يقولون: نعالجك .. بس تصير مسيحي ..!!

[مرقوق]

<center><font color="Navy"><font face="Tahoma">السلام عليكم و رحمة الله و بركاته


خطرت في بالي فكرة الموضوع هذا من تقريبا اسبوع بعد ما شفت اعلان في التلفزيون عن منظمه تمول و تجمع تبرعات لصالح الفقراء في جميع انحاء العالم .. الدعايه كانت تعرض لقطات "بصدق" تقطّع القلب .. اعلان مدروس .. مدته تقريبا من 45 ثانيه الى دقيقه .. في البدايه سألوا سؤال بسيط .. كان السؤال كالآتي:

<font color="Red">هل ستتأثّر ميزانيتك اذا تبرعت بمبلغ باوندين (12 ريال) شهريا..؟!</font>

سؤال ذكي و موجَََّه .. يحفّزك لمتابعة الاعلان .. طبعا اخوكم اللقافه تجري في دمه بدون ما يحفزه احد :) .. انتقلت الصوره الى دوله افريقيه من اللي يعانون الفقر و المجاعات .. اطفال يفتقدون ابسط اساسيات التغذيه السليمه .. تحولوا بفعل الجوع الى هياكل عظميه مكسيّه بطبقة جلديه "رايحه في عينها" .. منظر يدعو الى الشفقه .. منظر شفناه الف مره .. لكني هالمره شفته كأني للمره الاولى ادري ان فيه ناس حالتها بهالسوء ..

في نهاية الاعلان .. حطوا رقم مجاني تتصل عليه و تعطيهم رقم حسابك .. و يرسلون لك "فورم" تعبيه .. عشان يكون لهم احقية سحب المبلغ المذكور شهريا بدون ما تتعب نفسك و تروح تحول لحسابهم او تدفع لهم مباشره ..

بعد ما خلّصت الدعايه فكّرت "على غير عاده للأسف :(" في السبب اللي خلاهم يهتمون بالعالم الثالث الى هالدرجه .. كنت بصراحه متحمس للتبرع .. يعني ثنعش ريال ماهيب مأثره علي و لله الحمد "الثنعش ريال تجيب اربع ببسيّات هنا .. ماهيب واجد" .. راحت افكاري يمين و يسار .. آخر شي رسيت عليه ان المنظمه هذي هي في الغالب منظمه "تبشيريه" مثل ما يسمونها .. يعني كنت ابدفع فلوسي عشان اساهم في نشر ديانه منسوخه ..؟! عسى الله ياخذني قبل اسويها :( :(

طبعا مهما جمعوا من مبالغ بتروح في اكل و علاج للفقراء هذولي .. اقل شيء بيشكرونهم على المساعده و بيسألونهم: انتوا ليش طيبين معنا ؟! و الا: ليش انتوا تساعدونا ؟!!

بيجاوب المبشر او المبشره و ابتسامته شاقّه وجهه : لاننا مسيحيين .. و ديننا يدفعنا و يحثّنا على مساعدة المحتاجين .. و لأننا نطبّق "لاحظوا نطبّق" تعاليم ديننا جينا عشان نساعدكم .. تخيلوا ردة فعل هالضعوف اللي كانت المساعدات تمثل طوق نجاة لهم .. لو فرضنا انهم ما كانوا مسيحيين .. مسلمين على سبيل المثال .. احتمال كبير انهم بيقولون هذا و الله الدين القويم "و العياذ بالله" .. وش استفدنا من ديننا .. هذا لنا سنين متمسكين به و ما شفنا من "اخواننا" المسلمين الا الخراط الفاضي .. ما يتبرعون لنا الا اذا صار عندنا زلازل و الا فيضانات .. طيب و اذا مافيه زلازل نقعد بها يعني ..؟!
تطرقت قبل شوي لنقطة تطبيق تعاليم الدين .. الدين المسيحي او النصراني "او كما يُسمّى" لا يحثّ "بما تبقّى منه" على فعل الخير كما يحثّنا ديننا الاسلامي .. ربنا سبحانه و تعالى امرنا بايتاء الزكاة كركن اساسي من اركان الاسلام الخمسه .. ثم بالتصدق على المحتاجين سراً و علانيه .. و الصدقه ليست بفرض لكنها مستحبه على ما اعتقد (اتمنى من الاخ السلطان ان يبين لي اذا كنت غلطان جزاه الله خير) .. النصارى يدفعون و يتبرعون بدافع انساني .. و ليس دافعهم بالدافع الديني .. يعني حنّا المفروض نكون احرص منهم على النقطه هذي .. خصوصا ان تأثير تبرعاتنا راح يكون اقوى على هالمساكين اللي خدودهم يبست من المشق .. و لو تشوف واحد منهم رحت تصوّر معه تحسبه اكبر قطعة "شابوره" صُنعت لتدخل موسوعة جينيس القياسيه ..

على طاري موسوعة جينيس .. قال لي واحد من الشباب توه راجع من السعوديه انهم سووا مهرجان في جده .. و من فعاليات المهرجان انهم طبخوا 250 ذبيحه على ما اذكر .. ليش طيب ..؟ كل هذي شفاحه في اهل جده ؟ ما هقيت و الله .. الا عشان يدخلون الموسوعه .. بدال ما ندخلها كأكثر شعب منتج في العالم .. او اكثر شعب مُختَرِع .. دخلناها كأكثر شعب "يضرب بالخمس"

تعالوا نحسبها .. 250 ذبيحه قيمة الوحده نقول 600 بعد الخصم (و الله اني على نياتي) هذي 150000 ميه و خمسين الف ريال .. نزود عليها قيمة التباسي "جمع تبسي" اللي حطوها .. خلونا نقول ان كل ذبيحه بيشيلها تبسيين .. هذي 500 تبسي قيمة الواحد مية ريال على الاقل .. 50000 ريال .. طيب الطباخين او "الشيفز" عشان ما يزعلون .. كل واحد يستلم بالقليله 15000 ريال على هالانجاز اللي دخّلنا التاريخ من اوسع "امعائه" .. 70 شيف معقول ..؟ نقول سبعين .. امممش (ما صدقت الناتج) مليون و خمسين الف ريال عدا و نقدا .. بخلاف البباسي و الحلا .. على كم لفة سماطات "جمع سماط بتصرف" عشرين الف ريال معقوله ..!

نشوف الناتج طيب ..

150,000
50,000
1,050,000
20,000
------------------
1,270,000 ريال

طبعا كلّفت اكثر من كذا بكثير جدا .. لكن نكتفي بالمبلغ هذا .. السؤال اللي يناقز و يصاقع في الجدران يبينا نشوفه .. كم ذبيحه انكبّت في الزباله ..؟! ما يحتاج اجابات .. كثير جدا .. اذا ما كان اكثر من ثلاث ارباعها .. لو فرضنا ان هالمبلغ اللي صُرف على هالـ"فيستفال" راح لأفريقيا او اندونيسيا .. الفلبين .. الشيشان .. او اي دوله مسلمه تعاني من المجاعه او سوء الرعايه الصحيه .. اعتقد ان المبلغ المذكور بيغطي مصاريف اكثر من 200 عايله من حيث الاكل و الشرب و العلاج لمدة ثلاث سنين قادمه على الاقل .. و احتمال كبير يتبقى مبلغ "محترم" يقدرون يلعبون به قمار !!.. :rolleyes:

&lt;=== خربها :D


نقطه ثانيه .. سمعت من احد الاخوان ان بأستطاعتي التكفل ببناء مسجد في اندونيسيا على ما اعتقد بمبلغ ما يتعدى 32000 ريال .. لو فكرنا شوي .. هالمبلغ راح ينصرف و يضيع بدون فايده .. اقول لكم ليش .. المسلم يقدر يصلي في اي بقعه طاهره .. و على فرض اننا بنينا لنا جامع كبير يتسع للمصلين يوم الجمعه .. يكلف مية الف ريال على الاكثر .. كم واحد تبرع جزاه الله خير بـ 32000 ريال عشان ينبني مسجد .. عشرين مثلا .. 640,000 ريال صُرفت لبناء عشرين مسجد .. نقتطع منها مية الف ريال للجامع الكبير .. زائد 19 مسجد صغير .. تكلفة الواحد عشر الاف ريال .. و اقصد هنا مسجد "ستاندرد" يعني غير مبالغ في بنائه او فرشه .. راح يبقى لنا من الـ 640,000 ما يساوي 350,000 ريال .. ليش ما ندفعها لهالضعوف بدال ما نبني بها مساجد الله اعلم اذا كانت ستمتليء بالمصلين ..

قبل ما تشيشون علي .. خلونا نفكر مره ثانيه .. أمرنا الرسول صلى الله عليه و سلم بالآتي: اذا حان موعد الصلاه و كان الاكل جاهز .. فمن الاولى ان نأكل ثم نصلي .. لان بالنا بيصير مشغول بالاكل وقت الصلاه .. و الخشوع هو احد شروط صحة الصلاه .. و لن يتحقق هذا الشرط ما دمنا نفكر في الاكل .. فيه حديث شريف يتحدث عن النقطه هذي .. لكني للاسف ما اذكر نصه .. قياسا بما سيحصل "بالتأكيد" في اندونيسيا او غيرها من الدول الاسلاميه الفقيره .. اعتقد انه من الاولى ان نوفر الغذاء و الرعايه الصحيه و كل وسائل و متطلبات الحياه المعقوله لاخواننا .. عشان يفكرون بعدها في اداء واجباتهم الدينيه .. يعني .. نوكّلهم صح .. عشان يعبدون ربهم صح .. مع عدم اغفال توفير المرافق اللي تسهل عليهم عملية العباده ..

نقطه اخيره .. كلنا نشوف هيئات و جمعيات تعاونيه تدعم الفقراء و المحتاجين في جميع انحاء العالم .. منها هيئة الاغاثه الاسلاميه .. ناس تطوّعوا جزاهم الله خير بتوصيل الصدقات و الزكاة لمستحقيها .. لكنهم ما اولوا الجانب الاعلامي جزءاً من اهتمامهم خصوصا في الغرب .. اعتقد انهم يقومون بواجبهم على اكمل وجه في السعوديه .. لكنهم في الخارج مقصرين نوعا ما .. طول فترة جلوسي في بريطانيا ما شفت اعلان لهيئة الاغاثه او غيرها من المنظمات سواء في مسجد او تلفزيون او غيرها .. و اعتقد انه من الاولى اعطاء هذا الجانب حقه من الاهتمام و التطوير .. و صلى الله و سلم على نبينا محمد و على آله و صحبه و سلم ..

<font color="Red">تنويه: كل ما ذُكر في الموضوع "تقريبا" يمثل اجتهادات شخصيه تحتمل الصواب تماما كما تحتمل الخطأ .. فان اصبت فمن الله .. و ان اخطأت فمن نفسي و الشيطان .. أستغفر الله لي و لكم ..</font></font></font></center>

[مقلع مهوي]

<center>السسسسسسسسسسسسسلام عليكم عن بكرة ابيكم

هلا وغلا بك مرقوق
كلامك جميل ولا غبار عليه
بس وانا اخوك حنا ولله الحمد ماحن مقصرين
ولاهم باحسم منا ابد
انت لوتحسب تبرعات السعودية لفلسطين ولا تركيا ولا الهند ولا مصر ولا كوسوفو ولا غيرها
تعرف ان اللي اعطوه المسيحين ما يجي نقطة في بحر
وبعدين هذولا ما تضمن انهم يوصلونها للغرض اللي هم يقولون عنه
بس ولله الحمد احنا يحكمنا ديننا الحنيف
والذي يحتم علينا يصال الامانة لاهلها
ومغسي بكو
باي</center>

[الطير]

<center>-انا اذكر اني قريت الانجيل كامل .
وفي احد الصفحات قريت قصه ( طبعا معروف انه الانجيل محرف )
قريت قصه في احد صفحات الانجيل تقول: انه رجل غني سئل عيسى عليه السلام . ان ينصحه او يامره بشيء حتي يحبه الله او شيء من هذا القبيل فقال له: لازم تتصدق بكل اموالك وتعطيها للفقراء
------------
طبعا انا قعدت اضحك لانه مهوب شيء طبيعي انه الانسان يتصدق بكل امواله ولكن هذا تحريف
لانه القساوسه عندهم حرفوا الانجيل بهالشكل لانه الصدقات تعطى للكنيسه والكنيسه تاخذها وتتصرف
فيها علي كيفها
طبعا المبالغات اللي بهالشكل تخلي الناس يبتعدون عن اوامر دينهم

-</center>

[untame thoughts]

هلا أخوي مرقوق ..
يعطيك ألف عافيه على هالموضوع..
و الله إنك صادق ..يكسرون الخاطر هالضعوف اللي بأفريقيا و غيرها .. ودك إنك عندهم و تساعدهم ..و لو بكسرة خبز <IMG SRC="cwm6.gif" border="0">
الله يعين بس

[صفر سبعه]

اررررررررررررررحب..

حيا الله "مرقوقي" :) :)... من طول الغيبات , جاب المصايب :( :(

لا تعصب ,, امزح :D ..بس ترا صدق ملينا من الكآبه .. وترجع لنا بموضوع عن التبشير , والمبشرين ..

والا تبي تعلمنا انك في بريطانيا <IMG SRC="cwm16.gif" border="0"> ,, ترا كلٍ عنده دشّ ويشوف البي بي سي يا حبة قلبي.. :D .. لا تعصّب ,, امزح يا "دغبوس".. :) :)

تقول لا عدمتك :(بعد ما خلّصت الدعايه فكّرت "على غير عاده للأسف ")
بشرني عنك ؟؟ ..انت سليم؟؟.. مافيك شيء؟؟ ..الحمد لله :)
يقولون فيه واحد من جماعتكم "فكّر"..جته "جلطه" :D

لا واشوفك في ذالموضوع ,, خربتها من جد .. مافيه الا قوّة عمليات حسابيّه , ظرب وجمع وطرح :D
مصدقينك ياخي , والله مصدقينك <IMG SRC="cwm28.gif" border="0">

تحياتي لك يا "دغبوس" ,, ولو ماخوفي يودون ذالموضوع الماصله , كان استرسلت معك ..

لكن وش نقول ,, لو فكروا بعض ربعنا نص تفكيرك ,,, كان رحنا "شربة عدس" :D
لا والله الصدق كان صرنا "أطلق شعب في العالم"..

تحياتي لك يا غالي ,, وسلااااااااام :)

مليحوظه: دغبوس الماسنجر عندكم خربان , والا بس عندنا ؟؟ :rolleyes: :rolleyes:

[ما خليتولي اسم]

<center><font color="Purple">هلا اخوي مرقوق :)

وين كل هالغيبه

موضوع مهم جداً ،، ولكن مع الاسف لا يزال مجهود الجمعيات الاسلاميه محدود :( مقارنه بفرق التبشير

اتمنى اشوف نشاط لجان التبرع الاسلاميه تعمل بتنظيم اكبر ،،، و تنتشر ليس فقط في المناطق الاسلاميه بل تتعداه الى المناطق الغير مسلمه حتى نستطيع الحد من المبشرين

تسلم اخوي على الموضوع :)</font></center>

[الـــهـــوولـــــه]

<center>ما شاء الله عليك ألف وعيني عليك بارده مليون
على اشياء واجد

أولها
غيرتك الشديده على دينك وعلى فقراء المسلمين
جزاك الله ألف خير مضروب هالالف بالرقم اللي طلعته من الحسابات حقت تكاليف مفطحات المهرجان وايانا وكل مسلم

ثانيا
طرحك المعقول للحل بعد نقدك للخطأ اللامعقول

ثالثا
أقص يدي أن ما كنت نتخرج من قسم طبيعي

رابعا
الله يكثر من امثالك ويهدينا ويا كل مسلم
ويقضي على اعداء الاسلام
بقوته تعالى</center>

[saudi]

هلا بالاخ العزيز مرقوق...مثل ما تعودنا عليك ...موضوع فيه من الصراحه والحق الي ممكن ان اغلب الناس غافلين عنه....فمثل ما اشرت اغلب المسلمين اذا كان فيه حمله معينه لجمع التبرعات يحجمون عن التبرع <IMG SRC="cwm6.gif" border="0"> ليش؟! قال وش يضمن انها توصل للمستحقين؟؟ وفي النهايه من اللي يمد يد العون لاخوانا المسلمين <IMG SRC="cwm23.gif" border="0"> <font size="4">اكيد طبعا المنصرين...وهذي هي فرصتهم!!</font>

[السلطان]

السلام عليكم ورحمة الله وبركاته أخوي مرقوق،،،

الحقيقة أنني غائب منذ فترة ولكن فتحت الصفحة الثانية فوجدت موضوعك مصادفة!!!

وماتكلمت عنه كلام قيم وجميل فجزاك الله خيراً ولكن لابد لي من تعليق أو إضافة أو معارضة :)

المصطلح:
أشرت إلى أن البرنامج المعلن عنه تبشيري!
وهو في الحقيقة تنصيري مضل فليتك نبهت لهذا حتى لانعتاد على مصطلحات هم ابتدعوها :)

النقطة الأخرى قضية الإسراف في الأطعمة!!!
فجزاك الله خيراً على هذا التنبيه وماجاء في القصة يدعوا إلى الخوف ووجوب الأخذ على يد السفيه وأطره على الحق أطرا :(!!!
وتقديم الأكل على الصلاة فالحديث على ما أعتقد:" لاصلاة في حضرة طعام " أو كما قال صلى الله عليه وسلم.
ولقد كان ابن عمر رضي الله عنه يتعشى وهو يسمع الإمام يقرأ! :)

وأما القضية الأساس فهي التي أردت الوقوف عندها :)
المسجد:
كثير منا يقيس المسجد في الخارج على وضعه في الداخل وأظن أن هذا خطأ!
المسجد عندنا للصلاة وتحفيظ القرآن أحياناً والمحاظرات والدروس العلمية نادرا!
في حين أنه في الخارج هو المسجد والمدرسة والمعقل الإسلامي إن صح التعبير فهو واجهة الدعوة في أوساط غير المسلمين.

يجب أن يكون المسجد في الخارج معلماً يثير عجب الجاهلين بالإسلام!
يكون أيضاً مدرسة لتعليم الدين الصحيح!
يكون أيضاً مركز دعم للمصلين فيه دعماً مادياً ومعنوياً.
فلا نلتفت للطعام ونترك ماوراء ذلك!
ربط المسلمين في الخارج بالمسجد هو سبيل الحفظ من حرب التذويب الشعواء التي يعانون منها!!!

وضع مساجدنا يحتاج إلى إعادة نظر فمن حيث كثرتها!
وقلة الإستفادة منها!

واسمح لي أنتقل إلى نقطة أخرى:
رأى رسول الله صلى الله عليه وسلم عمر رضي الله عنه يقرأ في الإنجيل فقال له:
أفي شك يابن الخطاب؟!
ونهاه عن قراءة الإنجيل!
فإذا كان ذاك عمر وفي عهد رسول الله صلى الله عليه وسلم فنحن من باب الأولى أن ننتهي :)

وجزاك الله خير أخوي مرقوق.

[شداد]

جزاك الله خير على غيرتك لإخوانك المسلمين وجزاك الله خير على تذكيرنا, بخصائص نحن أجدر أن نطبقها ومنها توادنا وتعاطفنا وتراحمنا حيال بعض, ومن هذا البعض إخواننا الجوعى والعراة في كل مكان, وأحب أن أبشرك ونفسي بأننا هنا في بلاد الحرمين, لدينا مؤسسه خيريه بهذا الإسم: (مؤسسة الحرمين الخيريه) لخدمة الإسلام والمسلمين في جميع بقاع الأرض, ومن أهدافها الغذاء والكساء والعلم الشرعي الصحيح, للمسلم أولاً, يليه الكافر لإستمالته للإسلام.

وقد وقفت على أحد مشاريعهم لإغاثة غير المسلمين فقد أسلمت على أيديهم قبيله افريقيه كامله عددها يتجاوز الستين الف إنسان, ولم يتوقفو عند مجرد إسلام تلك القبيله, بل واصلوا دعمها لكي لاترتد, ويدعموها بطرق مختلفه, بعيدة وقصيرة المدى, تزويدهم بالغذاء واللباس والدواء (دعم قصير المدى), وإتفقوا مع ملك القبيله بأن يختارون مجموعه من أذكى شباب القريه ويرسلوهم الى السعوديه لتعلم العلوم الشرعيه ليكونوا دعاة في قبيلتهم, وقد وصلوا منذ فتره وهم يتعلمون الآن, وأيضاً دربوا فتيان ورجال القبيله على الزراعه, ليعتمدوا على أنفسهم من ناحية الغذاء (دعم بعيد المدى), بالإضافه للدعم الصحي وغير ذلك, وقد قابلت ملكهم في موسم الحج المنصرم فقد تكفل بنفقة حجه أحد التجار وعند مناقشتي له أوضح لي بأنه وقبيلته كأنهم ولدوا من جديد, وبما أن هذه المؤسسه خيريه فهي تحتاج دعم لكي لا تتوقف, وأعتقد أننا جميعاً لا ولن نرضى أن تتوقف, فمن أراد الإطلاع على أعمال هذه المؤسسه فليتبع هذا اللنك: http://www.alharamain.org

كما أبشرك ونفسي أنه يوجد في هذا البلد الكثير من المؤسسات الخيريه المشابهه.

[مرقوق]

<center>اسف جدا على التاخير .. لكني و الله مشغوووول جدا و سامحوني

--------------

مقلع مهوي:

و عليكم السلام و رحمة الله

مشكور على ردك .. و حبيت اوضح لك نقطه : كل الدول اللي تكلمت عنها تبرعنا لهم بعد ما صارت لهم مشاكل و كوارث (بخلاف فلسطين المحتله اللي مشكلتها قديمه)

قلت في جزء من الموضوع:

(وش استفدنا من ديننا .. هذا لنا سنين متمسكين به و ما شفنا من "اخواننا" المسلمين الا الخراط الفاضي .. ما يتبرعون لنا الا اذا صار عندنا زلازل و الا فيضانات .. طيب و اذا مافيه زلازل نقعد بها يعني ..؟!)


هذا ردي عليك طال عمرك .. يعني اذا ما عندهم زلازل او كوارث طبيعيه او مفتعله .. معنى هذا اننا ما نتبرع لهم ?!!

اتمنى تفكر في ردي شوي .. و اذا ما فهمت وجهة نظري حاولت اشرح لك اياها باسهاب اكثر .. لاني الحين مشغول و الله لكن لي رجعه معك ان شاء الله

--------------

الطير:

و الله يابو بندر ما فهمت وش تبغى توصل له بالرد ,, لكن كلامك بالفعل صحيح .. الكنيسه كانت ( يمكن ما زالت) تتصرف في الاموال و التبرعات على كيفها ..

مشكور يابو بندر :)

-------------

مزيونه :

احلىىىى مقلع متميز :) مبروك و تستاهلين كل خير ( و عقبال ما تصيرين مشرفه بعد :) )

اجل ودتس تساعدينهم بكسرة خبز ?!! وش قالوا لتس تيوس هم ?! :)

مشكوره على الرد :)

---------------

حبة عين غزيل :) :

مرقوقي اجل هاه :) .. الله لنا .. الحين ما عاد صرنا قد المقام :(
كخخخخخخخخ :) بس ما تغيرك الرتب ابد يابو سفن .. شنب طول عمرك

&lt;== احسن واحد يصرف السوالف :D

ابو سفن يا شين اللي يحلل الاشياء لنفسه و يحرمها على غيره !.. هذاك متلاقط مع جريدة الرياضيه في موضوع ماساوي و تقول ما نبغى كابه ?!

اذلف بس يا حبة عيني :)

اما بالنسبه لتفكيري ذاك اليوم .. ابشرك جت سليمه .. يعني زكام على خفيف و حومة تسبد بس نتعود ان شاء الله :)

على فكره: ترى ( ظرب ) تنكتب كذا : ضرب ( غريبه ابو علي ما انتبه لها )

على طاري الماصله .. ترى بردان ذاك اليوم طلبني اكتب موضوع ماصل في الجاده عشان ينقشه للماصله و الموضوع ذا و مواضيعي كلها في الجاده تحت امره ( كلها موضوعين و امن انا و وجهي :D ) يعني استرسل بايديك و رجليك الله يطعني عنك ..

يا كثرك ياخي: انا مسوي لك بلوك و داز لك فيروس يقعد على قلب كمبيوترك كما قعدة العريكه على قلبك :)

تسلم الله يطعن اللي في بالي ( و اللي في بالك ) عنك :D

--------------

ما خليتولي اسم :

هلا و غلا و مشكوره على السؤال ..

كلامك صحيح .. و من المفترض ان تتحرك الجمعيات الاسلاميه و ان شاء الله فيه تطور .. و الاخ زياد حاط لنك لاحد الجمعيات جزاه الله خير ( للاسف ما بعد اطلعت عليها لضيق الوقت)

و من قال يسلم اختي :)

-------------

الهووووله :

مشكوره على دعواتس الله يجزاتس خير

و الله ينفع بالموضوع .. و نشوف تحركات من قبل المنظمات الاسلاميه .. و ما لنا الان (خصوصا في بلدان الغربه) الا الدعاء لهم و الوقوف بجانبهم بقلوبنا على الاقل

برايفت : وش رايتس تقصين يدتس باكبر ساطور في بيتكم ?! :D

&lt;== متخرج اداري :D

ان شاء الله راجع للبقيه قريبا</center>

[amdady]

هلا والله ابو حمد ما قصّرت والله على ذا الموضوع
ههههههههههههههههههههههههههههههههههههاااي
اجل يلعبون قمار!!! بالله وش الاختبار اللي عليك قبل ما تكتب ذا الموضوع ؟
ما قصّرت يا ابو حمد ورا ما تسيّر علينا فيذاك ترا الدعوه الحين مظبوطه والحبال تسثرت ذا الايام :D الوكاد ان خوينا مربوطٍ بها هالحين !! لا تخاف انت ما حطّينا شيء على رقبتك :p

اقول ابو حمد ابي صفر سبعه شوي :
صفر سبعه ارررررررررررررررحب
يا خي افهما حاطّك بلوك :p

[دحيم الاغبر]

مسهم بالخير ... :)
وشلونك يا مرقوق .. ووشلون جارك :)

على طاريء التبشير .. اذكر اني سمعت عن سالفة حصلت في الجزيرة العربية ( او حصلت لناس من الجزيرة العربية ).. وافقت حديث الرسول عليه الصلاة والسلام .. في أن الشيطان ما يقدر يأثر على مسلمي الجزيرة في عقيدتهم ...

القصة ... أنه جاء مجموعة مبشرين وكانوا اطباء وممرضين .. واقاموا مستشفى .. وصاروا يعالجون المرضى وكبار السن ويرعونهم .. ولما شافوا أنهم بدوأ يحبونهم ويرتاحون لهم ... جمعوهم هاك الليلة .. وقالوا : ترى كل هاللي سويناه لكم وعطيناكم .. هو بتوجيه من " المسيح " عيسى بن مريم - عليه الصلاة والسلام - .. وانه بيزوركم الحين .. فلازم تخشعون له وتطيعونه ...
طبعاً هالمبشرين نصابين .. بس يبون يلعبون على الضعوف .. فقاموا وطفؤا الانوار ... وخلو واحد منهم يلبس ملابس غريبة ... ويجي كنه " المسيح " ...
صار كل شيء على مابغوا .. وطفؤا الانور .. ودخل " المسيح المزعوم ... ساعتها و بتلقائية وببراءة ... قال كل واحد من هالشيبان والمرضى قال دلالة على الدهشة : " اللهم صل على محمد " :D

وعقب هالكلمة .. ضفوا المبشرين عفشهم وراحوا :)

.......

أقصد بهالقصة ... أن العقيدة الصحيحة .. أقوى وامتن ...للاستمرار عل النهج القويم ..
طبعا ما ننكر ضرورة الاطعمة والالبسة ومستلزمات الحياة ...وهذي اثرها زي ما قلت انت كبير ...

لكن ... مثل ما قال أخوي " السلطان " جزاه الله خير .. ان دور المساجد في الخارج أكبر و أعم ... وهو تقريبا المدرسة والمسجد والمنتدى ومكان الاحتفالات والمشاركات الدينية والاجتماعية ...
وايضا .. لا ننسى دور " الدعاة " المهم ... اللي اعتبره اهم دور .. لانهم هم اللي ممكن يتعاملون مع الناس حسب عقلياتهم ... ويحمونهم من الانجراف للبدع والخرافات المنتشرة في بعض الدول الاسلامية ..

...

نقطة الاعلان ...
بصراحة .. صدقت كثيرا في هالنقطة ...
لو جينا من منطلق تجاري ... بنلقى ان فيه مقولة اقتصادية معروفة .. تقول " اذا اردت ان تقيم مشروعا ، فأصرف ثلثي رأس المال على الاعلان " ..

فالاعلان عن نشاطات الجمعيات واهدافها ضروري .. لتذكير الناس بها وبأخوانهم المحتاجين .. وضروري لتبيان مصداقية هذه الجمعية واعمالها المقامة ... :)

....

الله يعطيك الف عافية ويجزاك بالخير
ولا عاد تكتب بهالخط تكفى :rolleyes:
اللي كنه " تنقير دجاج " <IMG SRC="cwm44.gif" border="0">

[ 07-16-2001: تم تعديل الموضوع بواسطة : دحيم الاغبر ]

[it's me]

<font color="Blue">اولا الف هلا اخوى مرقوق..
من زماان..بعد اخبار الغربة... :)

تعرف ان غالبا كلامك في مجمله صواب..
ونحن اكثر من مقصرين ومهما قلنا اننا نعمل فنحتاج اكثر..
في حديث للرسول عليه السلام يقول بمامعناه..
""ان من اسباب دخول النار..
ان الناس امسكت فضول اموالها..""
والمعنىان كل مال يزيد عن حاجتنا هو من حق اخواننا المحتاجين..
ولااقول كل المال انما لو فكرنا ان يكون قليل دائم خير من كثير منقطع فهذا افضل..
انا اعرف كثير من الدعاة اللى تاركين الترف والنعيم هنا...
وعايشين في افريقيا و بورما وبنغلادش واندونيسيا..
ووصلوا اماكن مجهولة وبعيدة وغارقة في الفقر والجهل ..
وحاولوا ومازالوا وهؤلاء يحتاجون منا على الاقل المساندة بالمال والقلم والفكر..
ان لم نستطيع ان نساعدهم بانفسنا..

اما بالنسبة للمساجد..
فاظن..مسجد كبير في كل بلدة يقوم بالواجب..
وباقي المال يخدم اماكن تدر المال..

والمثل يقول :
لاتعطيه سمكة علمه الصيد.. :)


======

اخى مرقوق..شكرا على موضوعك..والف هلا ..</font>

[بـردان]

مرقوق يامصلك مصلاه لو تدري :D

بس ولو :( أنت الا منّك هوجستا تهوجس في أشياء مفيده .. أنا تدري وش آخر هواجيسي؟ .. كنت أقول لروحي لو يمسكون الشباب اللي يفحطون ويقضّبون كل واحد شارع .. ويقولون له فحّط بايديك ورجليك .. بعد أخذ الاحتياطات الأمنيه طبعا وتلبيق المواتر بعيد عنه .. وش النتيجه؟ .. شوارع أنصع سواداً :D

تحياتي المكعبه

[عمتكم]

<font color="Brown">السلام عليكم ورحمة الله وبركاته....</font>
الي ابي اقوله ان في موضوعك اكثر من نقطه ...
بس صحيح الأعلام له دور كبير
وأتمنى من الهيئات السعوديه انها تدورلها على متبرع من المعلنين عشان يظهر هذا الدور وتقدر هذي الهيئات انها تتطور وتتقدم.....
وبعد مو بس نحط اللوم على هالمؤسسات لازم احنا ندعمهم ولو بلقليل

[المــجــد]

<center>اخي مرقوق

مشكور الف شكر

اخي العز يز

لقد تركنا الضروريات والواجبات

لقد امتنع الكثيرون عن دفع الزكاه

والتي لو دفعت ما ظل عندنا فقير

ولكن للاسف تناسينا الاخره

للاسف من يعمل في الجماعات الخيرية

كثير منهم اصبحت السرقات عندهم اسهل من شرب الماء

للاسف القليل يهتم بدينهم

للاسف الاسلام صورته سيئة بفعل ابنائه

لا ادري ماذا اقول عندما كنت اتحدث مع شخص

مسلم ورقيا خارج ارض اسلامية

قال لي بفمه رليجيس از ويستينج تايم

الدين مضيعة للوقت

حينها قلت له

ضاع الدين منذ ان انتمى مثلك له

:( :(</center>

[صعرور أفندي]

هلالالالالالالالالا ابا المراقيق :)

من زمااااان عنك :)

والله اثرك منتب تلعب فاهم لهم يالهيس &lt;---- على باله مدحه

والله لوني مكانك اني لأدربي دميجتي واتبرع وأطير في العجه :)

والله موضوع جيّد يامرقوق

:)

[السراب]

<font size="6">مرقوق</font>
التبشير يحاول فيه النصارى بكل الطرق جمع التبرعات لصالح نشر دينهم ..
ولاتستغرب وجود مثل هذا الاعلان الذي يحاولون فيه التلاعب على المسلمين ..
ومشكور على طرح موضوعك الرائع ..

[مرقوق]

السلام عليكم و رحمة الله و بركاته ..

معليش اسمحوا لي على التأخير ..

-----------

saudi :

هلا بمطوّل الغيبه :)

اخي العزيز .. انا مانيب راد عليك .. ابرد على اللي يقولون هالكلام: ان الله اعلم بالنيات .. و المراد اننا نبذل من اموالنا في سبيل الله .. بنية سليمه .. المطلوب هو رضا الله عز و جل .. راحت الفلوس او ما راحت .. اهم شي نرضي ربنا سبحانه و تعالى ..

اتفق معك في كل ما قلت اخي العزيز .. و اشكر لك تواصلك .. و راجع ايميلك :)

------------

الغالي ابو علي (السلطان)

مشكور على رفسة الموضوع الله يسلمك :)

الظاهر ان هواشنا على المسنجر بيتوسع نطاقه و بيصير على الملا :D (اقصد نقاشاتنا الدائمه في شتى المواضيع :)

اولا:

المصطلح : تبشيري .. تنصيري .. كلها اسماء و انا اخوك .. و كلنا نعرف و متيقنين ان عقيدتنا هي العقيده الصحيحه .. عموما ما راح نختلف في هالنقطه .. :)

ثانيا: قضية الاسراف .. تتفق معي فيها .. نزحلقها و نروح للي بعدها :D

ثالثا و الاهم ( يعني اللي بنتهاوش فيه :D )

ابقتبس ردك .. و اعطيك وجهة نظري :)
<font color="Red">"كثير منا يقيس المسجد في الخارج على وضعه في الداخل وأظن أن هذا خطأ!
المسجد عندنا للصلاة وتحفيظ القرآن أحياناً والمحاظرات والدروس العلمية نادرا!
في حين أنه في الخارج هو المسجد والمدرسة والمعقل الإسلامي إن صح التعبير فهو واجهة الدعوة في أوساط غير المسلمين"</font>

كلام سليم ..

&lt;=== مالت على النقاش اللي تعرفه :confused:
<font color="Red">يجب أن يكون المسجد في الخارج معلماً يثير عجب الجاهلين بالإسلام!
يكون أيضاً مدرسة لتعليم الدين الصحيح!
يكون أيضاً مركز دعم للمصلين فيه دعماً مادياً ومعنوياً.
فلا نلتفت للطعام ونترك ماوراء ذلك!
ربط المسلمين في الخارج بالمسجد هو سبيل الحفظ من حرب التذويب الشعواء التي يعانون منها!!!</font>

"معلم" يابو علي؟ تقصد ان يكون مبنيا على طراز فخم ..؟ هذا اللي فهمته .. لكن يظهر انك نسيت ان زخرفة المساجد تشتت المصلين و تبطل خشوعهم لانهم بينشغلون بالزخارف عن اداء الصلاه و الخشوع فيها ..

تبي تربطهم في المسجد و تموّتهم جوع يابو علي ..؟

عموما .. انت ما وضحت اختلافك معي بشكل دقيق .. لكني فهمت انك معترض على فكرة تقليل الصرف على المساجد ..

و هذا ردي عليك الله يجزاك خير:

احد الاخوان "اظنها it's me " قالت فكره جميله .. و هي اننا بدال ما نبني مسجد "الله العالم اذا احد بيصلي فيه او لا" ننشئ مشروع خيري يستفيد منه الناس .. و يكون ذا ربح متواصل .. صح و الا لا؟؟

اما بالنسبه للانجيل .. ما فهمت قصدك فيه .. هل هو رد علي او على ابو بندر ..؟!

انتظر توضيحك لهالنقطه و النقطه اللي قبلها

عموما يابو علي .. انا و الله مواصل الحين .. و انت ردودك يبغالها جلسه .. راجع لك .. انت و مقلع مهوي .. ان شاء الله :)

---------------

اخوي زياد: شكرا على دعواتك جزاك الله خير .. و الله يوفقنا الى ما يرضيه .. هدفنا جميعا هو التقرب الى الله و محاولة التذكير و التنبيه .. فكلنا ننسى .. و كلنا نتقاعس في بعض الاحيان .. لكن التذكير يعيدنا الى سبيل الرشد .. "و ذكر فان الذكرى تنفع المؤمنين"

و جزاك الله خير على القصه اللي ذكرتها و على اللنك اللي حطيته .. و ان شاء الله تلقى تجاوب و اهتمام من الاخوه ..

جزاك الله خير :)

-------------

مرقوق:

هلا يالله حيه :) .. اجل مواصل يا النصاب ..؟! يحلفون انك ما بعد شلت الغمص بس قعدت برد السلطان و حطيتها في النوم ..!!

يا حبني لك .. اذلف .!

&lt;=== <IMG SRC="cwm3.gif" border="0">

--------------

امدادي: هلا ابو حمد .. الله يحييك ( انت قايل يالله حيه؟ ما علينا)

و الله ياخي لا اختبارات و لاش .. بس الواحد يستخف دمه شوي :)

باقي ردك انتهى تاريخه ;) و الطعن في الميت حرام :) <IMG SRC="cwm16.gif" border="0">

--------------

دحيم الاغبر:

مسهم بالنور :)

انا بخير دامك بخير ,, و الجار ابشرك حطيت رجلي عنه هو و جيرته :D

&lt;== يمدحون ذرقته :D

هههههههههههههههههههههه

يا حبي لذا الشويب .. عز الله انه اجبرهم يضفون عفشهم ..

شكرا على اضافتك يا دحيم .. بالفعل اثرت الموضوع :)

جزاك الله خير .. و ابشر ابغير الخط المره الجايه ..

على فكره دحيم : ترى هذا خطي حتى في المسنجر ..ليش ما دزد قلت لي هالكلام هناك؟ و الا تبي تهاوشني قدام العالم ..؟ :mad:

:D

------------

اتس مي:

هلا و غلا .. و شكرا على السؤال .. تسلمين الله يجزاتس خير ..

الله يجزا علمائنا و دعاتنا كل خير على جهودهم المبذوله .. لكن كما قلتي يجب علينا المساعده بما نستطيع .. لان مثل ما دعاتنا يجتهدون .. اليهود و النصارى ايضا يرسلون حملات الى ادغال افريقيا و امريكا الجنوبيه لنفس الغرض .. و الفارق الوحيد انهم يلقون دعم متواصل و كبير بعكس دعاتنا .. :(

شكرا لك اختي :) و هلا بك :)

--------------

بردان: يابن الحلال لو ابقول كل هواجيسي تسان ذبيتوني في شهار من مبطي ..

اذكر مره كنت متغدي كبسة دجاج .. و من الشبعه قام بطني يصوصي .. قلت هذا الظاهر الدجاجه تجمعت مره ثانيه في بطني و قامت تقاقي :D .. البلا لو اني ماكل بعير .. عز الله اللي رحت وطي :D

تحياتي المثلجه .. <IMG SRC="cwm13.gif" border="0">

--------------

تعبت و الله العظيم .. لكن بحول اللي عينه ما تنام ابرد عليكم باتسر او عقبه ..

تصبحون على خير ..

[ 07-12-2001: تم تعديل الموضوع بواسطة : مرقوق ]

[السلطان]

8
8
8
أنت ملاحظ؟؟؟ :D

أخوي مرقوق " أبو حمد " :)
يا أما أنك دلخ صحيح :D
أو أنك تستدلخ وتسوي نفسك ماتفهم علشان أرفع لك موضوعك وأكثر فيه الردود <IMG SRC="cwm13.gif" border="0">

&lt;=== كافشه :D
ماعلينا الثانيه فيها ذكى وماخبرناك ذكي :D
يعني صارت الأولى هي الصح <IMG SRC="cwm32.gif" border="0">

أبو حمد:
اتفقنا على معظم النقاط وبقي نقطة واحدة :)
فأوضح وأقول:
عندما أقول معلماً فأنا أقصد أن لا يكون مسجداً فقط بل مسجدا واسعا يحوي مدرسة وملجأ للجائع والمعتر!!!
يكون هذا المسجد هو محطة التوزيع للبلدة أو المدينة كلها من حيث أنه هو مكان انطلاق التبرعات من أطعمة وكسوة وتوجيهات :)
أما الزخرفة فعليها النهي من الرسول صلى الله عليه وسلم ومن أصحابه من بعده.
فالرسول صلى الله عليه وسلم رفض الصلاة على قطعة القماش المزخرفة فجاء نهيه بفعله.
وعمر رضي الله عنه كتب لأحد الولاة نهيا عن أن يحمر أو يصفر بالمساجد.
هل في هذا كفاية؟! أنت وفهمك عاد :)

قلت:<font color="Red">تبي تربطهم في المسجد و تموّتهم جوع يابو علي ..؟ </font>

في حين قلت أنا:
يجب أن يكون المسجد في الخارج معلماً يثير عجب الجاهلين بالإسلام!
يكون أيضاً مدرسة لتعليم الدين الصحيح!
يكون أيضاً مركز دعم للمصلين فيه دعماً مادياً ومعنوياً.
فلا نلتفت للطعام ونترك ماوراء ذلك!

فعندما أقول دعماً ماديا فهل هناك غير الدعم بالمطعم والملبس؟ :)
وعندما أقول معلماً يثير عجب الجاهلين بالإسلام فأقصد:
أن يروا عطف المسلمين على بعضهم وتجمعهم وكيف هم رحماء بينهم وليروهم ركعا سجدا!!!
هذا مايتعلق بالنقطة الأولى :)

أما النقطة الثانية:
فالمقصود النصح والتذكير للجميع :)

تحياتي المبردة :cool:

[صرف نفسك]

الاخ مرقوق
كلامك صح ولو كان حالناعكس ما ذكرت ما بقى هذا حلنا
أعرف واحد من الناس بدل مايروح يسربت في حدى الدول راح وتصدق بمبلغ لا حد الاحزاب السياية المسلمه تحرى فيهم الخير . يوم رجع لبلدة المسلم قفطوة وسوو معة تحقيق ولعنو أبو خامسة


بحجة دعم الارهاب


في كتاب ل شكيب أرسلان رحمة الله

ذكر من أسباب ضعف المسلمين شح أيدي المسلمن في مساعدة اخوانهم في العالم


وشكرا

[دزني واطيح]

أخوي الغالي مرقوق... موضوع مهم جدّاً... و تناولته بطريقة جميلة

فعلا يخوي... احنا مقصّرين في حق الدعوة لديننا الحنيف بالطرق غير التقليدية... و حقيقة نحن نعجز أمام المسيحيين في هذة الناحية... أذكر قبل بضع سنين أن احدى المؤسسات التبشيرية انتجت فيلما تبشيريا بطريقة مغرية و غير مباشرة في نفس الوقت... الفيلم كلّف مبالغ طائلة و لكن في المقابل حقق المراد حيث اعتنقت أعداد مهولة المسيحية من نتاج عرض هذا الفيلم حسب ما ذُكِر...ا

أعتقد يا مرقوق اننا خذينا الإسلام كشيء وراثي فعجزنل عن تطبيقه بحذافيره... و ما أقول الا الله يهدي الجميع و يعين المنظمات الاسلامية على تطوير و تكثيف جهودها

بس من جد حللللللللللللوة سالفة الشابورة... الله يرجّك على التفكير يا شيخ :)

ترى ردّيت على الموضوع بسرعة و ربما لي عودة أخرى يمكن أبلطع فيها شوي :D

عوافي :)

[بـردان]

أبو المراقيق :)

تسلم يدين خطّت هالكلام .. ولو تكثّر الموايق على الجادة بين الحين والآخر كان نمصعك بهديه زود على المتميزه .. نعطيك بادية حنيني مع لبن :D إجحدها عاد ..

إلى المتميزة لقوة الفكرة ولحَبابَة أسلوب عرضها :)

http://winmear.hypermart.net/eqla3/rayanmotamayz.gif