صبحكم/ مسيكم الله بالخير والعافية
الصراحة انا ناوي اكتب مواضيعن عندكم بس يبيلي اجيب افكار واشيا جديدة
والله ذي سالفتن صايرة لي انا والربع بس زودت بعض الخرط من عندي فخذ وخل
كنت هاك اليوم متبطح بالملحق قاعد اشرب من هالقهوة الي يحبها قلبك
ومادريت الا والتلفون يرن قحصت وطلعت من الملحق احسبوه الجرس عاد رجعت ورديت والاه ولد جارنا وائل قال تكفى يا مشخوط بروح معكم للصمان قلت يابن الحلال ما براسك قنص قال طيب بروح وبس بتفرج عليكم (مباراة باستاد الملك فهد) وانا مابيه لانه ارفل وخكري ولا براسه بران وماعمره طلع لهن قلت زين خلاص جهز أغراضك وباتسر بعد صلاة الفجر نسير عليك وناخذك
المهم يوم صلينا الفجر مرينا عليه والاو لابس هاك الجينز ورابط الشنطه العلاقي ورا إظهره وقاعد يحترينا عند الباب ويوم ركب معنا قال صباح الفل رد عليه واحد من الزقيرتيه وقاله فل ولا أعبي لك بعشره مير يكركر عليه كل اللي بالسيارة وهو يدربي راسه ما يدري وش السالفه
مشينا شوي والا وايل يزنها علينا ويقول يبي يرجع وخلاص هون (مايستحملش) قلنا معصي ويوم وصلنا الصمان كان موترنا قطع10 بس مهنا عزم
علطول دخلنا بالنفد وغرزت السيارة
نزلنا ننسم ونحفر وخوينا الارفل انسدح حدر رمثه وعقب جهد طلعنا السيارة ونروح لحدا الشعبان وينزلون العزبة والمنامات والوقت يمكن حول العصر ويشب واحد منا النشامى على الشاهي والقهوة واحد قعد يصف القش واحد ثاني أخذ أم صتمه وراح يلقط له من الضغار (دخل) المهم كل مسك له شغله والخكري ماغير يتبطح تقل حامل وتقضي القهوة والشاهي ونقعد نتقهوا ونقدع من هالسكري ونسولف والى وايل يجي يقول مافيه عصير الجو حار (بسم الله عليه يمخشه الهواء)
جا اليل ونمنا بدري عشان نقوم نصيد ويوم صار الفجر قمنا دوران بالشعبان المهم لقينا فرتز قميري ويطلع واحد منهم أم خمس البلجيكيه يم جاء يرمي ويجيك الخكري يسد أذانه يعوره الصوت ( ياربيه ) المهم ويرمي ويطيح 6 قميري ووحده صويب قالوا للخكري انزل جبهن ماعمرك نفعت قال لا يمه أخاف
تضاحكو عليه الربع ونزل واحد منهم جمعنه وجاك مدربي يوم جا يرتسب السياره ويقعد جنب الخكري والخكري يقول يا ربيه ابعده عن انا ما اتحمل الدم يا ربيه ومار يبدا النشمي يخوبلبه جاك ويقرب القميري لمه وذا يااااااااو يصرخ والعالم متفتخين ضحك عليه
ايه ويجي مسيان وتبدا الضلما والبوم يناعق (يا ولد)
ايه والولد ماش ما يستحمل قام وجلس جنب واحدن من الربع وكل شوي يقرب وكل شوي يقرب لين تلاصقو ومير يفز النشمي ويناضر ولا الخكري لاصقن فيه قاله وش فيك يا بعدي قال والله اني خايف
وعيا ينام لين قلناله سباحين ونام
المهم يوم نمنا يبدى وائل يشاخر ولا قدرنا ننام مير قاموا اثنين (الله يكثر من امثالهم) وتشاقلوه ويحلتونه هو وفراشه بعيدن عنا والرجال مواصل يشاخر مير يطلع له جني ويقومه من النوم وذاك طارت بوهتوه من الخوف وقال من انت قاله انا جني وانت اخوياك رموك فوق ولدي ومير تنكسر يديه وبما ان اخوياك بعاد فانت اقرب بنقتص منك انت (بدا الخرط الي اقولكم عنوه)
يجي وائل يقول للجني طيب عطن مهلة تكفى قال وش تبي قال أنا جاي معهم بالغلط ولا براسي بر ولا شئ بس لقافتي هي اللي جابتن معهم ولقافتي هي اللي سببت لي هالمشكلة معك وخلتن أكسر إيد ولدك طبعاً الجني دلخ ما يعرف شئ عن البشر قال الجني طيب ليش تعطي لقافتك مجال إنها تسوي بك كذا قال أنا أدري الشكوى لله قال الجني طيب وين نلقى لقافتك فيه اللحين قال شف رح لم أخوياي اللي نيمين ورح للي نايم بالطرف هذا خويي مشخوط (اوريك يالارفل بتورطن) تلقاه نايم على وساده إن رفعت الوساده تلقا لقافتي ولقافته نايمين هناك أمسك لقافتي ووره شغله قال الجني الغبي والله إنك صادق
راح الجني لمي وانا ماعرف انام الا اذا دخلت يدي تحت الوسادة ويجيك الجني ويرفع الوسادة ويلقى يدي قال هذي لقافة هذا بس وين لقافة وائل .
دور امر يدور يوم دور ولاو مدور (اتحداك تقوله خمس مرات)
ايه مالقى لقافة وائل يرجعله قال تلعب علي انت مالقيت الا لقافة رفيزك .
قال وائل وراه مانصلي وبعد الصلاة يحله الف حلال (يجيد فن التصريف)
تقدم الجني ونادى عياله يصلون يوم قال استووا اعتدلوا قال وائل اوكيه ياعمري يوم كبر الامام وكبروا عياله امر يقطع وائل صلاته ويفرك لنا و يوم وصلنا قانا قوموا قوموا هناك فيه جن قوه نهج للبيت قالوله قديمة تبي تسويبنا مقلب مثل ماسوينابك .(بلش مايدري وش يقول)
فجاة طاح وايل على الارض وقام يتبرصع (دخل بوه الجني)
ومادرينا الا وهو جاي ويشوتنا ويقول جايين للبر ولا جايين ننام يالله قوموا وهو اللي يقوم ويشب الضو ويركي الدله ويقوم ويفتح شنطته ويطلع منها الطحين ويعجن ويطلع من الشنطه هاك السمن البري ويصلح لنا قرص وحنا مغير فاقين اثامنا ويرش على القرص هاك العسل اللي جايبه بشنطته قال سموا الله يحييكم (وحنا ماندري وش جاو) افطرنا واخذنا البنادق نبي نصيد قلنا له خاونا قال لا روحوا صيدوا وانا ابجهز لوازم الغدا رحنا يوم جا الظهر رجعنا ومامعنا شي قال هاه بشروا يالبوارديه قلنا ما بهالمكان ولا طير الا يقوم ويطلع لنا ثمان وعشرين قميريه صايدهن لا وصايد بعد فخذ حاشي معهن
تغدينا وجا وقت الصلاة وانتم عارفين صلاة المغرب صلاه جهرية امنا واحد ويوم بدا يقرا مير يطيح وايل ويبدا يتنافض ويرقل وطقنا الخوف ونقز واحد ويكوي وايل مع رقبته وهنا بدا يطلع صياح وصوت خشن موب صوت وايل النعومه الخكري ويدخل الخوف بقلوب الشباب ويبدا كل واحد يقرا اللي حفظه بالابتدائي من القرأن وهنا بدا يتكلم الجني
الجني:انا ملك من ملوك الجن
دحيم الدلخ (ذا من ربعنا):وانا دلخ من دلوخة البشر...ماذا تريد ياهذا
الجني :لقد كسر وايل يد أبني واني اريد القصاص منه
دحيم الدلخ:طيب وش تامر عليه؟؟ حنا قطتنا لهالطلعه عشرة ريال كل واحد وانا معي بالبوك بالسحاب الايمن المقطوع ثلاثة اريل اشيله دايم احتياط لو نقصت دراهمي
الجني :ملك من ملوك الجن تقول اعطيك قطه انا فعلا بديت اقتص منه وهذي نقلت قصري من جسم راعي غنم لجسم خويكم وايل واجرت الدور الثاني لأجنبي مدرس رياضيات بأبتدائية الجن الحكومية وانا مااحب اطول بالبيوت اللي اسكنه شهر شهرين متى ماملوا الأهل و الاطفال (جني ولد نعمة)
دحيم الدلخ: لاتكفى الله يرحم والديك الولد ماخذينه من اهله سليم وبنرجعه سليم يالغالي وش رايك عندي عرض
الجني: وش عرضك؟
دحيم الدلخ: انا بجيب لك واحد ثاني تدخل به وتترك خوينا وش قلت؟؟
(وبدا كل واحد يأشر على الثاني خذ ذا محمد فاضي ماعنده شي والثاني يقول قسم بالله عندي اختبار السبت والثالث يقول حرام عليك يادحيم تذكر يوم اشريلك ببسي ابونص)
بنفس الوقت اللي قاعدين يتطامرون ويناقزون الاخويا دحيم جاب ثوب له والجني يناظر العيال المهبل الخوافين ويضحك ويروح دحيم ويعلق الثوب على عمود شجره ويحط الشماغ عليه ويرجع بسرعه
دحيم الدلخ: شف طال عمرك الرجال ذاك معنا وعنده غرف اكثر من وايل خذ راحك به وحنا مستغنين عنوه
يوم غدا تسذا <IMG SRC="cwm32.gif" border="0"> الجني ويقول بنفسه الوساع زين واكيد ان الدور الثاني مقسم شقق وأجرهن على الاجانب ويطلع بسرعه الصاروخ طاير لعمود الشجره شايلن بزارينه
!@#$%&!@#$%&!@#$%&
(تم حذف المشهد لبشاعته بعد اصطدام الجني بالشجرة)
ويطيح وايل واول ماقام قال:
<font face="Tahoma"><font size="6"><center>يـااااااي يـااااي ايـش الـصـداع هـذا</center></font></font>
بالنهاية اقول ترا ورا كل هالخنبقة استفادة والي هي اذا انت رجل صر رجل واذا انت مره صر مره
انا مره كنت جالس بالمقهى مع الشباب والى "رجل" جالس جمبنا ويوم جا خويه وجلس جمبه قاله الله انت حلو اليوم والثاني يقول ايه شريت جيل جديد
والمواقف واجد
<<<<<<< لا قم عليهم بعد
وسلامتكم