الرحاله مالها الا هلالها : رحلة أبها ! [الارشيف]

عرض كامل الموضوع : الرحاله مالها الا هلالها : رحلة أبها !

مالها الا هلالها

20-09-2001, 23:09

هذي سالفة سفرتي في هالصيفيه :
في الصيفيه الأخيره خذت فصل صيفي ( ياحظك :D ) ... وبعد ما انتهيت من الاختبارات كان معي 2 أسبوع تقريباً عطله ...
العائله الكريمه قرروا يروحون للطايف .. طبعاً رحنا من ثاني يوم عطلت ..
( منيب معطيكم سالفة هالرحله لأنها للعائلات فقط ... بتقولون لي فيه بنات يبون ينبسطون ... بقول لكم عمري ماعديت البنت لحالها عائله .. ولا مجموعة بنات عائله .. أنا ما اعترف بالعائله الا اذا كان فيهم أطفال ورجال وحريم )

سجل ياتاريخ .. وأكتب يازمن .... مالها الا هلالها خربها وطلع عن العرف السائد .... الله أكبر .. الله أكبر ..

المهم يوم رجعنا كان باقي معي من الإجازه 5 أيام .. ويدقون علي العيال .. وينكم فيه .. حنا في أبها ..
والله ولاعاقت معي وامر مكتب الخطوط في المروج .. خصوصاً ان التخفيض في المحفظه ....
وأطلع لأبها يوم الاثنين الأخير في الإجازه ... ويستقبلوني العيال هناك استقبال حافل ... حيث جرى لسموي استقبال رسمي .. فعند سلم الطائره طلعت جوالي وهاوشني موظف الخطوط وقال اصبر لين تدخل الصاله ( وكنت قد زرفت جريدتي الرياضيه والجزيره من الطياره ! ) .. وعندما دخلت الصاله قابلتني مواكب المبزره اللي جايين يستقبلون أهلهم ( وأنا على بالي جايين علشاني :D ) ... وفي ناحية من الصاله لمحت أخوياي جالسين ينتظروني ... وكانوا ثلاثه وأنا رابعهم ..وهم : السواق ( وهو من الجنوب ويعرف الديره ) , والعربجي ( هذا زاحف مقلع مهوي من جد ) , والخكري ( طول الرحله الجوال في أذنه مدري من يكلم ! )

وسلمت عليهم سلاماً حاراً ( بالشطه ! ) حيث انني لم أرهم حينها منذ اكثر من أسبوعين .
وعندما خرجنا من صالة المطار ... بادرت الجميع وصرخت : شمس أبها في وجهي ( متأثر بالإف إم ! ) ...
ثم قال الشباب : نحن جوعانين .. هل تغديت يامالها ؟
فأجبتهم : نعم .. لقد غدونا غداء راهين في الطياره ..
فقالوا : لعنك الله ... وتاركنا ننتظرك !
فقلت : وماذا تريدونني ان أعمل ... أأترك غداء ببلاش ( أي بلاش يابو الشباب .. ؟ ) .
المهم ونطلع من المطار ويروحون يتغدون .. يوم تغدوا قال خوينا السواق : وين تبون نروح .
قلنا للشقه .. نريح شوي وبعدين نطلع ( على فكره كانت الساعه 6 قبل المغرب ) .
رحنا للشقه .. الله وكيلكم جلسنا نلعب بلوت لين جت الساعه 8 ونص ... ( جايين لأبها يلعبون بلوت ! )
راح اليوم الأول ... اليوم الثاني انا كنت متوقع اننا نصحى الساعه 9 ونطلع ... لكن ماصحوا العيال الا الساعه 2 الظهر ... وماطلعوا الا 3 الا ربع ..
طلعنا ذاك اليوم للسوده ... قلنا بنآخذ لنا غدا من هناك ... وبعد مشوار طويل وصلنا للسوده وياليتنا ماوصلنا ... قال خوينا السواق فيه مطل قدام شوي .. نروح له شوي بعدين نروح نتكي ونآخذ غدا ... قلنا شورك وهداية الله .... يوم وصلنا للمطل وينزل خوينا العربجي على طول ... وبعدين لحقه السواق والخكري ... وبقيت أنا فوق أطالعهم .... أطالع ماش ... أشوف تحت بعيييد ... وانا لكم علي .. ماهنا ذيك الشجاعه .
المهم وانا فوق أقنعهم يرجعون وخوينا العربجي يحلف الا نآخذ لنا صكة بلوت تحت في الجبل !
ويجلس السواق والخكري يحاولون يقنعوني انزل ويشرحون لي الطريقه ... وكانوا هم تحتي مباشره ... أما العربجي فكان على اليمين شوي ... وتو العربجي بيعلمني طريق زين للنزول ... الا مانشوف الا غبرته ... نزل يمشي ألف ... وحنا ماندري وش جاه .. نحسبه يستهبل ... ياولد غير بدل .. مره ... الولد موب حولنا ... والله ولا يرده الا شجره على بعد 15 متر من مكان وقفته قبل ! ( الحمد لله ان فيه شجره ... ولا كان رايحين نجيبه من رجال ألمع ! )
شف ذا الصوره لمكان الحادث : http://www.alahlam.8m.net/als.jpg

أنا والخكري قعدنا نضحك ضحك موب صاحي :D ... أما خوينا راعي الديره ( وفي روايه السواق ) نزل للرجال ... وأنا من فوق ما أشوف الا الدمان تخرخر :eek: قالوا لي جب مويه .. وأنقز للسياره وأجيب المويه .. يوم جيت قابلوني طالعين والرجال متسند على السواق ..
والله وننقز به لمركز صحي ... ويصكونه بـ 7 غرز في راسه .. وتجيك الشرطه ... وخذ ياتحقيق ... وينشب لنا عسكري يقول الا انتم دازينه !
المهم ونطلع من المركز الصحي وحولونا على المستشفى يقولون احتمال نزيف داخلي ( شفت ياوحيد :) ) ... ولاطلعنا من الهوسبتل الا عقب العشا .. ويروح ذاك اليوم كله ولاتمشينا ! ( طبعاً اليوم اللي قبله راح من زمان في بلوت ! )

عاد اليومين اللي عقبهم مافيها شي يصلح لكم الا ان خوينا العربجي راكب راسه أي جبل نروح له الا ينزل .. ماتاب الله يرجه !

وهذي صوره ثانيه من السوده : http://www.alahlam.8m.net/als2.jpg

ماودي أطول عليكم ... لكن أعذروني على ردائة الاسلوب اللي صاير كوكتيل عامي على فصحى ... وأعذرونا على القصور ( القصور ولا الفلل :p )
وتقبلوا تحياتي ...
الى الماصله
<== عارف نفسه !

وحيد الجزيره

20-09-2001, 23:34

محجوز :) :)

منادي

22-09-2001, 03:10

لقد كان موقفا مؤلما يوم طاح خويكم <<----خرب اللغه العربيه

بس عندي سؤال لو انك انت طايح بدال خويك وش بيكون شعورك؟؟

ختم التكريم

23-09-2001, 07:39

<center>هلا اخوي مالها الا هلالها .. تستاهل يابعدي :)

http://d1d.net/1/pc/ama4ever/dmoo32w.gif

..</center>

دموع

23-09-2001, 07:43

ههههههههههههههه

هلا اخوي مالها الا هلالها ..
موضوع متعوب عليه يعطيك الف عافيه ..

ومبروك التكريــم :) تستاهل بقوّه

تحياتي ..

بنت نجد

23-09-2001, 07:53

الف مبروك يا مالها الا هلالها على ختم التكريم :)

تستاهل والله :)

ينطيك الف عافيه :)

مشخوط

23-09-2001, 08:13

خخخخخخخخخخ
منتب سهلين بس الخكري ماتشكى والا شي؟

شف ذا الموضوع http://www.eqla3.com/cgi-bin/cgi/ultimatebb.cgi?ubb=get_topic&f=19&t=000176
عقبوه تبت اطلع مع خكارة

بس الصور انتم ماخذينهن والا جايبهن من احد؟

لاهنت يابعدي وعوافي :)

صفر سبعه

23-09-2001, 11:25

مالها الا هلالها..ماشاء الله مبدع, في اي شي تكتبه :) :)

ههههههههههههههه ,, والله ما تنلامون بلوت "ابها" لا يعلى عليه خصوصا انكم مسافرين والصلاه "قصر" , يعني تمشي الصكات بدون حواجز :D

بس لا جيت مره ثانيه ,, عطوا خويكم "الدليل حقكم" اشكل .. وسلموني الطاره :) :)

الف الف مبروك فوزك بالموضوع الذهبي...
تحياتي لك يا غالي :) :)

سلاااااااام

هيكل عظمي

23-09-2001, 14:49

لاوالله مايروح للماصلة.. هذا مكانة التكريم.. الف الف الف مبرووووووك الختم.. وبالمرة الحمدلله على سلامة خويكم :)

مالها الا هلالها

23-09-2001, 18:12

يالله حي الربع .. صب الكفي ياولد ..
وحيد الجزيره :
ياخوي الحجز راح ... مالك الا انتظار :D

الا على فكره .. وش تقرب لك دهانات الجزيره :p
منادي :
لو اني طايح مكان خويي ... كان صحت <IMG SRC="cwm45.gif" border="0">
<=== صريح
مشكور يالغالي .. وتشرفنا بردك .. اللي كان له بالغ الاثر في نفوسنا ( <=== يخف به ! )
ختم التكريم :
اصبر يابو الشباب ردك مع رد راعيتك !
دموع :
مشكوره يالغاليه ...
قسم بالله أخجلتوني بكرمكم ....

الا على فكره ... ترى اول ماشفت يوزر ختم التكريم قلت ياشين الاعضاء الجدد اذا عطوهم وجه :D
<=== كان ناوي يذب عليه ذبه بنت كلب ... بس ضاع وجهه :confused:

الا على فكره ... الحين ختم التكريم أعطي على عدد الردود والمواضيع ( يعني 25 حتى الآن ) ولا كيف ؟ ( <== هالسؤال سألنيه أحد الأخوان فتكتمت وقلت أسأل أهل الاختصاص )
بنت نجد :
الله يبارك فيك ... ومشكوره على الرد ..
الا على فكره وش تقرب لك بنية نجد ؟ ( أكيد اخوات :) )
مشخوط :
هلابك أخوي ...
أجل تقول الخكري ماتشكا ... هو لقا وقت علشان يتشكى ... طول الرحله التلفون بأذنوه ( ايه ذكرتني ... ترى خكرينا قصمنجي ! ).....
أما بالنسبه للصور انا ملتقطها ( <== موب عاقل المصور ! ) .. ولعلمك فيه غيرها كثير بس منيب فاضي لكم أحطها !
<=== انواع الصراحه :)
صفر سبعه :
هلا بك يالغالي ..
يووووووووه ذكرتني بصكة البلوت اللي في الحبله .. لو كوش واحد بقوه طاح الورق تحت ....
والله انك صادق بعد ... أجل الصلاة قصر ..
هههههههههههه الله يرجك لين تطشم :)
أجل نعطي الدليل أشكل ... قدام بس ترا بنروح على سيارتك ( <== حجر له ! )

والله يبارك فيك .. وعئبال عندك ( <=== يادلخ هم اللي يوزعونها ! )
مشكور يالغالي وماقصرت
هيكل عظمي :
الله يبارك فيك اخوي ..
والله يسلمك .. خوينا هاليومين يخضع لبرنامج تأهيلي حيث انه يخلي اهوانه يشوتون راسه بالكوره علشان راسه فقد حساسيته على الكره ... والأرقام السريه ضايعه !

مشكور يالغالي وماقصرت

مشكورين ياحلوين .. ياطيبين ... بنحبكوا ( زي ماقال سامي ! )

السامي الماسي

23-09-2001, 18:22

هههههههههههههههههه

المهبول طول عمره مهبول

لكن الحمد له على سلامة العربجي

وانه ماقعد بها في رجال المع الى الحين

الا تعال بسئلك الحين ليه الخكري نزل وانت مانزلت يالخواف

يعني الخكري صار اشجع منك :D

انا عارف انك معد تبي ردي :)

خصوصا وان المستشارين كلهم بيردون عليك

لاكن ابينا الا ان نسجل حضورنا في مثل هذا الموضوع المميز

وتستاهل التكريم :)

تحياتي يامهبول :)

جعفر

24-09-2001, 08:43

هلاووووووين

الف مبروك اخوي وبعدين حطوا اي علامه لمنتداكم يالله دليتكم بمجيلان :D

تقبل تحياتي

<==== ركز على ردة فعل 07 :D

اياد

24-09-2001, 09:33

مالها والله انك ما قصرت

بس حسافة هالتذكره ياخوي اللي راحت كلها بلوت وخياطة راس ,,,, بس من جد انت ما قصرت ..

فيه واحد اسمه ساعتي تولع في الليل ياخي اتمنى انك تعلمه كيف يكتب وتكون كسبت فيه اجر ..

الى المميزهههههههههههههههههههه

[ 09-24-2001: تم تعديل الموضوع بواسطة : بيض بالجبن ]

بكرج حليب

24-09-2001, 17:21

الف مبروووك .... يعطيك الف عافيه

تستاهل :)

وحيد الجزيره

24-09-2001, 22:51

ههههههههههههههههههههه
هههههههههههههههههههه
هههههههههههههههههههه

رووعة يا مالها الا هلالها...مواقف وشرح واحلى ما فيه الدعم بالصور هههههههههه الله يعطيك ألف عافية..بس برنامجكم بالروحة مسسسسكت :D :D

ألف مبروك ختم التكريم..
(( الى المميزة ))

مالها الا هلالها

26-09-2001, 19:50

هاياااات ... أشكر كل من شارك ... وياهلا ومسهلا :
السامي الماسي :
والله انك فضحتني .. أجل صرت انا الخكري !!!

بس ولو منيب راد عليك ( وش عقبه !) بدري عليك ياحلو أصفك جمب الكباريه :)
جعفر :
هلا بالغالي .. والله يبارك فيك ..
اما بالنسبه للوصف ... فترانا حطينا واحد من الأعضاء الجدد عند الإشاره خليناه يوجه المارين للمنتدى ....
عموماً بنحيل طلبك لوضع لوحات إرشاديه للسيد وحيد بيه الجزيره المدير العام لكافة إدارات منتدى الصمان :)
بيض بالجبن:
هلا بك أخوي .. انت والله اللي ماقصرت على قرائتك للموضوع ...
اما بالنسبه لساعتك .. فأنا مستعد أقدم دروس خصوصيه بس كم تدفع :)

شكراً على ترشيحك للمميزه .. بس الموضوع رايح منذ مبطي للمميزه :) يعني ماشاورناك :D
امزح ترا .. ومشكور يالغالي

بكرج حليب :
هلا بك اخوي ... والله يبارك فيك ...
مشكور على المشاركه ..

وحيد الجزيره :
هلا بك يالغالي مره ثانيه ( ياكثرك :) )
عموماً الله يبارك فيك .. وكان البرنامج جايزن لك .... ترى نبي خوي السنه الجايه ( مانبيه علشانه هو بذاته .. نبيه علشان نوفر في القطه :D )

الا ماقلت لي .. وش تقرب لك دهانات الجزيره :)

مشكورين كل أبوكم وماقصرتوش