مسيكم بالخيير اذا انتم بالصبح
وصباح الخير اذا بالليل
وحيا الله كل العيارين والمنسمين والمهسترات والمقلعات
طبعاً فيه شباب كثااااار يكسرون الخاطر يدورون وحدة تعطيهم وجه ولا ترفع معنوياتهم وعلى طول ما يصدقون يشوفون زول بنت الا وقاطين ارقامهم وهذا إن دل على شي يدل على انهم صدق تماسيح وماشافوا خير لابو من جمعهم لابو من عطاهم جوالات،،، البصمة ويخب !!!!!! << شديد
على فكرة بقوللكم سر بس بيني وبينكم لا يطلع برا الموضوع .. للأسف احنا السبب .. ايه حنا لا تستغرب
.. حنا اللي خلينا هالبنات يشوفون نفسهم علينا !!
المهم قلت اسدح لكم طرق وأسرار خطيرة في كيفية انك تخلي السحلية اللي شايفه نفسها تهستر وتصير تلاحقك وتبي بس شوفة منك
... بس كمل الموضوع لين اخره وطبق القوانين وابشر بعزك ياأحلى تمساح
..... بس رجااااااء البنات يمتنعون ولا يكملون الموضوع لأنهم بيخربون الدعوة وبيعرفون الأسرار وحركات تطييح البنات ، بس اللي تحس ان ماحد معطيها وجه وودها تطبق الطرق على الشباب ترا ماهنا مانع
نبدا معكم شوفوا حبايبي ياشباااااب ياحلووووين اشربوا الحليييييييب << خشة عرض
اليوم الأول .. المهمة المستحيلة
طبعاً أكيد بتقول اصعب شي البداية ... ما جبت شي جديد .. البداية كيف تخلي نفسك مميز عن جميع التماسيح في مسرح الجريمة
بدون ما يحسون انك نصاب !!
أول شي لازم تفتخر بتمساحيتك .. وهناك فرق بين التمساح والخروف، انتبه تكون من النوع الثاني لأن الخرفان من مميزاتهم انهم يتسحبون على خششهم .. اما التماسيح واثقين من أنفسهم .. (راجع كتاب دليل الحيران في مثالب الخرفان لمعرفة الصفات المشتركة للخرفان)
لا تحاول تسوي نفسك رومانسي واشعار وحساس يااااي
يا ربيه ... اقول اثقل بس يبوووو ترا ماحد جاب خبرك ..! الرومانسية انتهت مع ايام احمد عدوية ومزعل فرحان.. ياحبيبي انت شكلك على ايام الالة الكاتبة .. تطور يالاخو حنا في زمن النت والبلوتوث وبنك البلاد (الا على سيرة البنك احد يبيع اسهمه تراني شراي
) ... خلك ثقيل ولا تسولف مع اي بنت ،، فك كشرك مع أبناء جنسك في التمسحة .. وسولف معاهم في اي شي مايفهمونه البنات .. مثلا في السيارات في الاسهم في السوني في الكورة واذا علقت بنت على كلامك سو نفسك ما قريت كلامها او قول لها وش دراك انتي عن هالسوالف خليك في الطبخ والنفخ (في الصميييم
) ....
الحين انت في الطريق الصحيح ،، وحتى الآن ضابط الكاركتر .... لا تجي بعد شوي وتخرب شغلنا وتبدا تخنبق ثمن تطيح على خشتك
.. حاول انك تاخذ الجو وتكون كنق الروم او المكان اللي انت فيه أياً كان .. ولا تجيب نكت مغبرة لانك كذا بتنسف كل مجهوداتنا ترا البنات اكثر شي يكرهونه النكت القديمة ويفضل انك ماتقول نكت اصلا لأنك ماصل اكيد زي بقية التماسيح
الحين راح تتفاجئ بأحد الضحايا ترسللك بالخاص (برايفت للقراوى) وتسلم عليك ... عادي لا تتفاجئ ... هم كذا طبعهم اللقافة والتلزق ... خاصة اللي يعطيهم ركب .. المهم خلنا في موضوعنا .. راح تقول لك الاخ من وين؟؟؟
طبعا لانك خروف راح تقول انا من الرياض ،، واحتمال تعطيها الكروكي حق بيتكم !!
اهجد وخلك رزين .. ولا ترد عليها ،، رح على العام وقل يا برايفت انزل من السطوح !!
الكلمة هذي لها دلالات كثيرة ،، اولا تثبت انك تمساح ياباني اصلي .... وتخلي البنت شكلها كذا
...
ثانيا راح تثبت لها بالدليل القاطع انك ما تعرف للف والدوران وحركات اللكاعة ، وراح تخليها تفكر في اللي سويته من الناحيتين الايجابية والايجابية ( يا حبني لي وانا اتفلسف
)
الان انت اعلنت الحرب الشعواء عليها ...
... والجيش مستعد للدفاع عن كرامتك المهدرة .. اعتبر نفسك لواء بالجيش
ووراك الكتيبة جاهزة لاقتحام معاقل العدو
... بس ناقص اشارتك وتوجيهاتك ... (ذكرتوني بشبابي وانا في حرب فيتنام << مع الفيتناميين طبعا
)
راح تتحداك البنت وتحاول تشيل كرامتها الممسوحة بالبلاط، وتقول لك في الخاص (عيب الحركات ذي؟؟) ... انت طبعا هنا تكون ذبحت تيسين بشوزن واحد .. التيس الأول قصدي الفائدة الأولى تسولف معها بالخاص وفي نفس الوقت هي اللي تبي كذا مو انت
... الخمها بالرد التالي اللي يبي يعفط وجهها يخليه قوطي صلصة ( ما تعودت احكي مع بنات بالخاص ) !!
السحلية طبعا راح تشك في كلامك وتتسائل (هل ياترى جاي التشات عشان وشو؟؟) انت لا تنتظرها يامال انفلونزا الطيور واصعقها بالكلمة التالية: ( اصلا انا جاي التشات منتظر واحد وبمشي ) << على فكرة نسبة نجاح الكلمة هذي في خطتنا مثل نسبة نجاح خطط ناصر الجوهر في المنتخب، لذلك لا ينصح باستعمالها الا من قبل الخبراء فقط ، حتى الخبراء لا يستعملونها ازين لهم
لذلك يفضل تستخدم الـ plan B يعني الخطة البديلة وتقول ( على فكرة وش رايك ببنات التشات ) .. السؤال هذا انا اسميه (رصاصة الرحمة) لانها وحدة منهم وماتقدر تسب او تمدح ..... فراح تنقل الكرة لملعبك وتقول ( انت وش رايك فيهم ) ..
طبعا انت تقدر في اي لحظة تستخدم الجوكر حقك وتقول Ladies First وراح يمشي الحال ..
عموما اياً كان ردها فتوقع ان السؤال الجاي راح تدخل فيه اسمك ... مثال: شكلك قديم فيذا يا (فلان) ، طبعاً هذي الحركة قديمة بس ماتقدر تستغني عنها البنت ويقصد منها ازالة حاجز الرهبة بينك وبينها (الميانة يعني
) ، طبعا لا تخق يبوووو !! وقلها ( خيرررر متى المعرفة ) << لاحظ وجود عدد 4 أحرف راء ،، لو استخدمت 5 احرف لا تكمل الموضوع رجاءً لانه مايصلح لك ..
راح تجي دقيقة صمت لضحايا تسونامي قصدي عشان صدمة الكلمة اللي قلتها ، لذلك لازم ترقعها بسرعة وتجاوب على السؤال اللي طرحته هي اساساً ... وبعد ما تجاوب قللها انا مضطر امشي الحين ... عندي موعد مهم ، بس خلينا نشوفك ... وبسبب غريزة اللقافة الموجودة لدى هذه الكائنات راح تاكل اظافرها من القهر وتحاول تسألك مع مين او تقول (تكفى يا مهم) ، لذلك لا تعطيها الفرصة وقل يلله باي باسرع وقت..
الان انت كذا جبت السكين وحطيته على رقبة الدجاجة وباقي تسمي وتذكيها ثم تشويها وتقلقل الكبدة وتفرش السماط وتفترسها بالهنا والعافية نياهاهاها
<< يفرك يدينه مثل شرشبيل
خلاص اطلع من التشات وانت رافع راسك فوق وافتخر بين التماسيح .. لانك عديت اول يوم .. واصعب يوم .. انجطل ونااام وانت ضميرك مرتاح ،، ولا تجلس تفكر زي هذا
ياخروف ..
الأيام من 2 إلى 9: اضرب عدوك بالكلاشنكوف ياسطل
صباح الخير ياتمسوح ياحلو ..... بدون مقدمات شل الغمص اللي بعيونك جعل عيون العدو تخفس وقم ومارس نشاطك اليومي الين تدق الساعة تك تك على الموعد المعتاد .. انت لأن فيك عنصر دلاخة مستعصي ومزمن من يوم ولدت بتروح طاير وداخل باسمك اللي امس وهذا يدل ياحبي على إن مخك تنكة مصدية (مع احترامي للتنكة)
لا لا لا ... ادخل بأي اسم انشالله (هبنقة) المهم تتأكد جات ولا لا ،، وانتظر الين تجي ، بعد ما تجي بدقيقتين اطلع وادخل باسمك اللي امس ، عشان تصير ثقيل وكأنها هي اللي منتظرتك ياذهين ..
طيب الحين انت ضبطت الدور ،، ومثل امس لا تبدا الحكي معها ... قل السلام عليكم مساء الخير ومن هالحكي وهي اكيد بتنتبه لك وبتقول حياك الله وو .... انت قل (هلا فلانة شخبارك اليوم) لا تنسى كلمة (اليوم) عشان تحس انك مقابلها امس او اللي قبله وانك تذكرها ،، هي بتنبسط اكيد بس مو مرة .... لذا ارجع لعادتك القديمة ياحليمة (بولند) وارجع سولف مع بقية اللي بالغرفة وطبعا بعد ما بديت تدق علاقة مع وحدة ، حاول تسولف بعد مع بنات ثانيات ،،، وتبين انك ذوق وتعرف تحط كلام حلو ومعسول .... هي بتغار بس على خفيف
لذلك بعد شوي ارجع وكلمها وجب أي سالفة خفيفة وفي نفس الوقت تحاول تعرف عقليتها ,,, مثلا: (يا فلانة تتابعين ستار أكاديمي ؟) وعاد خش في نقاش حامي معها ،، لا تحاول تسفه رايها وفي نفس الوقت حسك عينك تمدح آرائها ،، وخلك في موقف الوسط ،،
المهم بعد ساعتين و13 دقيقة بالضبط قل (يلله شباب وبنات مضطر اطلع نشوفكم على خير) واسدح لها عالخاص كلمة (استاذنك نشوفك على خير وانشالله ماتكونين زعلتي من نقاشنا الحامي بس كلام الشات ينشات ياقلبي خخخخخخخ)
بكذا تكون انتهيت منها وحطيتها بمخباك الايمن جنب جوال البصمة حقك (اللي يلبسون الجنزات يمتنعون) واستمر على هالنمط كم يوم ، تقريبا الين اليوم العاشر اللي هو يوم الهنا والسعد يا أحلى تمسوح أخضر كنك شراريب زيدي
اوووووووووووووو اوووووووووووو جاكم الاعصاااااااار
اليوم العاشر: الزحف الكبير
اليوم يوم النصب والمهايط العالمي ... لازم تكون مستعد ومتشيك وفي أحسن حالاتك المعنوية والنفسانية ... لا تنسى تفرش اسنانك وتتعطر عشان تحس انك نظيف ومنعنش مثل كذا
.. اييه ولا تنسى البايسون ترا له مفعول قوي
رح ادخل التشات بالتعليمات السالفة الذكر ، وهالمرة اول ما تشوفها كلمها خاص وقللها كيف الحال والذي منه وحاول تحسسها انها عزيزة وغالية ومن هالخرابيط هع هع هع
المهم بعد شوي انفخها وانفخها وسو بها مرقة ماجي بس لا تكثر الحبحر .. شف عشان تستوعب بالموضوع تخيل انك سعد مرزوق وراكب الكامري وتنطل بالسيارة ، ابيك يابعدي تنطل بالبنت تنطيل سعد مرزوق بالكامري ( أو تنطيل سامي الجابر بمصطفى ادريس
) أيهما اقرب ...
حاول تقعد معها قدر المستطاع وحسسها انك متفرغ لها يعني خلك عالخاص ولا تتكلم بالعام .. واذا تكلمت مع احد قل (احم احم) ..... فيه برضو تكتيكين جديدين بنستخدمها في هاليوم .... بس بيني وبينكم تراها خطيرة جدا ولو طبقتها بتكون سجلت هدف دبل كيك في الثمانيات بعد ..... وانتبه لا تغلط فيها لأن الطريقة لو انكشفت بيكون هدفك تسلل وبتنطرد وتتوقف الين نهاية الموسم بعد (وتستثنى من أي عفو قد يصدر مستقبلاً خخخخخخخ) !!!
التكتيك الأول..... حاول تدور واحد من اخوياك بس يكون تكانة وثقة .. تعرفه منذو مبطي .. وخله يدخل باسم بنت للتشات ،، ويبدا يتغزل فيك ويمدح ويمدح .. انت طبعا يبو الشباب في البداية تستغرب وتقول يالاخت متى المعرفة ؟؟ الحين لازم تقول هي : (من اول نظرة حبيتك) .. قل ( خيرررر !!! ليه انا راس جدك تحبيني ) طبع هي (خويك) مفترض تقول : وأغلى بعد !! ... انت بهاللحظة لازم بسرعة تطلق صاروخ أرض جو عابر للقارات محمل براس نووي ومنطلق من حاملة B52 ( كني خشيت جو
) ،، قل : ( الله يستر عليك يااخت (...) انا ماحبيت الا وحدة وياليتها تحس بس !!! ) مع زفرة كذا بس شلون تكتب الزفرة مدري عنك عاد تصرف لازم اعلمك كل شي.. صدق ناس ماينعطون وجه !!!
المهم التكتيك الثاني << ترفق يامحمد الخراشي ... بعد 14 دقيقة و59 ثانية بالضبط مو ربع ساعة لا تستذكي .. خل نفس خويك الملكع يدخل باسم ولد هالمرة .. ويطب في خويتك ، مثلا يقول ( انتي مو عاجبتني يا غبية ) انت ترد تقول عسى ماشر يالشيخ وش تبي؟؟ بيقول ( وش دخلك انت خلك على جنب ، تكلمت عليك انا ) هنا تخمه برد قوي ( ايه تكلمت علي !! اذا تكلمت على فلانة كنك تكلمت علي ) لاحظ لاحظ لاحظ ان أي بنت في العالم مهما كانت رافعة خشمها تحب الرجال اللي يدافع عنها ويفزع معها حتى لو مايعرفها .. صدقوني عن تجربة نياهاهاها
بعد ماتكون حزت على ثقتها ورضاها هالمطيورة،، قل لها على الخاص ( ماعاش اللي يسبك وانا موجود ) والله ان تغدي كشنة وملح وملوخية بعد وقل ماقال آهات ... وتوقع ان يكون ردها خيالي ... مثلاً ( يابعدي والله انك اصيل ) ... بكذا تكون خلاص على بعد خطوة ونص عن هدفك .... هدفك طبعا تدري وشو وهو ((
الرقم )) يا لطخ
بعد شوي كذا يعني مثلا بعد ماتكون كملت ساعتين ونص 3 ساعات بالشات راح تكون جبت الشوكة والسكين وباقي تسمي وتاكل ( يقال لي متطور اكل بالشوكة والسكين مالت
) طيب خش الحين عالخاص وقل لها ( والله راح افقد طلتك الحلوة
) ..... بتقول لك ليش عسى ما شر؟؟ انت هنا تجاوبها وتدور اي حجة مناسبة .... مثلا تقول ( ماعاد بدخل التشات عشان ظروف العمل ) أو أي حجة قاصمة للظهر
..
تتوقع تسكت البنت وتقول اوكي سلام؟؟ لا حبيبي اسمح لي اقول لك انك منتب لم سنع .. راح تقول لك اقتراحات بايخة عشان تقابلها بالتشات... لذلك انت زلزل أركانها وقل الكلمة اللي بتعفسها ... ( عندي حل وحيد ) بتقول لك وشو ، قل ( لا خلاص اعتقد ماينفع ) زي ما قلنا ان البنت عندها غريزة قوية جداً وهي اللقافة ، يعني انس انها ما تسألك ،، لذلك اذا سألتك وقالت لا قول ... انت ككائن بدائي تكشف اوراقك وتقول : ( بغيت اقول ممكن نتواصل عبر الجوال على الاقل اتطمن عليك لو مسجات بس لانك غالية ومكانتك كبيرة بقلبي ) ... هي بتنحرج وبتنلخم ويصير وجهها طماطة من طماط سوق الخضرة
( للي ما يعرف سوق الخضرة الرجاء التوجه لجنوب الرياض وبتلقى انواع الطماط على كيف كيفك بس ترا احلى انواع الطماط الطماط البلدي لا تروح تسوي فيها وتجيب مستورد تراني علمتك ) وين وصلنا ؟ اييه وصلنا ان البنت وجهها صار طماطة ( مع اني اشك ان في سعودية وجهها يصير طماطة ) قل لها عموما هذا رقمي يجوز اجي على بالك وترسلين مسج ...... هي راح تقول انشالله بحاول ..... وينتهي الموضوع وانت في العلالي ( العلالي ولا قشطة التاج )
الحين انت دورك انك تصبر وتصبر الين تجيك منها مسج او تدق وتسكر ( تراهن قعيطياااااااات ما يدقون دايم يخسروننا حنا التماسيح الدلوخ ) ،،،، لا تتسرع ترا الركادة زينة يا وليدي ... واصبر يوم يومين شهر سنة حتى عشرين سنة ،، لا تخاف مايضيع حق وراه مطالب والأمل في ربنا كبير ،، والنقطة الايجابية انها تحسب لك خدمة اذا تقاعدت هع هع هع
انشالله الموضوع عجبكم واللي ما عجبه يسوي مثل اللي بهالصورة ( 
) واتمنى ماحد يزعل من هالخنبقة اللي فوق تراي كتبتها وانا شارب شاني ومنسدح .. خصوصا حبايبنا البنوتات ترا الدعوة إقلاع ولا تصدقون التماسيح اللي يرززون وجيههم تراهم من هالنوعيات اللي فوق 
خصوصا اننا لازم نتذكر ان البنت امنا وبنتنا واختنا وجدتنا وشغالتنا وفي المستقبل يمكن يسمحون لهم بالقيادة ويصيرون سواقاتنا 
،، يكفي انهن الوحيدات اللي يتميزون بالركب السود
خلاص وخروا .... كل واحد على فصله
بشرى للتماسيح: كيف تطيح أي سحلية في 10 أيام !!
,, 
رد : بشرى للتماسيح: كيف تطيح أي سحلية في 10 أيام !!
الوضع العادي
