زحمة الشرقيه في العيد

[ابوبرغش]

رحت انا وخويي وصديقي راشد للشرقيه ووصلنا هناك الساعه تسع الصبح وكان الجو مافيه احسن منه .... وكان راشد معصقل مره .. وكان اسمن مني شوي يعني انا وياه كنا رقم 64 بتقولون وش معناته اقول لكم مدري بس حبيت اغير ذبحونا العالم دايم كنكم رقم 11 كنكم رقم 11 المهم انا وراشد ماننام الا لازم متعشين علشان مايطيرنا الهوى ...وفرشنا مراقدنا ونمنا وما كان فيه ناس واجد ... وما قمنا الا الساعه 5 على ازعاج خلق الله وطليت من تحت الكنبل اليين فيه امم لدرجة ان المكان الي بيني وبين رفيقي راشد قعدت فيه عائله ومن زود الميانه ابوهم متركي على راشد خويي وهو نايم وامهم منومتا ولدهم الصغير معي وملحفته وبنتهم الصغيره تلعب في رجلي مره تدفنهم ومره تطلعهم لا وتضحك تقول لبوها اليين دفنت رجلي يبه تحداني اطلع من تحت التراب ضب وتكب مويه على الرمل اليين تطلع رجلي وابوها الدلخ قاعد يكركر ويضحك وانا والرشدي ما نقدر نقوم معهم حريم فاتشين . .. وما خوفت الا من بنت معهم دبا .. اخاف تبرك على هالكنبل تحزب ماتحته احد ...
والجماعه والله ماهمهم ولا كنا موجودين بيني وبينكم انا ماخوفني الا الين جو يروحون اخاف يضفونا مع عفشهم.
وش نسوي وش الدبره المهم جى المغرب قلنا زين بيروحون هالحين جا الليل خلاص وش يقعدهم ... المهم يوم ناظرنا اليين الربع ماطرى عليهم يروحون لا وبيتسبحون الام والبني المهم لبسو لبس السباحه الميوه ولبسوا عليه شلحه ودراعه وبشت (متعبين انفسهم شارين ميوهات ) ..... وقلنا زين بيروحون يسبحون وننحاش من هنا المهم يوم جو يروحون قال ايوهم روحو انتم انا ابقعد هنا احرس العفش .. وقعد ابوهم الدلخ يحرس عفشهم الي هو انحن
.... والله المشكله وش يفكنا من هالدلخ ... المهم الرجال قام يحاسي نفسه يقول والله فيه شوي هوى وراي مارجع السياره شوي تذري عنا.... المهم الدلخ المهبول قام وشغل السياره ... وقام يرجعها شوي شوي المهم انه ما وقف الا عند رقبة رويشد ... المهم الدلخ يوم حول مااعجبته التلبيقه قال لنفسه خل ارجع السياره شوي ...... وكل هذا وانا ورويشد نتنافض من الخوف وعرقانين الناس جايه للبحر تسبح فيه وحنا جنبه سابحين عرق .... المهم الحمدلله يوم جى بيشغل السياره مره ثانيه جت مرته وبناته خالصين سابحين المهم حول وجلس معهم وكل ذا وولدهم الصغير نايم جنبي ... المهم ان بنتهم الدبا الي انا خايف منها قعدت علي رويشد خويي ... كنت خايف ان ابوها يوطاه بالسياره وياليته وطاه كان اريح له من هالرصاصه ... وكل ذا وابوهم وامهم وباقي بنيهم فرحانين ويسولفون .... لا وبنتهم الدبا تسولف وفرحانه وتقص على ابوها وشلون سبحت وكل ذا وها الضعيف تحتها ... والمشكله وش اقول لهله ..... وكان معهم بنت زينه هي الي مهونت مصايبي شوي ياهو فيها زين مابعد شفته ... المهم البنت الزينه قالت لامها فيني النوم ابنوم ..قالت امها عندس واحد من هالكنابل تلحفي واحد منهم ونومي واختارت الكنبل الي انا تحته وفصخت عبايتها ونقابها وجت ...........
ــــــــــــــــ
ــــــــــــــــ
الكماله بعدين
هل نامت بنتهم المزيونه؟
مامصير رويشد؟
الكنابل منهي له ؟ وليه كعدوا عند كنابلنا؟

[قابعها]

ههههههههههههههههههههههههههههههههههههههههههه
ههههههههههههههههههههههههههههههههههههههههههه
راح فيها رويشد هههههههههه بسرعه كمل يابوبرغش
ههههههههههههههه والله انت منتهي ومنسم هههههههه

------------------
اذا صار حبيبك عسل صكه واستريح

[كحيلان]

هاههاهاهاااااااااااااااااااا
هاهاههاهاهااههاههاهااهااهها
ابو برغش زين ان بنتهم الدبا ماكلت قرصان وشربت لبن والا راح رويشد
في خرايطها
كان يموت ضحيه كيماوي مودماني

[المهتني]

هههههههههههه ههههههههبييييييييييي
هههههههههههههههههههههههههههههههههههههههههههه
هههههههههههههههههاي الله يرجك يابو برغش
كمل تكفا علمنا وش صار ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

[رايح فيها]

ابو البراغيش اخلص علينا وش صار ،،،،،،،،،،

------------------
عطه خير @@@@

[b]<small><small>[ تم تعديل الموضوع بواسطة &nbsp; رايح فيها &nbsp; يوم &nbsp; فبراير 02, 2000]

[خالع]

انت منتهي هاهاهاهاهاها

------------------
خالع والاصطب والع

[ابوبرغش]

هلا والله بقابعها وكحيلان والمهتوي وخالع ولا يهونون الباقين

وبالنسبه لباقي القصه قريب انشالله واشكركم على شعوركم


------------------
اذا سالت الناس عنـــي فانا حوطي واصل العرب مني

[كحيلان]

عجل علينا يا ابو برغش
عجل لاتطول نبي مثل هالمواضيع المقلعه من قلب

[الداشر]

ابــــــــــ برغش ــــــــــو يرحم والديك كمل!!!!!!

------------------
داشر دشوري عدوي دايم مقهوري

[المنفهق]

هلالالالالالالالالالالالالالالالالالالالالا ابو برغش
اقول ما علمتنا وش الزمزميه اللي معهم؟ هم كان معهم ترمس شاهي والا لا واذا كان معهم , وش الرسمه اللي عليها رسمة فيل والا اللي عليها رسمة نمر تراها تفرق كثير
هذا من شنق ومن شنق آخر لا تبطي علينا بالجزء الثاني تخبر حنا نتابع ونقدر المتابعين ويهمني اعرف مصير رويشد.

[ابوبرغش]

الجزء الثاني من زحمة الشرقيه.
بنتهم الزينه الي اعتقد ان الزين مسمى عليهاوالعطر مطلع منها رفعت الكنبل الي انا تحته بتنوم معي .... احمدك يارب صبرت ونلت هالحوريه رزق من عندك ... يوم توها بتنوم يوم ناداها ابوها الدلخ يابنت لاتنومي احنا طالعين للبحر علشان تنامين تعالي اجلسي معانا ... ويافرحه ناتمت... لكن يكفيني انها بغت تنوم جنبي... المهم ان الدبا مازالت منوخه على رفيقي رويشد وش الي بيقومها لا وتثاوب يالله سترك عسى ماتفرشط عليه وتنوم ... المهم قربو العشا والشاهي .. والدبا تعشى معهم وهي على صديقي رويشد... يعني كلمال الوزن وزايد ... تصدقون انها عقوبة على خويي رويشد ... فخويي رويشد يشتغل على ميزان التريلات الي على الخط الطويل ودايما يتجاوز عن الوز الزايد وبسببه تحفر طريق الشرقيه وكل الناس يدعون عليه ..... وسبحان الله يمهل ولا يهمل ذا الدبا خذت حق الميزان والطريق والناس.... وابوهم الدلخ قعد يسولف عليهم يقول يابنات يوم كنت شباب عمري في حدود 24سنه كنت نايم في المحل هادا وفجئه اليين ذيك الحوريه تصحيني من النوم ... تعرف اسمي تقول يادلخ يادلخ قوم قوم من النوم المهم يوم قمت ماصدقت الي انا اشوفه ايش هادا الجمال ايش هادا الجسم ياهووه .... المهم طارت بوهتي فيها وماعرفت اتكلم
وقالت لي ليش انتا نايم هنا ... برضه ماعرفت ارد عليها قالت لي بعد ماقربت وقعدت جنبي وحطت يدها على فخذي .... شكلك حيران ولا تعبان ايش فيك.. اخيرا قدرت ارد وقلت لها مافيني شي طيب وبخير الله يسلمس ... قالت اطلب مني 3طلبات في حدود دقيقتين واحققهم لك .... وقلت ياواد ايش تطلب ايش تطلب مامعي الا دقيقتين ... وقاطعتني وقالت بسرعه ترا بروح واخليك ... المهم انا كان طموحي بيت اسكن فيه ووظيف جنب البيت وفكرة وقلت لها الامنيه الاولى ان تبنين لي مسجد كبير ... قالت المسجد انبنا هالحين وش امنيتك الثانيه ...قال ان يكون تابع للمسجد بيت مذن ...قالت بنينا البيت .... قال الامنيه الثالثه ان اكون انا المذن ... قالت اعتبر نفسك المذن ومن ذاك اليوم وانا احب هالمكان واتمنى ان تطلع مره ثانيه علشان اشكرها تلقون هالحوريه كبرت وطاحت سنونها ولابسه نضارات اييه الله يذكرها بالخير .... ماقلت لكم انه دلخ طموحه بيت مسجد .... المهم ابوهم قام يتثاوب ويحق في اسفل بطنه ( سعودي معروف وين يحك اما مدخل يده في خشمه ماترده الا الكبكات والا يحك اسفل بطنه صالخ الدعوى )وبيني وبينكم اذا جى الواحد في الشارع تلقاه يعد الي صالخين الدعوى تلقاهم يحكون تسن بينهم تحدي .... والخوفه لو يطلع على واحد منهم المارد من كثر الحك....
المهم ابوهم قال ليش يامره ماجبتي معنى الا كنبلين لوس جايبه عددنا كان نمنا هنا ..قالت المره انا ماجبت ذا الكنابل مهوب انت الي جايبهم قال لا... قالت ياخزياه كنابل الناس وقاعدين عليها قوموا نمشي قبل مايجون ..وكل ذا وهالمساويك الي هم انحن تحت الكنابل ... المهم يوم سروا قمت بسرعه ادور خويي رويشد رفعت الكنبل مالقيته ... والله المشكله اكيد ناشب في بنتهم الدبا وش السوات .. وقعدت ذيك اليله ابكي واطلب من الله ان الحوريه تطلع علي واطلب منها انها تهد بيت المسجد .. المهم يون رفعت الكنبل اليين رويشد لازق في الكنبل جنب صورة النمر ويشاهق احداً احد

وضفينا عفشنا ورجعنا للحوطه الله لايخلينا منها.

(هل تعلمون ان بيت المسجد صار طموح وهدف يسعى له)

------------------
اذا سالت الناس عنـــي فانا حوطي واصل العرب مني



[b]<small><small>[ تم تعديل الموضوع بواسطة &nbsp; ابوبرغش &nbsp; يوم &nbsp; فبراير 05, 2000]

[رايح فيها]

أقول ابوبرغش لاعاد تعدون الحوطة !!!!!! المرة ذي ستر الله على خويك وسلم والمرة الجاية الله اعلم وش يصير ؟؟؟
وبعدين سمعت أن والت ديزني بتفتح قريباً في الحوطة وبتفككم من العنوة للشرقية وغيرها ,,,,,,

------------------
عطه خير @@@@
ترا اللي يبغاني يلقاني على بيجر /
raehfeeha@maktoob.com


[b]<small><small>[ تم تعديل الموضوع بواسطة &nbsp; رايح فيها &nbsp; يوم &nbsp; فبراير 05, 2000]

[خالد]

المشاركة هذي يا أبو برغش، الإقلاع تراه مسمى عليها، والرجة طالعة منها، والصرقعة قصتك هي مصدرها. أضحك الله سنك على هالفلم الحوطي.

على فكرة، أشوفك تقول انحن، وربعي من الحوطة وسدير واجد. وأشوف أن أهل سدير هم اللي يقولون (انحن) بمعنى (نحن) وهل الحوطة والدلم يقولون: (إنا). انت من الحوطة والا نعام والا الحريق؟ أنا بس ودي أعرف الكلمة هذي إن كانت من كلامكم والا لا، مع العلم إني شاك إن واحد من ربعي (من أهل الحلوة) كان يقولها، بس إني ملخبط بينهم وبين أهل سدير. والا هذي كلمة توها طالعة جديدة مع هالحي الجديد (السلامية)؟ على فكرة، خالتي الله يطول عمرها على طاعته تقول: (الاسلامية)، وانا عجزنا نبي نفهمها انها السلامية وما عندها نية. بس وش تحرون، والله ماقصرت، يقال لها هالحين أنجزت إنجاز عظيم أنها نطقت ذا الكلمة حول الحروة، والا تراها تسمي الفاكس (الفاس). أها عاد لا أحد يذب على خالتي، روحوا العبوا بعيد. كبارنا حقهم الكرامة.

أخيرا، سالفة على تعليقك الأخير: (هل تعلمون ان بيت المسجد صار طموح وهدف يسعى له)، بس أبفتح موضوع جديد لها علشان مايملون الناس.

------------------
__________________________________________________ _________________________
الكمبيوتر مثل الزوجة الثانية!

[خالد]

كنت مرة في إدارة شؤون المساجد في منطقة الرياض، وكان فيه ناس جايين يختبرون علشان بيصيرون أئمة. وفيه ناس ثانين جايين يدورن إذا فيه مساجد يصلون بها، والله منعم عليهم بحفظ بعض الأجزاء (وودهم يترزقون الله).

المهم، كان فيه واحد شباب قاعد قدام مسؤول التسجيل في المكتب، والموظف كل شوي يقول اسم حارة من الحواري والا حي من الأحياء، ثم يسأله الرجال هذا: المسجد له بيت، ويقول له لا. يقوم الولد ويعطيه أسماء بعض الأحياء ويقول: المسجد ذا ودي أصلي بهم، ويقول له: هذولي محصلين لهم إمام مختارينه من حارتهم... وهات أشوف. الولد يقدم أسماء وتصير رايحة، والموظف يقدم أسماء ويعرض عليه يصلي بهم، وهو يسأله لهن بيوت ويرد عليه لا، ويهون الرجال.... وعلى هالمثوبه...
المهم، الربع اللي يحترون الموظف طفشوا، قام واحد وطمر على الولد ذا وقال له: انت يالخو ريحنا، أنت تبي مسجد له بيت، والا بيت له مسجد؟ البيوت اللي لها مساجد رايحة ومهومب محترينك لين تجيهم، والمساجد اللي مالها بيوت واجد، وتلقى المسجد منها له إمام كل اسبوعين.
الولد ضف وريقاته وظهر.

[ابوبرغش]

الاخ رايح فيها الله يبشرك بالخير على هالخبر بس عساهم يصلون .

الاخ خالد هلا والله انا حوطي وافتخر بهذا ويكفينا انا الوحيدين الي طلعوا الشيب في الكمبيوتر.

وبالنسبه للمساجدانا معك والمشكله ان فيه ناس ياخذون المسجد علشان بيته ويحطون عامل يصلي بالناس وهم جنب المسجد مايصلون واذا ضغطوا عليهم طلعوا من البيت واجروه الحمد لله رب العالمي.

وبيني وبينك ياخالد تسانك تعرف احد في شؤون المساجد الله يخليك خله يدور لي مسجد فيه بيت .

------------------
اذا سالت الناس عنـــي فانا حوطي واصل العرب مني

[ستيف]

هاهاهاهاهاهاهههههههههههههههههههههههههههههههههههاها هاهااحاحاحاحاح
الله يحوسك ياابو برغوشه""واحد يبي يحتك""وينك يخوي لي كم يوم مسجل وادورك ما لقيتك لكني عارف دوامك الله يعينك عليه عاد دوامين ياخي ارحم نفسك والا اقللك قللي وين انت به تشتغل عشان اكلمهم لك ترى حبايبي واجد............
وعلى فكره ان كانك ما قريت موضوعي عن التقييم فاسمحلي اقلك انك نلت لقب
_____________________KING of EQLA________________________________
وسلامتك
لا تنسى تبوسلي برغوشه
وقلنا وش اخبار ام برغش ""واحد يمون""

[بدوي اقشر]

وشي الشرقيه الله يحييك

------------------
حمرعين

[ابوبرغش]

عزيزي ستيف مرحبا هيل تعداد السيل و اشكرك على شعورك

وبالنسبه للتقييمك لي فاعتقد انك غلطان مع اعتذاري لك عن هالكلمه بس حبيت اقول لك لانك جديد ماتعرف الساحه وترا فيه ناس ما اجي عندهم شي

واعتقد ان الكثيرين من كتاب الساحه بتزعلهم علي لانك عطيني شي مهوب لي

مثال على ذلك لو جا واحد وقال ان محمد لطف هو احسن لاعب هلالي وهو ملك الهلاليين اعتقد ان جميع الاعبين بيكرهون محمد لطف لانه اخذ لقب لايستحقه واي لاعب آخر غيره جدير بهذا اللقب.

عموما اشكرك وارجو ان تكون اكثر دقه في المرات الجايه


------------------
اذا سالت الناس عنـــي فانا حوطي واصل العرب مني

[متنح]

الحق ما يزعل يا أبو برغش وتراك تستاهلها وإن كنت منت مصدق نعمل إستفتاء وانت تشوف بنفسك ، تستاهل نفتح لك مندى خاص بإسمك يا ابو برغش.

=======
نفس متنحه بس عضوة مجلس.

[Mas6ooL]

<div align="Right"><font size="+1" face="Arial" color="#000000"> ..</font></div>