أبي شـقـراوية..محتـار يا قلبـي.. ميــن تختــار؟؟؟!!!!!! [الارشيف]

عرض كامل الموضوع : أبي شـقـراوية..محتـار يا قلبـي.. ميــن تختــار؟؟؟!!!!!!

وحيد الجزيره

28-06-2001, 04:02

<center>سلااااااااااااااااااام</center>

<center>انتهت الدراسة..وبدت العروس..وصارت اسطوانة كل عام تجي للشباب اللي في سنّي ومن هو في سن الزواج <-- يعني افهموا اني كبير :D :D</center>
<center>كل ما جوا أهلي من عرس تجيك الاسطوانة المعهودة : </center>
<center>أمي : وحيد..والله يا لقينا لك بنت تطيّح الطير ( وبردان بعد) من السماء لاو جمال ولا جسم و..و... </center>
<center>وحيد :(يقلّب عيونه ويتثاوب ) يصير خير يمّه :( :( </center>
<center>أم وحيد: بس شف تراها مهيب من الجماعة لا تقعد تنشب لنا عقب تقول ابي شقراوية!!!! </center>
<center>وحيد: يمّه ان شاء الله .. بس خليني افكر بالموضوع مهوب قصّ ولزق وبعدين ترى انا استحي تسولفين معي بها الكلام قدام اخواتي :D :D ( يا عيني على الحياء) :) ..</center>

<center>اللي يلاحظ اللي صاير ان الاهل مرتن يعرضون عليك وحده قريبة وما تدري الا وهم خاطمين على وحدتن بعيدة ولا عندهم الا الجمال كميزة تخلي الام او الاخت تحط عينها على البنت وللاسف هذا هو واقعنا المرّ .. واذا امك عجوز ركزت على مهارات الطبخ والأعمال المنزليه وتربية الاطفال كأنك تبي تستقدم شغاله :( :(</center>
<center>والمعروف ان الحريم يختلفن من ديرة لديرة من نواحي كثيرة.. يعني لا من عادات ولا اسلوب المعاملة..فتشوف في بعض القرى ان المره لها سلطه على الرجال وتامر وتنهى!!!بعكس بعض القرى اللي تلقى ان المره مالها اي كلمة في البيت..وعلى هذا النحو.. والا قواعد :)</center>
<center>واللي يقهر صحيح هو سالفة " الشوفة " قبل الزواج ..يعني العالم اللي تبي تعرس مثلي وأمثالي ، هذولا بالله عليكم كيف يبون ياخذون قرار استراتيجي حيوي مثل هذا ؟كيف لشاب مقدم على الزواج انه يعتمد على رأي وذوق غيره في مشروع مصيري مثل هذا؟</center>
<center><--- الى الحين حمقان :( :(</center>
<center>راسي مدووش من مبدأ الاختيار اصلا ، هل الأفضل أن تكون قريبه او بعيده ؟ حطيت لكم عدة تقاط ابي اشاوركم فيها ، واللي عنده رأي مخالف يذكره ، لأني داخل على الله ثم عليكم في هذا الموضوع ، فلا تبخلون بالرأي ..</center>

<center>الصبر</center>
<center>بنظره بعيدة الى ما بعد الزواج ، ممكن نلاحظ ان القريبة هي الغالب ان تكون اصبر على زوجها من البعيدة لاسباب أهمها ان القريبة لا يربطها بالزواج عقد النكاح بس!! بالعكس بينهم قرابة ونسب وغير هذا علاقات اللي تجبرها على تحمل ما يصير في حياتهم الزوجية لاجل تلافي المشاكل اللي تبي تصير بعد الزواج من خلافات بين الاقارب.. :(</center>
<center>:D :D تحسين النسل :D :D</center>
<center>وهذه الغالب ان الواحد ما يروح للبعيدة الا اذا كان يبي يحسّن نسله، فيمكن ان عياله قصار؟؟ او انهم فيهم عيب وراثي.. وهذا شئ معروف من مبطي..فمن أيام الصحابة أتى وفد الى عمر وكانوا قصار..فعندما سأل عمر عنهم عرف ان السبب انهم ياخذون من بعض فقال مقولته المشهورة ( اغتربوا ولا تضووا ) يعني خذوا من بعيد عشان يتحسن نسلكم..بس مهوب دايمن .. الواحد يحتاج انه يبعد بس انا قلت الغالب..والا من الممكن ان يصير الواحد وقرايبه كلهم ما بهم عيبن ابد ولا يبي زود..بس زي ما قلت هذا مهوب واجد وقليل...</center>
<center>كتم الســرّ</center>
<center>السرّ طبعا مهوب السر اللي تطلعه رولا :) :) لا انا اقصد السر يعني الاشياء اللي تصير بين الرجل وزوجته..وفي هذه تكون القريبة احرص على كتم سر زوجها من البعيدة لعلمها ان هذا يسبب حزازيات بين العوائل القريبة بعكس البعيدة واللي ما تطق خبر لمثل هالحزازيات لقلة لقاءاتهم مع بعضهم .</center>
<center>القنــاعة</center>
<center>وهذا يعتمد على معرفة المراة بالرجل ويتفوق في هذا القريبة على البعيدة فهي تعرف قريبها وامكانية الصرف عليها وطبيعتهم المعيشية وكما يحصل من اهلها وجماعتها فهذا ابن جماعتها وتبي تخضع لما يقوم به من اسلوب في الصرف والمعاملات المالية في بيته ومع زوجته..بعكس البعيدة وخاصة اللي تعودت على اسلوب معين في التعامل في المصاريف يمكن ترفض بعض الاشياء واللي ممكن تصير عند الرجل كعادة عنده وعند جماعته واقاربه ، وهذا من اشهر ابواب الخلافات الزوجيه .</center>
<center>:( :( الطـلاق :( :(</center>
<center>اذا حصل الطلاق لا سمح الله من الزوجين فالبعيدة راح تكون الابتعاد عنها اسهل بكثير من القريبة واللي راح تتطور الى والدينها ووالديك لقرابتهم او راح ينتشر الخبر في الجماعة وراح يكثر الكلام من كل الطرفين عن الاسباب _ وهذه اشياء نسلم بها وتحصل في كثير من العوائل _ واللي راح تتعب الشاب كثيرا نفسيا..فالبعيدة افضل لانه راح يفتك من هالمشاكل ان حصل الطلاق لاسمح الله :( :(</center>

<center>فوش رايكم؟؟؟</center>

<center>أخوكم الشقراوي</center><center>وحيـد الجزيره</center>

it's me

28-06-2001, 04:33

اهلييين باخوى وحيد الجزيرة بعد طول غياب...

شوف اخوى ..
الام..اسمى امانيها سعادة ولدها مهما كانت ثقافتها..
طبعا اختلاف الثقافة قد يحدد فكرتها عن السعادة...

لكن..
عموما..كل ام تتمنى اللحظة اللى تشوف فيها ابنها الغالى على قلبها وهو يزف لعروسه...

نجى لفكرة ان البعض يركزوا على الجمال..
ترى الجمال مهم جدا خصوصا بايامنا هذه مع كثرة الصور اللى تحسن هيئات اللى بيطلعوا لكم في كل مكان...
لكن اكيد لازم معاه..وعى فهم دين قلب كبير وحناااااااان يملا العالم والا الجمال هنا يكون ماله
لزوم فعلا لانه رح يضر اكثر مما يفيد...

واستغرب راي الكثيرين وتصورهم ان الجمال لابد تكون صاحبته مغرورة او سطحية او غيرها من الاتهامات...

نجى لمسالة المهارات..
يعنى اللى تفهم وتعرف كيف تتصرف هذه كمان تريحك..
والا تجيك واحدة كل كلامها مااعرف ..
هذه مصيبة كبيرة خصوصا ان كانت لاتحب ان تتعلم ..
يعنى حتى الامل رااااح....
وهذه المعرفة مهمة ولو كان زوجها رح يوفر لها الخادمات والطباخ وووو...
لان معرفتها تخليها واعية للى يدور حولها وتحسن ادارته والاشراف عليه...

نجى لسالفة الشوفة على قولك..
انا اللى اعرفه ان الان اغلب الاباء بيوافقوا عليها..
وبصراحة انت المفروض تصر على طلبك وتقنع به والدها..وبالاحاديث...
او تحتال لتراها بمعية احد من اهلك والدتك او اختك وهذا جائز..."" ان كان بهدف الزواج...طبعا.. :) :) :)""""

نجى للحين حمقااااااااااااااااان..
واقول ..
طول بالك ... :) :) :)...المسالة ماهى مستاهلة..
الاشياء اللى تحمق لسسسسسسسسسسسه... :) :) :)

اما مسالة قريبة ام بعيدة فهذه مالها اى قانون...
فانا عملت احصائية للمتزوجين في عائلتنا..
قرايب او غير قرايب...
اكتشفت..ان القرابة او عدمها مالها اى علاقة بكل الحالات اللى تكلمت عنها...

..بصراحة تعبت يدى..
يمكن ارجع ثانى ...واشرح هالاشياء....

باختصار الله يوفقكم كلكم للزوجة الصالحة...طبعا بسسسسسس العزابية..... :) :)

سلااااااام..

قرن ابليس

28-06-2001, 04:40

شوف
هو من الناحيه الفسيولوجيه للموضوع ممكن انك تكلم ابوك
وتفهمه الموضوع من اوله لاخره
بس تكنيكيا انت غلطان يوم انك عطيت اول مره
بس لا يضيق صدرك لا تفكر فالموضوع وهي انشالله تبتجي على راسك
:D
انشالله اكون فدتك برايي
وشكرا ولا عاد تعودها

الرد بطريقه اخرى :
الموضوع راجعلك وانت اللي تقرر تتزوج ولا لا
<=====بالله وش رايكم بالاراء البنائه :D

F I O N K A

28-06-2001, 07:02

<--------- يا ناس حركاااااااااات يرد بالعربي

من قدك يا وحيد رد عليك شقراء بالعربي :) :) :)

اسمع اخوي

اولا وشوله تشيل هم ؟؟؟

ثانيا الله يبي يكتب لك الصاح و الخيره باذن الله

و ثالثا
وشوله تعقد الموضوع اكثر من كذا ؟؟؟؟؟؟؟
تراه ما يستاهل كل هالكلام و التفكير

هالحين من يبي يلقى كل هالشروط ببنت هالايام ؟

<-------- لا تخلينا يا ولد النيدو و البامبرز

;) ;) ;)

الله يعين الجميع و يوفقهم

و اعزمنا بعرسك ;) ;) ;)

يالله نعتذر عن هالرد السريع لاني والله مشغووووووووووووووول بس حبيت ارد

سي يا

ملاحظه:
ابمخمخ على الموضوع و ارد بعدين بس ياريت اقدر ارد بالعربي :( :( :( :(

ريانه

28-06-2001, 07:04

السلام عليكم ورحمه الله وبركاته<center>هلا اخوي وحيد الجزيره نور المكان فيك وفي الشله الي معك(عشان ما يزعلون بس ).....</center>
موضوعك حلو ولذيذ واحس انه بفيد
بس احب اقول لك اصابعك ماهي سوى
ويقولون بعد الاقارب عقارب
واخيروليس اخرا البعيد سعيد.......
مدري هم يقولون تسذا؟؟؟؟؟؟؟
مثل ما قلت لك اصابعك ماهي سوي
حبيبي مو كل قريبه قريبه في كل المعاني بعض القريبات ما ينفعن ولا كل بعيده بعيده في كل المعاني .
اخوي وحيد الان راح امشي معك في موضوعك خطوه خطوه اذا سمحت لي يمكن اطول عليك السموحه
_____________________________________
طيب نبداء
من ناحيه الصبر
الصبر موجود في كل البنات واذا موكلهن اغلبهن ولازم تكون قربيه يعني عشان تصبر؟؟؟؟؟؟
ها لا مو شرط اذا انت متفاهم معها موشرط حب وخرابيط مجرد تفاهم راح تصبر عليك حتى لو انت بعيد من عالم ثاني بعد

:D :D :D
طيب لتحسين النسل .........
لازم تكون بعيده؟؟
ومن دوله ثانيه اجانب اقصد لا حبيب البي موشرط الجمال اذا تبيه موجود في كل مكان وعالم موشرط بره :mad: :mad: :mad:
____________________
وعلى طاري كتم السر هذا فن ما يحدده قريب والا بعيد
ما ظن وحده ترظى انها تخلي زوجها نكته متحركه؟؟
صح؟؟؟؟؟؟؟؟؟؟؟؟؟؟؟؟؟؟؟؟؟؟؟؟
رد جعلك ترد بسنون :D :D :D
___________________اما من ناحيه الطلاق ليه البعيده مالها رب هااااااا قل
لا ...مشكله الطلاق مشكله صعبه ماهي سهله مثل ما انت متصورها لا الطلاق من البعيده والقريبه صعب
بس انا معك في انه من القريبه اصعب اذا كانوا اهلها قراب وعزيزين هنا صح صعبه لانه راح تصير مشاكل بين الطرفين تسبب كره ماله داعي
______________________________
اخوي وحيد لا تعتبره هذا انتقاد لموضوعك
بس وجهة نظر فقط لاغير<<<<<<<<<<<<< حشا صارت فاتوره
ا............ اخوي وحيد موضوعك ممتاز ورايق المميزه وشوي عليك
_________________________
ممكن سؤال:
<<<<<<<<<<< ناويه تطول الاخت
انت ناوي تتزوج ؟؟؟؟؟؟؟؟؟؟
طيب تحياتي اخوي
اختك ريانه

بـردان

28-06-2001, 07:22

وحيد :)

لاتفكر واجد .. إعقلها وتوكل ..

<== بيوهقه http://www.eqla3.com/file/ubb/icons/icon93.gif

أنت محتار بين القريبه والبعيده .. وانا أقول لك مافيه فرق بينهم .. واسأل الله التوفيق وبس :)

بس تدري إني متشقق ان shagra قدر يكتب بالعربي ؟؟ :D راحمه من زمان ذا الآدمي :(

تحياتي المكعبه

مشخوط

28-06-2001, 08:22

<center>ياهلااا بوحيد الجزيرة...

كل الكلام الي قلته انا في نفس الحالة (الا انك انت شقراوي وانا رساوي (قصيم)وش دخل هالحتسي :D ) وتجيني الهموم مادري وش اختار رساوية مني و فيي والا وحدة من برا
وانا عندي الزواج مهم وما بي الا الزين :)

وانا معك بماسالة الشوفة
لانك فعلا ما تقدر تثق او تاخذ بذوق امك والا اختك
حتى قيل لولا اختلاف الاذواق لبارت السلع
ويمكن تصير وش ملحها بس الشكل ما جاز لك

ومسالة انه اذا كانت تقربلك تبي تصبر عليك ذي صح
بس لو تناظرها بمنظار اخر القرابة يمكن تسبب زيادة الثقة بالزوجة
وتختبص الامور

واهم نقطة لي هي مسالة النسل
لان من اهم اسباب الزواج هي العيال
وما ابي عيالي يطلعون شيون والا قصار
لان العيال ينطبقون عليك

وحبيت ازود نقطة و هي انه ذا صارت المرة قريبة لك
بتسهل مسالةالتفاهم بينك و بينها
ففيه اللهجة
الطباع
العادات زي ما ذكرت انه يمكن اهلها متعودين ان الحريم هم الي يتامرون
واشيا اخرى</center>

واخيرا حبيت اتمنى انك تعرس على وحدة شقراوية ووش زينها (بس لا تنسى تدعي لي) وان لقيت وحدة لي لا تبخل علي :D :D :D ...وعقبال ما نشوف منك الذرية الصالحة...

ومشكووور يالغالي...

أم سحلول الداية

28-06-2001, 08:53

<center>أخوى وحيد الجزيرة

ضحكتنى يوم تقول ..
كل ما جوا أهلي من عرس تجيك الاسطوانة المعهودة :

أمي : وحيد..والله يا لقينا لك بنت تطيّح الطير ( وبردان بعد) من السماء لاو جمال ولا جسم و..و...

:D :D :D
كنك أخوى يوم نجي من زواج
نفس الشى نبهذل أخوي :D

لدرجة انه يقول منى مرجعكم من الزواج عشان ماتصجونى (شفنا ذى ..وفلانة تهببل ..وفلانة تاخذ العقل ..و...و..)

كله ذا عشانكم
لكن اقعدوا حوسوا ،، من غيرنا بتحوسون ..(لا تزعل منى تراك والله حسبة أخوى)
:) :)
نبيلكم السعادة و نبيلكم الاستقرار و نتمنالكم كل الخير

وبالنسبة للاشياء اللى ذكرتها ،،
أشكرك على كل اللي قلته لأنه فعععلا شى ياليته ينتشر بين الناس ،،
لانه في ناس إلى الان مايرضون يزوجون إلا للأقارب للأسف
:( :(

الله يوفقك
وتلقالك بنت الحلال اللي تسعدك

على فكرة ترى أخوي زوجناه العطلة اللى راحت
وتريحنا
:D :D

:) تحياتي لك :)</center>

عدة الشاهي

28-06-2001, 10:01

هلا اخوي
الصراحة انا من المتعصبين للبعيدين يعني ملزم انها ما تكون من الاقارب القريبين الجماعة ما يخالف؟
ما ادري وش السبب بالظبط لكن مسكت غلط اقول اغير؟
المهم انت قلت ان فيه قرايا حريمهم يتحكمون فيهم شقرا فيها الطبع ذا <== تراي افكر اخطب شقراوية من جد!!!!!!!!!
تكفا قل لي قبل ما اتورط؟؟؟؟؟؟؟؟
وبالنسبة للكلام اللي قلته بخصوص المميزات الل في القريبة والبعيدة تراها مهي على كل حال ولا هي غالبا بعد.
لكن انا اقول لك نصيحة وانا شغال فيها الحين لي سنتين قبل لا اخطب وهي:
انك تسأل الله الصالحة الخلوق وبعد الصفتين حط اللي تبي وبكل صلاة وانا اسأل الله هذا بكل صلاة الله يرزقن الصالحة الخلوق الصبوح الزينة ...الخ
المهم لا تفتر من الدعاء واعرف بالاخير ان الزواج قسمة ونصيب يعني ما تعتمد على الدقة بالختيار بالدرجة الاولى يعني التدقيق بالاختيار مهو اول شرط في ايجاد الزوجة المناسبة.
والله يوفقني ويوفقك للزوجات الصالحات اللآتي يعننا على الطاعة آآآآآآآآآآآآآآآآمين.
<======لا تشرهون واحد يبي يعرس اليوم قبل بكره متحمس قوة

فتى القراين

28-06-2001, 10:22

تدري عاد يا وحيد الجزيره ان زواج هالوقت طريقته زي الجح هالاوقات يعني انت وحظك ياتجيك حميرا <==حصينا :) وطعمها سكر والا جتك محيوسة ما تاتقبلها الغنم
<== جايب لربعه جحه على السكين ونطلوها في وجهه وتعقد :(

saudi

28-06-2001, 11:27

شف عاد..من الاقارب ولا غيرهم ..ما يهم ..اهم شي اذا سمعت او مدح لك احد وحده بنت ناس خلوقه وصالحه..اياني واياك تتردد :mad: لان في كثير من الاحيان ناس ترددوا بعدين ندموا وتحسفوا..!!!خذها والله نصيحه اخويه من واحدن يتمني لك كل خير <IMG SRC="cwm7.gif" border="0"> والله يساعدك :) <IMG SRC="cwm37.gif" border="0"> :)

عيطموس

28-06-2001, 16:25

هلا اخوي وحيد الجزيره
انا بقول رايي لو تكرمت :D :D
في البدايه
عندي انك ما تاخذ وحده تقرب لك مرره
ولا باس بوحده من نفس العائله
لكن يفضل انك تاخذ وحده مالكم علاقه بهم
بس يكونون مثلا من اهل الوشم قل ليش
:D :D
اولا: من ناحيه الصبر مايهم ان الوحده تكون قريبه او بعيده هذا شي في المراه نفسها يعني
من اخلاقها انها تصبر على رجلها عشانه وعشان اهله ان كانت تعز رجلها :p :p
من ناحيه تحسين النسل
ان تزوجت بوحده بعيده حلو ان عيالك يطلعون جدد :D
يعني يصير حركه يقولون الولد طالع على امه والا ابوه :D :D
كتم السر :
المره اللي تكون اخلااااااق زي ماقلت ماهي فاتحه خشتها وناطقه بشي بينها وبين رجلها
لان هذا من أساسيات الزواج وهو كتم السر (عاد نشوف يا عيطموس ايلا اعرستي :D :D )
الطلاق ماله داعي اجيب سيرته لانه كله سوا من بعيد والا قريب
القناعه : بالنسبه لي يتفوق البعيده على القريبه لان القريبه اتوقع والله مايهمهايعني ماهي مستحيه من رجلها حتى لو قالها ماعندي قريشات بتقوله طلع اللي في جيبك بس :D :D
ويفضل وشميه عشان بالعاده عادات كل منطقه متشابهه وسلامتكم :rolleyes: :rolleyes:
والله يوفقك يا وحيد الجزيره ويعينك واللي في سن الزواج ويرزقك بالمره اللي تجوز لك ( ويرزقنا بعد :D :D )
وتقبل تحيات اختك عيطموس وماعليش ثقلت عليكم بالحكي

المــجــد

28-06-2001, 17:00

<center>أخي العزيز

وحيد

اسمع مني النصيحة

ما تفرق قريبة أو بعيدة

ممكن البعيدة أحسن

لتلافي الأمراض

ولأنه اذا حدثت مشاكل ما تحصل بين العوايل

لكن شوف المرة تخطب لأربع

لمالها وجمالها ودينها وعلى ما اعتقد نسبها

فانت تدور لك اللي تجتمع فيها المواصفات الأحسن لك

ام انك تقول غريبة عاداتها غير

أنا أقول لك اذا انت تعاملت معاها بالطريقة السليمة
حتشكلها على حسب الطريقة التي تريدها

استخير ربك والله يوفقك

تراي معزوم على الفرح

سلااااام</center>

بنت زايد

29-06-2001, 06:05

وحيدالله يعطيك الف عاااااااااااااافيه بس....
انتظروووووووووووو در بنت زايد باااااااااااااجر ;) :D ;) :D ;) :D

بنت زايد :cwm7

Madee7a Hanim

29-06-2001, 06:29

أشكرك .. اخوي وحيد الجزيرة .. على هالموضوع المهم ..

وأنا بالنسبية لي .. أهم شي هو التفاهم بين الزوجين ..

ومو شرط ان تكون الزوجة قريبة عشان تكوت تفهم الزوج أكثر ..

بالعكس في زوجات قريبات لأزواجهم .. ومع ذلك مو فاهمين ازواجهم زين ..

ومو معنى كلامي ان الواحد يتزوج وحده من بلد ثاني .. او حتى مجتمع ثاني .. ما تفهمه ولا يفهمها .. حتى عيالهم يضيعون في الطوشة :)

لكن .. يتزوج من بنات بلده ..

وقبل الزواج لازم يشوفها ..
وانا عندي ان رؤية الخاطب للمرأة اللي ينوي الزواج منها .. مهم جدا جدا ..

أنا أستغرب كثير .. كيف واحد يتزوج وحده ما شافها :eek:
طيب اذا تزوجها وما عجبته .. وش يسوي ؟ يطلقها؟

ورؤية الخاطب لخطيبته .. جائز في الاسلام .. ومهوب حرام .. او فيه تقليل من قيمة المرأة .. مثل ما يقولون بعض الناس ..

هذا كل اللي عندي وآسفة على الاطالة :)

عابرة سبيل

29-06-2001, 11:02

هلااا اخوي وحيد الجزيره
والله عندي لك فكره تفك حيرتك وترااها فكره مجربه وننصحك فيها وعلى قول المثل اسال مجرب ولا تسال طبيب
الفكره هي حط المواصفات الي تبيهاا بشريكة المستقبل وشف الي فيها بعض الموااصفاات وماا يهم ان كاانت قريبه ولا بعيده اهم شي الاخلااق
وانا كاتبه قصيده حاطه فيها المواصفات الي ابيها
ادور على الرجال الي يحلالي
رجال سند ابني عليه امالي
رجال اوعده يصير كل راس مالي
ويوعدني بحب عدد حبات الرمالي
يرزقني الله منه البنات والعيالي
نلف العالم مع ان كفونا البراني
ابيه سعودي لا بحريني ولا عماني
ابيه قبلي ويكون شقراوي
ابيه ابيض جذاب ومليحاني
ابيه كامل وللرحمن الكمالي
ابيه راشدويصوم رمضاني
ابي رايته ناصعه مثل الهلالي
ابيه رجال وسيد الرجالي
ابي له شنب من غير لحيه لانه امرداني
ابيه متواضع ولا يسهر الليالي
له العز اذا ناسب خوالي وعماني
ابي كل الي قلته فيه
واذا ماحصل افضل اعيش لحالي

وسلامتكم
على العموم اخوي وحيد الله يرزقك بنت الحلال ويوفقك انشاءالله
<<<تراها خطابه كان تبي تخطبلك
بس ماهنا شوفه قبل العرس هذا شرط من الشروط بتوافق عليه ولا مانيب خاطبتنلك :D

بنية نجد

29-06-2001, 12:00

سلااااااااااااااااام ابن عمي :)
لاهي تهيآت ولاتخيلات كل الحلا بالشقراويات هن محليات السعوديات
:)
شف ياوليد عمي تراكم ابحلتونا :)مغير مالكم الا طاري هالعرس نبي نعرس نبي نعرس عاد والا منا خطبنا لكم تبدى الدندرة يازين العزوبية ويازين ايامها :)صح والالا؟ :)
شف ياخيي بالنسبة للزواج طالما انت محدد شروطك وحبذا انك ماتكون لكعة لانك بحالتك هذي انت الخسران يعني يمدحون السماحة :)
وفق هالشروط تتقدم للخطبة وبرأيي اذا هي مطابقة للشروط ولاهيب قريبة مرة مرة لان القرابة مرة مهيب زينه يعني اذا من فئة ياخال ابوي حك ظهري مهيب شينة :)
ورحت ولاجيت مالك الا نصيبك :)
<====تميلح هي وخشتها كنها جايبة شي جديد :)
وربي يوفقك ويرزقك ببنت الحلال اللي تسعدك
ها تبيني افزع فزعت وخطبت لك بس تكتب لي تعهد خطي وصوتي وامام الجميع اني بعد الزواج مالك عندي اي حقوق :)
يعطيك العافية :)

ابو هيكارو

29-06-2001, 18:20

<center> شقرا بقلبي مثل وشمٍ على كف ** يموت راعي الكف والوشم موجود

:cool: :cool: :cool:

ان تسان الله باليك ومعزّم تعرس فخذ شقراويه وخل عنك الدندره <IMG SRC="cwm1.gif" border="0">

بس لا تاخذ وحيدتن قريبه مرّه ,, بلا القريبه اخيانها بياخذون عليك ولا هيب بعيده ابيها بعد .. ما بقى الا نصالي شيّاب في عزايم :mad: :mad:

</center>

لما

29-06-2001, 18:37

اخوي وحيد ناوي يتزوج مبروووووووووك مقدما .. مدري الحق ابارك لك ذاك الوقت ولا لأ
وبصراحه حسن الاختيار هي اهم نقطه في الموضوع وماتفرق اذا كانت من هلك او لا اهم شي اخلاقها .. وربي اني اعرف واحد قام يداوم عند طبيب نفساني والسبب زوجته وهي بنت عمه وماتخلي شي بينه وبينها الى العالم كلها درت .. وياريت كل واحد يفكر زين قبل لايخطب ويسال عن البنت عدل مهوب يركض ورى الجمال وينسى اهم نقطه وهي اخلاقها .. لاوبعضهم اذا شافت الام بنت بهالعروس وعجبتها جت هي ولدها يوم ثاني يخطبون .. <--------------------------------في ناس جو خطبوها على بالهم في الجامعه في الاخير طلعت بثاني ثانوي ........ يعني حتى ماسالوا عن العمر .. والله ليت كل الشباب مثلك مجرد مايتخرجون يفكرون يعرسون على طول مهوب يتعدى عمره الثلاثين وهو بعده مافكر بس طايحين لي من سفره لسفره ولعب مع هالبنات وشوف الجواز حقه ماتلاقي الا (البحرين + الامارات .. وان كان فيه زياده .مصر )
ايه ياوحيد لاتنسى الدعاء وخصوصا في اوقات الاجابه واستخير قبل لاتتقدم وبعدها توكل على الله واخطب ..

ادعي معي ياوحيد وادعوا كلكم .. يارب ان توفق وحيد بذيك الشقراويه الي كلها اخلاق ودين وعلم وجمال وحنااااااااان ..

تلك التي تهبه حبها وتغدق عليه من حنانها.. وتفيض عليه من نهر رعايتها..وتغمره بلطفها.. وتاسره بكرم اخلاقها ..تقربه منه بثقتها به ووفائها له وخوفها عليه .. وطمعها في رضائه واحترامه وتقديره وحفظ سره

واتمنى لك السعاده الحقيقيه التي يبحث عنها الناس والتي تتمثل في راحة الضمير والصحه والامان والاستقرار في ووجود الحب وتوفر الحنان

وهذي امنيتي لك من كل قلبي لانك اخ تستاهل كل خير .. وان شاء الله بتلاقي بنت الحلال الي تناسبك وتليق بك وبذوقك
تحياتي .. اختك : لماااا

بنت زايد

29-06-2001, 20:15

مرحبا مليون بوحيد الجزيرة...
والله موضوعك وايــــد حلووو..
بس لا تعقدها ..
واذا كانت عندك انت القدرة انك تختار بنت الحلال الي بتكمل معاك حياتك... فاكيد بادور على الي تناسبك وتريحك سواء قريبه او بعيدة..
اما اذا ما كنت ماتقدر فاهلك..(الوالدة) اكيد بيختارون لك وحدة يشفون انها تستاهلك وانت تستاهلها..
والي الله كاتبه بيصير.... والله يوفقك انشاء الله

بنت زايد <IMG SRC="cwm7.gif" border="0">

ماأدري

29-06-2001, 20:53

السلام عليكم ورحمة الله وبركاته..
أخوي وحيد الجزيرة.. الله يوفقك وجميع الشباب والشابات في مشوار الزواج.
وترا أكثر شي افرح به هو اني اسمع وحده او واحد بيتزوج. لان الزواج فيه منافع كثيره منها العفة وصيانة الدين والراحة النفسية وتكاثر الامة اللي وصانا به نبينا صلى الله عليه وسلم.
احب اول شي ارد على تسائل الاخ.. والله اني مهوي نسيت اسمه..
هل الشقراويات يتسلطون على رجالهم؟
اقول له وانا من شقراء واعرف طباع بناتها زين.. تزوج منهم واسرع بعد تراهن طيبات ووفيات .. وهذي شهادة امام الله ... لكن ترا اصابع يديك ماهيب سوا.

والان ارجع لك يالوحيد وانت انشاء الله منتاب وحيد انت بين اخوانك واخواتك..
احب ابدأ من النهاية.. يعني لا سمح الله الطلاق. طبعا بيصير فيه خلافات عائلية كثيره اذا كان الزواج من قريبة.. لكن فيه مزايا لا بد من الاخذ بها في هذه الحالة:
1 - الاولاد بيكونون قريبين من امهم يعني في المدينة او القرية اللي انت ساكن فيها (( هذا في الغالب))
2 - اذا راحوا لزيارة امهم سيكونون في منزل احد اقاربهم وهذا في الغالب سيخفف عليهم وطأة الغربة.
يعني بيت عمك بيت خالك فهم اقرباء لابناءك من جهتين .. الاب والام.

.. الزواج من القريبة عادة يخفف مسألة التفاهم لان بيئتكم وحدة وعارفين طباع بعضكم.

..الزوجة القريبة ترعى حقين لك
1 - حق الزوجية
2 - حق القربى.

.. اذا اخترت من ستكون زوجة لك فصل لله سبحانه وتعالى ركعتين هي صلاة الاستخارة.

.. اذا عزمت فتوكل على الله.

.. والمثل يقول الخيل من خيالها والمره من رجالها

سلطان المنتدى

30-06-2001, 03:44

<center>

أخوي وحيد الجزيرة

شف مواصفات أختي عابرة سبيل
شكلها تنطبق عليك وانا ما ادري :)
تقول أختي</center>
<center>ابيه سعودي لا بحريني ولا عماني
ابيه قبلي ويكون شقراوي
ابيه ابيض جذاب ومليحاني
ابيه كامل وللرحمن الكمالي
ابيه راشدويصوم رمضاني
ابي رايته ناصعه مثل الهلالي
ابيه رجال وسيد الرجالي
ابي له شنب من غير لحيه لانه امرداني
ابيه متواضع ولا يسهر الليالي
له العز اذا ناسب خوالي وعماني
ابي كل الي قلته فيه
واذا ماحصل افضل اعيش لحالي</center>

<center>بعد كلام أخوي (ما أدري )يقول عن بنات شقراء انهم</center><center>
اقول له وانا من شقراء واعرف طباع بناتها زين.. تزوج منهم واسرع بعد تراهن طيبات ووفيات .. وهذي شهادة امام الله ... لكن ترا اصابع يديك ماهيب سوى :)</center>

<center>بعدين أخوي الزواج قسمة ونصيب

الله يكتبلك الي تسعدك وتكون عبدة صالحه :)

بس عاد لاتنسى تعزمنا على العرس :)</center>

بنت نجد

30-06-2001, 04:47

<center>هلا والله بوحيد
اشوفك مسير علينا ؟؟؟؟
وش الي صار ولا عشان وراك عرس :D </center>
<center>الحين ماتقدر تقول القريبه زينه ولا البعيده شينه لكل وحده ايجابيات وسلبيات ..
يعني مثلا فيه ناس تبي بنات برا العايله اما لانها يبون دم جديد ( تحسين النسل على قولتك ) يبون شي مالقوه في عايلتهم , او لان الرجال يسمع بزواج الاقارب والامراض الي تنجم عنه خاصه زواج عيال العم عشان كذا تلقاهم يختارون وحده بعيده , وبعضهم يختار البعيده لان فضايح البيت وقتها ماتطلع :) :) فهمتا علي ؟
الي اقصده انه اذا صار اي شي بينهم فالمشكله تطلع غصب وتكبر ويصير حساسيات ومدري ايش
عشان كذا بعضهم يفضل البعيده لانه لو يصير وش يصير بينهم محد راح يدري وان دروا تلقاه مهوب مهتم :) :)
صحيح ان القريبه تصبر عليك بس اذا اذا جت المساله للطلاق فهنا تصير كبيره ويجي بعدها مشاكل مع الاهل ومدري ايش ..
احسن مافي زواج الاقارب انك تدري عن فلانه زين والبنت بعد تدري عن الولد , عكس الزواج من بعيد ..

عموما مااقدر اعمم لانه دوم يصير حالات شواذوالتوفيق بيد الله :)</center>

جودالحزن

30-06-2001, 06:38

سلا777777777م....
شوف اخوي انا اهل ابوي كلهم مااخذين من الاقارب واهل امي ما اخذين من برى عائلتهم تماما..........لاحظت ان اهل امي مرتاحين مره في حياتهم ....من ناحية الامراض الوراثيه ومن ناحية العلاقات الاسريه ومن نواحي كثيره ....ترى الواحد لما يتزوج من ناس بعيدين منه بتكون العلاقه مبنيه على الاحترام والتقدير اكثر من الاقارب لان الاقارب ممكن يشيلون الميانه بزياده او يتعدون حدودهم اكثر.. من باب انه قريبنا وولد عمنا وبيتحملنا ومرده لنا... وان صارت مشكله فتنتشر اكثر بين الاقارب وبسرعه ...هذي تعلم اختها واختها تعلم عمتها .....الخ وان حصل طلاق تنقسم العائله قسمين .....وغيره وغيره من المشاكل.... انت كنت فعلا عازم ....خذ وحده من بعيد اصرف لك .... او خذ وحده قرابتها لكم بعيده ....وبالنسبه للصبر ولكتمان الاسرار والقناعه ....تراها تختلف من بنت لبنت ......والف مبروووك قبل الزحمه .....وعقبال الحبايب.....
:D :D :D :D :D :D :D :D :D :D :D

مجدولين

30-06-2001, 08:19

سلام على العزوبي والله خابرت لك خطابه تمام بس لي السعي وش رايك؟؟؟؟؟ الصبر هذا صدقني كل العالم يمرون فيه يعني لازم بالعربي يلطعون واما تحسين النسل هذا الي ربي كاتبه بيصير اما كتم السر فقليل فاعله في ذا الزمن <لأن البنات يقلدون رولا> اما اقناعه شف صفقني بعشرين كف ان وحده مقتنعه بزوجها تمام الاقتناع .....عاد والطلاق الله يبعدنا عن الشر مار مخربها انت من اولها ......وسلامتكم :eek: :eek: :eek: :eek:

وحيد الجزيره

30-06-2001, 14:18

الظاهر اني ابآخذ لي اندونسية بلا شقراوية بلا هم :D :D
<--- خربها اخر شئ :)
<-- تأثر بالشايب اللي في حارتهم عقب ما شكى له معاناته :)
it's me :هلا والله غلا باختي الكاتبة الرائعة اتس مي وتشرفت بانتس تكونين اول من رد عليّ بموضوعي وألف شكر لتس على سؤالتس عني في غيابي وان دلّ فانما يدل على طيب اصلتس يالغالية :)
نرجع لموضوعنا..شوفي كلامتس عن الام والاختيار سليم بس كلامتس عن الجمال انه يضر اكثر من انه يفيد امممممممم هذا احس اني عجزت اوافقتس عليها لانه مطلب ضروري ان الواحد ما يلتفت لغيرها..اجل تبين اخذ وحده شيفه واقعد اقابلها؟؟؟
ولو الوجه الحسن له تأثيره ;) ;)
اما كلامتس عن الشوفة حلو وحلال وعشرة على عشرة وليت كل الشيبان مثلتس :(
واخر شئ الاحصائية اللي سويتيها هذه معظمها اشياء نفسية يعني ما تبين على ظاهر الواحد واتمنى كلامتس يصير صحيح..وألف شكر لردتس يختي :)
دايــــــم الشـــــــوق : :) :) :) :)
shagra :هلااا شقراء وألف مبروك على الترقية يا حلو ;) والظاهر انهم ارسلوا لك مع الترقية جهاز عربي لاني اشوفك تكتب عربي :)
شكرا لردك..ثمن وش اعزمك؟؟!! من يبي يصب القهوة للرجاجيل ;)
ريانه :هلااا اختي ريانه..وألف شكرا لتشريفتس للموضوع :)
نجي للرد..
اول شئ انا ما تكلمت عن طباع البنت والا فيه صفات ايلا صارت في البنت ما تفرق بين قريبة او بعيدة :)
يعني مثلا الصبر..ألغالب ان الاشياء المترتبة عقب العرس تساعد في التأثير على الزوجين فاذا صار ما فيه اي علاقة عقب العرس اكيد تبي يصير تأثير الاشياء في نفسها عكس من انه يصير بينهم شئ :rolleyes:
ثمن الجمال انا ما قصدت بره :) والا بناتنا معروفات بالزين والجمال وشقراء موطن الجمال وما فيها دقت عصا. :) ما اقول الا الله لا يخلينا بس ;)
اما كتم السر نفس كلامي في الصبر..يعني فرق ان الواحد كان عنده سر وواحدن مؤتمنه عليه.فرق بين انه اذا حس انه يبي يجر عليه مصايب هالسر او لا؟؟صح؟؟ ردي جعل المويه ترد في حنكتس :) :)
اما الزواج فما ادري عنكم..انا قلت اني ابعرس اصلا؟؟؟!! ثمن مالي الا شقراوية ترى الموضوع شئ في النفس وبس :(
ان خبرتي لي وحدتن سنعتن لا تبخلين على اخيتس ;)
بـردان :هلااا بمشرفنا ومبروك الاشراف ( بدري) :) وألف شكر على تشريفك للموضوع وشقراء الظاهر ان الممرور حامت تسبده منه وارسل له كيبورد :)
مثله مثل مسطول :)

ولنا رجعة لاكمال الردود :) :)

Reema

30-06-2001, 14:25

اخوي وحيد والله مادخلت الموضوع الا يوم شفت كلمة "شقراويه"...

نصيحه:... والله (موب عشاني شقراويه) بس الجميع يشهد بسنع الشقراويات :)

المتفائلة

30-06-2001, 14:44

شوف اخوي وحيد تنكح المرأة لأربع ...

لمالها ولجمالها ولحسبها ولدينها ...فظفر بذات

الدين تربت يداك ...

اما مسألة الجمال موب مهم ...الا مهم ونص

بس عاد الجمال درجات :) :D ;)

-------------------------------------------
انا ما اعتقد ان فيه احد الى هذا اليوم

مايرضى ان الخاطب يشوف بنته ...

الصبر ..

مايقتصر على وحده دون الثانية لا من قريبة ولا

من بعيدة ...كلن فيهم الخير ..

تحسين النسل ..

فعلا يمكن يكون البعيدة افضل ...

كتمان السر..

حتى هذا مايقتصر على بعيدة او قريبه ..

-------------------------------------------

زهقت وانا اكتب ...

الزبدة اخوي ...انا عن نفسي لا احبذ زواج

الاقارب ... ولكن الحل الوحيد والملجأ لك

هو الاستخارة ...دعواتنا لك بالتوفيق ...

ثورة الشك

30-06-2001, 15:10

اهلين وحيد الجزيره :)

تذكرني :) إيوه انا اللي هناك في التشات دايم اسلم عليك صح ;) حليل انا ولا انت لك راي ثاني

بصراحه اخوى عليك اسلوب في الكتابه حلو بس انا ماجيت انصحك ولا شي والزواج كله قسمه ونصيب ولا ادري انا طبعا شي عنه غير اني بقول الله يوفقك في مثل ذي

لطيفة جسم وصغيره ;)

كورن فليكس

30-06-2001, 18:10

سلامو عليكوم ..

اسمع طال عمرك .. ابرد عليك وانا مستعجل ..

الأم دايم تمدح اي بنت تشوفها .. زينه وإلا شينه ,, اهم شيء عندها انها تزوج ولدها ..

اما اختيار الزوجه فصعب في هالأيام .. لكن خذ هالفكره ..

رح لأي سوق في الرياض .. وشف منهي البنت المتستره .. تابعها الين تركب السياره .. الحقهم الين تعرف بيتهم .. جب الوالده والأخوات و خلهم يسيرون عليهم ويعلمونك بالنتيجه ,,

ادري من الصعب انك تلقى متستره هالأيام .. لكن اصبر واستعن بالله .. حتى ما تتوهق بعدين !!

سلاااام :D

مقلع مهوي

30-06-2001, 20:39

<center>السسسسسسسسسسسلام عليكم عن بكرة ابيكم

الف مبروووووووووك منك المال ومنها العيال

شوفوا يا اهل شقرا الظاهر انكم مستحلين الاقلاع
ترى والله من دون زعل بس اول مره اسمع في شقرا
هي يوم سجلت في الاقلاع
يعني قبل يكن خمس شهور
ترى لاتواخذوني ما علي شرهه زيرو سفن وبكل فخر
المهم يا حبة عيني كل فتاة بابيها معجبة
غير بنات صفر سبعة لاتدور قال شقراويه قال خخخخخخخخ
بس تعرف ايش المشكلة عندنا لا تجي الا وانت راكب شبح
ورصيدك هاه حول 500 الف هذا بالدسكاونت
بس لايهمك ترى يستاهلون وسعرهم فيهم
حشا صرت محرج............
وعسى الله يبني بيتك ان شاء الله
وان طعت شوري اطلع من قرايبك ارحم لك
بس انتبه والله الله في بنت الحمايل اللي سمعتهم
تشرف البعيد قبل القريب
وروح اقرأ قصيدة ناصر القحطاني
اللي يذكر فيها اوصاف البنية اللي يبيها
مطلعها( أبي لي مهرة بنت حصان......(
ومغسي بكو
باي

</center>

بنت الوشم

01-07-2001, 15:04

ترى هالكوره لاطتاّ تسذا

<<==== لها وجه بعد ترد على الموضوع

اول ماهنا انا من شفت العنوان وهو ناعبني

وفيني روغتن عليه الله لايفتنا الا في طاعته،،

وبعدين الله لايخلينابس من هالشقراويات ،، مهوب

حيثي شقراويه(لاتحلفين بس)مار مشهود لهن عند

الله وخلقه(اتسذبي واعقبي)

الا وحيـد على طاري الشقراويات الله لايحرمنا فضله

اخبر وحيدن شقراوي الله يبطش به(تمون على عيال

الناس)يقول : لو مايجيني الا انها تعرف لي اذا

قلت ارقلي لنا مخامير0

عاد مهوب سببن وجيه؟؟

:D :D

وفي الختام اهدي سلامي للشعب السعودي وبابا عبد

الله (الله من الجحده)<<=== وش دخله اصلا في الموضوع

<IMG SRC="cwm16.gif" border="0"> <IMG SRC="cwm16.gif" border="0">

شارب فليت

01-07-2001, 19:17

ودي ادلي بدلوي في هذا الموضوع الحيوي ...

<-- بدايه جاده :cool:

اولا ودي اسأل الأخ الكاتب قبل يحط شروطه ويدخلنا متاهات ....
انت فلوسك زاهبه؟؟؟ :p

وبعدين ، قبل سالفة القريب والبعيد ( انصحك بالبعيد لان من عرفك صغيرا حقرك كبيرا وانت سجلك حافل ) وسالفة الصبر ( هذي لك حق من يبي يصبر عليك فعلا ) وتحسين النسل ( مالك امل لو تاخذ من تاخذ الشين فيك متأصل ) والقناعه ( هذي مضمونه لان اللي تبي تاخذك قانعة بحظها من هالدنيا ) انا ابيك تركز على قضية ( كتم السر ) هذي لأنك محتاج لبنت الحلال اللي تستر عليك وعلى بلاويك الزرقا :D

وفي الختام اتمنى لك حياة سعيده واستر ما واجهت ;)

الطير

01-07-2001, 19:26

<-----------هههههههههههههههههههه
<--------ميت من الضحك علي رد ابو فليت

وحيدوه هماي قايل لك لاعادتكتب مواضيع عن العرس
انتم يا عيال هالوقت مالكم هم الا تبحثون عن شنقككم الاخر؟؟؟؟؟؟؟
ياخي حرام عليكم استحي انا من هالكلا م بهالمواضيع
وخدودي تحمر تعرفوني خجول .وعلي وجه زواج وامي صاجتني تبي تخطب لي وانا كل مره اتهجج
شوف وحيدوووووووووه ابي اعطيك نصيحه
حطها في خلقت حلقه ودنك ولا تقبل باي زوجه الا اذا هي فيها هالصفه
تدري وش هي
لازم لازم لازم تكون حنونه وذكيه
ولا تراك تبي تحس انك ماتزوجت
انا علمتك ... سووا لها فحص حنان
وخل عنك اسرار ما اسرار وصبر ما صبر
وخنبقت ماصلت
الحنان يخليها تتفصل علي كيفك

ست بيت سنعه

01-07-2001, 20:49

مســـ الفول ـــــاء
ان كانك تبي تاخذ راي مره فانا اقووول,,,
كل الصفات اللي ذكرتها مهمه+صفتي الحنان والذكاء اللي زادها طير وصدق يوم قال ان ما اخذت وحده حنونه ما كانك معرس
الصفات اللي ذكرتها مهيب شرط تصير بالقريبه يعني تقدر تقول انها عموما توجد بالقريبه لكن ما تقدر تقول ان كل قريبه تتميز فيها وعلى كذا فيه بعيدات لكنهم من احفظ الزوجات على اسرارهم ومن ارحم الزوجات على ازواجهم فهذا يرجع للطبع نفسه وشخصيه البنت ويااما سمعت عن وحده ماخذه ولد خالها او ولد عمتها وتمشي وتتشكى منه عند الناس وكلن درى عن حالها
واذا قلتو لي ان هذي حاله شاذه ارجع واقوول المهم شخصيه البنت نفسها بغض النظر عن هل هي قريبه والا بعيده
الله يزوج المقلعين والمقلعات الصالح من خلقه عاجلن غير اجل :D خخخخخخ مستعجله على رزقها

وحيد الجزيره

03-07-2001, 15:52

ول..والله الجادة ما منها امان الواحد ما يآمن على موضوعه :rolleyes:

علىا لعموم ألف شكر على اللي ردوا وآسف على تأخري بالرد بس جتني بعض الظروف اللي اعاقتني عن ذا الشئ ( اخلص بس عطنا الردود ) طيب :confused:
مشخوط :يا هلااااا بك اخوي.. والنعم بك وباهل الرس المزايين :) ويالطمّاع تبي حلوة وانت من الرس ( اجحدها عاد ) :)
ألف شكر لردك..وكلامك سليم وحلو اما بالنسبة للشوفة فهي والله على حسب الشايب هو اللي يحدد والا انحن يا حيل الله على كيف الشايب الله يقلع ابليسه :)
<- بدا يحقد على ابو مرته من هالحين :)
وكلامك حلو عن الطباع وصحيح ان الطباع تختلف ويبي يتعب الواحد اذا أخذ وحده ما توافق معه بالطبع..والله يرزقك ويزوجك يخيّي...وألف شكر لاضافتك :)
أم سحلول الداية :هلاااا بك أختي..و وعسى هالضحكة دوم يوخيتي .. وأنا والله عندي وحدتن عليلة مثلتس :mad: ( تراي امزح ) متسلطه عليّ تسلط تسنها تبي الفكة :(
وألف مبروك على زواج أخوتس والله يوفقه ويسعده ويستر عليه ويرزقه الذرية الصالحة يااارب :) :)
وألف شكر لردتس أختي..
عدة الشاهي:هلااا بك أخوي..وشف يخوي أول شئ من قال ان الشقراوية تبي تاخذ من بره شقراء ( جت الحميّة) الشقراوية ما تبي الا شقراوي لانها ضامنه انه مهوب ماخذن عليها :)
ثمن شف وبيني وبينك..ماهنا ألط من حريمنا عليهم ألسنة وش طولها..بس وش حليلهن يعني يحشمن الرجال ويروفون به روفان :)
وألف شكر على نصيحتك..والله يزرقك بنت الحلال اللي تسعدك... :) ولك تحياتي أخي الغالي :)

فتى القراين: هلاااا وغلاااا وينك يا شيخ؟؟ وش ذا الغيبات؟؟اجل جايبن جحه على السكين ههههههههه
الله من زود الذهانة فتى الوقف :)
saudi :هلا بك أخوي ولاتدف يآخي :) :)
عاد بس المشكلة ان المدح يجي من حريم وهذا اللي يخلي الواحد يتردد :confused: :confused:
ألف شكر لردك يالغالي :)
عيطموس :هلاااا باختي عيطموس..والله كلام درر وحلو واصلا اهل الوشم كل الزين فيهم...بس الطلاق ولو ترى فيه فرق الا دققتي شوي :)
وألف شكر لردتس اختي عيطموس والله يرزقنا ويرزقتس ;) ;)

ولنا عودة لاكمال الردود..لاني ما ادري وش جاني الظاهر ابرسل للممرور يغيّر اسمي الى وحيد آدم..جايني عجز ما فيه ملح.. :)

فنيله علاقي

03-07-2001, 18:12

اهلييييييين وحيدوووووف
اولا مبروك انك قررت تتزوج
ياشباب هو قال بيتزوج والا قايل انه ناوي ولا بعد قرر
المهم ابي منك طلب
اذا خطبت لازم تطل على البنت وتوريها جبهتك تكفى
علشان ما تنصدم
فانت خلها تشوف جبهتك وبعدين يسهل الله
-------
فيه نقطه يا وحيد اعجبتني
كتم السر
والله يانك بتتعب بهالموضوع
وعلى فكره هالموضوع لازم تركز عليه وتنبه زوجتك انه اهم شي كتم اسرار البيت

miss_rosa

05-07-2001, 05:04

مرحبا اخي وحيد الجزيرة
الموضوع رائع .. بس أنا ما عندي رآئي
احب بس اقولك لا تنسى تعزمني لا هببت تتزوج، :) اقصد لا قررت تتزوج :)

miss_rosa

05-07-2001, 05:12

عفوا نسيت شي، اخي وحيد الجزيرة
ابغى اذكرك بس يصلاة الاستخارة .. وأذكار النبي صلى الله عليه وسلم.. كمان اذكرك بذات الدين .. تربت يداك
،،،،،،،،

وعلى مسؤوليتي.. كل من بغى السعادة الزوجية :) والأمن والطمأنينة والخير والذرية الصالحة فلينقذ نفسة بحافظه قرآن.. الجمل يفقد أهميته بعد أشهر قليله من الزواج.. !! هذا رجاء.. لا تدخل سواء انت او غيرك في مشروع مهم كالزواج " خبط لزق " !!
لا تشترط شروط ما لها اي قيمة ولا داعي ولا تكون رجل ما شافش حاجة أو مش فارقة معك ;) ;) ;)

مخيبر ولد سماعيل

05-07-2001, 08:43

أخوي وحيد الجزيرة
السلام عليكم،،،،،
كلامك كله ارتكز في معظمه على الحث على الزواج من غير الاقارب وهذا أمر محمود :) :)
بس برضه ججبت فوائد الزواج من الاقارب اللي هي مثلا كتم السر ;)
######
أخوي الحبيبالمرأة كما قال الرسول صلى الله عليه وسلم في حديثه المرأة تنكح لأربع:لمالها و لحسبها وجمالها ولدينها فاظفر بذات الدين تربت يداك

<center>تحسين النسل</center>

أنا اشوف يالحبيب أن زواج الاقاارب مافيه تحسين النسل الا نادرا وهالتشوهات الخلقية للأطفال والامراض الوراثية كلها بسبب زواج الاقارب وفي حديث للرسول صلى الله عليه وسلم-معناه-تزوجوا الأغراب ،واذا وحيد الجزيرة :D طقت في راسه الا يتزوج بنت عمه فأنا اشوف أن الفحص قبل الزواج لازم يتسوى للعرسان الجدد وخصوصا الاقارب عشان يتأكدوا من صحتهم وصحة الاولاد بعدين :D :D
<<=====ابوك ياشيخ اللي يسمع منك هالكلام يقول دختور :D :D

<center>كتم السر</center>

أنا اشوف المرة بطبيعتها هي اللي تحكم كتم السر من فضحه ونشره بين الناس سواء كانت المرأة قريبة ولامهيب قريبة (يعني :D بعيدة)
واذكرك بحديث للرسول صلى الله عليه وسلم ((إن من أشر الناس عندالله منزلة يوم القيامة الرجل يفضي إلى امرأته وتفضي إليه ثم ينشر سرها)) والعكس صحيح والله أعلم

<center>الصبر</center>

أنا اواقفك في رايك ان المرة القريبة تصبر على زوجها وعلى عمايله :D :D بحكم الزوجية ثانيا والقرابة أولا!! فعاد الله يعين لو صار طلاق
<<======ياوحيد الشقراويات يصبرون على اقاربهم :confused: :confused:

هذه الأمور اللي حبيت أناقشك فيها يابو الجزيرة
<<=====عشان اسم ابوه الجزيرة :D :D :D

نتمنى نشوفك اكثر :) :p

برايفت للطير:
جرب المرة اللي بمواصفاتك وقلنا نتايج التعاسة(قصدي السعادة ;) )كيف!!

وحيد الجزيره

07-07-2001, 14:56

قهرر :( :(

لي ساعة اصفصف وألوّن .وفي الاخير تطير مني الردود في لحظة :( :(

أبرد بعدين .. والمعذرة لكل اللي ردوا على تأخر الردود :(

وحيد الجزيره..

it's me

07-07-2001, 19:39

<center>
سلااااااام اخوى وحيد الجزيرة..ومافيه غيره.. :)

شكرا على كلماتك الطيبة... :)

نجى للرد.. :)

يقول وحيد..:
"""" بس كلامتس عن الجمال انه يضر اكثر من انه يفيد امممممممم هذا احس اني عجزت اوافقتس عليها لانه مطلب ضروري ان الواحد ما يلتفت لغيرها..اجل تبين اخذ وحده شيفه واقعد اقابلها؟؟؟
ولو الوجه الحسن له تأثيره ...""""

وتقول اتس مى..:
""" نجى لفكرة ان البعض يركزوا على الجمال..
ترى
"" الجمال مهم جدا"""
خصوصا بايامنا هذه مع كثرة الصور اللى تحسن هيئات اللى بيطلعوا لكم في كل مكان... :)
لكن اكيد
"" لازم معاه..وعى فهم دين قلب كبير وحناااااااان يملا العالم """
والا الجمال هنا يكون ماله
لزوم فعلا لانه رح يضر اكثر مما يفيد...

واستغرب راي الكثيرين وتصورهم ان الجمال لابد تكون صاحبته مغرورة او سطحية او غيرها من الاتهامات...""""

اذن اخوى وحيد مااختلفنا.... :)</center>

ما خليتولي اسم

08-07-2001, 01:42

<center>

أخوي الشقراوي :)

شكلك انك تلخبطت من كثر النصائح الي فوق :)

خذ رأي خذ اجازة فكر في الموضوع ،، ومتى ما كنت جاهز ترى البنات واجد ،،، و الاختيارات كثيره ،، عاد ياشقراويه مثل بعض النصائح يا من بعيد :)

اما الميزات و العيوب في اختلاف قربها من بعدها فليس هناك قاعده ثابته

اهم شيء مثل ما قالوا فلوسك زاهبه و لا وسع صدرك من هالموضوع :D

الله يكتب الي فيه الخير :)

تحياتي :)</center>

amdady

08-07-2001, 03:37

مــــــــــــــــــــاشــــاء الـــلـــه
تبي تعرس :confused: صعرور افندي كان ناوي يعرس بس هوّن ...؟؟؟ :D
تبي الشور!!!
اترك عنك اهل شقراء وخذ لك جدّاويه عشان اذا جا في الصيف تلقا واصطه تدخل مهرجاناتهم !!!<== يحسبها زي الفيصليه مهوب اية واحد يدخلها !! :confused:

عرمه

08-07-2001, 06:21

وحيد الجزيرة
تبي تعرس ومن ورانا خير أن شاء الله لا وتشجع الصناعات الوطنية :D عساك على القوة
أقول ترفق على عمرك مسوي فيها قدام الناس إنك حيوي وتستحي خخخخخخخ على غيري تمشى على البني أما الرجال فهين كان مشت عليهم
على كل اللي علي أني أدعي لك وأقول
الله يرزقك البنت اللي تقدرك وتعينك على أمور دينك ودنياك

وحيد الجزيره

09-07-2001, 17:36

جيت.. :D :D

** المجد **
هلا بك اخوي وشكرا لردك..بس من نخلي بناتنا له..اجل نخلي بناتنا يقعدن ونروح ندور على الاغراب :)..حياك الله ثمن تعال من قال اني ابحط عرس :)
<-- شقراوي يخاف من دفع الدراهم :)
حياك ربي ودمت لاخوك :)

** بنت زايد **
:) :) :) :)

** مديحة هانم **
مشكورة اختي على الرد وكلامك حلو..هو ما فيه كلام..بس مع مين الغالب يكون التفاهم حاصل؟؟!!
ثمن الزواج من الخارج ذي مستحيلة..لان عندنا فيذا اللي يسدون..ويملون العين <-- اجحدوها عاد :)
حياتس ربي وتشرفت بردتس.. :)

** عابرة سبيل **
الله الله الله..وين المتجول يشوف المواهب اللي طلعت في موضوعي..وش ذا الشعر والحركات يوخيتي..ثمن وش ذا الشروط يا عابرة سبنسر(تكرمين) :D :D
تسني اشوفتس تاصفيني انتي وهالبيت ;) ;)
وعز الله ماهنا شوفة تسني اباكل هالمخطوبة :(
وش خليتي للشيبان :) :)
ومشكووورة :) :)

** بنية نجد **
هلا هلا هلا هلا ببنية عمي..زي العادة كلام درر..ومالنا غناة عن الشقراويات..وش اسوي هي امي واختي وعمتي وخالتي :(
يعني مقابليني كل وقتي :(
نرجع لموضوعنا..
الزواج من القريبة بالحيل ذا انا شاطبن عليه واقول انه ما يصلح ابدن..يعني على قولتس اللي وصفتيها يا خال ابوي حك ظهري :) :) ذولي وش حليلهم.0 :)
ثمن تتاخذين تعهد مني؟؟ روحي‍‍ خذي تعهد منهم انهم ما يطالبونتس اني اخذ وحدتن ثانية من جماعتهم ايلا شافوني :) لاني صراحة شقراوي ووحده وياللله :)
ومشكووورة لردتس يالغالية.. :)برايفت لبنية عمي:
وش رايتس بحركة الاسامي اللي تجي في الردود بين نجمتينd:d تراي لاطشها منتس..مهوب عقب ترفعين قضية عند الممرور..و جاي ابستأذن منتس(بدري).. :) :)

** أبو هيكارو **
هلااااااااا بالمستشاااار..وين يا خااالي..والله اني فرحت يوم شفت ردك..اثري طلعت احبك يا تعبان وانا ما ادري ;)
بلا شقراوية بلا هم..
انت وش علومك؟؟
ووش مسوي؟؟
لو تبيني اخذ اندونيسية آخذ علشانك :)
والشيبان ماهنا شيبان هالحين..كلن متعلم ويدخلك منّا ويظهرك منّاك :( :(
خطر ما يلعب عليك ويعطيك شيّن مغشوش :) :)
لك اجمل وارق والطف تحياتي يا ابو الغاالية ;) ;)

ولنا عودة...... :) :)

بائعة الكراث

10-07-2001, 06:38

ياحييييييييل الله يالشباب اذا بغوا يعرسون
كنهم اللي طالعين من الثانوي ب(95%) وانواع الثقه بنسبتهم يوم جوا يقدمون طب خذوا ملفاتهم بالتشحذ وجدعوهم في كلية (الصيدلة) والا (العلوم الطبية التطبيقية)

مساكين انواع الثقه مادروا انه بيجيهم انواع الكروت الحمر

اخوي وحيد<---- ركزوا على كلمة اخوي لاني راحمته بقوة

انت رح اخطب اللي تبي تاخذك وبس

ترا ثلاثة ارباع البنات طايحين الحين في موضة ابكمل دراستي العليا(تطورت اوثيثية) , انا مهوب حلمي الزواج, انا ما ابي ارتيط توني صغيره(عمرها 27), ابي اقعد عزوبية ابي احس بالاستقلال (هذا كبي وبيست من كلام اخوانها)

تراي صادقه
وتبي الجد والله لوني رجال كان ما اخذ الا فرنسية

ياناس نفسي اشوف واحد عيونه زرق ويقول (جيتاااا)

بيجي كم واحد يتميلح ويقول بناتنا وبناتنا واخلاقهم ومدري وش بعد تراي اقول فرنسية ((مسلمة))

بـردان

11-07-2001, 07:13

وحيد ..

باحط نسخه من موضوعك في المتميزه علشان تشخّص به اذا رحتا تخطب :D

http://winmear.hypermart.net/eqla3/rayanmotamayz.gif

sOsO

11-07-2001, 15:12

اعقلها وتوكل
القرب والبعد ماله دخل شخصيه البنت نفسها ومبروووووووووووووك مقدما

وحيد الجزيره

16-07-2001, 19:07

الله يقطع ابليسكم مصخن لي ثلاثة ايام ما اتحرك ولا احدن جا ينشد عنّي :( :(
بس اوريك الوعد قدااام :)

** لما **
هلااا بتس اختي..وألف شكر على كلماتك الحلوة..واللي تدل على حسن نيتك :) :) بس اللي قلتيه هذا ماللولد حيلة يعني الاهل ممكن ينصبون ويا كثرهم يعني يا يصغرون البنت او يكبرونها بس اهم شئ تروح من عندهم :(
عاد ما اقدر اقول وروني شهادة ميلادها :( قسم بالله ان يصفقني الشايب بمخمس :D :D
وآآآمين من بؤك لباب السماء..وينها فيه بس :( :( شكلها ما جابت خبري..تلقينها نايمة وتشخر ههههه هذولي الشقراويات هذا طبعهم خخخخخ :)):
ألف شكر لردتس..ودمتي.. :)

** بنت زايد **
هلااا بأهل الامارات كلهم.. :)حتى انتم عندكم شقراويات :)
<--دلخ
حياتس ربي وألف شكر لردتس.. :)

** ما ادري **
هلا بك اخوي..والشقراويات اقدع نااس وما عليك من احد..تراهم منقهرين وانا أخوك منّا ومن حريمنا :)
والقريبة كلن يمدحها (مالك الاخشمك ولو هو اعوج) :)..يعني ماهنا الا الشقراوية عاد اجتمعت انها تحشم الرجال ( وهذه صفة فيهم ) وانها قريبة :)
تسلم على ردك..حياك ربي :)

** سلطان المنتدى **
انا قايلن ان عابرة شايفتني بس من معلمها عنّي :) :)
ثمن ما تلاحظ انهم كثروا اللي يبون يجون العرس :( :(
<--- توهق هالشقراوي..
<-- يبي يحط نواشف :)

عاد رد بنت نجد طويل ومستشارة لازم ارد عليها وانا مركز اخاف ارد غلط همن اصور انا ويوزري بره المنتدى :)

لنا عودة :) :)

حارس الكوخ

16-07-2001, 20:16

مســــــــــــــــــاء الكمونيه اقول يا وحيد الجزيره حتى انا محتار حيرتني معاك بس اسمع انت ماعليك ال تفهم ابوك ومك بل موظوع ون شاء الله يعني هاذا وسمع ون قالو لالالالا
لالا
لالا وش توك

اتركهم ثلاث اسابيع ورجعلهم ون قالو
قلتلك لالالالااصبر شهر وقلهم وكذا

<<<<<<<<====== تراه ماقرى الموظوع كله عشانه ماله حيل
مع السلااااااااااامه يا وحيد الجزيره ;)