منتخبنا يتأهل وبجدارة للدور الثاني ؟؟؟

[Gentle_Man]

سلام,

وش بلاكم أنت وأيّاه, وين الوطنيّه ووين الثقة بالمنتخب ... نسينا ماكلينا, خلاص صار منتخبنا كخ :D مب زين ؟؟؟

أهجدوا وأركدوا, هذي مجرّد كبوة جواد والأيام راح تثبت صدق كلامي من عدمه ... معروف عن منتخبنا لابد من ضربه تجيه على الدميجه :D, وبعدها تبتدي معها الإبداعات ... وللتاريخ معنا قصّه ومثل مثل ما صار لنا بالسابق من أحداث تعتبر شبه متكرّره ... وما أشبه الليله بالبارحه ؟؟؟

هو صحيح النتيجة كانت مخيبة للآمال والتوقعات ولكن هذا مهوب معناه نهاية العالم ... مافي شيء مستحيل عند الله, بس يبيلكم شويّة صبر وتفاؤل ... كل اللي خسرناه على فكره مجرّد 3 نقاط, يعني بقى لنا 6 ... وراح نجيبها إن شاء الله بالعزيمة والأصرار وبتكاتف الجميع ???

الله معك يامنتخبنا, وياجبل ما يهزّك ريح ... عليكم بالدعاء له بدل من الدعاء عليه, وبحيل الله وقدرته نبي نهزم الكاميرون وأيرلندا, وبكذا نتأهل للدور الثاني مع المنتخب الألماني اللي أرشّحه شخصيا للعب على النهائي ضد منتخب الأرجنتين ؟؟؟


تحيّاتي,

[سمران]

مع احترامي لك ... فيه فرق بين كاراخستان وقطر وبين الكاميرون وايرلندا:)

[Gentle_Man]

ومع أحترامي لك اخوي سمران ... الكوره مدوّره تخدم اللي يخدمها ويوظّفها التوظيف الصحيح, وخير مثال "السنغال" و "فرنسا" مافي كبير فيها ولاصغير ؟؟؟

[vip600]

ما عاد ينفع التخدير يا جنتل

منتخبنا للأسف سيئ سيئ سيئ

لا نلعب على انفسنا

ياخي تقول اليوم كنهم يلعبون مغصوبين

انا ما اتكلم عن الفنيات ... حنا نعرف الفرق بين امكانيات الفريق السعودي والفريق الألماني

لكني اتكلم عن الروح ... عن الحماس ... ما فيييييييييييه للأسف ... لا احد يناول زي الناس ولا احد يسلم زي الناس

والله اول الواحد يتمنى يتأهل لكأس العالم ... لكن الحين لا والله ما عاد نبي لا كأس عالم ولا غيره ما دام هذا منتخبنا

<==== كان اكثر الناس تفائل ( كان )

[سمران]

" تخدم اللي يخدمها "

ابيك تبين لي ان المنتخب اليوم خدم الكورة او قدم شيء يخلينا معه نطمح لو بتعادل في المباريات القادمة..

صدقني ماني متشائم لكن في هذه البطولة عندي احساس غريب بان المنتخب بيفشلنا:)

[Gentle_Man]

ياجماعة الخير, لكل مباراة وظروفها ... أصبروا عليه للنهايه, وبعدين أحكموا عليه ... المشوار مازال بأوّله, وبعدها يا أنكم تهلّلون له وألا تصلخونه وهو حي < === يسمع بأمثال الشيبان :D ؟؟؟

[vip600]

وين نصبر يا جنتل

هذا بالله فريق يستاهل ان الواحد يآخذ إجازة علشانه ؟

هذا فريق يستاهل ان الواحد يروح يطارد بهالشموس علشان يشترك في قنوات النصابين ؟

ترى كلها ثلاث مباريات ... واتمرمطنا بأول وحده منهم

حنا ما نطلب منهم الفوز على المانيا لأنه بدري عليهم

لكن نبيهم يشرفون الكره السعوديه ... هذا مهوب مستوى الكره السعوديه اللي شفناه اليوم ... وين المستوى اللي كان قدام نجوم هولندا ؟ صح انهزمنا في 94 قدام هولندا لكن الكل كان يشيد بالكره السعوديه

هل تتوقع انهم يبي يغيرون نظرة العالم لمنتخبنا بالمباراتين الجايه ؟ اتمنى هالشئ يصير ... لكن للأسف ما عاد عندي اي تفائل بهالمنتخب

والله يا جنتل كنت أكثر واحد متفائل وانصدمت اليوم بشكل كبير

[Gentle_Man]

أخوي vip600, والله أني حاسّ فيك وفي الشعب السعودي كلّه ... بس أتمنّى من الله تهدون شوي, وتعطون المنتخب فرصته الكامله وبعدين حاسبوه على كيف كيفكم ؟؟؟

أخبرك حكيم وأنا أخوك, وعشان كذا ما أبيك تطير بالعجّه ... أدري بك مقهور, بس صدقني قهرك وصدمتك راح تتلاشى لاشفت منتخبنا بصورة مغايرة تماما بالمباريات الجايه ضد الكاميرون وضد أيرلندا ؟؟؟

بصيص الأمل للتأهل للدور الثاني مازال وارد ... والميدان يا حميدان :D والتوفيق من الله ؟؟؟

[سمران]

اخوي جنتل مان....... وش رأيك نقلبها محاورة اصرف:D

[Gentle_Man]

محاورة كرويّه وألا محاورة شعريّه :D ؟؟؟

شف وأنا أخوك ياسمران:
بعد مباراتنا مع أيرلندا يوم 11/6 يا أنكم تحلتون هالموضوع مع راعيه بالماصله, يا ترزّوني مشرف على منتدى كأس العالم بعد تأهل منتخبنا للدور الثاني ... هاه, وش قولكم ... قولوا تمّ :D ؟؟؟

[vip600]

انا داري ان ابهدأ عقب ما انام :)

لكن لو خبص الدنيا منتخبنا في المباراتين الجايه ... وش اللي يبي يصير ؟

انا اقول لك

يبي يقولون هذي كبوة جواد ... ولكل جواد كبوه

ويبي يقيلون المدرب

ويرجع السيناريو وفق طرق علميه ومدروسه :rolleyes:

حبيبي جنتل

تراهم قالوا هالكلام قبل اربع سنين يوم نجيب العيد بفرنسا

وقالوا نبي نعوضكم في اليابان وكوريا

وين التعويض ؟ وش قاعدين يسوون اربع سنين ؟

[سمران]

جنتل مان.... الا تشوفه:)

بعد 11/6 يانشطب يوزرك او نحطك مراقب عام:D .. وش قلت.. قل تم؟:D

[Gentle_Man]

ياحبيب ألبي vip600, لاتنسى أن فرنسا اللي فازت علينا بالأربعه بكأس العالم 98 هي نفسها اللي فازت على البرازيل بالنهائي بالثلاثه ومن عقب فازوا بالكاس ... هذا معناه شيء واحد وهو أن منتخبنا حظّه سيء جدا في مقابلة أبطال كأس العالم بأول مباراه يخوضها ... وهذا اللي أتوقعه لألمانيا بها الكأس ؟؟؟

[Gentle_Man]

تمّ تمّ تمّ, اليوزر وراعيه يفداك ياسمران ... وكلّه يهون لأجل عيون الأخضر, مع أنّي أعزّ يوزري هذا اللي عرّفني بهالوجيه الطيّبه طوال هالسنتين ونيّف :D اللي قضيتها معكم بالإقلاع ؟؟؟

[منبهت]

vip600 . يا خسارة الاجازة . رح و انا اخوك و اقطعها بس و خلها في اخر الصيف اصرف .


تحياتي

[سمران]

جنتل مان... خلاص هونت عن اقتراحي:D ... الاقتراح الجديد هو يانك تصير مراقب عام او اخذ انا يوزرك... بس وش رتبتك؟:D ... لان يوزر مثل يوزرك حرام ينشطب:)

[Gentle_Man]

يا حبّك للتشات يا سمران :D شكل هالموضوع يبي يحلته للماصله vip600 قبل الحادي عشر من سبتمبر قصدي يونيو, والسبّه أنت وسواليفك اللي ما تنتهي ... ما شاء الله عليك, نفسك طويل :D وأنا ما أقدر أجاريك فلذلك اعلن أنسحابي مع فائق إحترامي للحرامي :D ولنا لقاء آخر بمشيئة الله بعد لقاء أيرلندا ؟؟؟

[vip600]

اخوي جنتل ... لحظه وين تبي تروح ... باقي هالكلمتين ابقولهم :D

فرنسا فازت علينا بكأس العالم 98 اربعه وخذت كأس العالم

اجل المانيا يوم فازت علينا بثمانية وش يبي يعطونها كاسين :)

اللي ودي اقوله ان مستوى المنتخب مدحدر للأسف ومهوب من هذي المباراة وبس ... الا من ايام التصفيات

الله يوفقهم بالمباراتين الجايه ... لكن كانهم خبصوا الدنيا فلازم يتعاقبون


اخوي منبهت

افااا عليك ... بكره بإذن الله ابداوم ... بلا منتخب بلا هم :)

وباقي مباريات كأس العالم لاحق عليها بالليل

[Gentle_Man]

لابد من الصبر عليهم أليما ينتهون من هالمباريتين حتّى ولو تعادلوا قدّام الكاميرون (مع أنّي أتوقّع الفوز لمنتخبنا) فصدّقوني الفرصه ما زالت مواتيه ... والمفروض ما نحاسبهم إلا بعد ما تنتهي مباراتهم مع المنتخب الأيرلندي, ولكل حادث حديث ؟؟؟

[منسدح بالبلكونه]

جنتيل مان الله يوسع صدرك قل آمين

هاذا الكلام اللي نحتاجه صح المنتخب ماقدم شيء يذكر
بس المفروض مثل ماقالوا مانبكي على اللبن المسكوب <---------بدري عليكم المثل هاذا ياجحلط:D

ونفكر باللي قدام
وطبعا حنا مانبي الى المستوى والنتيجه من رب العالمين

مشكور وما اروعك:)

[Gentle_Man]

هلا والله باخوي "منسدح بالبلكونه", أنا أشهد أنّك "طير شلوى" ... أيه هذي الروح اللي نبيها, وبعدين وش صار يعني لأنهزم المنتخب بهدف وألا أن شاء الله بعشرين ... ترى النتيجة وحده وهي خسارة 3 نقاط بس, وبلغة الأرقام تعني بالضبط مثل خسارة فرنسا قدّام السنغال :D وخسارته ل3 نقاط ... والتعويض مازال بابه مفتوح على مصراعيه, ولكل مجتهد نصيب < === حقوق النسخ محفوظه, لزاهد قدسي :D ؟؟؟

[** فهودي **]

مباراة اليوم هي بداية السقوط إلى الهاويه


وبينا الأيام راح تبين من اللي إحساسه أصدق

[ابودمجه]

اذا انت متفائل بالفوز مع انك مصقوع ب8

اجل جماهير الكاميرون وايرلندا وش بيقولون بعد مباراتهم ( الابداعيه) اللي تعادلوا فيها واحد واحد؟؟

ياناس تحسبون ماحد يلعب الا انتم؟؟؟؟


بعدينت تكفون لا احد يجيني ويقول اننا سبق وانهزمنا من هولندا ومع ذلك تأهلنا

لاني بأصقعه في دمجته

وبقوله يالدلخ يوم ننهزم كان الكل يتكلم عن المنتخب السعودي ومستواه

واجبرنا هولندا انهم يلعبون تحت ضغط بعد ماكانوا متو قعين انهم يفوزون بمهرجان اهداف

ولولا غلطات ابو دعيع ولا طالعين بالتعادل


وبعدين في 98 انصكينا بواحد من الدانمارك ومع ذلك طلعنا


اجل كيف مع 8 الالمان؟؟؟


الله يستر من الجاي

[Gentle_Man]

حلمكم علينا :D لازم نعطيهم الفرصة كاملة, وبعدين يجي وقت الحساب ... الصبر زين :D ؟؟؟

[حروف الحب]

عادتك يالجنتل هالتفاؤل..

بس هالمره غير..
من مصلحة الجميع بان المنتخب يوقف عند هذا الحد
ويعاد ترتيبه كاملا..
وفق خطط علميه مدروسه :D

[Peter Pan]

وبكذا نتأهل للدور الثاني مع المنتخب الألماني اللي أرشّحه شخصيا للعب على النهائي ضد منتخب الأرجنتين .

اما من ناحية نتأهل ...فالتفاؤل زين لكن نلعب على أنفسنا ونقول نتأهل وبجدارة هذي تسمى دلاخة مهيب تـفاؤل;5

[الملثم]

على قولة حنتل .. عطو الحر فرصة
يا عمي انسى ..
الحين فيه اداري مث لالناس يقول للفريق الهزيمة فينا فينا بس تكون خفيفة ..
وين الفكر الادارى ولا الشغلة ترزز والسلام
زين ان اليابانيين ما يحبون الشعر والادب العربي ولا كانت علوم

[Gentle_Man]

نواف بن فيصل: أنا جزء من المنتخب وأتحمل مسؤولية الخسارة
مكالمة نائب خادم الحرمين تخفف وطأة الهزيمة أمام ألمانيا

سابورو: صالح الحمادي
أجرى نائب خادم الحرمين الشريفين صاحب السمو الملكي الأمير عبدالله بن عبدالعزيز اتصالا هاتفيا بنائب الرئيس العام لرعاية الشباب رئيس بعثة المنتخب السعودي لكرة القدم إلى نهائيات كأس العالم الأمير نواف بن فيصل وبمدرب المنتخب ناصر الجوهر خفف خلاله من صدمة الخسارة الثقيلة التي تلقاها المنتخب أمام نظيره الألماني (صفر/8) يوم أمس، وقال سموه في اتصاله الذي نقله الأمير نواف بن فيصل للاعبين في اجتماعه معهم عقب المباراة: لكل جواد كبوة والمنتخب سينهض ويستعيد قواه.
وجدد سموه ثقته بالجهازين الإداري والفني للمنتخب وبجميع للاعبين وطالبهم بتجاوز المباراة والتفكير بالمباراتين المقبلتين تحقيق نتيجة مشرفة فيهما.
وكان الأمير نواف قد اجتمع بالجهازين الإداري والفني قبل أن يجتمع باللاعبين بحضور الإعلاميين السعوديين، وألقى سموه كلمة مؤثرة قال فيها: شاهدنا في المعلب قمصانا خضراء، لكنا لم نشاهد اللاعبين السعوديين، وأضاف: كنتم أكثر فريق لعب مباريات تحضيرية وأقام معسكرات تحضيرية، ووجدتم كل الدعم والرعاية من مولاي خادم الحرمين الشريفين وسمو ولي عهده وسمو النائب الثاني، وجميع المسؤولين السعوديين، ووضع الجميع ثقتهم فيكم ولن نقبل منكم عذراً إلا بتصحيح الوقت في المباراتين المقبلتين".
وتابع: "كل منتخب يمكن أن يتعرض للخسارة، ولكن خسارتكم غير منطقية، وافتقدتم الجدية والحماسة وكثرت أخطاؤكم وكان أداؤكم غير مرض نهائياً".
وجدد سموه ثقته في الجهازين الفني والإداري وقال: "أقدر للجوهر شجاعته بتحمل المسؤولية، ولكن ما شاهدناه أن اللاعبين أنفسهم لم يلعبوا بشكل جيد، وكانت هذه أسوأ مباريتهم".
وأعلن سموه أن الجهازين الإداري والفني سيستمران وسيجدان الدعم، وأن اللاعبين وصلوا مرحلة من الخبرة الجيدة التي تمكنهم من اللعب أمام فرق عالمية لكنهم فقدوا هويتهم وأوراقهم الفنية، وقال: عندي أمل كبير بتقديم عرض مغاير في المباراتين المقبلتين، ونأمل أن نتأهل للدور الثاني".
وفي موقف شجاع قال سموه: "أنا جزء من المنتخب، وأتحمل جزءاً كبيراً من مسؤولية الخسارة".

[الملثم]

اتوقع ان اللاعبين في نهاية المكالمة قالوا بصوت واحد ..
والله وماقصر ابو متعب ..
ابو متعب ابو متعب ..

وكان الرد المعتاد ..
المكافأة مضاعفة .. :(

ودي اقول كلام بس يستاهلون ما جاهم .. وكفى .!

[مربوش المربوش]

تفاؤلك حلو ياجنتل وهذا يدل على انك انسان صبور ,,,, وانك تحب وطنك ;)

لكن الثمانيه هبطت عزايم اللعيبه وعشاقهم لو انها ثلاثه اربعه معقوله
والمشكله انه منتخب عنده الخبره الكافيه انه يحرج الالمان ولعب مباريات وديه وكانوا في معسكر مدته طويله

بصراحه انا اقول ماللمنتخب اي عذر بالفاجعه اللي صارت :mad:

انا اتمنى ان المنتخب يحفظ ماء وجهه في المباريات الجايه ويرتب اوراقه

[أحد ناداني]

الأخ ..... جنتل قال فوووووق .....
(( حلمكم علينا لازم نعطيهم الفرصة كاملة, وبعدين يجي وقت الحساب ... الصبر زين ؟؟؟...))



عاد انا تذكرت الشمراني ... بطاش ما طاش .... عطو سداح فرصه .......

نعم انا معك يا جنتل .... يجب ان نمنحهم هذه الفرصه لكي .... يقضوا علينا ويسودوا وجيهنا ويكملوا الناقص

بصراحهههههههه 8 اهداف ..... شويه .... والله شويه قسم بالله شويه


ارفع راسك انت سعودي .... غيرك ينقص (اهداف) وانت تزودي
:D ;1 :D ;1 :D ;1 :D ;1

[Gentle_Man]

سلام,

مشكورين كل أبوكم عالردود والمشاركه :D ؟؟؟


تحيّاتي,

[فنطول]

يا شباب ليش انتم مستعجلين على التقطيع في المنتخب خلونا نشوف ايش عندهم في المباره الجايه



واذا ما عندهم شي اسحب عليهhttp://smilies.sofrayt.com/1/i0/wc.gif


وانا مع الاخ جنتل مان وانشاء الله نشوف شي يشرفنا

اخوكم:
فنطول الفنطيلو من مدينة الفناطيل

لوووووووووووووووووووووووووووووووووووول




http://smilies.sofrayt.com/1/g/coolman.gif

[Gentle_Man]

أحمد المصيبيح

مكالمة سمو ولي العهد
وسيلة فاعلة للعلاج السريع!

التاريخ: 6/3/2002 م

جاء الاتصال الكريم من قبل سمو ولي العهد برئيس البعثة السعودية المتواجدة في اليابان ليؤكد من جديد حرص القيادة السعودية على عدم تكرار الأخطاء ومعالجتها بشتى الوسائل من أجل سمعة هذا البلد الكبير..
فالهزيمة من ألمانيا بثمانية وبمستوى هزيل وحضور لا يليق صدمة تلقاها الجمهور السعودي في أول أيام مشاركته المونديالية (الثالثة) ولكن عندما يحرص شخصية كبيرة بحجم سمو ولي العهد على المبادرة بأول وسائل العلاج فإن هذا يبعث الاطمئنان ويعيد التفاؤل من جديد نحو النهوض من هذه الكبوة المفاجئة!

وقد تحدث الكثير عن الخسارة وكثرت التبريرات ووجهت الاتهامات ولكن يبقى العلاج المؤقت بالأسلوب (النفسي) أكثر لتعديل الصورة ومسح آثار الخيبة بحضور مقنع أمام الكاميرون وايرلندا وبعد المونديال فلنكشف الأوراق كاملة ونصارح أنفسنا ونبدأ العلاج من القمة إلى القاع.. ولنبدأ بنبذ العواطف والاجتهادات ونعمل بعلم ونبعد العقول المتأخرة ونستبدلها بعقول متعلمة يسيرها التخصص والمنطق.. نرفض الاجتهاد ونعمل للمصلحة ولمستقبل بعيد.. ونؤمن بأن الرياضة (علم) قبل كل شيء.. وزمن تخطيط المجالس وآهات الشارع المتعصب انتهى منذ زمن طويل جداً!

[Gentle_Man]

سلام,

"وإن غدا لناظره قريب" :D ؟؟؟


تحيّاتي

[مطفوق واجد]

فاقد الشئ لا يعطيه;8 ;8 ;8

[ياهملالي]

على طاري التفاؤل ..
أنا بصراحة أحب التفؤل والمتفائلين واحب أقول بهالمناسبة السعيدة إن المنتخب بيتأهل وبيفوز على إيرلند وبيجيب ثمانية صفر ، لا ويمكن يجيب عشرة عشان يعلمهم إن كل عورة لها فاتش وكل كسوة لها لابس، والله يكفينا شر الطيرة !



يــــــــــــــــــــــــ 10/ 0ــــــــــــا هملالـــــــــــــــــــــــــــ للمتفائلين ـــــــــــــــــــــي

[احمد 2002]

تصدقون ردي هذا بعد المباراة والحين اشوف هالتحليل قاعد يتميلحون منتنخبنا انهزم بواحد وقدم مستوي بالله وين المستوى 0 المستوى والله بلاعب واحد هو التمياط والباقين مايسوون تالي الغنم 000
اقول لا تكثرون تبريرات منتخبنا يفشل بكل ماتحمله الكلمه من معاني وبلاش مجامله ضايعه سلملي على الديوووك الالمان 0000 وقولوا الحق لو مررره بمبارة الكميرون لا تقولون المنتخب قدم شي وربي ماقدم الا الا 10 من 100 واذا تبون تعرفون اسالوا اي هندي او بنجلاديشي ويعلمكم عن مستوى منتخبنا