مأساه من عشرين سنه

[بائعة الفصفص]

هذي قصة قريبتي
متزوجه من اكثر من عشرين سنه من ابن عمتها
زوجها انسان غريب تقريبا مريض نفسي 00انسان سيء بمعنى الكلمه مع الجميع 00حتى امه واخوانه00

في البدايه تزوجها صغيره وسيطر عليها وكان يضربها بس ماشتكت ولا تكلمت00انجبت ابنتين وظهرت المشاكل وكان يغلط على امها وابوها ولايحترمهم 00قال ابوها يا بنتي اتركيه تراه مابينفعك وانا اربي بناتك00بس هي الظاهر تحبه قالت لا خلوني ارجع هذي المره اجرب يمكن ينعدل قالوا خلاص:sm4:

ومرت السنين وهي تعاني من شتمه وضربه ومرات ينعدل شوي بعدين يرجع لوضعه الى صاروا العيال سبعه:( البنات هم الكبار والعيال هم الصغار

النتيجه عقد نفسيه للبنات وتقريبا فشل دراسي 00طبعا شتائمه وضربه وصل للبنات يضربهن ضربا مبرحا:mad: ويشتمهن بألفاظ سيئه جدا ويقذفهن حتى مثل قول يا شر00 وغيرها

كان في البدايه يحرض البنات على امهن خصوصا البنت الكبيره ويخليها تتصنت على امها اذا كلمت اهلها علشان تعلمه ايش قالت عنه او اذا اشتكت

يعاملهم مثل الشغالات كرف ليل ونهار وعامل تفتيش للبيت وياويلها لو يشوف ذرة غبار في الحوش او في البيت وطبعا لو انكسر شئ 00هذا يوم القيامه في البيت:sm17:

مره الام انهارت وصابها السكر وصارت تشتكتي من اعراض كثيره 00من جهة الزوج الظالم المتجبر ومن جهة البنات اللي صاروا معقدات نفسيا وبس مشاكل طول الوقت والابناء في الطريق اطفال مساكين
طبعا ابو الزوجه مات من سنين وزوجها يلعن ابوها وامها عند كل مشكله ويشتمها باقذر الاوصاف ويضربها 00ومره ضربها ضرب شديد وهي حامل في الشهر التاسع :sm1:واتصل على اهلها وشتمهم وقال تعالوا خذوا بنتكم والسبب علشان كاسة مويه بارده 00يعني سبب تافه

بس هي مسكينه ماقدرت تبعد عن عيالها وتبكي ليل نهار علشان ترجع لهمpb093
وهو دائما يهددها ويقول بتزوج اطلعي من بيتي انقلعي ومن هذا الكلام


انا نصحتها تتركه وتاخذ عيالها وبناتها لتنقذهم منه 00قلت انتي راحت عليك وبناتك نفسياتهم تعبانه 00طيب لحقي على عيالك لان الولد مابيتحمل وبيطفش من البيت ويروح الشارع وآه من الشارع 00يعني ضياع:(

طيب في هذا الوضع
تقدر تروح للقاضي ينجدها لأن اخوانها بيقولون تعالي واجلسي في بيت ابوك وكل واحد بيعيش حياته 00مين يصرف عليها وعلى عيالها
هل القاضي بينصفها ويساعدها ام لا؟

[. rOro .]

ياربي

الله يكون بعونهم ويكفيهم شره ..

:

تأخرت كثير في هالقرار ..

يعني وش بقى راح تخسره لو جلست معه؟ .. يمكن بس نقطة الاولاد ..

طيب هي لما تتركه وتطلب الطلاق بيترك اولادها معها؟ .. مااتوقع انسان شراني لهالدرجه يتركها بحالها .. راح يساومها على عيالها .. ولو خلعت نفسها منه بتتعب معه ويمكن يحرمها منهم ويستفرد فيهم ويزيد تعقيدهم اكثر

وهي فهمت من كلامك ان ماهي موظفه ولا مستغنيه في مسألة المال ... يعني محتاجين له

مااشوف ان الطلاق حل

الله يسخره لهم او يكفيهم اياه بماشاء يارب

-- باك بضيف نقطه--

كلامي السابق ما قلته تئييدا مني لـ انها تستمر معه وتعيش ذليله هي وعيالها تحت وطئته... وتصيبها امراض الدنيا بسببه...

كلامي من واقع نعيشه ونشوف ونسمع ان المطلقه نادر ما يتم انصافها ان في مسألة الأولاد أو النفقه .. مالها اي شي يضمن حقوقها من زوج متمرد داخل مجتمع ذكوري ومحاكم الله العالم باللي يصير داخلها ..

يعني الحمدلله في بيت بيلمها هي وعيالها ... لكن اذا اخذهم منها؟ ... او خلاهم معها ونساهم وما التزم بنفقتهم وهذا المتوقع من شخص بهالمواصفات ..

وش بتسوي تطر؟ :(

الله ينصفها يارب

[رجول حرفي]

الله يصلح حالهم يارب

[مختبة]

نعم لازم تحاول تنقذ ما يمكن انقاذه..وما يمكن انقاذه مو شوي ابدا
هذا الشر(زوجها) مع الوقت راح يزيد.. ويأثر على زواجات البنات وبعيد الشر ممكن يضيعهم

عليها تستعين بمحامي يساعدها ويوضح لها موقفها ..من خلع وخلافه
في امريكا يوفرون محامي مجاني للحالات اللي ما تقدر تدفع..طيب وهنا؟!
في مصر الشقه من حق الزوجة والنفقه يدفعها الرجل غصبن عن عينه..لكن عندنا يعتمد :( فيها وفيها حسب القاضي :(
اخوانها مستعدين يخلونها تسكن بالبيت طيب هذه نقطه جيده
اكيد فيه جهات مختصه تقدر تستعين فيها بحيث انها تساعدها بعمل معين او شي
ان شالله الاخوه والاخوات اللي عندهم فكرة بيساعدونbp039

اللي ابيه اقوله لا تستسلم ..ضروري تجند قوتها وطاقتها علشان تعيش حياة كريمة
بناتها وعيالها وهي من حقهم يعيشون بأمان..بكره بناتها بيتزوجون لو بوضع مع هالسفيه بيأثر على سمعتهم او يمكن يعملهم مشاكل او يشوه صورتهم عند ازواجهم بأي شكل

00قلت انتي راحت عليك وبناتك نفسياتهم تعبانه

لا حرام ما راحت عليها..من حقها تعيش بسلام وتنام وهي مرتاحة البال بعد رحلة طويلة مع المعاناة وبناتها ان شالله بيتغيرون للأفضل اذا توفرت لهم بيئه سليمهbp039

يا رب ساعدها pb189

[مغرور حدي]

ترفع عليه قضية بالمحكمة ويطلقها الشيخ .. واحسن لها تروح لمحامي عشان ماتتعب من مشاوير المحكمة

الله يعينها

[احساس جديد]

حبيبتي الله يكون بعون قريبتك000 ويرفع عنها000 ويفرج همها000

لاتخافين مصير الشمس تطلع بعد الظلام000ومافي شي يدوم للابد000

بالنسبه لمشكلتها اخر الحلـــــــــلول(الطلاق)00
لاحظي اخر شي 00مو اول00لانو في اشياء كثيره لازم تعملها 000وبعدها اذا مانفع نلجاء اليه وهو حق وماراح يسلب منها شي لا ((كرامتها ولا اولادها ولا حريتها))000والاهم ((الراحه النفسيه فالجسديه))
اسمحيلي اقول انو قريبتك 00اخطائت من البدايه لانها ماوضعت حل ولا حد بل مشت معاها والي يصير لها شي طبيعي000لا تستغربيبن فعلا طبيعي لان المسار واحد وهذا من تبعياته000
اولا:زوجها من الي فهمتها والي وضحتيه000تصرفاته مو طبيعيه000
فاما يكون يتعاطى مخدرات 000او يعاني من شك مرضي00نتيجه موقف منذ الصغر او الطبع غلاب000
او مرض نفسي مااقدر احكم الان لان المعطيات مو كامله ويبغالها جلسات 000
لذا عليه تلجاء الى مستشار نفسي او اسري او اجتماعي >>لانهم راح يساعدونها لفهم الموضوع وعليه راح يتم العلاج0000
وصدقيني 000معاهم راح تنحل المشكله000سواء بالايجاب او الرفض000
وااكد على هذه الخطوه لانها مهمه لا تتساهلون فيها0000

عن طريقها كل شي بينحل000وكل شي راح يتم بسريه تامه000
انا ما اقدر اعطيك شي ولاغيري 000
خليها تروح لمستشار اسري و00وباذن الله راح تلقى العلاج000
وانا اتحمل المسؤليه كامله0000

حرررررررررررررام كافيه تجاهل واهمال المتضريين الان هي واولادها000

احترامي00

[joLina]

الله يكون بعونها , ويفرج لها كربتها : (

[alhilaliah]

والله مااقدر أقول
الا الله يكون بعونها .. ويفرج كربتها ..
يااارب ..

[كارميل ماكياتو]

هذا المفروض يتعالج لانه مريض ,,

الله يعينها وياجرها ,,

[انوار الرياض]

يالله وش هالحاله العصيبه

الله يفرج كربتها يارب

الطلاق مهب حل وحيد حتى بعد الطلاق بامكان يرفض تاخذ بناته حرام ويحط حرته بالبنات

لازم يعالجون ويشوفون وش فيه بالضبط

[بائعة الفصفص]

مشكورين جميعا على الرد والله يجزاكم خير

زوجها مافيه البلا بس طبيعته شراني وعصبي ومايهمه احد ومايخاف من الله والا هو شغيل وماعليه

صدقوني اني ماذكرت اشياء كثيره من تصرفاته تشيب الراس
حتى قالت لي ان المدرسه اتصلوا عليها يقولون بنتك مو طبيعيه نفسيتها واذا كان عندكم مشاكل قالت مافيه بيت يخلو منها 00طبعا هي ماقالت للأب لأنه لو يدري بيهلك البنت ضرب انه ليش المدرسه يشتكون00وهذي البنت المفروض انها ثاني سنه جامعه بس مازالت في الثاني ثانوي

عموما هي اتخذت خطوه بس عسى ماتتراجع وهي انه تتفق معاه يتزوج اخرى لانه دائما يقول (بتزوج وانتي اطلعي برا )من سنين فهي بتقول خلاص روح تزوج واتركني انا وعيالي نعيش بسلام وبس 00وترى هذا التصرف اشجع قرار ممكن تتخذه

الله يفرجها عليها 00تتكلم وصوتها في حشرجة البكاء من كثر القهر

[‏ŁEěOи๏]

لاحول ولاقوه إلا بالله..

انا من وجة نظريَ تصبر على حالها يلي صبرها هالعشرين السنه يصبرها إلى ماشاء الله..

حرآم عيالها يضيعو أكثر مو أنهم ضايعين الحين..يعني بالطلاق بيضيعون اكثر

على الأقل هي لاقيه بيتَ الحين وعايشه مع عيالها لكن لو تطلقت كيف بيكون حالها وخصوصاً لومهي موظفه.. :(

يعني تصبر مو بس هي التعبانه معه حتى عيالها حرآم هذول الصغار يتشتتون يعني يوم تطلق

البنات وين بحصلون حنان لو مافي أمهمَ ..؟؟؟ وربي هذه النقطه أكبر ضيااعَ لهم..pb093 ومن أسباب أنحراف البنات

شوفي الأصلاحيات مليانه مشاكل والأاسباب الام والاب منفصلين pb093

انا أنصحها تصبر وعليها بالدعااء له وتكلم واحدَ من عايلته يكون يحترمه ويقدرهَ يتفاهمَ معاه بالطيب

وهي خليها بعدّ تحاول تفهمهَ وتقرء كتبَ كيفة التعامل مع هذول الاشخاص ..

أنا ماأنصح بالطلاق بعد هذول العيالَ أنا أشوف كل شيء بالطيب يجيَ لازمَ تفهمَ كيف تتعامل معاه

وعليها بالدعااء هيي وعيالها وترفع من معنوياتي عيالها حرآم يضيعوو هذول الصغاار..

ولو بيتزوج خليه يتزوجَ عليها على الاقل بيكونَ أهون من وضعها الحين طالما أنها موطايقته

بالعكس فكه منهَ وبترتاح من خشته << من المؤيدين بتعداد الزوجات :D

أتمنىَ نقطتي وصلت والله يعينها ويهدي سرها..

[حرم زوجي]

الله يفك كربتهم ياربbp039

[جداااوي]

للاسف القاضي خصوصا قضاه هذه الايام بيقول لها ارجعي بيت زوجك

حتى لو يقبرك حيه ؟

[حرة بحياتي]

طيـب الأم وغسلت يدها من هالزوج ومن حياتها
بس الابناء ؟؟؟؟؟؟؟

المشكله اللي اشوفها امامي مو مشكله زوج وزوجته لانهم تخطوا هالمرحله بكثيييييييير
المشكله الاساسيه هي البنات والاولاد

الأم لقت لها حل وهو انه يتزوج :eek: هي ياعمري تعتقد انها بكذا راح تحافظ على حقوقها ياااابائعه الفصفص الحين هي ما أخذت حقها وهي في بيته وشلون بتاخذه وهو مرمي بحضن غيرها
هو كيفه يبي يعرررس بقاف يشيله بس انتبهي لاتطلع من لســانها خليه يسوي اللي يبيه


الأم وبناتها محتاجين لنااس يوقفون معهم نفسيا وخبيرين بهالمجال مافيه الا الاخصائيين والله الذي لا اله الا هو ان الاخصائي النفسي ضروري تواجده مع الشخص الطبيعي وشلون الشخص الي يعاني من هالضغوط والأزمات لايردها شيء تتصل ولا تروح لـ مركز الراشد وبعد فتره الام بتحس بقيمه حياتها وراح تعرف ان هالحياه ماتتلخص بوجود انسان مريض بجانبها

عطوها دفعه انها تشتغل أيا كان الشغل , تفكر بإقامه مشاريع وتلجأ لصندوق المئويه ولا صندوق عبداللطيف جميل لتمويلها لازم تخطو خطوه جديه عشان توفر لها مصدر دخل منها هي ولاتصير بمنة هالرجال ولا غيره

المهم الان
معالجة نفسها
معالجة بناتها واولادها
توفير مصدر دخل مهما كااااااان
ولاتنسى اللجوء لرب العالمين

وهذا الرجال بيجيه يومه الله يعينه

دايما احاول امسك نفسي بمثل هالمواضيع ولا اعصب بس عجزت امسكها هنا :(

<-- طيب انقلعي

طيب pb094bp039 يمكن تكون لي رجعه أكثر روقان يمكن pb189

تحيّتي bp039

[Mَsْhَaْ3ِRْ]

ولو بيتزوج خليه يتزوجَ عليها على الاقل بيكونَ أهون من وضعها الحين طالما أنها موطايقته

المميزة ماشاء الله لك من اسمك نصيب pb189:D


صراحة مافي أحسن من انها تحاول تزوجه ثانية ( لو كان مقتدر )
لأن كان براسه شي ، بيطيح من الزواج بثانية ،
يا إما انه بينبسط وبتتحسسن حالته وبينعكس هالشي على زوجته الأولى ويكون له أثر
أو انه يندقم صح فيها ويرجع مدقوم ومتأدب للأولى وهذا يصير عادة
وفي احتمال كبير جدا انه محد يبيه اصلا
وبيقعد يدور ومايلقى .. وبعدها بيحمد ربه عاللي هو فيه

[ريــ الرياض ـوف]

عموما هي اتخذت خطوه بس عسى ماتتراجع وهي انه تتفق معاه يتزوج اخرى لانه دائما يقول (بتزوج وانتي اطلعي برا )من سنين فهي بتقول خلاص روح تزوج واتركني انا وعيالي نعيش بسلام وبس 00وترى هذا التصرف اشجع قرار ممكن تتخذه

اللي مثل هالاشكال حسافه عليه يكون عنده زوجه وعيال
كيف لو يزوجونه ثانيه
حرام تبلون بنت الناس..
الرجال شراني وهالشي مستحيل زوجه ثانيه تغيره..


انا اشوف انها تكلم محامي وتسال
اتوقع انهم يقدرون يطلقونها منه اذا اثبتت لهم انه يسبب لها ولعيالها الاذى
وتشوف وضع العيال اذا بتقدر انها تاخذهم معها
يعني بالعربي تشوف حالتها بشكل عام لو صار الطلاق..

او بدل ماتقنع بالزوجه الثانيه خلها تقنعه بالطلاق
اصلا لو تطلقت غصب عنه بيدفع النفقه...وهي تحاول انها تدبر حالها بمصدر دخل ثاني
والله ان حالة التقشف هذي انها احسن من حالة الرعب الي عايشه فيها هي وعيالها
لا وفيه بنت ضعيفه مالها ذنب بتبلونها به :( يمه عسى ماكون انا هههههه :D


الله يكون بعونها ويفرجها عليها :(

[أحلى الغيد]

أفضل حل من وجهة نظري تكلم مستشار أسري

أعرف سيدة اتصلت على مركز بن باز الخيري بالرياض وتكلمت مع شخص تقول جدا متفهم ويسأل وماسألها اي معلومات شخصية مثلا الاسم وكذا

وتناقش معها في مشكلتها باريحية تامة وأقنعها بالحصول على الطلاق وبشدة وأنه الحل الأمثل لحالتها

وراحت المحكمة وحصلت على الطلاق وأبنائها كمان


القصة السابقة ليست مثال بالطبع لكل مشكلة ظروفها الخاصة طبعا



الرسالة التي اوجهها لها انها تتصل عليهم وتأخذ استشارة منهم او أي مركز آخر

طبعا تتصل على مركز أسري مو أي شخص او شيخ لا شخص يكون متخصص وفاهم


فيه مركز المودة بجده برضوا الاتصال بهم عن طريق الهاتف وناس يحلون المشاكل بكل سرية وكذا

رقم مركز المودة للاستشارات الاسرية 6716655 (02)


رقم مشروع بن باز الخيري 012297777



http://www.alzwaj.org


إذا افترضنا ان امكانية الاتصال معدومة بالنسبة لها او صعبة ممكن الاستشارة عن طريق الموقع

موقع مركز المودة


http://www.almawaddah.net/contactus.html



قرأت ان هناك قرار اجبار الزوج على النفقة باقتطاع جزء من مرتبه الشهري وتحويله لحساب الزوجة ;)

حسب علمي انه متداول ولم يتم اقراره بعد:(


الله يوفق الجميع يارب ولا يخيب لها رجا ياربbp039

[حارقتهم]

؛




الحين لو مطلقه من اول ماشار عليها ابوها مو افضل لها؟
ياويلها من الله جنت على عيالها بزعمها المرأه المسكينه الصابره pb192

بعض الحريم عندهم قدره خارقه على تحمل كل اشكال الالم نفسيا وجسديا pb030 ولا ابطل رجال يقدر يصبر يومين لو كان بوضعهم..

[TR~tr]

صعب الطلاق !!
اذا بيخلي البنات عنده بيعقدهم زياده على الي هم فيه
ممكن اذا اعرس ترتاح منه نفسيا ويفك عن البنات

الله يكون بعونها ويفرجها لها

[نديم]

بائعة الفصفص انا لله وانا اليه راجعون ياكثر هالبلاوي ربي يعينهم على بلاوهم
الطلاق لاتفكر فيه لانه من الواضح بعد وفاة والدها اخوانها سلبيين وصاديين عنها
الحل مالها الا تلفت لبناتها وعيالها وتجتهد في اصلاح احوالهم باللي تقدر عليه وعسى الله يعوضها فيهم
واما زوجها فجبلته سيئة فتحاول ماتتصادم معه حتى لايضرها اكثر

[نملة فسفورية]

ياقلبي الله يكون بعونها هي وبناتها :sm1:

ياربي شلون صبرت عليه :( .. ؟

والله أنا أشوف انها لو لجأت للقضاء تردد ياليل ماطولك :sm1:

والله مايخليها هو من غير شي مجننها هي وبناتها كيف لو اشتكت عليه ؟ :eek:

وصعبه تترك بناتها وتطلق :sm1: ..

الحل مثل ماقالوا الأعضاء يتزوج وحده ثانيه عشان تفتك منه شوي ويحل عنهم :mad:

أو انها ترسل مشكلتها للذوي الخبرة مثل سلمان العوده وغيره وتشوف وش يقولون لها ..

الله يكون بعونها ويصبرها على اللي هي فيه :sm1:

[L.7.N]

الله يعينها يارب
مسكينه والله مره كسرت خاطري
يمكن الزواج ما يفك من ازمته
اخاف يزيدها..
الله يصبرها بس

[حـلـم تـحـقـق]

مساء الخير ،

كان الله في عونها ،
بودنا أن نستدرج في إستعراض المشكلة
ولكن يبدو إن المحور الأساسي للمشكلة
ليست صاحبة الشكوى وإنما زوجها
ولاينفع أي إستعراض او محاولة
لحل المشكلة عن طريقها هي بشكل
ودي .

ولكن بإمكانها الأستعانه بوحدة الحماية الأجتماعية
في وزارة الشؤون الأجتماعية ، تتصل عليهم وتشرح
لهم السالفه من إلى ، حتى لو هي طفشانه منه نهائياً
ممكن هم يجون يأخذونها هي وأولادها وبناتها ويسكوننها
إلى أن يُبت في وضعها ، من جهات الأختصاص .


بالتوفيق يارب

[بائعة الفصفص]

الف شكر لكم على التفاعل والرد

الظاهر مشكلتها مثل المرض المستعصي ماله علاج ويستمر في الانسان الى ان يقضي عليه

بعد آخر مشكله وبعد شتائمه وهمجيته لدرجة انها انحرقت بالزيت 00كانت تقلي بيجيها ظيوف وهو حايسهم ويصرخ عليهم ومن الارتباك (طش)الزيت عليها وهو يقول وقت صراخه تستاهلين الله انتقم لي منك:eek: قالت حسبي الله ونعم الوكيل وشوي الا هو طررراخ زحلق:sm17:

المهم انها ضغطت على نفسها واستقبلت ظيوفها برغم حرارة الحرق وبعد ماطلعوا بكت الى ان صدعت:sm1:

المهم انها اتصلت على اخوها وقال خلاص اجي اخذك بعد الامتحانات ونتفاهم معاه واحنا عارفينه من زمان بس لانك ماشتكيتي ماتدخلنا

المهم الاخ هديت اعصابه رجع يرضيها (طبعا غصب عنهم يرضون مو بكيفهم) المهم يقول ماحصل الا خير وعادي قالت والحرق اللي انحرقت قال انتي اللي حرقتي نفسك:( قالت خلاص تزوج قال لا مابتزوجpb093وهو دائما يقول انقلعي علشان بتزوج وبجيب واحده تربيك وتكسر راسك وبطردك

وقال لاتدخلين اهلك بيننا واذا تدخلوا انتي طالق 00هذا وهو يراضيpb036
المهم هي محتاره ماتدري تدخل الاخوان والاقارب ويمكن يطلقها وياخذ بناته 00او ترجع تمشي الحال مع انها عارفه انه بيقلب عليهم بعد فتره بسيطه وبتخسر وقفة اخوها اللي بس مأجل التدخل علشان الامتحانات وبيسحب نفسه من موضوعها تماما
المهم انه انسان مزاجي وقاطع رحم درجه اولى وهي بين نارين

[الافــــلاجــــي]

لا حول ولا قوة إلا بالله
انا في حالات الزواج الوم الحرمه في المشاكل الي تحصل
لانها هي بإمكانها تعز اهلها وتعز نفسها قبل كل شي اول تترك الحابل على النابل
يالغاليه خويتك حاليا مهما يصير قد يكون متأخر بس التأخر افضل من يتم الوضع على ما هو عليه
الابتعاااااااااااد الابتعاااااد عن زوجها هو الحل الوحيد ولو لفتره ما اقول طلاق ولكن الفتره تطول شوي يحس بالخطأ الي صار
مفروض من البدايه ما رجعت له ومسأله انه يمكن تعدل وضعه ما اعتقد بيتعدل بيوم وليله ما اعتقد بيتعدل بدون موقف قوي
لو في البدايه سمعت كلام ابوها وجلست افضل بكثير تعالج الخطأ من بداياته ولكن حاليا الابتعاد اشوفه افضل حل ولو لفتره لين يحس بخطأه

ومسأله طلاقه في تدخل الاهل لا تدخل اهلها ولكن تبتعد اهي عنه بدون تدخل الاهل لا يكلمونه اخوانها ولا شي متى ما تغير يجيها :) وإذا اهو كلم اخوانها يوضحون له الاخوان بالمشكله
والله يهونها عليها يارب

[خفوق]

سلمي لي على القضاء اذا اخذ لها حقها منه

هذي مالها الا تفرش سجادتها و تصلي اخر الليل و تدعي ربها يفرج لها وينتقم لها منه

ولا هذا ماله الا موت يضفه لان مايقواه الا ربه

[e7sas 6flah]

موقف صعب وعشرين سنة مو شوية..
الله يصلح حالها ويهدي رجلها ويخليلها عيالها...

[ميرندا برتقال]

ليتها تتطلق وتفتك منه عالأقل البنات مايتعبون أكثر والعيال يعيشون طبيعي

[z3lan]

الحل


تقتله وهو نايم وهي تنقص بعدها بشهر والبنات يتزوجون شيبان والعيال يتاجرون بالمخدرات :d
والله ياعليكم حلول مدري وش تبي


اذا تطلقت منه اخذ بناتها وعيالها ورماها لاخوان ماراح يسالون فيها
الحل تصبر وتتحمل عشان بناتها وعيالها .. ويصلح لها الله واحد من العيال يعوضها عن اللي صار كله

[امونه53]

الصلاة والاستغفار والدعاء هو العلاج
من ناحية اخوانها راح يتقبلونها الشهور الأولى بعدين بيملون لأنها ام 7 عيال

مالها الا تكمل صبرها والله يشفى زوجها من مرضه

[تغيرت ياقلبيـ]

الله يرحمه ابوي كان عنده بعد نظر
اشوف انها اجرمت بحق نفسها وعيالها
يضربك ويشمتك وترجعين له
وش هالعشية عشان عيالك تتحملين كلش شئ
ضرب واهانة وتكرهين نفسك
ابدن مو حل ولازواجه من ثانيه كمان حل
الحل الطلاق وتاخذين عيالك
اتوقع واحد بطبعه ماراح يتحمل عياله
زين بس تحمل نفسه مالت عليه
>> اتضايق لمن اشوف مثل الحالات وسلبية المراة
بالتعامل معها خاصة انها تقدر توقف من البداية عند حده
ولاتسمح له بالتجاوز معها
الله يفرج كربتها يااارب

[احلى من العسل]

الله يعينها ... ويفرج همها .. من جد لو قصرت السالفه من البدايه ..على حياة ابوها الله يرحمه..

لكن لعل قصتها هذي تكون عظة وعبرة لغيرها

من البنات اللي يحسبون السكوت عن حقهم افضل حل..

يا عمري على هالعيال والبنات ..احس انهم يتمنون يموت ابوهم اليوم قبل بكرة..

ماينلامون.

[بائعة الفصفص]

الله يجزاكم خير جميعا على مشاركتكم




الحل


تقتله وهو نايم وهي تنقص بعدها بشهر والبنات يتزوجون شيبان والعيال يتاجرون بالمخدرات
والله ياعليكم حلول مدري وش تبي


اذا تطلقت منه اخذ بناتها وعيالها ورماها لاخوان ماراح يسالون فيها
الحل تصبر وتتحمل عشان بناتها وعيالها .. ويصلح لها الله واحد من العيال يعوضها عن اللي صار كله



الخوف انه بناتها وعيالها تتدمر حياتهم بسبب هالاب
لأن البنات تقريبا مصابات بحالات نفسية بنسب مختلفة

والأولاد تخيلوا احيانا اذا عصب على ولده ابو 10 يضربه ويفتح باب الحوش ويطرده ويقفل الباب:sm1:

[( كرامتي عاليه)]

هذا الي ربي كتبه لها
بس ياحرام عيالها احس فقدو طعم ان الواحد يعيش مع امه وابه واخوانه يضحكون مع بعض يبكون مع بعضهم
ربي ابدلهم خيرا
ربي ابدلهم خيرا
ربي ابدلهم خيرا

[pinkiah]

الله يكون بعونها ..:( .. يارب ساعدها pb189

[رَوّنق]

آه بس :(
عسى الله يكون في عونّهم ,, !!

[Free !]

مشكلة والله !
أنا من رايي الشخصي أنها تحاول تاخذ عيالها أو تروح للمحكمه !!
والمحكمه رآآح يطبقون شرع الله ورسوله !!
وهم أحق بذلك !!

دمــــتِ

[علوش ريدفيلد]

الله يعينها ويهدي زوجها

المفروض انو من البداية تطلب الطلاق

لان هذا وحش وجع يوجعهتحمست

[7dk hena..!!]

لا حول ولا قوة الا بالله :sm1:

الله يكون بعونها :)
فعلا تاخرت في قرارها الحين بس الشكوة لله :( تحاول تدور لها على وظيفه قبل تفكر بالطلاق عشان تضمن اي شي يوكلها ويعيشها لاني ما اتوقع من زووجها انه بيصرف عليهم

تحياتي...bp039

[O0VIP0O]

سلخير ....انالي علاقات في هيئةحقوق الانسان وفي أتم الاستعداد بما أقدر عليه وأجري على الله ..ويا قوي فيه اللي أقوى منكـ يالله قلوب فاشية من البعد عن الله ..استغفر الله عدد الحركات والسكون