ما عمرك قمت من النوم متأخر ومستعجل تبي تلحق الدوام مايمديك تغسل وجهك من الروعة
وتاخذ شماغك مهوب مكوي وتدرعم وانواع البشرية والزحمة قدامك الين تاصل واول ماتلبق وتدخل العمل تتصبح بخشة المدير
اللي يفاجئك ويقول لك ليه متعب نفسك وجاي وشوله العنا كان كلمتنا تلفون بس وحنا نوقع عنك ولا على الاقل نرسل لك المعاملات للبيت تشوفها لنا وترجعها مع سواق العمل وما يحتاج تتعب نفسك يابعدهم انت
.. اكيد ما قد صار لك كذا صح؟ ولا عمره راح يصير << لا عاد تكتب مقدمات تكفى
^
^
ترا هالكلام اللي فوق لا يمت للموضوع بصلة بس ماكان عندي مقدمة قلت خل اناظر خشة (طخ طيخ) في المسنجر يمكن تفتح نفسي، وهذي النتيجة للأسف
ايه قبل لا انسى ترا عنوان الموضوع زارفه من (مقلعه منذو مبطي) بس هي ما تدري اسكتو اووص
[line]
المهم قدر الله علي وماشيت لي ثلاث جحلط كل واحد علاقته بالصفات البشرية مثل علاقة جدتي بظاهرة الاحتباس الحراري
.. يعني كنت الوحيد اللي يعتبر آدمي بينهم .. هالخلف كان كل واحد منهم فتوة حارتهم وثلاثتهم يكرهون بعض ولا يجمع بينهم الا انهم شيون ومبزرة ومهايطية
وماينفع فيهم طب يعني عاقلهم يروح العمل بفنيلة علاقي
اولهم اسمه (
جلنط) وهذا عربجي وراعي تفحيط .. من انجازاته انه مهجد حارتين ويعرف يرفع غزالة بسيارته
.. يقولون انه يوم انولد طلع من بطن امه مظلل كاتم وحاط اسطبات كرسيدا مكان عيونه
وكان هالولد معجزة لدرجة انه ماكان له حبل سري ،، كان حاط شكمان مكان الحبل
.. ابوه من الفرح اول ما شافه بكى وقال بس هذا اللي بيرفع اسم عايلتنا .. طبعاً عايلتهم اسمها كلتش ..
الثاني (
سملقي) دلوع مرة بس مشكلته انه اثرم وهذي سببت له عقد نفسية وتوحد وامراض عصبية وصار خكري بس يزعل لا قالو له خكري
.. كان هالولد حرف السين يسمع به ، يعني انس يغني ولا يلقي قصيدة .. يقولون انه يوم ولد سوى بالغلط (بحث واستبدال) لحرف السين وقلبه ثاء ومن يومها ماعاد يعرف لهالحرف
.. عاد هذا مشكلة وجهه انه مثل الكيرم يعني شفت لا نثرت حبوب الكيرم اول اللعب .. هذا وجهه كن واحد ناثره .. العيون بجهة والخشم بجهة يالله لك الحمد
حتى يوم انولد جا معه كتيب ارشادات عشان مايغلط ويشم من اذانيه مثلاً
عاد اعقلهم اسمه (
صنيدح) بس انه احيان تطقه النفاضة اذا شغلوا له مزعل فرحان وبديّع مسعود .. وكان من كبر عقله له صندحتين وحدة براسه والثانية استبنه بشنطة السيارة
.. ومن الطرائف اللي نذكرها لصنيدح انه اذا سمع زيران يهنق .. ولا ينفع معه الا تسوي له ريستارت
.. ميزته الوحيدة انه يفت دق رقبة .. ويستنزل اذا سمع موسيقى يابلادي واصلي واحنا معاكي << وطني الخال
..
المهم في لحظة من اللحاظيظ تهور جلنط وسملقي وصنيدح وقرروا يكشتون بالبر ويحلون المشاكل اللي بينهم .. انا قايل لهم لا تطلعون مع بعض بس ما طاعوني .. المهم طلعوا من الصبح ومبسوطين الين جا وقت الغدا قال جلنط لسملقي: قم يا ورع صلح لنا الغدا
.. سملقي الاثرم زعل وقال اثتغل عند امك انا
ليه اثلح الغدا ورا ماتقول لثنيدح التكروني بدل ماهو قاعد يتأمل وينغف
.. طبعاً صنيدح طنقرت معه اجل مابقى الا هالخكري يتكلم عليه ويقوم بالزبيرية ويجدعها في وجه سملقي اللي سوا حركة ماتركس وحنى ظهره فـ جت الزبيرية بخشة جلنط
.. عاد تأزم الوضع وكانوا بيلعنون جدف بعض بس اللي فك بينهم "أهم الأنباء" في القناة الأولى بدا ومايقدرون يفوتونه
فاضطروا يتابعونه وهم مأتشين .. بعد ماخلص ضفوا عفشهم وكل واحد راح لحارته وهو حاقد على الثاني وقرروا انهم يبدون الحرب اللي سميت فيما بعد بـ:
~~~
حــرب الصنــادح ~~~
[line]
كان جلنط يعتبر نفسه اقوى واحد وبدا يجمع المهايطية اخوياه وقدر يلعن سنسفيل كم واحد واخذهم معه ومن اهم اللي انضموا لحزب جلنط كانو شاطف وبستم وابو مفكين
.. اما سملقي الاثرم محدن عطاه وجه بس انه في كم واحد رحموه وانضموا له يدورون الاجر واهمهم لؤي ورامي وأيمن
... خوينا صنيدح طب على اخوياه مرة وهم يخبتون ويستنزلون ولقط له كم واحد بعد ما نفضهم عشان يطلع كل الجن اللي بروسهم واهم اللي خطفهم بندق وابو جبهة ومخنفر
مع اندلاع الحرب قرر سملقي يرسل العيون وبنفس الوقت يجس النبض عند الحارات المعادية (مسوي خليل الزياني على غفلة
) نسيت اقول لكم ان سملقي يقولون عنه مثقف كروياً لأنه متصور مع حسين المسعري
.. ويحلف انه كان محترف بأرطاوي الرقاص وهو اول من سوى حركة رونالدينو يوم جاب هدف بالكعب
..المهم أرسل لؤي ورامي لحارة جلنط وأيمن لحارة صنيدح ... اول ما خش لؤي ورامي حارة جلنط استقبلوهم اخويا جلنط (شاطف وبستم وابومفكين) وقالو ويييين ياحلوين هي حارة بدون بواب
.. عاد لؤي ورامي يوم سمعوا كلمة (ياحلوين) صارت وجيههم كذا
ماتشوف الا غبرتهم .. الزم ما عليهم شرفهم
وبصراحة حارة جلنط ما تنومن يعني العاقل فيهم يقضم ويسرق اسطوانات غاز
.. في نفس الوقت كان أيمن يستكشف حارة صنيدح وتوزى ورا تنكة تمر عشان يشوف وش يسوون ووش استعدادتهم عاد الحارة كلها جن وطق طبول وسامري .. وانواع الاستنزال يشوفه قدامه .. قال ذولي شكلهم زلايب ماعندهم الا زفن ورقص خل اشوف صنيدح وش يسوي .. ويروح أيمن بكل خفة لم بيت صنيدح ويحصله فوق السطح يطير الحمام .. قام دخل الحوش ويلقى اسلحتهم وذخائرهم .. عشر نبيطات أصلية ام 3 مغاطات وعشرين دستة شروخ وشماغ جاهز للتلفيط وست اوراق من صندوق الجماعة (ابي افهم وش يبون يزينون فيها
)
في أثناء الحرب الباردة بين الحارات كان صنيدح يحاول يروع أعداءه .. مرة من المرارير أرسل لجلنط صينية فيها ذيل جربوع وقطو داعسته تريله .. وحط معها ورقة كاتب فيها "أدري انه مهوب قدركم بس الجود من الماجود"
.. عاد جلنط ملكع مايحتاج قال بخوفهم وابين لهم اننا عرابجة .. رجع لهم الصينية فاضية مافيها الا عظام وكاتب على ظهر الورقة حقتهم "أكرمكم الله"
ومرة صنيدح نفسه مسوي يستفز سملقي الاثرم راح ارسل له طقم اسنان تركيبة ،، عاد سملقي حقد قال ذا الخال مسوي عيار اوريه شغله راح ارسل له علبة مكياج وكريمات للبشرة الحساسة
وفي ليلة مافيها ضو قمر
.. كان سملقي ماشي بحارتهم وما درى الا اثنين خوال متلطمين ماسكينه وساحبينه عاد هو جلس يصيح ويقول مااامي وين موديني
.. قالوا له "في القسم حتعرف"
المشكلة هم سواء متلطمين ولا مهوب متلطمين ما فرقت يعني ماينشافون كنهم سوبر بالتشات حاطن "مخفي"
.. المهم طلعو هذولي بندق ومخنفر اخويا صنيدح ،، وشالوه في خيشة وودوه لصنيدح .. اول ماحطوه قدامه قال سملقي: مهيب الهقوة ياثنيدح
.. تغدر بي يالخال .. عاد صنيدح طقته ام العبيد وقال: اها على شحم يالخكا لا يكثر
.. انا جبتك هنا عشان اعرف اخرتها معك تبي تعقل زي الاوادم ولا اشوف شغلي معك .. قال سملقي: تهبى وانا اخو ثوثن
.. صنيدح مافهم قال وشو؟ عاد تفشل سملقي ورص على اسنانه يبي ينطق الاسم زين قال تهبى وانا اخو سوسن
.. قال صنيدح: سوسن ينخش ضروسك انشالله قل امين بالله هذا اسم تتعزوى به
انت العلاقة بينك وبين الرجولة مثل العلاقة بين أولدكنت ومايفير (ملاحظين انه توه لاعب مونوبولي
) اسمع الكلام اللي يجمد على شاربك .. بكرا انا ناويك وابي اتودس ببطنك قدام الله وخلقه واعلمك منهو صنيدح .. الوعد في الجرادية بتحصل جدار مكتوب عليه "آهات من طول العنا"
قال سملقي: ايه ردد ردد ياليل مطولك انت وخشمك اللي كنه يوم السبت
.. ماابي اتفرع بالسالفة واقول لكم ان الطفاية جت بجبهة سملقي
المهم وهو طالع لقى جلنط يويز عليهم ويتصنت وش يقولون صاح فيه واعيبااه يابو كلتش تتجسس
.. عاد انلخم جلنط ويقال له يرقعها قال: الرجال مايعيبه شي (فاهم المرجلة غلط يبو
) المهم جلنط عرف بالموضوع وجمع أدواته .. وكلن تلحف الثرى ونام استعداداً لليوم الموعود << ياشيخ تسمع بالاسلوب الأدبي
[line]
وبعد الطليعة في اليوم الموعود ما حضر احد لان الاتحاد السعودي اجل المباراة
.. بس مع اصرار جلنط وسملقي وصنيدح قرروا اقامتها على نفقتهم الخاصة وجابوا الكاس وجابوا صورة للشسمه
عشان يحسون انه النهائي حظي برعاية كريمة (وجه قافطينه المباحث
) .. وعاد كل واحد منهم يتفلسف ويقول ان مايهمنا الكاس وانما يكفينا الوصول للنهائي واهم شي الاخلاق
... حضر الأعداء وكل واحد معه اخوياه وأسلحته الخفيفة والثقيلة .. جلنط عنده واسطة بوزارة الدفاع اخوه يشتغل سكيوريتي وقدر يهرب له صاروخين روسيين بس انهن مايشتغلن (طراه ان كل صواريخنا من الحرب العالمية الثانية
)
ووسط الشمس اللهابة (صح كذا؟
اذا صح اقتبسوها ترا تعبت الين طلعت معي
).. ايه قلنا ووسط الشمس الملتهبة
والشرر يتطاير من عيونهم والعرق يتصبصب من افواههم << حشا بعارين
.. صفر الحكم إيذاناً ببدء المباراة
.. وعلى طول صنيدح ما صدق خبر شغل الفرقة حقته طبول وسامري واستنزل الخال ونزل كل السكن اللي براسه .. طلع بلاوي منه حتى خشمه طلع سكني انا اقول خشمه مهوب طبيعي العادة الناس خشمهم فتحتين هذا فتحتين وفتحة بالسقف
اما برطمه السفلي بلحاله طلع منه ست عفاريت
حتى يقولون انهم شايفين ابليس بكبره ناشبن بضرسه بس ماهوب اكيد
.. المهم يوم سملقي شاف الدعوة خربانة وارتاع
على طول انصرع بس شمموه ريحة اباط صنيدح وقام يردح
.. الحين شفت لو خذت شراريب محمد نور بعد مباراته قدام الهلال على طول وكبيت عليها شاهي معفن وبعدين ذبيتها ببيارة 4 شهور همن طلعتها وشميتها؟ هذي تعتبر بمثابة عطر BOSS عند ريحة آباط صنيدح
المهم ان سملقي بعد ما قام من الإغماءة راح استخدم اسلحته السرية .. وهي عبارة عن 4 صوارير و 3 تسلابة سلوقية و 6 فيران بزعمه يخوفهم
.. المشكلة اول ما فكهم انصرع هو مرة ثانية من الروعة
والمدرب على طول قال بدلوه ماينفع وكان هذا اول واخر تغيير اضطراري بالمباراة
عاد التقى جلنط وصنيدح وجهاً لوجه وصندحة لصندحة
.. وقام صنيدح يسوي حركات وصخة باصبعه زي الامريكيين
يبي يستفز العربجي جلنط اللي ماصدق خبر وعطاه ركبه على بطنه همن نط عليه نطة سنوكا وكسر العود حق الخال مثل حركة المحارب يوم يكسر الجيتار
.. بعدين ثبته على الحلبة بس طلع الحكم نصاب متعاون معهم (زي العادة
) ويقوم صنيدح يعطي جلنط قرموع على راسه خلاه يعض الارض .. وبعدين حط رجله فوقه في إهانة واضحة
.. طبعاً جلنط ما تحمل وقال يلعن ام اللي ما يوكلك تراب ياشحمة الزيت
.. صنيدح رد عليه قال انا شحمة الزيت يالسمرمدي ياحاشي دخنة
.. يوم ولعت بينهم مرة ثانية وقاموا على بعض وجو يترفسون ببطون بعض مادروا الا شرطة الجرادية محضرة عندهم .. ويطلع لهم ضابط بمقصين وتاج
(يلعن ام اللي علمك عسكرية ياشيخ
) ويمسكهم ويحذفهم بالسيارة ، عاد لقو مع جلنط اصبعين حشيش و3 اصابع اوادم
.. ولقو مع صنيدح 36 جني متخلفين بدون اقامات طلع متستر عليهم ومشغلهم في فرقته ..
المشكلة ان سملقي طلع منها براءة لأنه هو اللي مبلغ عليهم
~~~~ حــــرب الصنــــادح ~~~~
رد : ~~~~ حــــرب الصنــــادح ~~~~
أقبص لي خدوده 
بس ما أدري وش معنا أسمه أصلا كلهم مدري وش معنا أسمائهم ..!!
الوضع العادي
