازم الماستر يكون له علاقة لو بمادة أو فرع من تخصصك . يعني انتي عربي .. ممكن تدرسي أدب إنجليزي أو تخصص التعليم الإبداعي أو أي مجال أدبي يعني . مو تخصص عربي و أروح أدرس طب أو هندسة ! . لا طبعاً ما يصير . بالنسبة لإدارة الاعمال مدري لو لها علاقة بس لو كان هذا هو المجال اللي حابة تكملي فيه اعطيني فرصة اسأل لك و ارد عليكِ .

بس أكديلي انتي تخصصك عربي والا هذا مجرد مثال ؟. عشان أقدر افيدك كويس .


الشي3
انا صفر في الانجلش ينفع ابتعث ولا راح انكرش ؟؟؟

ينفع . فيه شي اسمه سنة لغة تأسيسية يعني تأهيل في اللغة الإنجليزية . ممكن بالراحة تطوري لغتك فيها و تجيبي المعدل المطلوب لو عندك إرادة و حابة تتعلمي بسرعة و راح تتجاوزي و يحولوكِ للدراسة الجامعية على طول bp039


الشي 4
لازم يكون معي محرم ؟ ؟؟
وكيف حيكون السكن ؟؟


الابتعاث على حساب الدولة لازم محرم للبنات . السكن حينزلك راتب توفري سكنِك به زي ما تحبي . bp039

و بالتوفيق bp039

ـ


على جنب :

المرعب :
هالمكاتب تبدأ تجيب لكم قبول معاهد كأساس ،، وجامعة كهدف ثاني
لأن الدولة من هالبعثات الاخيرة بدأت ترسل على قبول المعاهد فقط .. يعني اللي عنده قبول معهد ياخذ قرار الابتعاث ويروح الله يسلمه وخلال هالفترة هو يدبر قبول جامعة
اما البعثتين اللي قبل لازم يكون عندك قبول جامعة ..

للأسف كلامك صح . و شرّ البلية ما .. : )

ـ

[.!.$.!.]

طيب معليش انا بنشب لكم شوي وفهموني حبه حبه

انا تخرجت تربيه خاصه ماصار لي كم شهر زين .. جامعتنا العريقه ما تقبلني ماجستير الا بخبره سنتين!! وهذا شرط الزامي
لو ابي اقدم عالبعثه علشان اكمل بالاداره ينفع؟!
ولو ما كان ينفع وبغيت اكمل بعلم نفس او نفس تخصصي لازم خبرة؟!
مع العلم اني بالثانوي علمي

و ايهم افضل انتظر الين بعد الترشيح واجيب قبول المعهد والجامعه والا ابدا من الحين ؟!
واولم العصابه قبل الفلقه !!

[المرعب]

المرعب :
هالمكاتب تبدأ تجيب لكم قبول معاهد كأساس ،، وجامعة كهدف ثاني
لأن الدولة من هالبعثات الاخيرة بدأت ترسل على قبول المعاهد فقط .. يعني اللي عنده قبول معهد ياخذ قرار الابتعاث ويروح الله يسلمه وخلال هالفترة هو يدبر قبول جامعة
اما البعثتين اللي قبل لازم يكون عندك قبول جامعة ..

للأسف كلامك صح . و شرّ البلية ما .. : )


والله انا ما اشوف انه عيب انهم يخلون الناس تسافر بموافقة المعاهد
طبعا السبب بكل بساطة
إني اعرف ناس من البعثات الثانية ماسافروا إلا قبل شهر لأن ماجتهم موافقة جامعة لسه :mad:
تخيلي ينتظر سنة وشوي عشان موافقة جامعة
طيب عطني موافقة معهد وخلني اروح وانا ادبر نفسي هناك ان شاء الله

هو عيب ظاهريا إلى حد ما .. لكن فعليا يعتبر شيء زين انك تترك مجال للطالب يبدأ دراسته ويروح وهو يدور خلال الفترة ...
صح العيب انك تترك الطلاب وتشيل يدك عنهم .. لكن الميزة انك تقولهم ابدأوا ولا تنتظرون وتتأخرون
حرام سنة في العمر تروح وانتظر موافقة جامعة

هو مجرد رأي لأني شفت معاناة طلاب وبزيادة
طبعا ردي هذا كله لأني فهمت من جملتك ان ليه يرسلونهم بموافقة معاهد بس لو كان كلامك العكس ما كأنك شفتي ردي :D


طيب معليش انا بنشب لكم شوي وفهموني حبه حبه
انا تخرجت تربيه خاصه ماصار لي كم شهر زين .. جامعتنا العريقه ما تقبلني ماجستير الا بخبره سنتين!! وهذا شرط الزامي
لو ابي اقدم عالبعثه علشان اكمل بالاداره ينفع؟!
ولو ما كان ينفع وبغيت اكمل بعلم نفس او نفس تخصصي لازم خبرة؟!
مع العلم اني بالثانوي علمي
و ايهم افضل انتظر الين بعد الترشيح واجيب قبول المعهد والجامعه والا ابدا من الحين ؟!
واولم العصابه قبل الفلقه !!

والله مادري إذا كان فيه رابط بين التربية الخاصة والادارة واعتقد انه مافيه اي رابط ابدا
اما لو بتكملي علم نفس او نفس تخصصك فيه مجال ولا يحتاج خبرة ولا شيء
لأنك راح تدرسين هناك ماجستير ...
وهم ماراح يطالعون وش كنتي بالثانوي ولا غيره هم عليهم من آخر شهادة اللي هي الجامعة

وانا أفضل انك تنتظرين الترشيح لا تجيبي اي شيء الحين
الترشيح بالعادة يكون بعد رمضان يعني على شوال او القعدة
من وقته لين المقابلات الاخيرة وغيره يمديك تجيبين موافقات
المعهد انا جبت موافقته عن طريق مكتب a2z خلاص اربعة ايام بس ..
طبعا ماهوب شطارة فيهم لكن مراسلة للمعهد وامرها هين المعاهد في كل دول العالم


اتمنى يكون ردي وافي وكافي :D

[Elite]

طب نبغى مواعيد التقديم ع الماستر لاهنتوا..
ووش رايكم باستراليا - نيوزيلاند هل الماستر هناك سنة زي بريطانيا؟

[المرعب]

طب نبغى مواعيد التقديم ع الماستر لاهنتوا..
ووش رايكم باستراليا - نيوزيلاند هل الماستر هناك سنة زي بريطانيا؟

اللي اعرفه في شهر رجب وهو أول تقديم يفتح قبل البكالوريوس
http://www.mohe.gov.sa/Arabic/Pages/default.aspx

تابعي موقع الوزارة اول بأول

بالنسبة لأستراليا على حد علمي ان الدراسة متشابهه مع بريطانيا إلى حد ما بس اعتقد الماجستير عندهم ياخذ فترة اطول شوي ...
اما نيوزلاندا ما ادري بصراحة وش وضعهم ولا ادري وش سالفتهم اصلا :D
مع إني أفضل بريطانيا .. لكن كثير يحبون استراليا على بالهم انها ارخص :D
وهي مافرقت عن بريطانيا بالأسعار اي شيء :D

[loco por el]

مرحبا ..
حبيت اسأل هل صحيح أن بعثات السنه الجايه راح تكون بس للدول الآاسيويه؟
طيب واللي يقول ان استراليا غاليه .. طيب بريطانيا وكندا ارخص ولا كيف؟؟
وشكرا