سواد يكسو قلب رجل < ارجو المشاركه > [الارشيف]

z L e T

12-06-2008, 20:09

السلام عليكم ورحمة الله وبركاته

مساء معطر بالكادي للجميع :)bp039

راح اتكلم بمشكلة احدى زميلاتي باللهجه العاميه بعيدا كل البعد عن التكلف ولأنه اسهل لي في سرد تفاصيل مشكلتها علّ الله ان يبدل حالها الى الافضل وجميع المسلمين والمسلمات

تحكي لي زميلتي مشكلتها وطلبت مني ادلها على حل وقلت في نفسي ان اعضاء الاقلاع ما راح يقصرون بالحلول الممكنه وان شاء الله ان اراءكم واقتراحاتكم لها تفيدها باذن الله اترككم مع احداث قصتها باختصار :

هي متزوجه ولها ما يقارب السنه ونصف ودايم يصير مشاكل لها مع زوجها بس ترجع المياه لمجاريها وقبل فتره صارت مشكله بينها وبين زوجها وبعد ما صارت المشكله ارسل لابوها تعالوا خذوا اغراض بنتكم :confused: ,, ابوها جا وسألها قال نروح ناخذ اغراضك قالت ايه دامه هو ما يبي وجودي بحياته روحوا خذوها وطبعا خذوا كل اغراضها وبعد اسبوع من اللي صار جا اخوه يبي يحل الموضوع وترجع المياه لمجاريها شرطت البنت كذا شرط لانها شافت اشياء مع زوجها لا تسر لا عدو ولا صديق < طبعا هي بعد ما ارسل لابوها رسالته علمت ابوها بتفاصيل حياته وانه زين جت منه:( >

بعدها باسبوع تقريبا اتصل زوجها وكل من الثاني جلس يطلع اللي بخاطره طلب منها تكذب الاقاويل اللي قالتها لابوها عنه وو وو قالت له ابشر من عيوني بس ارجع معززه ومكرمه وماله داعي ترفع صوتك ع النازله والطالعه رد عليها بانه موافق وطلبت منه انه يدحل ويسلم ويعتذر لأهلها لانه غلط عليهم بالكلام وهي تكلمه لكن هو رفض يعتذر لاهلها وربطت مصير رجعتها له بانه يدخل يسلم على اهلها < مثل ما دخّل ابوها بالمشكله وارسل الرساله لازم يرجع يطلب رجعتها من ابوها > وياخذها معاه وهي لها عند اهلها ما يقارب الشهر او اكثر الحين pb036

واليوم صار بينها وبينه رسايل هو يحاول انها ترجع وهي ما عندها مانع مقابل يدخل ويسلم على اهلها اخرتها عطاها مهله ثلاث ايام ترد له فيها اذا بترجع او لا وسلام على اهلها ما طرى له يسلم ؟!!

وعلما بان معاها طفل من زوجها :confused:, وبرضو اهلها رافضين رجعتها لان عدم دخوله وسلامه عليهم فيه اهانه لكرامتهم وكرامة بنتهم ولو انه شاريها مثل ما يقول كان تنازل ودخل وسلم :rolleyes:
وشكله من رسالته اللي معطيها فيها مهله تفكر بالموضوع انه اذا ما جاه رد بيطلق :confused:

اللي ابيه منكم وش تنصحونها فيه ترد على رسالته بعد ثلاث ايام والا تطنشه ولا كأنه موجود بحياتها لان هي تشوف قدر اهلها عنده من قدرها هي او او او او عطوني حلول

انتظر ردودكم بفارغ الصبر bp039

koogak

12-06-2008, 20:16

ياليت تكبرين الخط شوي أختي

EMILY

12-06-2008, 20:20

أختي ترا الخط صغييير>>>نسخت الرد بالوورد

بالنسبه لمشكلة صديقتك ..صعب..صعب ننصحها برأي...
ماعندي الا قول الله يوفقها بالقرار اللي مايضرها

amdady

12-06-2008, 20:21

الخط صغير وانا اخوك
غير كذا المشكلة فيها حلقات كثيرة مفقودة ..

بلّى أنا

12-06-2008, 20:44

المشكله اذا الزوج مااحترم اهل الزوجه.. وماشاف ان لها اهل او سند.. داس على رقبتها..

المشكله مب سهله؟؟ اهلها في كفه .. وحياتها مع زوجها في الكفه الثانيه..

ليش ماتستشير احد معروف بحكمته ورجاحة عقله.. لو مثلا من الاستشاريين في الحياه الزوجيه

او شيخ معروف بأراءه وحكمته..حتى لو من عايلتها.. بس تكون ضامنه هالشخص.. يعني انه

يشور عليها.. ومايدخل ومايفضحها ويحفظ السر..

او انتي سوي بحث.. عن اسماء مشايخ وابحثي عنهم .. اذا عجبتك ارائهم دوري ارقامهم..

كان ودي افيدك اكثر..اهم شي ماتنسى الإستخاره..

الله يصلح شانهم..

z L e T

12-06-2008, 20:56

الخط صغير وانا اخوك
غير كذا المشكلة فيها حلقات كثيرة مفقودة ..

هي مشكلتها برجعتها لزوجها ترجع له بحكم انه ابو الطفل اللي معاها واهلها فتره وبينسون مثلا ؟!! خصوصا ابوها موب راضي لرجعتها بدون ما يدخل الرجال ويسلم ويعتذر من الكلام اللي قاله :confused:

او انها ترضي اهلها وزوجها ان كانه يبيها ومتمسك فيها على كلامه ما راح يتخلى عنها وبيجي يوم ويسلم ويعتذر

بس هي تفكر بالمهله اللي اعطاها اياه تفكر ما تدري هي ترد عليه او تطنشه الين يطيح اللي براسه ويعتذر

أو انه ناوي على حاجه مهيب كويسه وخايفه

z3lan

12-06-2008, 20:57

z L e T

12-06-2008, 21:09

ياخي اعتذر لاهلها و خذ زوجتك وولدك .. عيوننا اوجعتنا ترى :D

لحظه ارمي العدسة المكبره وارد رد توضيحي << الطنطاوي :D

المفروض على الزوج انه فعلا يدخل ويوضح لاهل زوجته انه متمسك فيها وانه تزوجها عشان يحطها فوق راسه ويوعدهم بانه راح يعيشها في حياة تليق فيها وانه ندمان على كل تصرف مشين بحقها

والمفروض على الست هانم ذي اللي من اصغر مشكله طارت للجوال تكتب رسايل لابوها وتكشف اسرار بيتها .. انها تعرف ان هالمشاكل ذي في كل البيوت وان التعامل مع هالمشاكل يكون بالصبر والنظرة لمستقبلهم ومستقبل اولادهم

كش عليكم انتم وجيهكم وجيه زواج اصلا :D

البنت ما حكت لابوها شي الا لمن ارسل زوجها رساله لابوها وقال تعالوا خذوا اغراض بنتكم يعني معاد ابي بنتكم هي لكم

ويوم بغى الحين يردها يقول ميدها اهلك مالهم دخل بحياتنا ومشاكلنا < يعني يوم صارت مشكله بينه وبينها راح يدخل ابوها بالسالفه ويرسلّه رساله ويوم بغى الصلح اهلها مالهم دخل ؟! >عذره انها اذا تبيه بتروح معاه وماله داعي يعتذر لاهلها < والواضح من رفضه انه يدخل بيت اهلها قاطعه وجهه من فعايله مع بنتهم واللي سواه فيها لانها بالسابق مخليته ملاك بس تعبت وهي تكبت الين جا الوقت اللي انفجرت فيه وكله من حصاده هو pb036

وما فيه احد كامل كل ابن ادم خطاء وخير الخطائين التوابين

بلّى أنا

12-06-2008, 21:14

بس ترى مو شرط تتبع راي ابوها..بعض الأباء عنيدين..واحيان العصبيه والضيقه تعميهم..

والزوج ماعطاها هالمده الا ونيــّته رديّه.,,ومو بعيده يقول هي مب اعند مني ..

والرجال بجميع الأحوال مو خسران شي.. (اقصد بنظره).. يعني لو طلقها يمديه يتزوج

ولو بغى يقهرها.. بياخذ ولدها,,

اعتقد ترجع له.. وتشوف اذا هو تعدّل خلاص مافيه مشكله,,

يعني يمكن هو مايبي يعتذر لأهلها..(يكابر)..

يعني انهم مشّو كلامهم عليه,,

يمكن مع الوقت يلين راسه ويمشي الوضع بدون اعتذار,, يعني بأقرب مناسبه يمكن يجي ويسلم,,

ويصير الوضع عادي.. بس تحط ببالها.. هل هي مستعده للطلاق.. لو عندت وقالت ماعلي منه وطنشته

لأن الوضع ماظنه يحتمل التطنيش..لأن الرجال مصيبه مع العناد..

Mَsْhَaْ3ِRْ

12-06-2008, 21:16

اللي ابيه منكم وش تنصحونها فيه ترد على رسالته بعد ثلاث ايام والا تطنشه ولا كأنه موجود بحياتها لان هي تشوف قدر اهلها عنده من قدرها هي او او او او عطوني حلول

ممكن اسألك انتي ؟
هل البنت طلبت حل ؟ ولا انتي تبين حل عشان تقولينه لها ؟

z L e T

12-06-2008, 21:20

z L e T

12-06-2008, 21:24

ممكن اسألك انتي ؟
هل البنت طلبت حل ؟ ولا انتي تبين حل عشان تقولينه لها ؟

لو ما طلبت مني حل كان ما حكيت لكم مشكلتها وهي بناء على رغبتها :)

هنديه حليوه

12-06-2008, 21:33

صرااحه الله يعينها .. :(
زوجها غلطان .. :(
وربي مالنا الا ندعي لها ..
طيب زوجها ليه راافض يدخل ويسلم وينهي هالمشكله .. !
ياربيه الله يهديييه .. :)

mrs.dodo

12-06-2008, 21:36

bp039

شوفي ياقمر انا حطيت نفسي بمكانها بالضبط و بقووولك رايي بهالموضوع pb036

من البداية ربطها لأهلها بموضوع رجعتها غلط واكبر غلط سوته :sm4:
وهالشي مو يعني انها تنزل كلمه اهلها او احترام اهلها عنده لا بالعكس
هي تقدر تخلي زوجها يحترم اهلها ويحشمهم حتى لو هو مايشوفهم او بينهم تتشات :rolleyes:
دام هي وزوجها تفاهموا بالموضوع الا نقطه انه يسلم على اهلها واهلهامصرين على انه يجي يسلم عليهم طبعا اصرار الأهل اتوقع 70% جاي من انه مايبون يكسرون كلمتهم و 30% استرجاع لكرامتهم وكرامه بنتهم...!!مع ان هالشي محد يقدر يسترده الا الزوجه pb024

انا بنظري ان هي البنت لوحدها تآخذ قرار بهالموضوع بعيد عن اهلها وعن اي احد يتدخل بهالموضوع
خاصة ان بينهم ولد واللي باين من كلامك ان البنت تبي ترجع خلاص بس الرفض جاي من اهلها
هذي حياتها والأفضل يكونون الأهل بعيدين عن هالموضوع مهما كان حجمه
لأن مافي اي شخص بهالدنيا راح يحس بأحساسها او راح يتضرر من القرار لو كان نقتف الا هي خاصه ان في رابط بينها وبين زوجها

سووو ,,اذا تبي ترجع لزوجها تحاول تتفاهم مع اهلهااو تدخل بالموضوع احد من كبار العائله معروف بكلمته مثلا جدها او اي احد كبير وله كلمه وتفهمه الوضع وهو يتفاهم مع اهلها بوجودها
وتجيبها لهم بطريقه ممكن لا مو ممكن اكيد بيجيها رفض بالبداية بس يحاولون بس اهم شي بدون ماتعلم زوجها بأنها اقنعت اهلها او جابت لهم طاري او دخلت احد بالموضوع لأن هالشي مايخص الزوج ولا كل شي ينقال للزوج ولا من مصلحتها تقوله pb093

وبالنهاية لازم اهلها يتقبلون الموضوع لمصلحه بنتهم
حتى لو جاها زعل من اهلها او انهم بينوا انهم مو راضين عن هالقرار بيرضون بالأول والأخير بنتهم هي ونو واي يكبرون السالفه عليها

طبعا هالحكي بناءا على انها هي تبي ترجع له بشروطهاpb036
وطبعا هي بأسلوبها وكلامها معه تقدر بسهولة تسترد كرامتها او وت ايفر الشي اللي حست انه تمادى فيه

بالتوفيقbp039

آلشيخه ألفت

12-06-2008, 21:58

انا اشوف انها تعطيه فرصه يثبت انه شاريها

واذا رجع لحركاته ما حتكون المره الاولى اللي يصير فيها مشكله كبيره ...

يعني بيكون حجتها قويه في المره الجايه وانها عطته اكثر من فرصه يبين حسن نيته .. بس هو ما يستاهل

من رايي لو انا مكانها بتنازل حاليا وابين له اني شاريته رغم معارضة اهلي .. واذا هو ماقدر هالتنازل والله
معليـــــــــــــــــــــــــــــش
" اللي خلقك يخلق مليون غيرك و احسن منك ولو انك رجال كفو كان تقدر التضحيات :) "

بزوه

12-06-2008, 22:02

طبعااااا تطنشه وتطنش مهلته لان هالحركه هي الفيصل بين احترامه لها والا اهانته لها طول عمرها

شوفي الرجال مهوب جاد في تنازله عنها لانه شوفي راح يرسل اخوه يصلح الموضوع ويبيها ترجع له
بس المهم انها تتمسك برايها وتعطيه : اقنور:rolleyes:
وبيجي يترجاها ... وان راح تخليه يروح
ما منه خير اللي ما يحشم اهلها وش تبي فيه ؟؟
هذا موقف مصيري يا تقدر تنتصر للعلاقه وصلاحها
والا انها بتجلس طول العمر على نفس الوضع السابق

Serenity

12-06-2008, 22:06

ترجع ونص ومليون كمان..

هو صح غلط في الاول ودخل اهلها بينهم
وماقصروا هم وسووا اللازم مع بنتهم قدام زوجها..

الان هو بيحاول يرجعها واعتذر لها عن خطأه.
.وش دخل اهلها..صح غلط فيهم بس هو اعتذر لها
مافي داعي تكبر الموضوع وتصر يدخل لهم..
وصدقيني مو معناته لو تنازلت ورجعت له انه باعت اهلها عشانه!!

خليها ترجع له والله يبعد الشيطان عنهم..وبعدين اهلها مارح ينفعونها مين ماكانوا وهي معها طفلها..كلن رح يكون مشغول بحاله...هي مالها غير زوجها...

هل فكرت لمن يكبر طفلها وش بترد عليه؟؟
لو طفلها كبر وسأل ليش ابوي طلقك..وش بتجاوب؟؟عشان مارضي يدخل لاهلي؟؟!!..انا لو مكان طفلها ابد ماارح اسامحها انها تحرمني من ابوي عشان هالسبب!!

خليها تتعوذ من بليس وترجع له..ولو صار شيء لاسمح الله وقتها يدخل اهلها وترجع لهم ..هم موجودين لها في كل وقت لكن هو مو باقي لها كل وقت ...

وليتها كانت رجعت من قبل لايعطيها مهلة 3 ايام.

\\

بعد التعديل

تعليق على بعض الردود من دون ذكر اسماء..

احترم وجهة نظر كل واحد يقترح انه مو من كرامتها ترجع له وانه اهانه ومدري وشو..
احترم انه كل انسان له كرامه..لكن في مسألة العلاقه بين زوجين..لو كل واحد حط في راسه لأ كرامتي ماتسمح لي صدقوني مارح تعمر البيوت..الزواج لازم يكون فيه تضحيات من اي من الطرفين عشان يستمر هذا الرابط ولا بينحل !

رجول حرفي

12-06-2008, 22:14

الله يصلح حالهم يارب

alhilaliah

12-06-2008, 23:57

الله يصلح حالهم يارب ..
بس بكل صراحه .. اذا هو يهين اهلي ..
ويتلفظ عليهم ..
مستحيل اجلس عنده .. اذا هو رافض انه يدخل ويسلم على اهلها ..
تحقره ..
ومستحيل يطلقها صدقيني ..
هو يهددها بس ..
اذا هي تبيه وماتقدر تعيش بدونه وبتتحمل نتايجه قرارها
ترجع معه ..
لكن اذا بتفكر بأهلها .. وبكرامتها ..
ماترجع له أبد ..
لان اهم شيء كرامه البنت واهلها ..

الله يصلح حالهم يارب ..

فشفاشه منحاشه

13-06-2008, 00:31

صرااحه الرجال بين انه ماعنده نية يتعدل
لان من أسلوبه وااضح انه ماعنده في احد لا هي ولا أهلها
وش اللي اجل ثلاث ايام كنه مان عليها وقسم
يعني معليش هي ماطلبت يعتذر سلام على الاقل يعني طول عمره ماراح يدخل
يسلم زين منها اللي متحملته وراضية ترجع معه وهو فوق كل هذا يكابر
وكنه ماسوى شيء ولاحط اعتبار لطلبها على الاقل بين لأهلها انك شاريها وانك
نادم على اللي صار مهوب كنك مغصوب ...

فيه بعض الرجال يكابرون واتوقع انه من هالنوع يعني لأنها قالت شرط
رجعتها كذا ماراح ينفذه والا الشرط عادي ولا فيه شيء
وبيقدر يسويه من غير ماتطلبه اتوقع بس العنـــــــد

على العموم الله يصلح حالها ..ورأيي لها انها تحاول تبين لها ان هالطلب مو
شرط طلب عادي لان بعض الرجال عندهم حساسية من كلمة شرط

هذيـان

13-06-2008, 01:41

شوفي من البداية ماقدرها حتى هو بيرجعها ماحسسها بقيمتها
أسلوبه فظ معها..وما احترم أهلها (واحنا ماندري فيه بينه وبينهم شي)
لكن احترامك لهم من محبتك وتقديرك لشريكة حياتك..
وبعدين انتي قلتي بعد اللي شافت منه اسأليها قولي لها تقدرين تتعايشين طول عمرك
اذا رجع يتصرف معك بنفس الطريقة الأولى خلي تحط نفسها أمام واقع رجل تعدى سن البلوغ
والتغير الجذري في طبعه وسلوكه شبه مستحيل..
اذا كانت ماتقدر.. تنفصل عنه بعدما تستخير ربها ومو أول وحده تنفصل عن عيال
يتبهذل واحد ولا عشره..
رأيي متشائم بعض الشيء واعتذر لكن لازم نقرب الواقعية بدل العواطف..

لانها شافت اشياء مع زوجها لا تسر لا عدو ولا صديق
أنا ماعندي فكرة ايش سوى فيها..
لكن لو بعرض لك الاشياء اللي أفضل ان الزوجة تنفصل عن زوجها اذا شافت منه مثل التصرفا..
الضرب..الخمر..ترك الصلاة..الشك..هذي ممكن بصعوبة تتعايش معها وتأثر على نفسيتها
وحده قريبة مني لها 6 أطفال وسلوك زوجها ماتغير يسكت شهر ويرجع يضربها هي وعيالها ويشك فيها ويشرب مؤخراً (الله يفتح على قلبه)سألتها لو رجع الزمن تتطلقين قالت ايه..هي أم كويسة لكن تصرفات زوجها انعكست على أطفالها بشكل سيء صاروا الأقارب يناظرونهم وكأنهم مو متربين وحظها ماجابت ولا بنت عشان ماتتعذب مع أبو زي هذا مثل هذي النوعيات صعب تتغير واللحين صعب الانفصال مو مثل لو كان طفل واحد..
اذا كانت موجودة فيه صفات زي كذا تنفصل بعدما تصلي استخارة ان شاء الله20 مره أهم شي توصل لقناعة
قبول أو رفض..
أما الكلام واختلاف وجهات النظر وسوء السلوك يعني من النوعية اللي ترمي الكلام
واللي يحقر هذي ممكن تتعايشين معها اذا عندها طول نفس..
بس أعيد وأكرر الرجل لن يتغير جذرياً..
دعواتي لها بزوج صالح وتوفيق من رب العباد..
سلامي..

لو تحكي الدروب

13-06-2008, 03:31

طيب وش سبب الزعل ,,, واذا هي غلطانه وش الغلط ؟ وكيف علاقتها هي بأهل زوجها ؟

اسئلة لازم نعرفها عشان نحكم

تحياتي

Lil Hana

13-06-2008, 06:43

شوفي انا حطيت نفسي مكانها الا كرامة الاب مااحد يدوسها
معليش لا هو رجال عدل و الحياة معاه غبرة لا و بعد غلطته جاي يخيرها pb036
ياترجعين لي غصب عن اهلك يا بطلقك
هذا اصلا مو رجاااال ولا جاته الرجولة pb093
شغله شغل بزران

الغلط راكبه من ساسه لـ راسه و جاي يتفلسف pb131
زي ماعرف يرسل الرسالة لـ الابو و يقله تعال خذوا اغراض بنتكم يجيه بنفسه و يعتذر و ياخذها
و تراه باين انه من جنبها و مو مطلق بس يضغط عليها علشان كبريائه المجروح :sm3:
و بالدليل انه راسل اخووه قبل و يبغاها تقول انها كذبت و افترت عليه
يعني بالعربي ماعنده سالفه بس مايبغا يبين انه غلطان من الفشيلة :sm3:
شكله لما رسل الرسالة مستني الاب يجي يقوله تكفي خلاص ارضى و بنتي الغلطانة

خليها تطنشه و تصفه

R o z a

13-06-2008, 09:02

اول شي الله يكون بعونها ويفرج همها يارب

ثاني شي لو انا مكانها مانب راجعه له :) لانه مستكثر انه يعتذر من اهلي ؟!

الي ما يبي اهلي ما ابيه وموب من زينه اتحسف عليه لو معاي 10 منه ومن كلامك انه اسلوبه زي وجهه يعني بتكون عايشه على الحافه احتمال بعد بكره يتوقح معها ويضفها بعد وترجع لاهلها وموقفها بيكون بايخ جدا منهم
اوكي انت تعزني وتحترمني احترام اهلي من احترامي انا ابيك وانت تبيني ما اختلفنا بس اهلي فوق كل شي ولما تتنازل وتتنازل وتروح الكرامه واهمية الاهل ما بياكلها الا هي
تحاول معه بهدوء وتقنعه وتشوف اسبابه ووجهة نظره ليه ما يبي يعتذر لهم ؟
واخيرا ..
تدعي الله وتستخيره وما خاب من لجأ له وتستغفره بنية الاصلاح بينها وبين زوجها والله يكتب الي فيه خير لها وله ..bp039

نملة فسفورية

13-06-2008, 11:02

زوجها غلطان المفروض يقصر الشر ويروح يعتذر لأهلها من حقهم انه يعتذر لهم ..

وش يرسل رسالة ويقول تعالوا خذوا اغراض بنتكم هذي بلحالها يبي لها اعتذار pb036

وخير مايسلم عليهم اذا هو شاريها يشري اهلها قبلها واذا هو متمسك فيها مايطلق على سلام واعتذار .. هو غلطان والمفروض ماترجع له الا اذا حس بغلطته بحقها وحق أهلها :(

واذا هي قادره انها تشتغل وتعيل نفسها وولدها .. لاترجع له لانه واضح انه بايعها :rolleyes: .. لو متمسك فيها والله يبوس رجلين اهلها بس ترجع له ;) ..

كرامتها من كرامة أهلها الرجال بداله مليون بس الاهل مابعدهم أهل ..

الله يصلح حالهم bp039

ريما بسملعلي

13-06-2008, 16:37

الله يكون بعونها يارب::

والله صعبه ماندري وش نقول //

بس أنصحيها بالدعاء ...

z L e T

13-06-2008, 17:43

طيب وش سبب الزعل ,,, واذا هي غلطانه وش الغلط ؟ وكيف علاقتها هي بأهل زوجها ؟

اسئلة لازم نعرفها عشان نحكم

تحياتي

سبب الزعل عند غرفتها ان اهله يدخلون ويطلعون باي وقت يبون ويوم عارضت وقالت لا يدخلون غرفتي لأن مهما كان فيه حاجات خاصه لها بالغرفه ما تبي احد يشوفها رد عليها بكل وقاحه هذولا اهلي يدخلون ويطلعون من الغرفه متى ما يبون واذا صرتي في بيت ابوك تحكمي !!! :rolleyes:

هذي اساس المشكله واللي صدمها كانت طالعه من البيت وجت بتاخذ غرض من البيت الا تلاقي اخته بالغرفه وتقرى جريده :eek: يعني ما احترموا وجودها معاهم بالبيت وكان هذا سبب مشكلتها

شي طبيعي انها بتزعل بس هو كبر السالفه وارسل لابوها تعالوا خذوا عفش بنتكم < يعني الا يبي يخلي البنت هي الغلطانه :rolleyes: >

وعلاقتها بأهل زوجها جدا عاديه وكافه خيرها وشرها :)

z L e T

13-06-2008, 17:55

قلت لها عن ردودكم اللي تقولون فيها ترجع له وموب لازم يسلم على اهلها قالت لي انه قد صارت كذا ورجعت وانه بيتعدل ولا ربطت مصير رجعتها بسلامه على اهلها وتمادى معاها لدرجة انه يقول اهلك مهوب مهتمين فيك ويبون الفكه منك لأن وجودك مطلقه في بيت اهلك راح يضايقهم ووو :rolleyes:

وكان تقول ممكن يتعدل اذا رجعت هالمره ومعاد نرجع للمشاكل بس اهلها قالوا لها بترجعين له الله معاك ما راح نوقف بوجهك بس لو تجينا يوم تقولين ضربك او سوى لك اي شي يضايقك مالنا دخل فيك لان هاللي يسوونه لمصلحتها وانه اذا فعلا شاري على كلامه بيدخل ويسلم لأنه جاها من الاهانات منه بما فيه الكفايه :rolleyes:

رغم مكالمته لها على حد كلامها انه خلاص ناوي يتغير وكل شي بيصير اوكيه , بس دايم كذا يقول خلاص وكل شي اوكيه ويرجع مثل اول على قولة المثل كنك يا ابو زيد ما غزيت :rolleyes:

الافــــلاجــــي

13-06-2008, 19:08

الصراحه قريت المشكله والله لو انها اختي
كان ما راح اخليها ترجع إلا لما يعتذر لانه اتصل على ابوها وقال تعالو خذو عفشها ما تنزل على الاقل يودي عفشها
والشي الثاني بسحب منها الشريحه أو على اقل تقدير بخليها تفقل الشريحه عشان تقطع الاتصال به
مع احترامي من زوجها ما اعتبره رجال مع اني ما اعرف المشكله ولكن طريقته في تعالو اخذو عفش بنتكم ما يسويها اي رجل حتى ولو اني اكرها وبطلقها مهوب مشكله مصير الايام تحلها كأقل تقدير راح احترمها ولكن ما احاول اهينها وانزل من كرامتها قدام اهلها قبل ما انزلها قدام الناس يعني شوفوني تراني رجال وين العشره الي بينهم وين راحت الايام الحلوه بينهم خلال السنه والنص ؟؟ بكل سهوله تخلى عنها وتناسى الايام الحلوه ؟؟
أنا كشخص ما راح اوافق انها ترجع له وخصوصاً بانها توها في بدايه حياتها وهذا الي فهمتها بان عندها طفل واحد وهذا اول موقف بينهم يكون قوي شوي وهذا الي بيحدد كرامتها الي بيقول ما بين الزوجين كرامه بقول معك حق في الاشياء البسيطه ولكن بنزلها كرامتها قدام اهلها هذا ما اعتقد اي عاقل بيرضاه اما بينيها وبينه بقول تنهضم :)
إذا قطعت وسيله الاتصال بينهم اعتقد يوضح مصيره إذا كان شاريها ولا بايعها وما اعتقد يتخلى عنها إلا إذا كان فيه بلا ولا واحد عنده طفل بيفكر في طفله قبل كل شي

نصيحه انها تحفظ كرامتها وكرامه اهلها ولو اهانتها ذي المره والله ان يتعود زوجها على إهانه كرامتهم وبيكررها مره ومرتين وثلاث :)

على العموم ما اقول إلا الله يوفقها يارب ويصلح بينها وبين زوجها ويسعدها دنيا واخره pb189

لو تحكي الدروب

13-06-2008, 19:12

سبب الزعل عند غرفتها ان اهله يدخلون ويطلعون باي وقت يبون ويوم عارضت وقالت لا يدخلون غرفتي لأن مهما كان فيه حاجات خاصه لها بالغرفه ما تبي احد يشوفها رد عليها بكل وقاحه هذولا اهلي يدخلون ويطلعون من الغرفه متى ما يبون واذا صرتي في بيت ابوك تحكمي !!! :rolleyes:

هذي اساس المشكله واللي صدمها كانت طالعه من البيت وجت بتاخذ غرض من البيت الا تلاقي اخته بالغرفه وتقرى جريده :eek: يعني ما احترموا وجودها معاهم بالبيت وكان هذا سبب مشكلتها

شي طبيعي انها بتزعل بس هو كبر السالفه وارسل لابوها تعالوا خذوا عفش بنتكم < يعني الا يبي يخلي البنت هي الغلطانه :rolleyes: >

وعلاقتها بأهل زوجها جدا عاديه وكافه خيرها وشرها :)

من حقها ماتدخل احد بغرفتها وغرفة النوم لها خصوصيات ,,, وعيب ان الاهل يدخلون ويطلعون
بغرفتها متى مابغو ومن غير مايشاورون ,,, وزيادة على كذا زوجها بصف اهله حتى بالغلط وما احترم خصوصياتها كزوجة ,,,

وانا اقول انها تتمسك برأيها وماترجع للبيت الا اذا دخل واعتذر لأنه هو الغلطان ,,, توضح له برساله او تكلم عليه بوقت يكون هادي ورايق وتقوله بأسلوب ,, اذا انت تحبني وغالية عليك تعال
ادخل وسلم وخذني ,, واحترامك لي يشمل اهلي بعد ,, ايظا تسأله اذا هي مقصره مع اهله
يقولها ؟ ,, يمكن بخاطره شي وماقاله ,, بأسلوبها الحلو والهادي تقدر تعرف وش يفكر فيه وليش
مايدخل وتكون جلسة مصارحه ونقاش ,,, اما صراخ وكلام عالي ماينفع ابد وبيضل متمسك برأيه
حتى لو كان غلط وعارف .

وعلاقتها بأهل زوجها جدا عاديه وكافه خيرها وشرها

ليش كافيه خيرها ؟ معناه مقصره ,,, اذن تسأله وتوعده انها هي بعد تكون احسن من قبل معك
ومع اهلك وبحطهم فوق راسي ,, ( الكلمه والاسلوب الحلو مؤثر جدا )

تحياتي

Lil Hana

13-06-2008, 19:47

ياسلام يعني لما جات على اهله مارضي و قوم الدنيا و قعدها و وصلت انه يطردها من البيت
و بس هو الخايس يجي يسلم على ابوها لا مايبغا
تقولين قبل سوتها كذا مرة علشان كدا مو محشمها و يهددها بالطلاق و عارف انها بترجع

حفظ كرامة اهله و طردك من البيت علشانهم
و انتي قاعدة تفكرين ارجعله و اطنش اهلي pb093
وحدة بوحدة ياحلو pb034

اقعدي بس و كبري المخدة معززة مكرمة عند بيت اهلك
و لا تزعلينهم و تخسرينهم علشان بزر مافيه ريحة الرجولة

مالت على كذا رجال :mad:

هذيـان

13-06-2008, 20:02

سبب الزعل عند غرفتها ان اهله يدخلون ويطلعون باي وقت يبون ويوم عارضت وقالت لا يدخلون غرفتي لأن مهما كان فيه حاجات خاصه لها بالغرفه ما تبي احد يشوفها رد عليها بكل وقاحه هذولا اهلي يدخلون ويطلعون من الغرفه متى ما يبون واذا صرتي في بيت ابوك تحكمي !!!

هذي اساس المشكله واللي صدمها كانت طالعه من البيت وجت بتاخذ غرض من البيت الا تلاقي اخته بالغرفه وتقرى جريده

صدقيني ما أحترمها أبداً..
تحفظ كرامتها أحسن..

ليش كافيه خيرها ؟ معناه مقصره ,,, اذن تسأله وتوعده انها هي بعد تكون احسن من قبل معك
ومع اهلك وبحطهم فوق راسي ,, ( الكلمه والاسلوب الحلو مؤثر جدا )

مداخلة عبدالعزيز إذا تسمح..
كيف تكون مقصرة مع أهله والواضح ماحطوا لها إعتبار وزوجها ما احترمها
وبعدين دائماً الزوج اللي يحترم زوجته عند أهله بيحترمون زوجته ويهابونها
معليش حتى لو ساكنة معهم مايعني يتدخلون بخصوصياتها أبسط شي تكون معه
بغرفة خاصة وحتى هذي مو موجودة..!!
وتبغاها تحط أهله فوق راسها وهو مهين أبوها ولا أعتذر لأهلها يعني تعطيه كرت
يدوس عليها زيادة ويهينها أكثر..وبعدين اتضح ان الزوج بعده مانضج اللي ماعرف خصوصية
الزواج وأهلي يدخلون متى مايبون سلامات..!!
مثل ما تبيها تقدر أهله خل يقدر أهلها وهو ماسواها يعيد ويرجع على طبعه..
ومو كل مره لازم الزوجة تقدم تنازلات لا..
::
حلو ان أهلها مارموها عليه عازين بنتهم خل تطلب اللي ترتاح عليه
شقة بإيجار خصوصية عالأقل ومتأكدة ماراح يبعد عن أهله ويرفض طلبها
لأنه مايتكلم بلسانه بلسان أهله وما استبعد أطراف كثيرة متدخلة بحياتهم الزوجية
بداية بأخوهم والبقية خلف الستار مادام انه فاتح فمه..
::
حل وحيد يتيم تطلع هي وهو بشقة ويتعاهدون محد يطلع سر أو يشكي لأهله مهما
كان السبب لمدة محددة شهر أو أكثر اذا حسوا أنهم ارتاحوا وانسجموا مع بعض
فالغلط من الطرفين من البداية..
::
شكراً

.0البرد0.

13-06-2008, 20:11

بالله هذولي كفو زواج :D

الا غصب يريدون يكسرون شوكة الرجال قدام زوجته ..

والمصيبة موضوع تافه ينحل بطريقه بسيطة .. كبروا السالفه

لا والابو وش دخله بالبنت يزعل ههههههه ياناس من جد لقافه

يااخي زعلت من الرجال لاتكلمه ولا ترفع عليه سلام ربك .. تدخل البنت بالسالفه وتهدم حياتها للللليش؟

لو انها اختي والله لأشيل عفشها واوصلها لبيت زوجها ..

لان الموضوع تافه .. ولان المره مالها الا بيت زوجها .. ماأحد راح يبقى لها الا رجالها

Serenity bp039bp039 ياشيخه انتي عقلك كبير .. هذا المنطق الصح والتفكير الصح .. تحياتي لك

لو تحكي الدروب

13-06-2008, 20:23

مداخلة عبدالعزيز إذا تسمح..
كيف تكون مقصرة مع أهله والواضح ماحطوا لها إعتبار وزوجها ما احترمها
وبعدين دائماً الزوج اللي يحترم زوجته عند أهله بيحترمون زوجته ويهابونها
معليش حتى لو ساكنة معهم مايعني يتدخلون بخصوصياتها أبسط شي تكون معه
بغرفة خاصة وحتى هذي مو موجودة..!!
وتبغاها تحط أهله فوق راسها وهو مهين أبوها ولا أعتذر لأهلها يعني تعطيه كرت
يدوس عليها زيادة ويهينها أكثر..وبعدين اتضح ان الزوج بعده مانضج اللي ماعرف خصوصية
الزواج وأهلي يدخلون متى مايبون سلامات..!!
مثل ما تبيها تقدر أهله خل يقدر أهلها وهو ماسواها يعيد ويرجع على طبعه..
ومو كل مره لازم الزوجة تقدم تنازلات لا..
::
حلو ان أهلها مارموها عليه عازين بنتهم خل تطلب اللي ترتاح عليه
شقة بإيجار خصوصية عالأقل ومتأكدة ماراح يبعد عن أهله ويرفض طلبها
لأنه مايتكلم بلسانه بلسان أهله وما استبعد أطراف كثيرة متدخلة بحياتهم الزوجية
بداية بأخوهم والبقية خلف الستار مادام انه فاتح فمه..
::
حل وحيد يتيم تطلع هي وهو بشقة ويتعاهدون محد يطلع سر أو يشكي لأهله مهما
كان السبب لمدة محددة شهر أو أكثر اذا حسوا أنهم ارتاحوا وانسجموا مع بعض
فالغلط من الطرفين من البداية..
::
شكراً

هلا اخر طموحاتي ,,, ملاحظتك في محلها ,, وعشان كذا انا سألت كيف علاقتها مع اهل زوجها
واتضح لي ان العلاقه متعكره نوعا ما من كل الطرفين ,,, وكون انهم دخلوا بغرفتها من غير اذنها
وعشان كذا منب محترمتهم وبكفي خيري ,,, هذا مهوب حل عقلاني وانما معالجة الخطأ بالخطأ ,,,

وزي ماذكرت في ردي الثاني,, النقاش الحلو ومحاسبة انفسهم مع بعض بجو هادي ولوحدهم من
غير تدخل الاهل بيوصلهم لنتيجه طيبه ان شاء الله ,,,

Serenity

14-06-2008, 00:31

قلت لها عن ردودكم اللي تقولون فيها ترجع له وموب لازم يسلم على اهلها قالت لي انه قد صارت كذا ورجعت وانه بيتعدل ولا ربطت مصير رجعتها بسلامه على اهلها وتمادى معاها

رغم مكالمته لها على حد كلامها انه خلاص ناوي يتغير وكل شي بيصير اوكيه , بس دايم كذا يقول خلاص وكل شي اوكيه ويرجع مثل اول على قولة المثل كنك يا ابو زيد ما غزيت :rolleyes:

من خلال رده هذا ومن خلال تصرفه في الاول عشان يرجعها واااضح جدا انه نوعا ما ماعنده ثقه كبيره في النفس او انه خايف تتفوق عليه في شيء او انه متردد في حياته..
منيب مستشاره نفسيه عشان احلل شخصيته لكن اللي ودي اوصل له هو انه زوجها وردة افعاله معها ممكن هي تحتويه وتتعامل معها ببعض من الحنان والثقه والحب وصدقيني مع الوقت رح يطمئن قلبه هو وتخف المشاكل...

لكن كل مره هو يقول لها كم كلمة,,وهي تاخذها على محمل الجد فهو اكبر خطأ ارتكبته..لأنه وااضح من كلامه بالمرات السابقه انه نوعا ما مايقصد به الا استثارتها وزعزعة الثقه في نفسها ..خصوصا لمن يقول :

لدرجة انه يقول اهلك مهوب مهتمين فيك ويبون الفكه منك لأن وجودك مطلقه في بيت اهلك راح يضايقهم ووو :rolleyes:
صدقيني لو هي تعاملت مع هذي الردود انه اول شيء تتجاهلها وثاني شيء تحتوي زوجها بعطفها وكياستها والاهم من كذا ثقتها بنفسها رح يخف من حدة اللي حاصل بينهم كثير..خصوصا واضح انه فيه ثغره عاطفيه بينهم.bp039

وكان تقول ممكن يتعدل اذا رجعت هالمره ومعاد نرجع للمشاكل بس اهلها قالوا لها بترجعين له الله معاك ما راح نوقف بوجهك بس لو تجينا يوم تقولين ضربك او سوى لك اي شي يضايقك مالنا دخل فيك لان هاللي يسوونه لمصلحتها وانه اذا فعلا شاري على كلامه بيدخل ويسلم لأنه جاها من الاهانات منه بما فيه الكفايه :rolleyes:
غلط غلط غلط واكبر مليون غلط..انهم يخيروا البنت بين زوجها وبينهم.:(:(...هم باقين لها الله يحفظهم كلهم..لكن هو رجال واحد..مو باقي لها.. ممكن ينفذ اللي براسه وبيطلقها وبيشوف غيرها مليون..وهي لاتقول ونا بعد بشوف غيره مليون!...

المشكله مجرد التفكير في انه يالله كرامتي...لأ..مستحيل اتنازل عنها وعن كرامة اهلي..هو مايسوى..فيه منه مليون...بقريح هو واشكاله....الخ
المشكله هالفئه تحسب نفسها قاعده في سوق رجاجيل تنقي منهم بكيفها!!!

الزواج مهوب لعبة يااخوان..الزواج رباط مقدس يحتاج الكثير الكثير من التضحيات :(

هل هي او اهلها فكروا في ولدها؟؟؟؟؟؟وش مصيره؟؟؟؟
وهل فكروا ممكن يحرمها منه ؟؟

هل بجد فكروا في المشكله بكااامل العقل وابعدوا العاطفه عنها؟؟؟ رجاء لمن يفكر احد في هالمشكله يبعد العاطفه شوي ومسألة كرامتي ومهانة ومدري وشو..لأنه مهيب كرامة ذي تطلق عشان هواش بسيط وااضح للكل ..وش بتقول لنفسها بعدها؟؟وش بتقول للعالم؟؟؟ اني تطلقت عشان زوجي يقل لي اهلك مايبوك ؟؟؟
بالله وين العقل؟؟:(

الطلاق مو سهل ياجماعه خصوصا في حالتها وعندها طفل ومشكلتها هينه..:(

وبعدين في هالمشكله احنا نخاطبها هي..لان هي اللي ارسلت المشكله بواسطة صديقتها..مافي داعي يكون التخابط موجه لزوجها..لانه مااستشار احد على الاقل!

ليت يااختي الكريمه صاحبة المشكله تتحلي بالصبر والكياسه في حكمك..وتجلسي مع اهلك بخصوص زوجك وتراضيهم وترجعين له معززه مكرمه..لانه وقتها محد خسران ابد..صدقيني للمره المليون اعيدها لو رجعتي له مو معناته رضيتيه على حساب اهلك..وهم باقين لك الله يحفظهم لك ..لكن لو تطلقتي -لاسمح الله - اللي بيخسر هو انتي ثم انتي ثم انتي ثم انتي...واهلك رح ترجعين لهم وقتها بيراضوك ساعتين وبعدها الكل بيروح لحاله..وتقعدي لحالك بعدها..:(

بتقولين تعبت من الرايحه والجاية وكل شويه تصير نفس المشكله اقل لك احتسبي اجرك عند الله..حتى لو حسيتي تضايقتي وبهذله قدام الناس واهلك رايحه جايه..على الاقل اسمه مشاكل بينك وبين زوجك والبيوت اسرار ومحد خلا من المشاكل..

وبالنسبه لاهل الزوج الوحده ماعليها منهم دام انه زوجها كويس معها بقريح هم كلهم..هي تزوجت الرجال ماتزوجت اهله..في كثيرين من اهل الزوج بيكونوا سبب للمشاكل بين الزوج وزوجته..والافضل الابتعد عنهم او لو مضطره تحتكين بهم تسوي الواجب وخلاص..والله يهدي الجميع

الله يوفقك ويهدي قلبك الى الطريق الصحيح bp039

\\

البرد ،،

يعطيك العافيه على كلامك الطيب bp039bp039bp039

المطمئنه

15-06-2008, 08:34

مازال المسلسل مستمر

اصبري يابنت

وحافظي على بيتك

. rOro .

15-06-2008, 15:57

لانها شافت اشياء مع زوجها لا تسر لا عدو ولا صديق < طبعا هي بعد ما ارسل لابوها رسالته علمت ابوها بتفاصيل حياته وانه زين جت منه >

بعدها باسبوع تقريبا اتصل زوجها وكل من الثاني جلس يطلع اللي بخاطره طلب منها تكذب الاقاويل اللي قالتها لابوها عنه

وعلما بان معاها طفل من زوجها , وبرضو اهلها رافضين رجعتها لان عدم دخوله وسلامه عليهم فيه اهانه لكرامتهم وكرامة بنتهم ولو انه شاريها مثل ما يقول كان تنازل ودخل وسلم
وشكله من رسالته اللي معطيها فيها مهله تفكر بالموضوع انه اذا ما جاه رد بيطلق

اجل يهين ابوي ويقول تعال خذ بنتك ويرفض انه يسلم عليه!!!!!
مو تصرف شخص شاري رجعتها له
واضح ان مافيه خير.. وان كانت المصايب اللي تعرفها عنه ومنطمه يترتب عليها مشاكل مستقبلا لا ترجع له ..
اهلها وراحتهم باقي العمر ابقى لها مليون مره من زوج مافيه من الخير ذره .. ترجع لهم بطفل افضل من انها تنكد عليهم كل يوم والثاني وبكره ترجع باربعه او خمسه
لازم تصر على رايها وتقول تعال سلم على ابوي وحب راسه وخذني والا فارق الله لاردك ! ما عاش اللي يجرح كرامته بسببي!!

هي موظفه والا طالبه والا ايش؟ .. يعني قصدي محتاجه نفقته على ولدها؟ اذا الاجابه نعم ... الله يعينها لانها ماتقدر تتطلق هالاشكال ماتعترف بنفقه ....واذا لا ..نفس كلامي اللي فوق

الله يختار لها الأصلح ويوفقها

. rOro .

15-06-2008, 16:08

soft-rock

15-06-2008, 16:32

من حقها ماتدخل احد بغرفتها وغرفة النوم لها خصوصيات ,,, وعيب ان الاهل يدخلون ويطلعون
بغرفتها متى مابغو ومن غير مايشاورون ,,, وزيادة على كذا زوجها بصف اهله حتى بالغلط وما احترم خصوصياتها كزوجة ,,,

وانا اقول انها تتمسك برأيها وماترجع للبيت الا اذا دخل واعتذر لأنه هو الغلطان ,,, توضح له برساله او تكلم عليه بوقت يكون هادي ورايق وتقوله بأسلوب ,, اذا انت تحبني وغالية عليك تعال
ادخل وسلم وخذني ,, واحترامك لي يشمل اهلي بعد ,, ايظا تسأله اذا هي مقصره مع اهله
يقولها ؟ ,, يمكن بخاطره شي وماقاله ,, بأسلوبها الحلو والهادي تقدر تعرف وش يفكر فيه وليش
مايدخل وتكون جلسة مصارحه ونقاش ,,, اما صراخ وكلام عالي ماينفع ابد وبيضل متمسك برأيه
حتى لو كان غلط وعارف .

إقتباس »
وعلاقتها بأهل زوجها جدا عاديه وكافه خيرها وشرها
ليش كافيه خيرها ؟ معناه مقصره ,,, اذن تسأله وتوعده انها هي بعد تكون احسن من قبل معك
ومع اهلك وبحطهم فوق راسي ,, ( الكلمه والاسلوب الحلو مؤثر جدا )

هذا الكلام الصوووح ..شكرا عبدالعزيز..
اذا اعتذر = حفظت كرامتها وكرامة اهلها وماعاد يسويها .وفنفس الوقت ترجعله..
فيه ردود احيانا ودك تقولين لهم ..اسكتوا ..من دون فايدة بس تعليق يكبر اللي سواه الرجال ويخليه كنه ماعطها من شوشتها ..
تدرين ليه ؟ لان احيانا الواحد ..يرد ويقول والله ماخليه ..مالت عليه ..والخ من هيك آراء..عشانه ماصار له الموقف بحق وحقيق!! يعني وانتي يالحرمة بعد نسيتي العشرة اللي بينكم ..وهالطفل المسكين!..طلاق في سنة ونص ..عجيــــــــــــــب..
كل شي باذن الله يتصلح ..وكل مشكلة ولها حل الا ماندر..وهالمشكلة ابسط من غيرها ..شوفي ياعمري فيه موقع خطيـــــر ..حلو للمتزوجات<==طيب انتي وش دخلك! هع
القائمة عليه انسانه اخطر يمكن لو اقول اسمها عرفتوها ..المهم حلوووووو انها تدخله وتقرا المواضيع اللي فيه ..قمممة في الرقي والعقل ..+ تبين لك شخصية كل رجل وكيفية التعامل معاه ..
نسيت صراحة سياسة الاقلاع ..اظاهر مايمديني احطه هنا صح؟
اذا مايمديني علميني ورسلك اياه برايفت..

والله يوفقها ان شالله للي فيه الخيرة لها..

خفوق

15-06-2008, 16:54

الي مافيه خير تركه خير

الي اخلاقه زفت و طاردها و تعالو خذو اغراض بنتكم و مدري وشو و اخرتها حتى سلام ما يبي يسلم ؟؟

مهوب كفو للبنت

دام انت تشوفها حثاله و لا هي كفو حشيمه و على الطالعه و النازله لاعن خيرها و سابها و ساب اهلها

و فوقها مروح رساله لابوها تعالو خذو اغراض بنتكم

وفوقها يوم جيت بتعدل الامور روحت اخوك يعني ما تنازلت يا صاحب السعاده و جيت بنفسك

و فوق هذا و هذاك ما تبي تسلم و تستسمح خاطر الرجال و بنته الي طلبت منها تكذب نفسها عند اهلها عشانك؟؟

يابنت الحلال

خليها تطلع وراسها مرفوع

الي يشوف زوجته بها الشكل و يشوف ان اهلها ما يسوون حتى سلام ؟

مهوب كفو حرمه

يروح ياخذ له اجنبيه يلعن ابوها و ابو الي خلفوها و تلاحق وراه مثل كلاب الشوارع

و الطيور على اشكالها تقع

لو شاريها عدل الامور بما يجب ان تعدل به

يسوي كل شي عشان ترجع له

لكن هذا؟

مستهتر سخيف مهوب كفو لا حرمه ولا ولد ولاهو كفو حموله طيبه

تسفهه و تحقره حقرة الكلب و بيجي لين عند رجليها

ولا بالناقص فيه و في اشكاله

الي هذا اوله ينعاف تاليه

ترا ما اخذها من الشارع ولا لقى ابوها محرج عليها يوم يسوي فيها كذا

الحياة اذا خلت من الاحترام ؟

ماعاد تصير حياة

هذا مابعد ابدى استعداده للحياة الزوجيه و تبعاتها

على هالاساس ما احترم زوجته

ولا قدر ابوها

ويبي كل شي على كيفه

و اخوه داري انه سفيه عشان كذا جا يرقع له

لكن انا لو منها ما عاد ارد عليه ولا اكلمه لين يجي يحب راس ابوي

ولا يقضب الباب و ينقلع

خله يطس في بليس

الي مثله مهوب رجال ولا هو كفو حرمه

وافلقيني ان تزوج

ما تزوجو الي صاحين والي مايعيبهم شي

يتزوج هالرقله هالسفيه

قولي لها تصفطه على جنب لين يستوي و يعقل

ان عقل زين على زين

و ان ما عقل؟؟

قلعته

هي بدونه احسن

مواريه مهيب مواري رجال اجودي بيسعدها

ΆŁŶαŚМèή

15-06-2008, 18:42

بصراحـه الموضـوع كبيـر مره ..

لو ماعندهـا أطفـال راح يصيـر أسهـل من كيـذا ,,

غلطـان ويتبيجح بصراحـه ,

أنـا رايي من راي أهلهـا ,
الله لايهينـو يدخـل ويسلـم ويعتـذر لهـا ,

ويحطون نقـاط أساسيه
عشـان مو عالطالعه والنازله يغلط ويقول لها روحـي لأهلك

.0البرد0.

15-06-2008, 20:27

سوري على المداخله

بس مو الاب اللي تدخل

الزوج هو اللي ارسل له تعال خذ بنتك وعفشها ... يعني هو اللي دخله ! ..

بعدين هذي بتنه وش لقافه وما لقافه؟ pb036

لا عادي خوذي راحتك :D

ايه هو قاله تعال خذ بنتك .. ما قاله تعال نتضارب انا وانت ..

وبعدين قال له تعال خذ بنتك ما رماها بالشارع ..

بعدين هذي بتنه وش لقافه وما لقافه؟

ايه لقافه وعشرين لقافه ... واذا بنته وش دخله بحياتها الزوجيه

دام انه زوجها رجال يخاف الله فيها ومحترمها ماله شغل فيها .. الا انه يتدخل بخير وبصلح

حتى بالصلح اتوقع ماله شغل لانه بيوضع نفسه بمكان ماله داعي ..

هي خرب بيوت من شويه ... الا من هالتدخل الي مال امه داعيpb093

وحياك ربيbp039

تايد مع مبيض

15-06-2008, 20:42

شوفي أختي .. قولي لها ان اعتذر لأهلها تراه ما سوى شيء . لأن المشكلة إلى الآن ما إنحلت .
سبب المشكلة عبارة عن خصوصية الحياة الزوجية أو غرفة النوم .
خليها هي واياه يحلون المشكلة هذي .. ومتى ما حلوها يجون أهلها في المرتبه الثانية
هو زوجها وطاعته ألزم من طاعة أمها وأبوها
إذا هي تبي تجتث المشاكل من جذورها وترتاح من سالفة أهلك ما يقدرونك .. وأختك تقراء الجرايد في غرفتي
اطلعي لشقه والا لدور .. وصدقيني أغلب مشاكلك بتقل .
لأن معروف السكن مع حمولة يؤدي إلى إستعباد زوجة الإبن إلا من رحم الله

هذا والله أعلم وصلى الله وسلم على نبينا محمد

المسبووهه

15-06-2008, 22:07

من جد شين وقوي عين بعد ..

لاترجع له .. الله لايرده..! وقعدتها في بيت اهلها ابرك لها من مقابل وجهه ..

هذا غير انها ساكنه مع اهله يبيهم بعد يتدخلون ؟ .. والله شي سخيف ويحوم الكبد صراحه .. ! مهما كان .. لازم احترام الخصوصيات ( وبعدين وش هالاهل اللي ماعندهم احترام خصوصيه pb036 ) ؟

وان كانه على ولدها وتقول ابرجع يمكن يتعدل .. فـ قولي لها : ( ابو طبيعه مايغير طبعه )

بس لا ترجع له .. وتتوهق ببزارين ثانين منه الله يحوم تسبده .. واذا على الطلاق بالعكس كل الناس عندهم مطلقات وعندهم اولاد عيشتهم وتربيتهم احسن من اللي متربين عند امهم وابوهم ..

انا مدري الى متى هالبنات يخافون من شي اسمه طلاق ؟! .. اللي مثله تتطلق منه وترمي سبع حصيات ( جمع حصاة ) وراه << قولة امي ههههههههههه

الزبدة .. قعدتها عند اهلها معززه مكرمة احسن لها من انها تنهان عنده هو واهله ..

واللي مهب محترم اهلها مهب محترمها :rolleyes:

هذيـان

16-06-2008, 01:46

شوفي أختي
اطلعي لشقه والا لدور .. وصدقيني أغلب مشاكلك بتقل .
لأن معروف السكن مع حمولة يؤدي إلى إستعباد زوجة الإبن إلا من رحم الله

هذا والله أعلم وصلى الله وسلم على نبينا محمد

ممتازbp039bp039
أعتقد هذا أنسب حل لحد الآن قبل اتخاذ أي قرار مصيري..

حِكَايْه..,,

16-06-2008, 03:51

" القطو الكبير ماينتربى "..

هالمثل أؤمن فيه مليون % من تجربة انسانه قريبتي اقول لك هالقناعه..
ولها نفس تجربة صاحبتك..,
لا اسلوب ولا تقدير من زوجها وبينهم بنت.. وكانت الزوجه عند اهلها عايشه ملكه قبل تتزوجه..
ومن تزوجته وهي عايشه بِذل مابعده..حتى الصرف مايصرف عليها.. pb093
صار بينهم زعل في يوم من الأيام وراحت بي اهلها..
وسب اخوها في التلفون وتلفظ عليه ألفاظ الله وكيلك..
ومع ذلك يوم حنت له ولعب عليها بكلمين حلوين ووعود يسمع فيها بس..
رجعت له..,
" وعادت حليمه لعادتها القديمه " رجع يسب ويشتم..,
والحين ندمانه عدد شعر راسها.. :sm1:

انا اسفه اني طولت في السرد .. بس نفس الأحداث تقريباً..
طالما انه ماقدّرها من البدايه ولا حشم ابوها << ياقليبي
صدقيني بيتمادى أكثر .. وهذا أول دليل على انه ماراح يتغير ابد..,
هي واضح نها عطته اكثر من فرصه دامها شافت منه اللي لايسر لا عدو ولا صديق وبلعتها وسكتت..
وماتكلمت ولا طلعت من بيته إلا يوم طردها الضعيّفه..
واضحه زي عين الشمس انه يبي روحتها باللي هي به ..
فَـ خليها تعيد التفكير أكثر من مره .. وتحط في بالها انها بتكمل معه باقي عمرها..,

الله يفرج همها يارب..,

الليدي لجينا

16-06-2008, 05:43

انه اشوف انها ماترجع .. الا لم يسلم على اهلها ..وش هالكبرياء!؟

ووش الي لك 3 ايام وبطلق .. خير ؟؟ تهديد يعني ... يعني كنه عارف انها ميته عليه او حاس انها خايفه من الطلاق ... انا اتوقع بل اجزم انها لو ترجع له مشكالهم ماراح تنتهي طول عمرها .. اذا هي ماكرمت نفسها ولاقدرتها ماراح يكرمهاا ولا يقدرهااا

يعني قدامها خيارين اذا هي مره مره ماتبي تتطلق!! .. ترجع وتتحمله بمشاكله لانه ماراح يتادب وهي راجعه بهالطريقه !!!
او الخيار الامر .. الطلاق !! وطفل افضل من طفلين .. وحياة سنه ونص .. افضل من عشره اطول متحمل للمشاكل فتره اطول ..

وحتى المشكله اللي بسببها ارسل لابوها مافي اتفه منها باين انه بس يبي يستقوي عليها !!!ويسوي نفسه قدام اهله اني الرجال القوي وعلى حسابها !وهالمشكله اشوف مفروض هي الي تزعل مو هو ؟! يعني مسوي قلب عليها ومالك كلمه ولا لك خصوصيه ؟!! <<<والله يانا حامت كبدي منهpb131

بس انا لو مكانها مستحيل ارد عليه وهو مسوي لي فيها معطيني فرصه ولا بطلق يقاله يهدد خيرررررررررر منتب غنيمه فكككه<< معليش تحمست شوي pb131

---

دام انه زوجها رجال يخاف الله فيها ومحترمها ماله شغل فيها .. الا انه يتدخل بخير وبصلح

حتى بالصلح اتوقع ماله شغل لانه بيوضع نفسه بمكان ماله داعي ..

هي خرب بيوت من شويه ... الا من هالتدخل الي مال امه داعيpb093

طيب ماشوف ان زوج محترمها ولا شي ؟ هذا احترام علشان اهلي دخلوا غرفتك لاتزعلين وروحي لاهلك؟ وين الاحترام ؟!
واشوف تدخل الابو في محله .. اولا البنت مو هي اللي دخلت ابوها .. ساكته ولا راحت تتشكى جا هو ودخله ؟!
وتعالوا خذوا عفش بنتكم ؟
وتعالي ولا نيب داخل مسلم على اهلك ؟
يعني ماشوف اي نوع من الاحترام !!
وحتى لو هو يخاف الله ماسوى كذا .. لان بنات الناس مو لعبه ! اذا زعلت بدق على اهلك واذا رضيت منيب مسلم على اهلك !!!!!!!:rolleyes:
bp039

الله يكتب لها اللي فيه خير يارب ويسعدهاbp039

z L e T

16-06-2008, 10:17

لا عادي خوذي راحتك :D

ايه هو قاله تعال خذ بنتك .. ما قاله تعال نتضارب انا وانت ..

وبعدين قال له تعال خذ بنتك ما رماها بالشارع ..

برد هو ما قال لأبوها تعال خذ بنتك , اللي قاله لابوها تعالوا خذوا عفش بنتكم يعني بنتكم هي لكم :rolleyes:

وبعدين يقول ارجعي ولا كن شي صار وفوق هذا يبيها تعتذر من اهله رغم الغلط منهم وما احترموا خصوصياتها ودخلوا غرفتها بغيابها وبدون اذن منها ؟! :rolleyes:

كان ممكن من البنت ما تدخل اهلها بالسالفه وتناقش الموضوع مع زوجها وتقوله حركة اهلك مالها داعي وو و بس هو الظاهر يبي يخلي البنت غلطانه وتوقع انها رجوله لمن يرسل لاهل البنت تعالوا خذوا عفش بنتكم واهل البنت بيترجونه لا تكفى خلها عندك وش صاير بنحل الموضوع عشان بدل ما يعتذر هو واهله يخلي البنت واهلها يعتذرون له هل يعقل ؟! :rolleyes:

الله ما شفناه بالعقل عرفناه

مهما كان المرأه لها احترامها وتقديرها مهيب نفايه نرميها على رجل يسلب كل حقوقها ؟! :rolleyes:

z L e T

16-06-2008, 10:29

هي موظفه والا طالبه والا ايش؟ .. يعني قصدي محتاجه نفقته على ولدها؟ اذا الاجابه نعم ... الله يعينها لانها ماتقدر تتطلق هالاشكال ماتعترف بنفقه ....واذا لا ..نفس كلامي اللي فوق

الله يختار لها الأصلح ويوفقها

لا موظفه ولا طالبه متخرجه من الجامعه وجالسه بالبيت ,, وبالنسبه لنفقة ولدها بتقدر عليها ان شاء الله < اساسا من تزوجت وزوجها ما يدري عنها لا بكسوه ولا بغيره عايشه بعز اهلها:rolleyes: >

. rOro .

16-06-2008, 16:14

^
حلووو كنت ابي اوصل لهالنقطه

بليز لاترجع الله يوفقها يارب ويعوضها خير ..

رَوّنق

17-06-2008, 07:54

الله يفرج همهآ يآرب ..
أنآ من رأي مآترجع له !
لأن الرجآل الي يسوي كذآ
اعرفي انه اكبر كذآب ..
وماعنده ثقه بنفسه
وماهمه الانفسه
لو يحبها حب اهلها معها
ولا هانها وقال تعالوا خوذوا اغراض بنتكم !
ليه مالها رب .. !
مالها مشآعر واحآسيس !
مو هالشي اهانه لها قبل ما يكون اهانه لاهلها !
ماعليش يعني كبروا عقولكم يلي تقولون ارجعي ولاعليك من الكرامه !
الواحد ما يتزوج عشان يضحى ويعيش بنكد ,
على أمل التغيير
طيب ماتغير وزاد سؤء تجلس تدمر نفسها والسبب الوفاء والتضحيه !
الزوآج استقرآر ورآحه نفسيه ..
اذآ هو ما احترمها ولا احترم خصوصيآتها هذآ مآيستاهل من يضحي عشانه ويرجع له!
وعموما الحيآة ماتوقف على رجل !
بالعكس يمكن خيره لها قبل ما تجيب من اكثر من طفل وتبلش صح ,
وتزيد المشاكل هنا لاعاشت حياتها ولا حست بالراحه وانحرمت !
للاسف لا تخلينها تكرر تجآرب غيرهآ !
انا مرت علي هالحآله اقسم بالله انواع الذل لما رجعت !
وداست على كرامتها وكرامة اهلها !
البنت عزها بأهلها هم الي بيبقون لهآ ..
وهم الي بيوقفون مع بنتهم ..
وهم الي يستاهلون التضحيه !
اما الرجآل ينتعوض ولاراح توقف الحياااة عليه !
دامه يسوي كذآ بالبدآيه أجل بعدين وش بيسوي !

Diet WaTer

17-06-2008, 10:33

,

صرآحه قليل ادب مع احترآمي له ,, :)

الحين تبي ترجع زوجتك ولآ تبي تعتذر لـ اهلهآ وانت سآبهمـ ؟؟

صدق قوي وجه وفيه بجآحه ,,

انآ انصحهآ نصيحه لـوجه الله يمكن اني صغيرهـ على النصح لكن هذآ اللي اشوفه منآسب صرآحه ,,

مثل انه مآعطى اهميه لـ اهلهآ ولآ احترمهمـ فـ مآ منه خير ابد لآ لهآ ولآ لـ ولدهـ ,,

ودآمـ ان حيآتهآ فيهآ مشآكل يعني مهيب المشكله الوحيدهـ ذي ,, ينقلع ومثله عشر ,,

وان تطلقت مهيب ضآيعه ابد ,, وفيه احسن منه اكيد bp039

الله يخلي لهآ اهلهآ و ولدهآ pb189

والطيب مهوب ضآيع في هآلدنيآ bp039

سلمي عليهآ والله يوفقهآ ويستر عليهآ :)pb189

,

حرم زوجي

17-06-2008, 11:04

لازم يحس ان وراها رجال ويحط حساب لاهلها هو غلط عليهم واذا مااعتذر لهم بكره يجيها الدور اهم شيء احترام اهل الزوجه وينحط لهم مقدار وبعدين ذوقا زي مادخل الابو بالسالفه وارسل له مسج يعتذر ويطلب انه ياخذ بنته موب ياخذ البنت وبسكان السالفه لعب بزارين

سَـما

17-06-2008, 12:08

.
.

إذا كانت تريد الإحترام والعزة ، فلا تعود إلا بإعتذار ومنزل مستقل ، وإلا فالتعود مخلفة ورائها قيمتها وقيمة أبويها
وأخبريها أن من النعم الله عليها بأن رزقها بمن يصون كرامتها فلا تفرط بهم - الأهـل -
ولتعلم بأن من لا خير فيه لـ أهلي وأهله ، لا خير فيه لي
bp039

بعض العقول في وطننا بلوة :

والمصيبة موضوع تافه ينحل بطريقه بسيطة .. كبروا السالفه
وبما أنه تافه كما تزعم ، فما دخل الأهـل عندما أرسل
أليس من المفترض من رجل سوي ، غلق باب غرفته وأخذ الأمور باليسر واللين

لا والابو وش دخله بالبنت يزعل ههههههه ياناس من جد لقافه

ولأن هناك أعتقاد سائد - خاطئ طبعاً -أن لا أبوة بعد الزواج نرى هذه العقول :rolleyes:
الأب رَبي ، ومن الأجحاف أن نزيحة و ندعوه فقط لمشاهدة ما بناه يُهدم من غير سَوي

يااخي زعلت من الرجال لاتكلمه ولا ترفع عليه سلام ربك .. تدخل البنت بالسالفه وتهدم حياتها للللليش؟
صح ،
ولكن الزوج هو من دخـل الأب برسالته العوجاء كـ عقله

لو انها اختي والله لأشيل عفشها واوصلها لبيت زوجها ..

تمنياتي بأن لا يُوليك ربي أمراً كهذا

.. ولان المره مالها الا بيت زوجها .. ماأحد راح يبقى لها الا رجالها

أوه ، صحيح الزوج لا يموت ولا ينحرف ولا يفني يبقى كما ولدته أمه إلى ان ينتهي دوره
علماً بأن القاعدة الصحيحة " ما أحد يبقى لها إلا أهلها " والأولوية للأهـل دائماً

ريميه نجد

17-06-2008, 15:39

الله يوفقها للطريق الخير لها pb189

مشكلتها صعبه :(

لان رجلها مو راضي يعترف بغلطه ويسامح :(

بكذا يكون حطها بين اصعب خيارين " تختارة او تختار اهلها "

الله يعينها pb189

مراعي كولا

18-06-2008, 05:57

شفي المشكله يمكن انحلت لان المهله انتهت

لكن ان رجعت له بشروطها فهي كسبانه انه بيعزها

وان طلقها هذا مو كفو زوجه

وان رجعت تستحمل عاد وعلى نفسها جنت براقش

مياسين

21-06-2008, 02:19

قال تعالى:
لا خَيْرَ فِي كَثِيرٍ مِنْ نَجْوَاهُمْ إِلَّا مَنْ أَمَرَ بِصَدَقَةٍ أَوْ مَعْرُوفٍ أَوْ إِصْلاحٍ بَيْنَ النَّاسِ
وَمَنْ يَفْعَلْ ذَلِكَ ابْتِغَاءَ مَرْضَاتِ اللَّهِ فَسَوْفَ نُؤْتِيهِ أَجْراً عَظِيماً ( النساء)
..
قال عليه الصلاة والسلام
(ألا أخبركم بأفضل من درجة الصيام والصلاة والصدقة ؟ قالوا بلى : قال:
اصلاح ذات البين ..فإن فساد ذات البين هي الحالقة ) أي تحلق الدين .

الظاهر ان زوجها من النوع اللي كلمه توديه وكلمه تجيبه
وفهمت انها تبيه وهو يبيها بس يقال كرامتي ماتسمح لي
بس الكلمة الطيبه تؤثر.. فتحاول تستلطفه بالكلام وتحاول وتحاول وراح ينفع معه ان شاء الله
وهو مهما كان أب ماراح يهون عليه ولده
وأبوها تلقينه مو مرتاح لحال بنته كذا..ولا هي مرتاحه
فتبين له ان الأمر بيده واذا يبيها يحاول انه يجي يسلم..
مع ان شخصيته بدت لي ماش ..
وتقول له بما انك قدرت اهلك انا بعد بأقدر اهلي وكلمتهم على عيني وراسي
صعب انها ترجع له بدون موافقة ابوها.. اقل شي ابوها بيحس بنقص من بنته
الطلاق مو شي سهل.. وهو يبيها بس هي تحاول تضغط عليه شوي
الله يصلح بينهمbp039

موقفها صعب كل شي ولا أهلها :)

.0البرد0.

21-06-2008, 21:04

طيب ماشوف ان زوج محترمها ولا شي ؟ هذا احترام علشان اهلي دخلوا غرفتك لاتزعلين وروحي لاهلك؟ وين الاحترام ؟!

وهذا بعد مو سبب ان زوجها مو محترمه .. يعني اذا كان الرجال مو منقص عليها شيء وبهالحاجه قصر اصبح مو محترمها ابد ؟!

واشوف تدخل الابو في محله .. اولا البنت مو هي اللي دخلت ابوها .. ساكته ولا راحت تتشكى جا هو ودخله ؟!
وتعالوا خذوا عفش بنتكم ؟

يالغاليه .. اجل يتصل على مين ؟ يتصل على عمها ولا خالها ولا ولد الجيران . اكيد بيتصل على ابوها تعال خذها دام بنتك هي الي ماقدرت تلم الموضوع وتكبره

وتعالي ولا نيب داخل مسلم على اهلك ؟
يعني ماشوف اي نوع من الاحترام !!

لمــــــــين ؟ لا ابوها ولا للبنت ؟ ياناس الابو وش دخله بين الاثنين ..

وحتى لو هو يخاف الله ماسوى كذا .. لان بنات الناس مو لعبه ! اذا زعلت بدق على اهلك واذا رضيت منيب مسلم على اهلك !!!!!!!

اتوقع انه تزوج بنتهم مو عيلتهم .. سلم ماسلم مالهم شغل يحرمون البنت من رجالها ..
هذا رايي .. يتحمل الخطاء ويتحمل الصواب

تحياتي لك

.0البرد0.

21-06-2008, 21:11

برد هو ما قال لأبوها تعال خذ بنتك , اللي قاله لابوها تعالوا خذوا عفش بنتكم يعني بنتكم هي لكم

وبعدين يقول ارجعي ولا كن شي صار وفوق هذا يبيها تعتذر من اهله رغم الغلط منهم وما احترموا خصوصياتها ودخلوا غرفتها بغيابها وبدون اذن منها ؟!

كان ممكن من البنت ما تدخل اهلها بالسالفه وتناقش الموضوع مع زوجها وتقوله حركة اهلك مالها داعي وو و بس هو الظاهر يبي يخلي البنت غلطانه وتوقع انها رجوله لمن يرسل لاهل البنت تعالوا خذوا عفش بنتكم واهل البنت بيترجونه لا تكفى خلها عندك وش صاير بنحل الموضوع عشان بدل ما يعتذر هو واهله يخلي البنت واهلها يعتذرون له هل يعقل ؟!

الله ما شفناه بالعقل عرفناه

مهما كان المرأه لها احترامها وتقديرها مهيب نفايه نرميها على رجل يسلب كل حقوقها ؟!

لا من قال انها نفاية .. اتمنى ان ردي ماينفهم كذا .. ولو عرفتي البرد كان فهمتي كيف يحترم ويقدر كلمة انثى ..

بس الموضوع مبين انه طاح بين صغار عقول .. المرأه كبرت السالفه ... والرجال صارت كرامته وماكرامته ومن هالخرط ... والابو قط معهم بالهوشه ..
انا كلامي يالغاليه .. ان الابو يطلع من السالفه لايخرب على بنته دام ان الرجل يبيها ..
ولو كان الموضوع فيه شخص حكيم كان ماكبرت السالفه ..
وتحياتي لكbp039

سَـما

بعض العقول في وطننا بلوة : pb093

اختي سما ياليت لما نرد على بعض نحترم اراء بعض
يمكن كلامي مايعجبك ويعجب غيرك ..
هذا رائيي انا وعقلي احترميه علشان اقدر ارد عليك لااكثرpb093

وبما أنه تافه كما تزعم ، فما دخل الأهـل عندما أرسل
أليس من المفترض من رجل سوي ، غلق باب غرفته وأخذ الأمور باليسر واللين
والزوجه كرتون بطاطس جالسه .. ليش هي نفسها ماصغرت الموضوع بدل ماكبرته
اتوقع ان مفاتيح الرجل بيد زوجته .. صح ولا لا pb036

ولأن هناك أعتقاد سائد - خاطئ طبعاً -أن لا أبوة بعد الزواج نرى هذه العقول
الأب رَبي ، ومن الأجحاف أن نزيحة و ندعوه فقط لمشاهدة ما بناه يُهدم من غير سَوي

والله يهدم ولا ينبي اتوقع هو بنفسه سلم البنت لرجالها
الا اذا كان معطي بنته هديه كأنها كرتون فاين وبعدين تندم

ياعزيزتي التربيه تخلي لكل واحد اساس مايحيد عنه:rolleyes:
انا لما اربي مااظل طول الوقت اتدخل بشؤن اولادي
انا عملت الي علي وهم يتصرفون براحتهم الا لما ينطلب مني اني اتدخل معهم:)
هذا المنطق الصحيح للتربيه ااذا كنتي تجهلين فيه روحي اسئلي علشان تستفيدي اكثر

صح ،
ولكن الزوج هو من دخـل الأب برسالته العوجاء كـ عقله

وش السالفه ياهووووه .. :mad:
اجل يتصل على الشرطه ولا على مين يتصل؟؟؟؟؟pb131

اكيد بيتصل على ابوها .. يرسل رساله ..
اجل يتصل على مين ؟

تمنياتي بأن لا يُوليك ربي أمراً كهذا

اللهم لك الحمد متولي هالمنصب وانا عمري اربع سنوات ..:)
وبالاخير جايه تقولي لي عقلي بلوه .. pb093
ياعزيزتي كانك درستي التربيه ولا الولايه
انا لي 24 عام وانا اطبقها وامارسها بخوف من ربي
مو لكي اعجب الناس ولا اتبع عادات وتقاليد بائده

أوه ، صحيح الزوج لا يموت ولا ينحرف ولا يفني يبقى كما ولدته أمه إلى ان ينتهي دوره
علماً بأن القاعدة الصحيحة " ما أحد يبقى لها إلا أهلها " والأولوية للأهـل دائماً

لما تحرفي كلامي وتفنديه على كيفك اتوقع هذا سبب ردك الاولي:rolleyes:

اتوقع انك مصابه بمرض فوبيا الرجال علشان كذا بتعب معاكpb093

وقاعدتك ياليتك تسئلين عنها زين ..:)

الزوجها مالها غير بيت رجالهاوعيالها ..
طبعا باحترام وتقدير .
لانها حتى لو جلست عند اهلها
من غير احترام ولا تقدير
اتوقع ان القاعده بيكون لها شواذ:eek:
وهي ليست دليل قطعي ياسيدتي:)

تحياتي لوطنك bp039

بيبسي دايت

21-06-2008, 22:05

أعتقد إن المشكله بالزوج نفسه ..
الي ما أحترم اهل البنت من الاساس ..
عشان يصون بنتهم ويحافظ عليه .. ! !

مادري وش أقولك بس أكثر التهديدات لا تنفذ ..
وأعتقد لو تدخل أحد عاقل وفاهم من أهل الزوج وعقله وركده تبي تنحل الامور :)
والله يستر على ولآيانا ولآيآ المسلمين أجميعن ..

جداااوي

22-06-2008, 18:13

ضروري نعرف بعض التفاصيل خصوصا عن شخصيته

وبيني وبينك ضروري يتعهد امام ناس من اقاربها واقاربه ما يكرر المشاكل

z L e T

25-06-2008, 09:02

شاكره لكم تفاعلكم واراءكم bp039

الحمدلله زوجها جا وسلم واعتذر وان شاء الله ان القلوب تصافت :)

والله يكتب لها ولجميع المسلمين والمسلمات اللي فيه خير يا رب :)bp039

سَـما

28-06-2008, 02:39

اختي سما ياليت لما نرد على بعض نحترم اراء بعض
يمكن كلامي مايعجبك ويعجب غيرك ..
هذا رائيي انا وعقلي احترميه علشان اقدر ارد عليك لااكثر

ولأننا نحترم الأراء ، فأنا رأي أنها بلوة وأنت ترى أنها نعمة وغيري إما معك أومعي
bp039

والزوجه كرتون بطاطس جالسه .. ليش هي نفسها ماصغرت الموضوع بدل ماكبرته
اتوقع ان مفاتيح الرجل بيد زوجته .. صح ولا لا

والعكس صحيح .
ولكن كيف لها أن تصغره ؟
أن لا تذهب بيت أبيها ؟ أو أن تكاذب هاتف أبيها بالرسالة التي وصلته ؟

والله يهدم ولا ينبي اتوقع هو بنفسه سلم البنت لرجالها
الا اذا كان معطي بنته هديه كأنها كرتون فاين وبعدين تندم

الزواج قدر ، وإلا لما أحل الله الطلاق
لا أعتقد بأن أب سيسلم أبنته لمن لا يرجوا صلاحه .

ياعزيزتي التربيه تخلي لكل واحد اساس مايحيد عنه
انا لما اربي مااظل طول الوقت اتدخل بشؤن اولادي
انا عملت الي علي وهم يتصرفون براحتهم الا لما ينطلب مني اني اتدخل معهم
هذا المنطق الصحيح للتربيه ااذا كنتي تجهلين فيه روحي اسئلي علشان تستفيدي اكثر

برافـو bp039
والأب ما تدخل إلا عندما أرسل الزوج للأب بأن بيتي يتعذر بنتك .

وش السالفه ياهووووه ..
اجل يتصل على الشرطه ولا على مين يتصل؟؟؟؟؟

اكيد بيتصل على ابوها .. يرسل رساله ..
اجل يتصل على مين

ألا تلاحظ أنك تناقض جملتك أعلاه .
كان الأصح أن لا أحد يتدخل ، ويحل الموضوع بينهم كأي زوج وزوجة "

اللهم لك الحمد متولي هالمنصب وانا عمري اربع سنوات ..
وبالاخير جايه تقولي لي عقلي بلوه ..
ياعزيزتي كانك درستي التربيه ولا الولايه
انا لي 24 عام وانا اطبقها وامارسها بخوف من ربي
مو لكي اعجب الناس ولا اتبع عادات وتقاليد بائده

بارك الله فيك .

لما تحرفي كلامي وتفنديه على كيفك اتوقع هذا سبب ردك الاولي
لا أحرفه ، فالقصد أن ما للإنسان دائم إلا الله .
فكم من الأزواج أخذهم الموت قبل الأباء ، وعادت البنت لبيت أبيها والعكس طبعاً صحيح

اتوقع انك مصابه بمرض فوبيا الرجال علشان كذا بتعب معاك

لا أعتقد ذلك ، فنماذج الرجال حولي مشرفة .
bp039

وقاعدتك ياليتك تسئلين عنها زين ..

الزوجها مالها غير بيت رجالهاوعيالها ..
طبعا باحترام وتقدير .
لانها حتى لو جلست عند اهلها
من غير احترام ولا تقدير
اتوقع ان القاعده بيكون لها شواذ
وهي ليست دليل قطعي ياسيدتي

وبما أنك تحترم الرأي الأخر ، وأن كل شخص له وجهة نظر وتجارب
فأعتقد بأني لست بحاجة لسؤال والتأكيد لوجهة نظري .

وتحياتي لشخصك bp039

شاكره لكم تفاعلكم واراءكم

الحمدلله زوجها جا وسلم واعتذر وان شاء الله ان القلوب تصافت

والله يكتب لها ولجميع المسلمين والمسلمات اللي فيه خير يا رب

الله يسخرهم لبعض .
bp039